1. Maharateng ko mamasiˈayaw a sapalifet noikor, cacalemcem kita to maanan hani?

CAKA halafin noikor mamifekad ko adihayay demak, tinakoen mamalaˈafo ko mararaway pihakelongan, o Makok a Kok mamifekad to saˈodis, mamifekad ko Armakiton. Maharateng konini a demak calemcemay kiso han? Saan kiso miharateng alatek: ‘Ano mifekad konini katalawan a demak i, wa ngaˈay kita mitafo to madimadi i Kawas han?’ Ano iraay ko mahaenay a cariraw iso, haratengen ko lalangian a sinael tataˈangay ko sapadama, sanay ko sowal ni Yis to nisawawaan: ‘Pakasoˈlinen ko Kawas, pakasoˈlinho takowanan.’ (Yohani 14:1) O tanektekay a pakasoˈlin papadama kitanan timolo misiˈayaw to sapalifet noikor.

2. (1) Sasamaan kita paˈicel to pakasoˈlin no niyah? (2) Onini lalakaw mamilengo to maanan hani?

² Paˈicel kita to pakasoˈlin no niyah anini, ngangaˈayto misaday misiˈayaw to sapalifet noikor. Ngangaˈay kita miharateng to niyah ano tahasiˈayaw to sapalifet samanay ko piharateng. Mihaen ko demak ita mamahapinang o maanan ko papaˈicelen no pakasoˈlin no niyah. Ano maremo ita ko cecay sapalifet, matongalay ko tanektek no pakasoˈlin, mihaen o tatimolo to kita misiˈayaw to noikoran. Onini lalakaw mamilengo, o nisawawaan ni Yis itini maanan sepat pakayraan misaaliay to taˈangayay pakasoˈlin. Minengnengho kita, ano malifa ita ko malecaday a sapalifet sasamaan ko demak, talaˈayaw misaday to taˈangayay sapalifet noikor.

3. Mikitini Matay 6:30, 33, sowal ni Yis o papakasoˈlin kita to maanan?

³ O tawki no lomaˈ makalimay mirenec to sakaˈorip no fafahi ato wawa, kawra itini pasangaray a lintad, mihaen to demak cowa ko madoloay. Malahdaw ko katayalan no roma salikaka pasangaray mahela ko faelohay katayalan, o roma salikaka  manaˈayay to cowa ka tatodong to Krisciyang a tayal. Itini mahaenay a pakayraan, misaaliay kita to tanektekay a pakasoˈlin, pakasoˈlin to papadama ci Yihofa kitaanan midimokos to paro no lomaˈ. Ihkalay ko sowal ni Yis to nisawawaan itini Pasifanaˈ i Lotok. (ˈOsien ko Matay 6:30, 33.) Ano pakasoˈlin kita cowa ko papakiyadi saan ci Yihofa kitanan, ngangaˈayto kita misamacay matayal saki Cingranan. Mahapinang ita samanay ci Yihofa midimokos to nodafongan a saali ita, mamatongal ko piingid Cingranan, matongalho ko tanektek no pakasoˈlin.

4-5. O maanan ko padamaay to paro no lomaˈ ni Kastelo misiˈayaw to cariraw no kaˈorip?

⁴ Nengnengen ita, itiniay Winirira paro no lomaˈ ni Kastelo misiˈayaw to cariraw samaanay tahatanam to sapadama ni Yihofa. Isaˈayaw iraay ko kaeminay a omah nangra, ngaˈayay ko kaˈorip, kawra ikor maˈafasay no mariˈangay a tamdaw ko omah nangra, milaplapay cangranan. O wama ci Mikee sanay: “Nohatini itini sanay micaliwan kaemingay a omah, paloma to miming a kakaenen, onini sanay ko sakaˈorip. To romiˈamiˈad paceremay kako micangacang ci Yihofaan pafeli to kakaenen toya romiˈad.” Pasangaray ko kaˈorip no paro no lomaˈ ni Kastelo, kawra pakasoˈlinay cangra to sidaˈitay kakarayan a Wama iraay ko ˈicel mirenec to sakaˈorip nangra to romiˈamiˈad, mansa padotocay mirienang to saˈopo, micerid mitosil. Salakatay cangra micangacang to Hongti Kitakit, soˈlinay pafeli ci Yihofa to kihcod a saali nangra.

⁵ Itini pasangaray lintad, ci Mikee ato fafahi ci Yiwli padotocay misinanot samanay ci Yihofa midimokos cangranan. Latekay, pakaynian ni Yihofa i salikaka pafeli cangranan to dafong, anca mipadang ci Mikeean mikilim to matatodongay a katayalan. Latekay, pakaynian ni Yihofa i Fenpo pafeli cangranan to kacalohan a dafong. Caay pisawad ci Yihofa cangranan, telocto matongalay ko tanektek no pakasoˈlin no paro no lomaˈ nangra. Milengo ko taˈangayay fafahiyan wawa ci Yoselin to samanay ci Yihofa padama cangranan a nalifetan sanay: “Mahapinangay ko pipadama ni Yihofa to paro no lomaˈ niyam, tada mitemeray to falocoˈ niyam. O ngaˈayay tadiˈecen i hakelong no kaˈorip ako a widang Cingra. O malifaay no paro no lomaˈ niyam a sapalifet padamaay tamiyanan, misaday misiˈayaw to taˈangayay sapalifet noikor.”

6. Misiˈayaw to pasangar no sakaˈorip i, sasamaan kiso paˈicel to pakasoˈlin?

⁶ Cangoˈotay ko sakaˈorip iso han? Ano mahaenay i, cowa ko madoloay. Kawra, ngaˈayho kiso misaka dademak toniya toki patanektek to pakasoˈlin no niyah. Mikifalocoˈ mitolon ci Yihofaan, micekiwho ato midotim to sowal ni Yis i Matay 6:25-34. Ngaˈayho kiso minengneng to nalifetan no salikaka, miharateng ˈifowa cangra to tayal ni Yihofa, samanan ni Yihofa midimokos ko kaˈorip nangra. (1 Korinto 15:58) Mihaen matongal ko pakasoˈlin iso, ano midimokosan ni Yihofa ko sakaˈorip no salikaka, o mamidimokos tisowanan. Mafanaˈay Cingra to saali iso, mafanaˈayho sasamaan  mirenec to saali iso. Ano soˈlin matinako iso ko pipadama ni Yihofa, mamatongal ko tanektek no pakasoˈlin, noikor ngangaˈay mihadidi to pakidemay a sapalifet.—Hapakuk 3:17, 18.

7. Mikitini Matay 8:23-26, o pakasoˈlin no nisawawaan tahalifaay to maanan a sapalifet?

⁷ Kinacecayay, tahalifaay ci Yis ato nisawawaan to faliyos i riyar, misaka dademakan ni Yis konini a toki padama to nisawawaan mihapinang itini maanan a pakayraan papaˈicel cangra to pakasoˈlin. (ˈOsien ko Matay 8:23-26.) Itiya taˈangayay ko faliyos i riyar, micomoday i tamina ko tapelik, kawra maeholay ko fotiˈ ni Yis. Rawraw sanay ko nisawawaan, mipalalay ci Yisan paˈorip cangranan. Damsayay ci Yis somowal to pasangaray nangra, saan: ‘Cangoˈotay ko pakasoˈlin a tamdaw, hano matalaw kamo hani?’ Soˈlin macalohay itiya, kawra mamafanaˈ koniya nisawawaan dadipoten ni Yihofa ci Yis ato itihiay ningra a tamdaw eca ka madokaˈ. Mananamay iso ko maanan hani? Ano samaanto ko malifaay “soˈlinay a faliyos,” anca sano faliyosay a sapalifet, ano tanektek ko pakasoˈlin wa ngaˈay malaˈosi ko pisiˈayaw.

8-9. O pakasoˈlin ni Anie tahalifaay to manan a sapalifet? O maanan ko padamaay cingranan misiˈayaw to sapalifet?

⁸ Nengnengen ita ko nalifetan no cowa ka ciramod fafahiyan salikaka i Potolike. Onini a salikaka ci Anie, ikor no tahalifa cingra to pakidemay sapalifet matongalay ko ˈicel no pakasoˈlin. 2017 miheca, tahalifaay ci Anie to “soˈlinay a faliyos.” O Mariya a faliyos mipalakay to lomaˈ ningra, pakayni toniya pades malahdaway ko tayal ningra. Sanay ci Anie: “Toya tatokian tada cariraway kako. Kawra mananamay ako mitadiˈec ci Yihofaan, padadotoc mitolon Cingraanan, mansa cowa ka tapiˈ no cariraw.”

⁹ Masowalayho ni Anie ko roma a lalangian padama cingranan malaˈosi misiˈayaw to sapalifet, o midofdofay. Sanay cingra: “Midofdof to sakayat no likakawa ni Yihofa padamaay takowanan mitafo to rihadayay, mahapinangay ako pakaynian ni Yihofa i salikaka pafeli to adihayay a sapakalalok, pafeliayho to misaalian ako a dafong. O sapafeli ni Yihofa takowanan mataˈlifay to micangacangan ako, taˈangayay ko pipaˈicel to pakasoˈlin ako.”

10. Ano misiˈayaway kiso to “faliyos,” sasamaan ko hademak?

¹⁰ Misiˈayaway kiso to “faliyos” han? Malifa iso ko pades anca sano faliyosay a sapalifet, tinakoen pakidem ko adada no tireng, telocto taˈangayay ko saroero, fokil sato a midemak. Latekay tada macariraway kiso, kawra aka matapiˈ no cariraw, telocto malahdaw ko pakasoˈlin ci Yihofaan. Ka padotoc miingid Cingranan, mikifalocoˈ mitolon Cingranan, songilaˈen miharateng samanay ci Yihofa padadotoc midimokos tisowanan. (ˈOlic 77:11, 12) Ngaˈay pakasoˈlin kiso, ano aninito anca noikorto, cowa ko mamifalah ci Yihofa tisowanan.

11. Hano mamisetek to falocoˈ midofdof to mikeriday a salikaka?

¹¹ Iraay ko maanan ngaˈay padama tisowanan  misiˈayaw to sapalifet hani? Malecad misowalan ni Anie, kalimlaan ko midofdofay. Minanam pakasoˈlin to pakasoˈlinan ni Yihofa aci Yis a tamdaw. Latekay o sakayat no mikeriday a salikaka awaay ko pinang ita, kawra ano midofdof kita, papalemed ci Yihofa kitaanan. Ngaˈay kita mikitini Fangcalay Cudad ato nalifetan no madimadiay sikawdan no Kawas a minanam, o midofdofay ngaˈayay milidong to ˈorip no tamdaw. (Kasadakan 14:1-4; 2 Rayray 20:17) Misongilaˈ kita midotim tonini a demak ngaˈay to misetek to falocoˈ, ano aninito anca noikoran mamidofdof to sakayat no likakawa ni Yihofa. (Hipray 13:17) Mihaen, cowa ko mamatalaw kiso to aira a taˈangayay a ‘faliyos,’ oya taˈangayay a padiing.—Taneng 3:25.

12. Mikitini Luka 18:1-8, o pakasoˈlin hano ngaˈay padama kitanan misiˈayaw to cowa ka sadafdaf a demak?

¹² Mafanaˈay ci Yis, micada ko nisawawaan to cowa ka sadafdaf a demak o papalifet to pakasoˈlin nangra, mansa somowal cingra to maˈoningay i Luka a sapatinako. O cecay maponengay fafahiyan padotocay micangacang to cowa ka moecel a misawkitay patado cingranan masadafdaf ko pisawkit, pakasoˈlinay cingra ano padadotoc eca pisawad ko niyah, o papadama koya misawkitay cingranan. Salikor, mihaiyay koya misawkitay to saali ningra. Mananam ita ko maanan hani? O masadafdafay ci Yihofa, mansa somowal ci Yis: ‘Oya mipiliˈan Ningra a tamdaw saromiˈamiˈad saan micangacang Cingranan, coko papatado Cingra cangranan masadafdaf ko pisawkit han?’ (ˈOsien ko Luka 18:1-8.) Sanayho ko sowal ni Yis: ‘Ano ira ko wawa no tamdaw i, itini fafekang no sera mamahela ko mahaenay a pakasoˈlin han?’ Ano tahalifa kita to cowa ka sadafdaf i, pahecaden toya maponengay ira ko tanektekay a pakasoˈlin, padadotoc mihadidi, tanektek eca pisawad. Ira ko mahaenay pakasoˈlin ita, ngaˈayto pakasoˈlin to papatado ci Yihofa kitaanan masadafdaf ko pisawkit. Pakasoˈlinho kita to ˈicel no satolon, latekay o satolon ita pairaay to kafahkaan a minaroˈan.

13. Tahalifa to katalawan ko cecay paro no lomaˈ i, o satolon samaanay padama cangranan?

¹³ Nengnengen ko nalifetan no fafahiyan salikaka ci Wilo itini Kangko a kitakit. O kitiraan ningra mifekaday ko lalood, mapacieciay cingra ato cowa pihakelong a faˈinay miˈorong to 15 ko mihecaan fafahiyan a wawa milaliw to pades. Itini lalan, miˈetengan no sofitay cangra, pasowal to mamipatay cangranan. Tomangicay ci Wilo, sapihinomaw ko fafahiyan wawa ningra cingranan, sataˈangay saan ko ngiha mitolon, itini satolon kinapinaay masowal ko ngangan ni Yihofa. Maharek mitolon cingra i, milicayay ko cecay tapang cingranan: “Kaemangay a wawa, cima ko pasifanaˈay tisowanan mitolon?” Pacaˈof cingra: “O wina ako. Saka dademakan ningra ko sowal i Matay 6:9-13 pasifanaˈ takowanan mitolon.” Sanay koya tapang: “Kaemangay a wawa, rihaday mihakelong to wama wina iso a miliyas. Nanay dipoten no Kawas namo ci Yihofa kamo.”

14. (1) O maanan a pakayraan ko papalifet to pakasoˈlin no mita? (2) O maanan ko papadama kitaanan mitafo to mihadidiay?

 ¹⁴ O mahaenay a nalifetan mitadtaday, aka pisakahmaw kita to epoc no satolon. Ano cowa ka tangsol ci Yihofa anca tano kafahkaan a pakayraan pacaˈof to satolon ita, sasamaan to hani? Papalecaden ita toya sapatinakoay ni Yis a maponengay padadotoc eca pisawad a mitolon, pakasoˈlin cowa ko fafalahen ni Yihofa kita, hanaca itini matatodongay a tatokian tano cecay a pakayraan pacaˈof to satolon. Papadotocho kita micangacang ci Yihofaan pafeli to fangcalay saocor kitaanan. (Filipi 4:13) Haharatengen ita, cato ka halafin papafeli ci Yihofa kitaanan to kadofahay a sapalemed, ho mapawan ita ko macadaay a roray i salakat. Mitadiˈec kita to sapadama ni Yihofa mitafo to mihadidiay, matongal ko tanektek no pakasoˈlin, ngaˈay ko pisaday misiˈayawto sapalifet noikor.—1 Pitiro 1:6, 7.

15. Mikitini Matay 17:19, 20, o nisawawaan ni Yis tahalifaay to maanan a pasangaray?

¹⁵ Pasowalay ci Yis to nisawawaan, o pakasoˈlin ngaˈay padama cangranan miremo to masakenaay a sacara. (ˈOsien ko Matay 17:19, 20.) O nisawawaan ni Yis soˈlin na kinapinaay milaplap to tatiihay coyoh, kawra kinacecayay pasokiyaway cangra. Misamanay hani? Sowal ni Yis cangoˈotay ko pakasoˈlin nangra. Ano maedeng ko ˈicel no pakasoˈlin nangra, soˈlin malecad o lotok ko taˈangay no pasangaray, wa ngaˈay a maremo. Anini, o mamalifa ita ko sano lotokay a sacara alatek. Nengnengen ita ko cecay tinakoan.

16. Ikor no patayen no tamdaw ko faˈinay ni Kayti, o pakasoˈlin samanay padama cingranan miremo to kasomad no falocoˈ?

¹⁶ O cecay fafahiyan salikaka ci Kayti, itiniay i Kowatimala. Cecay romiˈad maharek ko saˈopo, itini lalan no pinokayan o faˈinay ni Kayti ci Ayti mipatayan no tamdaw. O pakasoˈlin samanay padama ci Kaytian miremo to kasomadan hani? Sanay cingra: “Pakaynian ako i satolon mihepol to karetengay ˈinorong pafeli ci Yihofaan, mansa ngaˈay mitafo to rihadayay. Mahapinangay ako pakaynian ni Yihofa i paro no lomaˈ ako ato kasakopangay a salikaka midimokos takowanan. Misaˈicelay kako mitongalay to tayal saki Yihofaan, milowanay konini to adada no falocoˈ, padamaayho takowanan eca ka pakidem ko cariraw to nociraan. Mikitini tonini nalifetan mananamay ako, ano o maananto ko mamasiˈayaw noikor a sapalifet, ano iraay ko sapadama ni Yihofa, ni Yis ato likakawa no Kawas, o mamadangar ako a maemin.”

17. Misiˈayaw to sano lotokay a sacara, sasamaan ko demak ita?

¹⁷ Pakayni kapatay no salawina ato ngaˈayay widang masomaday kiso han? Songilaˈen micekiw ko pakayniay patikol maˈorip a maˈoningay i Fangcalay Cudad, paˈicel to pakasoˈlin no niyah to patikol maˈorip ko mapatayay. Ano mafalah ko paro no lomaˈ adadaay ko falocoˈ iso han? Songilaˈen micekiw, padama to niyah pakasoˈlin o sapirikec ni Yihofa sahtoay o ngaˈayay. Ano  o maananto ko malifaay iso a pasangaray, o ngaˈayay a toki patanektek to pakasoˈlin han ko pinengneng. Ngaˈay kiso itini satolon ihkal ko pihadak to nafalocoˈan no niyah, aka a misiwatid ko niyah, ka padotoc a micawmaˈ to salikaka. (Taneng 18:1) Soˈlin maharateng iso ko salakatay a demak masomaday a tomangic, padadotocenho midemak ko papadama tisowanan mitafo to mihadidiay a demak. (ˈOlic 126:5, 6) Ka padotoc mirienang to saˈopo ato mitosil, micekiwho to Fangcalay Cudad, miceridho miharateng to sapafeli ni Yihofa tisowanan a makapahay a noikoran. Ano mahapinang iso padotocay padama ci Yihofa tisowanan, mamatongal ko tanektek no pakasoˈlin.

18. Ano mahapinang iso cangoˈotay ko pakasoˈlin no niyah, sasamaan ko pidemak?

¹⁸ O masiˈayaway iso i salakat ato aniniay a sapalifet ano mahapinangay iso cangoˈotay ko pakasoˈlin no niyah, aka matoled, o ngaˈayay a toki patanektek to pakasoˈlin han ko pinengneng. Na micangacangay ko tarokos ci Yisan saan: ‘Nanay paˈicelen iso ko pakasoˈlin niyam.’ O mamihaen kita micangacang ci Yihofaan. (Luka 17:5) Roma i, ngaˈayay miharateng kita to ngaˈayay a taˈarawan tonini a lalakaw. Palecaden ci Mikee aci Yiwli miharateng to sapadama ni Yihofa kitaanan. Malecad to fafahiyan wawa ni Wilo aci Anie mikifalocoˈ a mitolon ci Yihofaan, mangalef tahalifa to katalawan a tatokian. Malecadho ci Kaytian, mihapinang pakaynian ni Yihofa i paro no lomaˈ ato widang padama kitaanan. Mitadiˈec kita to sapadama ni Yihofa malaˈosi ko pilakowit to sapalifet anini, matongal ko pakasoˈlin, noikor ano maanan to ko mifekaday a demak o papadama ci Yihofa kitaanan.

19. (1) Pakasoˈlinay ci Yis to maanan? (2) Ngaˈay pakasoˈlin kiso to maanan?

¹⁹ Padamaan ni Yis ko nisawawaan mihapinang itini maanan a pakayraan cangoˈotay to pakasoˈlin, kawra mafanaˈay cingra wa ngaˈay ko nisawawaan mitadiˈec to sapadama ni Yihofa malaˈosi ko pisiˈayaw to sapalifet, cowa ka cisasa cingra tonini. (Yohani 14:1; 16:33) Pakasoˈlinay ci Yis, noikor wa ira ko taˈangayay ˈopo tamdaw iraay ko tanektek a pakasoˈlin milakowit to taˈangayay a padiing. (Paˈarawan 7:9, 14) O masalalomaˈay kiso han? Pakayni mikiriwiˈay a sidaˈit ni Yihofa, ano mameten iso ko kahacecay toki patanektek to pakasoˈlin, noikor o mamilakowit to taˈangayay a padiing!—Hipray 10:39.