Misongilaˈan iso miasip ko lalakaw no Mikecolay han? Wa ngaˈay pacaˈof to laenoay salicay:

Sasamaan kita minengneng to minilnilan no fangcalay saocor no Kawas a tamdaw?

Masemeray kita to pakasoˈlinay falocoˈ nangra, kawra cowa ko mamikiriwiˈ a misamacay ko harateng cangranan. Cowa ko ‘papakidem a pakahemek’ cangranan, cowa ko papatakalaw cangranan. (Yuta 16) Pakayni hatokel nangra tayra i kakarayan, cowa ka ngaˈay kita milicay to notekedan a salicay, mipakangodo cangranan.—mikecolay, Saka 1 Folad 2020, saka 28-29 fiedac.

Hano ngaˈay pakasoˈlin kiso, wa misinanot ci Yihofa tisowanan hani?

Sowal no Fangcalay Cudad, ˈayaw no hofocen kiso misinanotayto tisowanan ci Yihofa. Wa tengilen Ningra ko kahacecay satolon iso, mafanaˈ to harateng ato nafalocoˈan iso, wa pakayni nano demak iso a lipahak. (1 Rayray 28:9; Taneng 27:11) Misolotan ni Yihofa kiso mafanaˈ Cingranan.—mikecolay, Saka 2 Folad 2020, saka 12 fiedac.

Hacowa a tatokian a caciyaw? Hahacowa a tomerep?

O lalipahak kita pasowal i tamdaw to pakayniay ci Yihofaan a soˈlinay kimad. Ano maˈaraw ko tao mamararaw ko misaˈosian i, o papatalipaˈelalen ita cingra. O malohemay malitengay wa itini matatodongay tatokian a mihadak to limoˈot. Pakayni makecengay ko mitosilay tayal a kilac, cowa ka ngaˈay kita milicay anca mihadak to milingatay a demak. Oha mamitafo kita to mahimeday.—mikecolay, Saka 3 Folad 2020, saka 20-21 fiedac.

Saka 2 fedengan no Yoil a ririˈ ato saka 9 fedengan no Paˈarawan iraay ko maanan kasasiromaan?

Sowal i Yoil 2:20-29, wa laplapen no Kawas ko ririˈ, patefocenho ko mapalakay no ririˈ. Ikor noniya demak, wa tefadenho no Kawas ko fangcalay saocor Ningra. Oniya sapairasol itiniay pilood no sofitay no Papilon to Israil ato ikor noni a matatodong. O masowalay no Paˈarawan 9:1-11 a ririˈ oya iraay ko tokel tayara i kakarayan a Krisciyang ko mitoroˈan, timoloay cangra a milasil to sasawkit no Kawas toniya tatiihay a hekal, pakarorayay to hekal a tamdaw.—mikecolay, Saka 4 Folad 2020, saka 3-6 fiedac.

O cima ko kaˈamisay hongti anini?

O Rowasiya ato kapot ningra, misongtolay ko pifiyor nangra to finawlan no Kawas, mahawpay ko pikeceng to mitosilay a tayal, misaˈadaay to Misawacayay Tamdaw ni Yihofa. Kaˈamisay hongti padotocay malalifet to katimolay hongti.—mikecolay, Saka 5 Folad 2020, saka 13 fiedac.

‘Minaroˈan no fangcalay saocor’ o matiliday aca i Kalatiya 5:22, 23 siwaay a capeling han?

Cowa ka hatira. O fangcalay saocor wa ngaˈay padama kitanan palahad to roma capeling, tinakoen o moecelay. (Ifiso 5:8, 9)—mikecolay, Saka 6 Folad 2020, saka 17 fiedac.

Itini wangcan pasadak to sowal, sasing, kamotoˈay ika wa mifekad ko maanan pasangaray?

Ora pasadakan iso a lalakaw papiharatengay to tamdaw to cowa pisapoener kiso, maolahay a pahiyo.—mikecolay, Saka 7 Folad 2020, saka 6-7 fiedac.

O mitosilay wa ngaˈay samaan minanam to malaˈosiay a mifotingay?

O malaˈosiay a mifotingay itiniay kaadihayan no foting a tatokian ato kitiraan a matayal, mafanaˈay misaka dademak to matatodongay a lalosidan, hanaca timoloay itini masakenaay a pakayraan padotoc a matayal. Ano mitosil kita to tamdaw wa ngaˈay mihaen ko demak.—mikecolay, Saka 9 Folad 2020, saka 5 fiedac.

Samaan padama to pacekiwan matongal ko kaolah to Kawas?

Ngaˈayay pakalaloken ko pacekiwan miasip to Fangcalay Cudad to romiˈamiˈad, midotim to maasipay a lalakaw, pasifanaˈenho cangra a mitolon.—mikecolay, Saka 11 Folad 2020, saka  4 fiedac.

Sowal ni Pawlo: ‘Pakayni ci Kristoan, mamaˈorip ko polong tamdaw noikor.’ (1 Korinto 15:22) ‘Polong tamdaw’ cima ko mitoroˈan?

O misowalan ni Pawlo itini wa patikol maˈorip ko kahacecay tamdaw cowa ka saan. ‘Polong tamdaw’ oya manilnilay no fangcalay saocor a Krisciyang ko mitoroˈan, wa ‘malacecay ci Kristo Yisan, malo fangacalay’ cangra. (1 Korinto 1:2; 15:18)—mikecolay, Saka 12 Folad 2020, saka 5-6 fiedac.

Oniya ‘cecay melet, masoni ko laepa i saikor’ patikolay maˈorip a tamdaw, wa ira ko maanan ˈinorong?—1 Korinto 15:51-53.

Wa malacafay cangra ci Kristoan ‘tano malad a cokol mikowan to kalo kitakit.’ (Paˈarawan 2:26, 27)—mikecolay, Saka 12 Folad 2020, saka 12-13 fiedac.