CACEKIWEN LALAKAW 42
Tanektek ko Pakasoˈlin, Kaˈimeren ko Soˈlinay Kimad
Hapinangen a mipalifet ko masamaamaanay a demak. Kaˈimeren ko ngaˈayay a demak.—1 TISALONIKA 5:21.
RADIW 129 Fakecen ko Hatokel no Mita
KALIMLAAN NO LALAKAW *
1. Hano maoraten ko ˈalomanay tamdaw hani?
ANINI, pinaay efan a kasakapot no Kristokiyo o mihaydaan no Kawas ko pihakelongan no niyah sanay a miharateng. Mansa maorat ko ˈalomanay tamdaw, saan cangra milicay: “Toniya hekal cecayay aca ko matatodongay a pihakelongan han? Anca o mihaydaan no Kawas ko polong a pihakelongan han?” Malo Misawacayay Tamdaw ni Yihofa, pakasoˈlinay kita to o soˈlinay kimad ko sapasifanaˈ no niyah i tamdaw han? Pakasoˈlinay kita to mihaydaan ni Yihofa ko pakayraan no niyah a midoko Cingranan han? Sasamaan kita a pakasoˈlin toniya tosa a demak hani? Nengnengen ita ko wacay.
2. Hano tanektekay ko pakasoˈlin ni Pawlo to soˈlinay kimad? (1 Tisalonika 1:5)
2 Tanektekay ko pakasoˈlin no tarokos ci Pawlo to soˈlinay kimad. (ˈOsien ko 1 Tisalonika 1:5.) O mahaenay a pakasoˈlin cowa ko patelasay. Misongilaˈay cingra micekiw to sowal no Kawas, pakasoˈlin to ‘mikayatan no Kawas ko tamdaw mitilid to polong a Fangcalay Cudad.’ (2 Timoti 3:16) Mikitini Fangcalay Cudad mananamay ni Pawlo ko maanan hani? Makilimay ningra ko soˈlinay a wacay, misawacay to o mikiˈokan no Kawas a Misiya ci Yis, oniya wacay o padetengan no ˈaˈideman no Yutaya a mipawan. Onini a makaniway ˈaˈideman no pihakelongan mitaypiyaway ko niyah to Kawas sanay ko sowal, kawra midemakay to kaˈintelan no Kawas a demak. (Titus 1:16) Cowa ka lecad ci Pawlo cangranan, o Sowal no Kawas ko sapasifanaˈ ningra to tao, misaka dademakay ko niyah, eca ko kaolahan aca no niyah a Sowal no Kawas ko pakasoˈlinan.—Dmak 20:27.
3. Makilim ita ko polong a caˈof no salicay, ngaˈ ira ko tanektekay a pakasoˈlin han? (Nengnengen ko sapatongal lalakaw “ O Midemakan ni Yihofa ato Makapahay a Araaw—‘Caay ka Emin a Miˈosi.’”)
3 Harateng no romaroma tamdaw, o matatodongay a pihakelongan o ngangaˈay pacaˈof to polong a salicay, mahawpay ko cowa ka sowal no Fangcalay Cudad a salicay. O hatiniay a pilongoc o matatodongay han? Nengnengen ita ko tinakoan ni Pawlo. Palimoˈotay ci Pawlo to salikaka ‘hapinangen a mipalifet ko masamaamaanay a demak,’ kawra mihaiay cingra, adihayayho ko kafokilan ningra a demak. (1 Tisalonika 5:21) Sanay cingra: ‘Mimingay ko kafanaˈan ita a demak, malecaday o tano fodawan a dadingoan ko sapinengneng ita, o maapohay aca ko maˈaraway.’ (1 Korinto 13:9, 12) Malecaday ci Pawlo kitaanan cowa ka cipinang to kihcod a demak, kawra cipinangay cingra to pakayniay ci Yihofaan a taˈeneran a sifanaˈ, padamaay konini cingranan pakasoˈlin to soˈlinay a kimad.
4. (1) Sapitongalaw kita a pakasoˈlin to iraay ko soˈlinay a kimad no niyah, ngaˈay samaan ko demak hani? (2) Oniya lalakaw mamilengo to manan?
4 Sapitongalaw kita tanektek ko pakasoˈlin no niyah, pakasoˈlin to iraay ko soˈlinay a kimad no niyah, o cecay pakayraan i palinien to patirengan ni Yis a taadoan a midoko ato Misawacayay Tamdaw ni Yihofa a taadoan a midoko. Oniya lalakaw mamilengo, o soˈlinay Krisciyang o (1) mamihawad mitaˈong to samiyay, (2) mamikangodo to fangcalay ngangan ni Yihofa, (3) maolah to soˈlinay kimad, (4) fanekfek a masasiolah.
MISAWAD KITA MITAˈONG TO SAMIYAY
5. Pasifanaˈan ni Yis ko nisawawaan samaan ko pidoko to Kawas? Ngangaˈay kita samaan mitoor to sapasifanaˈ ningra a midemak?
5 Tangongolay ko olah ni Yis ci Yihofaan, ano itinito kakarayan anca i fafekang no sera i, misamacayay midoko to Kawas ci Yihofaan. (Luka 4:8) Pasifanaˈan ningra ko nisawawaan mihaen to demak, midoko cingra ato madimadiay a nisawawaan cowa pisaka dademak to samiyay. O ˈadingo ko tireng no Kawas, o misangaˈan no tamdaw a dafong caay ka ngaˈay patalahkal to ˈdil Ningra. (Isaya 46:5) Roma i, ngangaˈay kita patado to fangcalay tamdaw misangaˈ to samiyay ato pasayra i samiyay nangra a mitolon han? Itini 10 a Rikec saka tolo a limoˈot, sanay ko sowal ni Yihofa: ‘Aka pitoˈtoˈ to samiyay, aka pitodong to kakarayan, fafekang no sera lalomaˈ no nanom a maamaan dafong a misangaˈ. Aka pitaˈong to samiyay.’ (Kasadakan 20:4, 5) Pakaynien i makalimay sapilifokaw to pihayda no Kawas a tamdaw, ihkalay konini a sowal.
6. Anini, o maanan a pakayraan ko mitooran no Misawacayay Tamdaw ni Yihofa a midoko to Kawas?
6 Sowal no mikingkiway to likisi no hekal, o salakatay Krisciyang ci Yihofa aca ko midokoan sanay. Tinakoen, Likisi no Krisciyang a cudad (no Padaka) sanay, ano ira ko tamdaw pasowal itini pidokoan a kitiraan misaka dademak to samiyay, maedeng o mamapiliˈ ko salakatay a Krisciyang. Anini, malecaday ko Misawacayay Tamdaw ni Yihofa, cowa ko papasayra i “fangcalay tamdaw” anca sasing no coyoh a mitolon, cowa ko papasayra ci Yisan a mitolon. Roma i, cowa ko papasayra kita i tatafing a mitaˈong, anca midemak to midokoay to kitakit a kawing. Ano samaanto ko piroero no tamdaw kitaanan, misetek kita to falocoˈ mitoor to limoˈot ni Yis a midemak, sanay cingra: ‘Ka pidoko to Kawas iso ci Yihofaan.’—Matay 4:10.
7. Misawacayay Tamdaw ni Yihofa ato roma pihakelongan iraay ko manan kasasiromaan hani?
7 Anini, ˈalomanay tamdaw maolahay mitengil to idahiyay mikimad a ˈaˈideman no pihakelongan, pakidem ko pipatakaraw cangranan, pala samiyay a midoko cangranan. ˈAlomanay tamdaw tayraay i kiyokay noniya ˈaˈideman, micakay to cudad nangra, pakiyaho to adihayay payci pafeli cangranan anca midama to lekakawa nangra. O roma tamdaw pakasoˈlinay to sowal no ˈaˈideman malo soˈlinay kimad. Maˈaraw nangra koniya ˈaˈideman i, hato pakaˈarawayto ci Yisan a mahemek. Kawra soˈliˈlinay midoko ci Yihofaan a tamdaw caay ka pihakelong to romaroma tamdaw, soˈlin mikangodoay kita toniya mikeriday a tamdaw, kawra mamitoor to sapalimoˈot ni Yis midemak, sanay cingra: ‘Sahtoay o salikaka kamo.’ (Matay 23:8-10) O cecay tamdaw o ˈaˈideman no pihakelongan anca o ˈaˈideman no mirikecay, caay pala samiyay saan kita a mitaˈong cangranan, cowa ko mamidama to sasowalen ningra. Masafelitay, cowa ko noniya hekal kita, misatenokay i mikowanay a demak. Itini toniya pakayraan, caay ka lecad kita to adihayay kasakapot no Kristokiyo.—Yohani 18:36.
MIKANGODOAY KITA TO FANGCALAY NGANGAN NI YIHOFA
Harateng no soˈlinay Krisciyang ngaˈay padama to tao mafanaˈ ci Yihofaan tada o kalikoan (Nengnengen ko saka 8-10 fatac) *
8. Hano mafanaˈ kita, makalimay ci Yihofa paˈdil kita to ngangan Ningra, padamaho to tao mafanaˈ to ngangan Ningra?
8 Kinacecayay, sanay ko pitolon ni Yis: ‘Amaaw, nanay paˈdilen iso ko fangcalay ngangan Iso.’ Tano malecaday o kakeleng a ngiha ci Yihofa mikitini i kakarayan pacaˈof, mikiˈok to mamihaen ko demak Ningra. (Yohani 12:28) Itini fafekang no sera mitosil ci Yis i, misaˈicelay paˈdil to fangcalay ngangan no kakarayan Wama. (Yohani 17:26) Mihaenay miharateng ko soˈlinay Krisciyang, ngaˈay misaka dademak to fangcalay ngangan no Kawas hanaca padama to tao mafanaˈ toniya ngangan, o kalikoan konini.
9. Saka 1 hahekalan Krisciyang samanay ko demak, paihkal to mikangodoay to fangcalay ngangan no Kawas ko niyah?
9 Itini saka 1 hahekalan, caho ka halafin ko katomireng no kasakopang no Krisciyang i, midimokosay ci Yihofa to ˈalafang a tamdaw, ‘mikitini lalomaˈ nangra mipiliˈ to cecay ˈopo malo finawlan Ningra.’ (Dmak 15:14) Miharateng koniya Krisciyang, ngaˈay misaka dademak to ngangan no Kawas ato pasifanaˈ to tamdaw mafanaˈ toniya ngangan, o kalikoan a demak. Itini pitosilan ato mitilid to Fangcalay Cudad i, miceriday cangra misaka dademak to ngangan no Kawas *, misawacay to soˈliˈlinay o finawlan no Kawas cangra.—Dmak 2:14, 21.
10. Iraay ko maanan a wacay ngaˈay misawacay, o Misawacayay Tamdaw ni Yihofa soˈlinay o ilaenoay no ngangan ni Yihofa a finawlan?
10 O Misawacayay Tamdaw ni Yihofa o itiniay ilaeno no ngangan ni Yihofa a finawlan han? Nengnengen ko laenoay a wacay. Anini, ˈalomanay ˈaˈideman no pihakelongan mihalakaay saka ecaaw mafanaˈ ko tamdaw to iraay ko ngangan no Kawas. Romaroma tamdaw mikitini mihongyakan a Fangcalay Cudad mipadengay to ngangan no Kawas, roma tamdaw mikecengay to tamdaw itini kiyokay misaka dademak toniya ngangan. * Awaay ko sasowalen, edengan ko Misawacayay Tamdaw ni Yihofa ko soˈliˈlinay mikangodo to fangcalay ngangan ni Yihofa. Misarocoday kita to ˈicel misawacay ci Yihofaan, awaay ko roma a pihakelongan malecad kitaanan padama to tao mafanaˈ to fangcalay ngangan no Kawas. (Isaya 43:10-12) Roma i, mitepangan ita Faelohay Hekal Mihongyakan Fangcalay Cudad tosaay ok sepat patek efan ko adihay, o mipadengan no roma mihongyakan kasadakan no ngangan no Kawas, patikolan noniya mihongyakan misaka dademak ko ngangan no Kawas. Mitepangayho kita to mataˈlifay ko 1,000 sasowalen a cudad, oniya mitepangan marariday misaka dademak to Yihofa sanay a ngangan.
MAOLAHAY KITA TO SOˈLINAY KIMAD
11. Samaan mahapinang ita to maolahay to soˈlinay kimad ko salakatay a Krisciyang?
11 Maolahay ci Yis to pakayniay ci Yihofaan ato araaw Ningra a soˈlinay kimad. Cowa ko pitoor aca ningra to soˈlinay kimad maˈorip, misaˈicelayho a pasifanaˈ to tao mafanaˈ to soˈlinay kimad. (Yohani 18:37) O soˈliˈlinay mihakelong ci Yisan a tamdaw maolahay to soˈlinay kimad. (Yohani 4:23, 24) Soˈlinay i, panganganan no tarokos ci Pitiro ko pakasoˈlinan no Krisciyang o ‘lalan no soˈlinay kimad.’ (2 Pitiro 2:2) Maolahay to soˈlinay kimad ko salakatay a Krisciyang, mansa minaˈay to misafelitay to soˈlinay kimad a pihakelongan, nanaman no serangawan ato no tamdaw a harateng. (Kolosay 2:8) Malecaday, o aniniay Krisciyang misaˈicelay ‘mitoor to soˈlinay kimad ko waywayan,’ mikaˈimer to pihakelongan no niyah ato pakayraan maˈorip palecad to sowal no Kawas.—3 Yohani 3, 4.
12. Ano mahapinang no malohemay malitengay i congpo ko sasalofen a pinengneng, samaanay ko demak? Misamanay?
12 Caay ka pasowal ko Misawacayay Tamdaw ni Yihofa to masongilaˈay ko kafanaˈ no niyah to Fangcalay Cudad. Pakayni sapasifanaˈ ato limasmas no likakawa, latekay cowa ka tatodong ko pinengneng nangra to demak. Cowa ko kafahkaan konini, samanen sowal no Fangcalay Cudad o finawlan no Kawas misaaliay to toki palidlid saan mitongal to matatodongay a sifanaˈ. (Kolosay 1:9, 10) Palidlid sanay ci Yihofa padama to tamdaw cipinang to soˈlinay kimad, mihaenay o mamakahi kita mihadidi a mitala to pipatedi no soˈlinay kimad. (Taneng 4:18) Kawra, ano mahapinang no malohemay malitengay i congpo ko sasalofen a pinengneng i, tangsolay a midemak. Misalof ko adihayay kiyokay, o sapakaolahaw to ˈalomanay a mihakelongay. Kawra o pisalof no Misawacayay Tamdaw ni Yihofa, pakayniay sapitongalaw miingid to Kawas, pakayniayho sapitooraw to patirengan ni Yis a taadoan midoko to Kawas. (Yakop 4:4) Misalof kita to pinengneng, cowa ko pakayniay kafalic no pinengneng no hekal a tamdaw, ao pakayniay ka ihkal no kacipinang to Fangcalay Cudad. Soˈlinayto a maolah kita to soˈlinay kimad!—1 Tisalonika 2:3, 4.
FANEKFEKAY KITA A MASASIOLAH
13. O manan ko sakakaay a capeling no soˈlinay Krisciyang? Anini samaan kita mihapinang to iraay ko mahaenay a capeling no Misawacayay Tamdaw ni Yihofa?
13 Saka 1 hahekalan a Krisciyang paihkalay to adihayay makapahay a capeling, sakakaay i o ciolahay falocoˈ, sanay ci Yis: ‘Ano masasiolah kamo, wa mafanaˈ ko polong a tamdaw to nisawawaan ako kamo.’ (Yohani 13:34, 35) Anini Misawacayay Tamdaw ni Yihofa malecaday o paro no lomaˈ, makelecay masasiolahay, awaay ko roma lekakawa malecad kitaanan pakaremo to kasasiroma no kitakit, finacadan ato saˈaroan. O saˈopo ita ato taykay matomesay to soˈlinay a olah no salikaka. Onini patongalay to pakasoˈlin ita, o pakayraan ita a midoko o mihaydaan ni Yihofa.
14. Pakayni i Kolosay 3:12-14, ano fanekfek kita masasiolah o sasamaan ko pidemak?
14 Palimoˈotay ko Fangcalay Cudad kitaanan ‘ka fanekfek a masasiolah.’ (1 Pitiro 4:8) O cecay pakayraan i, makahi a misodod to tao, mihepol to dangoc no tao. Mamisaˈicel kita mikilim to toki, paihkal to hinapaladaˈay hinalafangay a harateng i polong a salikaka, mahawpay koya pakararaway kitaanan a tamdaw. (ˈOsien ko Kolosay 3:12-14.) O mahaenay a olah soˈlinayto o sakakaay a capeling no soˈlinay a Krisciyang.
‘CECAYAY ACA KO PIHAKELONGAN’
15. O taadoan ita midoko itini maanan pakayraan malecaday to saka 1 hahekalan a kasakopang no Krisciyang?
15 Anini, o taadoan ita midoko itini roma pakayraan malecaday to saka 1 hahekalan a kasakopang no Krisciyang. Tinakoen, itini likakawa a pakayraan, iraay ko malohemay malitengay ita, dama sikawdan ato milisoˈay to kasakopang a kantok. (Filipi 1:1; Titus 1:5) Roma i, malecad o saka 1 hahekalan a Krisciyang, midofdofay kita to pakayniay raramod, madadiˈiay ato no ˈirang a rikec no Kawas, midipotayho to kasakopang ho eca ka mafiyor no padetengay mararaw caay kakahi pasasiyor a tamdaw.—Dmak 15:28, 29; 1 Korinto 5:11-13; 6:9, 10; Hipray 13:4.
16. Mikitini Ifiso 4:4-6 mananam ita ko manan hani?
16 Sowal ni Yis, ˈalomanay sao mihakelongay cingranan a tamdaw cowa ko soˈlinay a nisawawaan ningra. (Matay 7:21-23) Paˈayaway ko Fangcalay Cudad itini salikoray a romiˈad, ˈalomanay tamdaw ‘o potal aca ko mangodoay.’ (2 Timoti 3:1, 5) Ihkalay ko sowal no Fangcalay Cudad, soˈliˈlinay haydaen no Kawas a pihakelongan ‘cecayay aca.’—ˈOsien ko Ifiso 4:4-6.
17. Anini o cima ko mihakelongay ci Yisan ato iraay ko edengan matatodongay a pihakelongan hani?
17 Anini, o cima ko edengan matatodongay a pihakelongan hani? Masowalayto ita ko adihayay a wacay, mifolfol to pidoko a taadoan ni Yis ato saka 1 hahekalan a Krisciyang. Cecayay aca ko caˈof, o Misawacayay Tamdaw ni Yihofa. Ngaˈay malo ilaenoay no ngangan ni Yihofa a finawlan, hanaca mafanaˈ to pakayraay Cingranan ato araaw Ningra a soˈlinay kimad, tada malikoay kita! Nanay padadotoc kita tanektek ko pakasoˈlin, kaˈimeren ko soˈlinay kimad.
RADIW 152 O ˈIcel, O Tokel Niyam Kiso, Tatiˈeren Kiso
^ 5段 Oniya lalakaw mamilengo to patirengan ni Yis a taadoan no matatodongay a pidoko, mamilengoho i salakatay a nisawawaan ningra samanay mitoor tonini a taadoan midoko to Kawas. Roma i, o lalakaw mamihadak to wacay, misawacay to mitooray ko Misawacayay Tamdaw ni Yihofa to malecaday a taadoan midoko to Kawas.
^ 9段 Nengnengen Mikecolay 2010 miheca, 7 folad, 1 romiˈad, saka 6 fiedac sapatongal lalakaw “Saka 1 Hahekalan a Krisciyang Misaka Dademakay to Ngangan no Kawas Hokira?.”
^ 10段 Tinakoen itini 2008 miheca, o saka 16 liyad a ˈaˈideman no pihakelongan ci Pento, itini pisikay to lisin no Tingsokiw, romadiw anca mitolon i, “cowa kangaˈay misaka dademak” to ngangan no Kawas sanay.
^ 63段 TATODONG NO COKA: O likakawa ni Yihofa 200 masasiroma ko mitepangan a Faelohay Hekal Mihongyakan, ngaˈay maˈosi no tamdaw kono wina sowal misaka dademakay to ngangan no Kawas a Fangcalay Cudad.
