1. Pakalalokay ci Yihofa kitanan sasamaan ko pidemak?

MAOLAHAY ci Yihofa to madimadiay a olah. (Hosiya 6:6) Damsayay Cingra pakalalok kitaanan misaareteng minengneng tonini a capeling, pakayniay i pairasolay ci Mikaan pasowal kitaanan ‘maolah to madimadiay a olah.’ (Mika 6:8 ato roma pihongyak.) Kawra sapidemakaw tonini, isalakatho kita cipinang tonini a capeling.

2. O maanan ko madimadiay a olah?

² O maanan ko madimadiay a olah? Itini Faelohay Hekal Mihongyakan Fangcalay Cudad, “madimadiay a olah” mataˈlifay ko 200 a masadak. Mikitini “Sapitadtad a Sowal” no Faelohay Hekal Mihongyakan Fangcalay Cudad, mitoroˈan a madimadiay a olah o pakayniay mikiˈokan a sowal, o moecelay, madimadiay cowa ka piliyas a olah, o mitoroˈan i o olah no Kawas i tamdaw, kawra maˈaraway i kalalaˈed no tamdaw. Paihkal to madimadiay a olah o saˈakawangay taˈarawan ci Yihofa. Oniya lalakaw mamilengo to samanay Cingra paihkal to madimadiay a olah i tamdaw, dotoc a lalakaw mamilengo, o sikawdan ni Yihofa sasamaan mitodong Cingranan, masasi paihkal to madimadiay a olah.

3. Pasowalay ci Yihofa ci Mosian to maanan milingatay to niyah a demak?

³ Miliyas ko Israil tamdaw to Icip caka halafin, pasowalan ni Yihofa ci Mosi to milingatay to ngangan no Niyah ato capeling a demak, sanay Cingra: ‘Yihofa, Yihofa, o siniˈadaay to tamdaw, patadoay miharateng to tamdaw a Kawas, o caay ka ranikay a maketer, iraay ko kadofahay madimadiay a olah, tada soˈliˈlinay ngaˈay tiˈeren, midaˈocay ko olah to tamdaw, misododay to  raraw.’ (Kasadakan 34:6, 7) Oniya kasemeran a sowal mahapinangay ni Mosi, o madimadiay a olah ni Yihofa iraay ko cecay mikiriwiˈay a pakayraan. O maanan hani?

4-5. (1) Samaanay ci Yihofa somowal to Niyah? (2) Dotoc mamilengo kita to maanan salicay?

⁴ Sowal ni Yihofa cowa ko madimadiay aca a olah, pasowalayho ‘iraay ko kadofahay madimadiay a olah’ no Niyah, o sasinanoten ita konini. Itini Fangcalay Cudad oniya ‘iraay ko kadofahay madimadiay a olah’ a sowal kina pinaay masadak, o ci Yihofa ko misowalan cowa ko tamdaw. (Saˈosi 14:18; Nihimiya 9:17; ˈOlic 86:15; 103:8; Yoil 2:13; Yona 4:2) Itini Fangcalay Cudad miceriday ci Yihofa mihaen a somowal to Niyah, mahapinangay misaaretengay Cingra tonini a capeling. Masemeray ci Tafiti a pasowal: ‘Yihofaaw, tahiraay i kakarayan ko madimadiay a olah Iso . . . Kawasaw, tada kalimlaan ko madimadiay a olah Iso! Mikiˈading a maemin ko tamdaw i lalomaˈ no sapikpik Iso.’ (ˈOlic 36:5, 7) Malecaday kita ci Tafitian misalimla to madimadiay a olah no Kawas han?

⁵ Sapitongalaw to kacipinang to madimadiay a olah hatiniay a capeling, dotoc mamilengo kita to tosa salicay: Ci Yihofa pasayraay cimaanan paihkal to madimadiay a olah? O madimadiay a olah Ningra pairaay to maanan haepoc no mita?

6. Ci Yihofa pasayraay cimaanan paihkal to madimadiay a olah?

⁶ Ci Yihofa wa pasayra cimaanan paihkal to madimadiay a olah? Sowal no Fangcalay Cudad ngaˈay kita maolah to adihayay a dafong, tinakoen “epah” “simal” “pirikec” “sifanaˈ” ato “taneng.” (Taneng 12:1; 21:17; 29:3) Kawra o tamdaw ko paihkalen to madimadiay a olah cowa ko dafong. Kawra, ci Yihofa cowa ko polong a tamdaw ko paihkalan to madimadiay a olah, ao edengan o mikiriwiˈay ko kangaˈay no kalalaˈed Cingranan a tamdaw ko paihkalan to hatiniay a capeling. Madimadiay ci Yihofa to widang Ningra, patadoay cangranan misaday to makapahay a hanoikor, tahadaˈoc cowa ko mamiliyas cangranan.

7. Ci Yihofa tano maanan pakayraan paihkal to olah i polong a tamdaw?

⁷ Ci Yihofa paihkalay to olah i polong a tamdaw. Pasowalan ni Yis ci Niketemo: “Tada maolah ko Kawas to tamdamdaw. Saka, padeteng sa Cingra a pafeli to dengan a Wawa Ningra to sakaecaaw ka tekop no cimacima a pasoˈlinay a mitiˈer i Cingraan. O sakaciˈorip nangra to midaˈocay.”—Yohani 3:1, 16; Matay 5:44, 45.

8-9. (1) Ci Yihofa hano paihkal to madimadiay a olah i sikawdan Ningra? (2) Dotoc mamisongilaˈ kita miharateng to maanan hani?

⁸ Soˈlin maolahay ci Yihofa to polong a  tamdaw, kawra malecad o sowal no fafekangay lalakaw, edengan pasayraay ci Yihofa i sikawdan Ningra, oya mikiriwiˈay ngaˈayay ko kalalaˈed Cingranan a tamdaw, paihkal to madimadiay a olah. Ngaˈay kita mikitini i sowal ni Tafiti ato pairasolay ci Taniilan a mahapinang konini. Sanay ci Tafiti: ‘Nanay mararid Kiso paihkal to madimadiay a olah i mafanaˈay Tisowanan a tamdaw.’ Sanayho cingra: ‘Tahadaˈoc ci Yihofa tano madimadiay a olah micada to mikangodoay Cingranan a tamdaw.’ Sanay ci Taniil: ‘Yihofaaw, o tadamaanay a Kawas Kiso . . . tano madimadiay a olah i maolahay Tisowanan, midofdofay to limoˈot Iso a tamdaw.’ (ˈOlic 36:10; 103:17; Taniil 9:4) Oniya sinael mitadtaday, paihkalay ci Yihofa to madimadiay a olah i sikawdan Ningra, samanen mafanaˈay cangra Cingranan, mikangodoay Cingranan, maolahay Cingranan ato midofdofay to limoˈot Ningra. Edengan pasayraay ci Yihofa i finawlan Ningra, oya mitooray to matatodongay a pakayraan midoko Cingranan a tamdaw, paihkal to hatiniay a capeling.

⁹ ˈAyaw no misatapang kita midoko ci Yihofaan i, paihkalan ni Yihofa i polong a tamdaw a olah malifokayto ita ko epoc. (ˈOlic 104:14) Ikor no malo finawlan Ningra kita, paihkalayho Cingra to madimadiay a olah i kitanan. Mikiˈokay ci Yihofa to sikawdan Ningra: ‘Ano malinalinah ko taporo i, ano mangiyangiyangi ko lotok, caay ko mamiliyas ko madimadiay a olah Ako i tisowanan.’ (Isaya 54:10) Malecaday matinakoay ni Tafiti, ‘o sasangaˈayen ni Yihofa micada ko madimadiay sikawdan Ningra.’ (ˈOlic 4:3) Tada maolahay ci Yihofa kitaanan, sasamaan ko demak ita hani? O sowal no mitiliday to ˈOlic: ‘O cima ko citanengay mamisinanot tonini a demak, misongilaˈ miharateng to madimadiay a olah ni Yihofa.’ (ˈOlic 107:43) Mihaenay, dotoc mamisongilaˈ kita miharateng to madimadiay a olah ni Yihofa pakayni i maanan tolo a pakayraan paira to haepoc no mita?

10. O tahadaˈocay madimadiay a olah ni Yihofa pakayni kitanan mamalifok ko maanan a epoc? (ˈOlic 31:7)

¹⁰ O midaˈocay ko madimadiay a olah no Kawas. Itini ˈOlic 136 fedengan kina 26 mitadtad tonini. Saka 1 sinael sanay: ‘Miakoˈid ci Yihofaan, nawhani o ngaˈayay Cingra, o midaˈocay  ko madimadiay a olah Ningra.’ (ˈOlic 136:1) Dotoc, mikitini saka 2 sinael tangasa saka 26 sinael, misaliyaliyaway maˈosi ita ‘samanen midaˈocay ko madimadiay a olah Ningra’ sanay a sowal. Ci Yihofa tano masakenakenaay a pakayraan paihkal to midaˈocay a madimadiay a olah i sikawdan Ningra, tada mitemeray kitanan konini! ‘Samanen midaˈocay ko madimadiay a olah Ningra’ oniya sowal papakasoˈlin kita, o olah ni Yihofa i sikawdan Ningra cowa ko mamafalic. Cowa ko raranikay ci Yihofa misawad to sikawdan Ningra, tada dihkoay ko falocoˈ ita! Papadotoc Cingra maolah to midokoay Cingranan a tamdaw, kalacafay i tatihi nangra, mangalef itini pisemseman nangra a tatokian. Malifokay ita a epoc i: Cowa ko mamiliyas ci Yihofa kitaanan, mafanaˈ tonini matomesay ko lipahak ato ˈicel no mita, ngaˈay misiˈayaw to masakenakenaay a pasangaray, padadotoc romakat i saka tayra midaˈocay ˈorip a lalan.—ˈOsien ko ˈOlic 31:7.

11. Mikitini ˈOlic 86:5, hano ‘makahi misodod to tamdaw’ ci Yihofa?

¹¹ Iraay ko madimadiay a olah no Kawas, mansa makahi misodod to tamdaw. Madimadiay a olah miocoray ci Yihofaan misodod to mikifalocoˈay pasasiyor, eca to piliyaw mararaw a tamdaw. Mitiliday to ˈOlic ci Tafiti sanay ko sowal ci Yihofaan: ‘Caay pidoedo Cingra to raraw ita a mitefoc titaanan, caay ko nano patelac ita ko sapicoˈay Ningra i titaanan.’ (ˈOlic 103:8-11) Ci Tafiti mikitini kaadayayan a nalifetan no niyah, makesemay a harateng tada aretengay a ˈinorong, kawra mananamay Ningra o ‘makahiyay misodod to tamdaw’ ci Yihofa. Hano makahi ci Yihofa misodod to tamdaw hani? O caˈof itiniay i ˈOlic 86:5. (ˈOsien.) Malecad o sowal ni Tafiti, matomesay ko madimadiay a olah ni Yihofa to micangacangay to sasodod Ningra a tamdaw.

12-13. Ano kakesem sa kita to nano raraw isaˈayaw, o maanan ko ngangaˈay padama kitanan?

¹² Ano mararaw kita i, makesem ko falocoˈ o pinangan konini, iraay ko sakangaˈay no mita. O hatiniay a harateng micorohay kitanan micangacang to sasodod no Kawas ato pasasiyor misafaeloh. Kawra o roma midokoay ci Yihofaan a tamdaw padotocay makesem to nano raraw isaˈayaw, o hatiniay a kakesem papiharatengay cangranan soˈlin pasasiyorayto ko niyah,  cowa ko mamisodod ci Yihofa cangranan sanay. Ano mahaenay kiso i, tongalen ko kafanaˈ ci Yihofaan, mihapinang to makahiay Cingra paihkal to madimadiay a olah i sikawdan Ningra, mihaen mamasayar ko falocoˈ iso.

¹³ Malifokay ita a epoc: Soˈliˈlin cowa ko malefotay kita, wa ngaˈayho makorac ko makapahay falocoˈ, lipahak a midoko ci Yihofaan, samanen o ˈirang ni Yis ngaˈayay ‘mikorac to raraw ita.’ (1 Yohani 1:7) Ano pakayniay kiso i cecay dangoc no niyah matoled ko falocoˈ, haratengen tada makahiay ci Yihofa misodod to soˈliˈlinay pasasiyor a tamdaw. Sinanoten mansanay ko sowal ni Tafiti to kalaliting no madimadiay a olah ato misododay, sanay cingra: ‘Ano hakowaay ko takaraw no kakarayan a miliyas to sera i, hatiraay ko kakahad no madimadiay a olah Ningra to mangodoay i Cingraan. Ano hakowaay ko kararaay no kawali ato kaetip i, hatiraay ko pipaliyas Ningra to raraw ita i titaanan.’ (ˈOlic 103:11, 12) Tada makahiay ci Yihofa ‘misodod’ to soˈliˈlinay pasasiyor a tamdaw.—Isaya 55:7.

14. Samanay ci Tafiti somowal to sadipot no madimadiay a olah no Kawas kitanan?

¹⁴ O madimadiay a olah no Kawas midipotay kitaanan. Sanay ko satolon ni Tafiti ci Yihofaan: ‘O pilimekan ako Kiso, tahapades kako, dadipoten Iso kako. Milekalan Iso ko sakalidong a ngiha i taliyok ako . . . . O mitadiˈecay ci Yihofaan a tamdaw iraay ko madimadiay a olah i taliyok nangra.’ (ˈOlic 32:7, 10) I nolitengan, mitaliyokay to niyaroˈ a lowil midipotay to lalomaˈay no niyaroˈ a finawlan caka madokaˈ no ˈada. Malecaday, o madimadiay a olah ni Yihofa masongilaˈay ko pidipot kitaanan, eca ka mapalak no tamdaw anca o demak ko kalawidang ita Cingranan. Iraay ko madimadiay olah ni Yihofa i kitaanan, mansa misolot Cingra kitaanan, ngaˈay kita materek i tatihi Ningra.—Yirimiya 31:3.

15. Hano patinakoen ni Tafiti ko madimadiay a olah ni Yihofa to pilimekan ato pisitaraan hani?

¹⁵ Tano roma sapatinako ci Tafiti milengo to sadipot no Kawas i finawlan Ningra, sanay cingra: ‘O pikiˈadingan ako a kitiraan ko Kawas, o tano madimadiay a olah micada takowanan a Kawas.’ Sanayho ko sowal ni Tafiti: ‘Iraay ko madimadiay a olah Ningra takowanan, o pisitaraan ako, o pilimekan ako, o paˈoripay i takowanan a Tapang, o sapatada ako, o midipotay takowanan.’ (ˈOlic 59:17; 144:2) Hano patinakoen ni Tafiti ko madimadiay a olah ni Yihofa to pilimekan ato pisitaraan hani? Samanen ano icowato kita, ano padadotoc kita midoko ci Yihofaan, cowa ko mamihayi Cingra to tamdaw anca demak mipalak to kalimlaan a kalalaˈed ita Cingraanan. Itini ˈOlic 91 fedengan malecaday ko sakiˈok kitaanan, mitiliday toniya ˈOlic sanay: “Pasowalen ako ci Yihofa: ‘O midipotay takowanan Kiso, o pisitaraan ako.’” (ˈOlic 91:1-3, 9, 14) Ci Mosi na patinakoay ci Yihofaan to pilimekan. (ˈOlic 90:1 ato roma pihongyak.) ˈAyaw no mapatay cingra i somowalay to mitemeray to falocoˈ a sowal: ‘Mikitini nolitengan o midipotayto ko Kawas, midaˈocay a kamay Ningra midamaay tisowanan.’ (Limoˈot 33:27) Samaanay ci Yihofa misaka dademak to midaˈocay a kamay Ningra midama kitaanan hani?

16. Ira ko maanan tosa a sapalemed kitaanan hani? (ˈOlic 136:23)

¹⁶ Ira ci Yihofa malo pilimekan, rihadayay ko harateng no mita. Kawra latekay matoleday ko falocoˈ ita, malecaday o mapolinay pasangarto a lomowad. Toniya tatokian sasamaan ci Yihofa padama kitaanan hani? (ˈOsien ko ˈOlic 136:23.) Tatano kamay Cingra damsay a palowad kitaanan, ngaˈay kita miliyaw tanektek tomireng. (ˈOlic 28:9; 94:18) Malifokay ita a epoc: Ngangaˈay kita tahadaˈoc mitiˈer ci Yihofaan, mansa ira ko tosa sapalemed: (1) Ano  icowato kita iraay ko rihadayay a pilimekan. (2) Milifok to tangongolay ka ciharateng no kakarayan Wama.

17. Iraay ko madimadiay a olah no Kawas, mansa ngaˈay kita pakasoˈlin to maanan? (ˈOlic 33:18-22)

¹⁷ Malecad masowalay i fafekang, ngangaˈay kita pakasoˈlin ci Yihofaan ano misiˈayaw kita to sapalifet o mamidama kitaanan, wa ngaˈay kita mitafo to madimadiay. (2 Korinto 4:7-9) Pairasolay a Yirimiya sanay: ‘Caay ka laˈafo kita, pakayniay i madimadiay a olah ni Yihofa, samanen awaay ko tolas no siniˈada Ningra.’ (Radiw no Mararomay 3:22) O papadotoc ci Yihofa patalahkal to madimadiay a olah kitaanan, malecad o sowal no Fangcalay Cudad: ‘Pasilaenoay ci Yihofa minengneng to mangodoay Cingranan a tamdaw, midimokos to mitalaay to madimadiay a olah Ningra a tamdaw.’—ˈOsien ko ˈOlic 33:18-22.

18-19. (1) Mikitini kita tonini a lalakaw mananamay ko maanan hani? (2) Dotoc a lalakaw mamilengo to maanan hani?

¹⁸ Mikitini kita tonini a lalakaw mananamay ko maanan hani? Itini ˈayaw no mafanaˈ kita ci Yihofaan i, o patalahkalan Ningra a olah i polong a tamdaw pairaayto to epoc kitaanan. Ikor no misatapang kita midoko Cingranan, paihkalayho to madimadiay a olah kitaanan. Iraay ko madimadiay a olah ni Yihofa kitaanan, mansa tano midaˈocay a kamay Ningra midipot kitaanan. Papadotoc Cingra kalacafay i tatihi ita, palaˈosiho to kihcod a sakiˈok Ningra kitaanan. Makalimay Cingra tahadaˈoc kita malo widang Ningra! (ˈOlic 46:1, 2, 7) Mihaenay, ano o mananto ko masiˈayaway ita a sapalifet, papafeli Cingra to ˈicel kitaanan, padama kitaanan mitafo to madimadiay.

¹⁹ Ci Yihofa tano masakenakenaay pakayraan patalahkal to madimadiay a olah kitaanan, makalimayho tano madimadiay a olah a macacada kita. O sasamaan ko demak ita hani? Dotoc a lalakaw mamilengo tonini a salicay.