1-2. (1) O faelohay mararamod hano mamitadiˈec ci Yihofaan? (ˈOlic 37:3, 4) (2) Onini a lalakaw mamilengo to maanan?

NOHATINI misadayay kiso mararamod han? Anca o faelohay mararamod kiso? Ano mahaenay, madeng makalimay kiso malacafay to kaolahan iso a tamdaw lipahak ko kaˈorip. Manaokaniw, o kaˈorip no mararamoday iraay ko pasangaray, macapiday ko pina kalimlaan a sasaˈosien. Sasamaan ko pisiˈayaw namo to sapalifet, samaan ko misaˈosian, o hahalafin ko pilingat to kaˈorip no raramod namo. Mitadiˈec kamo ci Yihofaan o cacitaneng ko misaˈosian, mamatongal ko tanektek no raramod namo, mamatongal ko lipahak namo. Kawra ano eca pisimsim kamo to harateng ni Yihofa, mamifekad ko pasangaray no raramod, papasangar kamo a lipahak.—ˈOsien ko ˈOlic 37:3, 4.

² Soˈliˈlin o faelohay mararamod ko misowalan nonini a lalakaw, kawra o salicay i lalomaˈ o mamasiˈayaw no mararamodayto a tamdaw. Mamilengo kita to ngaˈayay taˈarawan i Fangcalay Cudad, hanaca papadama kitanan misaka dademak to mananamay i kaˈorip no raramod. Minengnengho kita to nalifetan no papina mararamoday, minanam cangranan.

3-4. O faelohay mararamod mamisiˈayaw to maanan a sapalifet?

³ Pakalalokay ko roma tamdaw to faelohay mararamod mitoor to pinangan a kaˈorip. Tinakoen, mitokelay ko wama wina ato salawina kahenay a ciwawa cangra, miroero cangranan.  Roma widang ato paro no lomaˈ mikitini ngaˈayay a harateng palimoˈot cangranan micakay to lomaˈ, mitongal to adihayay a dafong.

⁴ Ano eca pinaˈon, o misaˈosian no faelohay mararamod papaira to sakacitadah. Sapatikolaw to tadah, kakoˈedaw ko toki no mararamoday a matayal, hato malowanto ko toki to notekedan picekiw, pakalomaˈay pidoko ato mitosil. Sapietanaw to adihayay payci anca ira ko katayalan, mamilawa cangra to saˈopo, telocto malahdaw ko adihayay toki matayal saki Yihofaan.

5. Mikitini nalifetan ni Kelawse aci Malisaan mananam iso ko maanan?

⁵ Adihayay tinakoan mitadtaday, micangacang to pakadafongay cowa paira to lipahak no tamdaw. Ci Kelawse aci Malisa iraay ko mahaenay nalifetan. * Tiya mararamod cangra i, saka sinowayaw no kaˈorip mieminay to toki a matayal, kawra cowa paira konini to soˈlinay karenec nangra. Sanay ci Kelawse: “Kadofahay kami i nodafongan, kawra itini pidoko ci Yihofaan awaay ko patosokan niyam. Sasifod sanay ko kaˈorip niyam, taˈangayay ko saroero.” Ano mahaenay kiso, aka matoled, nengnengen ko ngaˈayay taˈarawan no tao papadama tisowanan a mafalic. Dotoc nengnengen ita, o malo faˈinayay ngaˈay mikitini taˈarawan no Hongti ci Yihosafatan mananam ko maanan?

6. Misiˈayaw ko Hongti ci Yihosafat to pakidemay sapalifet i, samaanay misaka dademak to safalod no Taneng 3:5, 6 hani?

⁶ Malo faˈinayay, latekay pakayni karetengay ˈinorong taˈangayay ko saroero namo han? Ano mahaenay i, ngaˈayay todongen namo ko ngaˈayay taˈarawan ni Yihosafat. Malo Hongti no kitakit, mamidipot ci Yihosafat to polong no kitakit, samaan cingra mitamorong tonini karetengay ˈinorong hani? Misarocoday ci Yihosafat a midemak, mipaˈicel to sapiˈading i cowacowa no Yuta, misaˈopoayho to 116 efan a sofitay. (2 Rayray 17:12-19) Ikor, malifaay ni Yihosafat ko pakidemay sapalifet. O Amon tamdaw, Moap tamdaw ato Miuni a tamdaw makakapotay malo taˈangayay sofitay milood to Yuta kitakit, taˈangayay ko saroero cingranan ato paro no lomaˈ ato finawlan. (2 Rayray 20:1, 2) Samaanay ci Yihosafat a miremo hani? O demak ningra malecaday o sapalimoˈot no Taneng 3:5, 6. (ˈOsien.) Pasayraay cingra ci Yihofaan micangacang to sapadama, misaali to sapafeli ni Yihofa a ˈicel cingranan. Itini 2 Rayray 20:5-12 maˈoningay ko satolon ni Yihosafat, onini a satolon mahapinangay ita tada misapoeneray ci Yihosafat, tada mitadiˈecay to kakarayan sidaˈitay a Wama ci Yihofaan. Samaanay ci Yihofa pacaˈof to satolon ni Yihosafat hani?

7. Samaanay ci Yihofa pacaˈof to satolon ni Yihosafat?

⁷ Pakaynian ni Yihofa ci Yahaciilan a Lifi tamdaw pasowal ci Yihosafatan: ‘Ka tomireng i saaroˈan no niyah, minengneng sasamaan ci Yihofa milidong tamowanan.’  (2 Rayray 20:13-17) O mikiriwiˈay a pakayraan milood konini. Kawra cowa kono tamdaw a maharatengay konini, ao mikitiniay limoˈot ni Yihofa. Misarocoday ci Yihosafat mitadiˈec ci Yihofaan, mitooray a midemak. Mikerid cingra to finawlan misiˈayaw to ˈada i, o cima ko ikaˈayaway a tomireng hani? Cowa ko mapahatatanamay a sofitay, ao awaay ko lalosidan a romadiway. Cowa patoleden ni Yihofa ci Yihosafat, padamaan Ningra ci Yihosafat milowid to ˈada.—2 Rayray 20:18-23.

8. Mikitini ci Yihosafatan ngaˈay mananam no faˈinay ko maanan?

⁸ Malo faˈinayay, ngaˈay kamo minanam to ngaˈayay taˈarawan ni Yihosafat. Iraay ko ˈinorong namo midimokos ato midipot to paro no lomaˈ, misaˈicelay mihaen to demak. Tahalifa to pasangaray i, ngaˈay tano niyah a pakayraan miremo saan ko harateng namo, kawra aka mihaen ko harateng. Pasayra ci Yihofaan micangacang to sadama, malacafay to fafahi mikifalocoˈ a mitolon. Roma i, misongilaˈ micekiw to Fangcalay Cudad ato mitepangan no likakawa no Kawas a cudad, pasayra ci Yihofaan micangacang to sakayat, ato mitoor to mananamay a midemak. O roma tamdaw cowa ka pihayda to pakayniay i Fangcalay Cudad a misaˈosian namo alatek, hanaca maapaay kamo saan ko harateng, pasowalho tamowanan edengan ira ko payci ato dafong ngaˈ taˈangayay ko sadipot i paro no lomaˈ. Kawra aka mapawan to taˈarawan ni Yihosafat, mitadiˈecay cingra ci Yihofaan, pahecadho to demak. Cowa ka piliyas ci Yihofa tonini madimadiay a tamdaw, cowa ko mamiliyas Cingra tisowanan. (ˈOlic 37:28; Hipray 13:5) Mihaenay, sasamaan ko demak no mararamoday ngaˈ ira ko soˈlinay a lipahak hani?

9. Ci Isaya ato fafahi ningra patirengay to maanan ngaˈayay taˈarawan no mararamoday a tamdaw?

⁹ Ci Isaya ato fafahi ningra paisalakatan ci Yihofa i nokaˈorip. O pairasolay ci Isaya, o fafahi ningra iraay ko no niyah pairasolay a tayal, samanen panganganan cingra to ‘fafahiyan pairasolay.’ (Isaya 8:1-4) Ci Isaya ato fafahi misamacayay matayal saki Yihofaan, patirengay to ngaˈayay taˈarawan no mararamoday a tamdaw anini.

10. Micekiw to sapairasol no Fangcalay Cudad hano papadama to mararamoday misetek to falocoˈ misarocod matayal saki Yihofaan?

¹⁰ Anini o mararamoday a tamdaw ngaˈayay paisalakaten ci Yihofa i nokaˈorip, misarocod a matayal saki Cingranan. Malacafay ko mararamoday micekiw to sapairasol no Fangcalay Cudad, mihapinang to malaˈosiay ko sapairasol, o papaˈicel to pakasoˈlin ci Yihofaan. * (Titus 1:2) Ngangaˈay cangra miharateng sasamaan ko niyah mihadak to ˈicel palaˈosi to pina sapairasol no Fangcalay Cudad. Tinakoen, paˈayaway ci Yis o ngaˈayay lihaf no Hongti Kitakit itini ˈayaw no saikoray romiˈad mapatenak i paro no kakarayan, ngaˈay cangra misaˈicel a mitosil, micowat to sakalaˈosi nonini a sapairasol. (Matay 24:14) Ano pakasoˈlin cangra to mamalaˈosi ko sapairasol no Fangcalay Cudad, mamatongal ko pisarocod matayal saki Yihofaan.

11. Tahalifa to taˈangayay a kafalic i, ci Priskila aci Akuila kamayan midemakay to maanan?

¹¹ O kaemangay a mararamoday ngaˈay minanam ci Priskilaan aci Akuilaan. Onini  a mararamoday o Yutaya tamdaw, itiniay i Loma, ikor no tahatengil to ngaˈayay lihaf ni Yis malo Krisciyangay. Madeng marenecay cangra to kaˈorip itiya, kawra ikor palimoˈotay ko Hongti ci Krautius papiliyas to Yutaya tamdaw i Loma. Pakayni ci Priskilaan aci Akuilaan samanay ko pifiyor to kaˈorip nangra hani? Mamalinah cangra, miliyas to kananaman a kitiraan, miliyawho itini faelohay a pala misatapang to misangaˈay to kopang a singdi. Onini taˈangayay a kafalic micongeday cangranan ecato isalakat micangacang to Hongti Kitakit no Kawas han? Mafanaˈay kiso to caˈof alatek. Ikor no malinah cangra i Korinto i, malacafayay to tarokos ci Pawloan a matayal, pakalalok to itiraay a salikaka. Ikor, malinahayho cangra tayra misaaliay to mitosilay a pala matayal. (Dmak 18:18-21; Loma 16:3-5) ˈIfowaay ko kaˈorip nangra, tada lipahakay!

12. O mararamoday hano mamalacafay misaˈosi to patosokan matayal saki Yihofaan?

¹² Anini, ngaˈay kita mitodong ci Priskila aci Akuila i salakat micangacang to Hongti Kitakit no Kawas. Itini makakaolahho malalengo to patosokan no kaˈorip no niyah, malalengo tatosa sasamaan misaˈicel malaˈosi toniya patosokan matayal saki Yihofaan, wa adihay ko toki maˈaraw to misaka dademak ko fangcalay saocor ni Yihofa i kaˈorip nangra. (Patnakay 4:9, 12) Nengnengen ko nalifetan ni Lasaye aci Ilisapay. Sanay ci Lasaye: “Itini makakaolah a tatokian i, ihkalay malalengo kami to sasamaan matayal saki Yihofaan.” Sanay ci Ilisapay: “Samanen maharekayto malalengo, mansa misaˈosi kami to masakenaay a sasaˈosien i, cowa ka papicara to salakatay a patosokan niyam to mipiliˈan no niyah.” Ikor, ci Lasaye aci Ilisapay malinahay tayra i Mikelonisiya, itini misaaliay to mitosilay a kilac matayal.

13. Mikitini ˈOlic 28:7, mitadiˈec ci Yihofaan pairaay to maanan a ngaˈayay minaroˈan?

¹³ ˈAlomany mararamoday malecaday ci Lasayean aci Ilisapayan, saka iraaw no adihayay a toki mirienang to mitosilay pasifanaˈ to tamdaw a tayal, misaˈicel kantang ko kaˈorip. O mararamoday malacafay misaˈosi to patosokan matayal saki Yihofaan ato misaˈicel milaˈosi toniya patosokan, pairaay to  makapahay a minaroˈan. Mamatinako to midimokos ci Yihofa cangranan, mamatongal ko pakasoˈlin a falocoˈ ci Yihofaan, mamalifokho ko soˈlinay a lipahak.—ˈOsien ko ˈOlic 28:7.

14. Hano mafanaˈ kita to pakasoˈlinay ci Pitiro ato fafahi ningra to sakiˈok i Matay 6:25, 31-34?

¹⁴ O tarokos ci Pitiro ato fafahi ningra patirengay to ngaˈayay a taˈarawan no mararamoday a tamdaw. Mafanaˈ ci Pitiro ci Yisan maedeng kalitosa tangasa cecay miheca a tatokian, o mamisaˈosi to kalimlaan a sasaˈosien. Nao mifotingay ko tayal ni Pitiro midimokos to paro no lomaˈ, kawra mitahidang ci Yis ci Pitiroan mihakelong cingranan i, mamisimsim ci Pitiro sasamaan midimokos to paro no lomaˈ. (Luka 5:1-11) Ikor, misaˈosiay ci Pitiro mihawad to mifotingay a tayal, kalacafay ci Yisan tayra icowacowa pala mitosil. Oniya saˈosi tada citanengay, iraay ko lalangian ita pakasoˈlin to midamaay ko fafahi ni Pitiro cingranan. Mikitini Fangcalay Cudad mahapinang ita, ikor no patikol maˈorip ci Yis, na kalacafayay ko fafahi ni Pitiro tayra i caka lecad a pala matayal. (1 Korinto 9:5) Awaay ko hasasa, tada ngaˈayay ko fafahi ni Pitiro, mansa ngaˈay mihadak to sapaini i mararamoday a Krisciyang. (1 Pitiro 3:1-7) Mikiˈokay ci Yihofa, salakatay micangacang to Hongti Kitakit a tamdaw mamicada to sadimokos Ningra. Ci Pitiro ato fafahi ningra ihkalay mahapinang pakasoˈlinay tonini a sakiˈok.—ˈOsien ko Matay 6:25, 31-34.

15. Mikitini nalifetan ni Tiyake aci Ayste mananam iso ko maanan?

¹⁵ Ano halafinay to kiso mararamod, sasamaan mitongal to kalim matayal saki Yihofaan hani? O cecay pakayraan i minengneng to nalifetan no roma mararamoday. Tinakoen, ngaˈay kiso miˈosi to “Makalimay Cangra Mikinafalah” a madadoedoay a lalakaw. Itiniay Pracil mihaenay ko demak ni Tiyake aci Ayste. Miˈosi toniya lalakaw patongalay to kalim nangra tayra i misaaliay to mitosilay a kilac. Sanay ci Tiyake: “Maˈaraway niyam samanay ci Yihofa padama tonini a salikaka, makalimay sapitinakoaw to sakayat ato sadimokos ni Yihofa.” Ikor malinahay cangra tayra i Parakoy, mikitini 2014 miheca padadotocay matayal i Putawya ko sowal a kilac. Sanay ci Ayste: “Maolahay kami to sowal i Ifiso 3:20. Itini matayal saki Yihofaan i, misaliyaliyaway kami mitinako tonini a sowal tada soˈlinayto.” Itini sinael mikiˈokay ci Pawlo, o sapafeli ni Yihofa mamataˈlif ko micangacangan ita. Cowa ka lakisaw konini a sakiˈok!

16. Ano misimsim ko kaemangay a mararamoday to patosokan no niyah i, ngaˈay mitengil to sapaini no nima hani?

¹⁶ O kaemangay a mararamoday ngaˈayay pasayra i kadofahay ko nalifetan a mararamoday minanam, oniya mararamoday mafanaˈayto mitadiˈec ci Yihofaan, o roma pinaayto polo miheca miemin to toki misakafah. Ano miliyaway kiso misimsim to patosokan no niyah, ngaˈayay mitengil to sapaini nangra, o mitadiˈecay ci Yihofaan a pakayraan konini. (Taneng 22:17, 19) Roma i, o malohemay malitengay ngaˈay padama to kaemangay a mararamoday patireng to matatodongay ato mamalaˈosi a patosokan.

17. Ci Kelawse aci Malisa iraay ko maanan a nalifetan? Mikitini cangranan mananam ita ko maanan?

¹⁷ Latekay misaˈosi kita tano maanan a  pakayraan mitongal to tayal saki Yihofaan, kawra o mifekaday a demak cowa ka lecad to mitokelan no mita alatek. Fafekangay masowalay ci Kelawse aci Malisa mararamod to tolo miheca ikor malinahay tayra i fenpo no Fenlan mirienang to patirengay a tayal, kawra mahapinangay ko niyah edeng enem aca folad materek itira. Salakat tada matoleday cangra, kawra caka halafin matahidangay cangra mirienang to sowal no Arapiya a pihatatanam. Nohatini, itiniay i roma kitakit sowal no Arapiya a kilac lipahakay matayal saki Yihofaan. Mitikol miharateng ci Malisa to isaˈayaw a nalifetan sanay: “Ka misarocod mitadiˈec ci Yihofaan, mitanam to cowaho ka demaken isaˈayaw a demak, soˈlinay o katalawan. Kawra matinakoay ako ci Yihofa tano cowa ka harateng masakenaay a pakayraan padama kitaanan. Tahalifet to hatiniay demak ikor, o pakasoˈlin ci Yihofaan ikakaay ko tanektek to saˈayaway.” O nalifetan nangra mitadtaday, ano misarocod kita mitadiˈec ci Yihofaan, papalifonen ni Yihofa kita.

18. O mararamoday tatosa sasamaan ko demak ngaˈay padotoc mitadiˈec ci Yihofaan?

¹⁸ O raramod mikitiniay ci Yihofaan a sapatelong. (Matay 19:5, 6) Makalimay Cingra milayap ko mararamoday tonini a sapatelong. (Taneng 5:18) O kaemangay a mararamoday, mamisongilaˈ miharateng to pakayraan namo maˈorip, misarocoday kamo misawacay to tada misalimlaay ko niyah minengneng to kihcod sapafeli ni Yihofa tamowanan hokira? Pasayra ci Yihofaan mitolon, micekiw to Fangcalay Cudad, mikilim to matatodongay tamowanan a safalod no Fangcalay Cudad, dotoc mitoor to sapafeli ni Yihofa a sakayat midemak. Kamo mararamoday malacafay misarocod matayal saki Yihofaan, o lalipahak a marenec ko kaˈorip!