MACADA ko tikami no ngaˈayay widang, samanay ko harateng iso hani? Macadaay ni Timoti ko tikami no tarokos ci Pawlo, oniya tikami ikor malo saka 2 Timoti no Fangcalay Cudad. Itiya, maedeng sapikilimaw ci Timoti to awaay ko adeses a kitiraan minengneng to o maanan ko sowal no ngaˈayay widang cingranan. Saan ko harateng ni Timoti alatek: “Ngaˈayay ci Pawlo hokira? Pakayni pinengneng to sapatorod takowanan a demak, o maanan ko sapaini ni Pawlo takowanan hani? Oniya tikami wa padama takowanan milaheci to mitosilay a tayal han? Oniya tikami wa ngaˈay padama to roma tamdaw han?” Oniya tikami pacaˈofay to polong a salicay ni Timoti, adihayay ko malifokay ningra a epoc. Nohatini, nengnengen ita ko pina kalimlaan a sapaini.

Satapang no tikami, tangsolay matinako ni Timoti ko kaciharateng ni Pawlo cingranan. Damsayay ci Pawlo pangangan cingranan to ‘kanonoˈan ako a wawa.’ (2 Timoti 1:2) Itiniay kongyin 65 miheca macada ni Timoti koniya tikami, madeng 30 ko mihecaan ningra itiya, hanaca o kadofahayto ko nalifetan a malohemay malitengay. Malacafay cingra ci Pawloan matayal to 10 miheca, adihayay ko mananamay.

Mikitini tikami mafanaˈay ci Timoti, padotocay ci Pawlo madimadi a mihadidi to masakenaay a pades, mapakalalokay cingra. Itiya, mapalitay ci Pawlo i Loma, hanaca mangataayto patayen. (2 Timoti 1:15, 16; 4:6-8) Mahapinangay ni Timoti tada timoloay ci Pawlo, samanen sanay ko sowal ni Pawlo: “Kihcod a demak mihadidiay kako.” (2 Timoti 2:8-13) Wa ngaˈay kita malecad ci Timotian, mikitini taˈarawan ni Pawlo milifok to sapakalalok.

Pakalalokan ni Pawlo ci Timoti misaareteng to patorodan no Kawas cingranan a tayal. Sanay ko sowal ni Pawlo ci Timotian: “O sapafeli no Kawas tisowanan a sidaˈit, padotocen iso a fanekfek, malecad o mirengrengay to namal.” (2 Timoti 1:6) Itini toniya sowal ni Pawlo, mihongyakan to ‘sidaˈit’ no Kirisiya a sowal tatodong i ‘cowa papaycien a sapatelong,’ oniya sapatelong cowa ko mietanan, cowa ko hatatodong no micadaay to sapatelong a tamdaw. Tiya piliˈen ci Timoti matayal i  kasakopang i, milifokay toniya sidaˈit.—1 Timoti 4:14.

Pakayni toniya sidaˈit, pakalalokan ni Pawlo ci Timoti samaan ko demak hani? Maˈosi ko sowal ni Pawlo i, maharatengay ni Timoti ko falah alatek. Ano mamapadeng ko namal i, parengrengan no tamdaw ko namal, ho miliyaw a marengreng ko namal. Misaka dademakan ni Pawlo ko cecay sowal no Kirisiya toniya sinael, cecay citing mitadtad toniya sowal i ‘miliyaw, misafaeloh a mirengreng to namal,’ Tatodong no sapatinako i ‘ fanekfek mirienang to cecay a tayal.’ Mihaenay, palimoˈotay ci Pawlo ci Timotiyan: ‘Misarocod ko falocoˈ matayal i saaroˈan iso!’ Anini, oha mamihaen kita fanekfek a matayal saki Kawasan.

Itini tikami, pafeliyan ni Pawlo ci Timoti to roma sapaini, padama cingranan malaˈosi ko pidemak to ˈinorong. Sanay ci Pawlo: ‘Tiˈeren iso ko lalomaˈay ita a fangcalay saocor, dipoten koniya makapahay sapatorod.’ (2 Timoti 1:14) O maanan koniya sapatorod hani? Fafekangay sinael, masowalay ni Pawlo ko ‘marocekay a sowal,’ o soˈlinay kimad no Fangcalay Cudad. (2 Timoti 1:13) O mamitamorong ci Timoti to ˈinorong, itini kasakopang ato pitosilan a kilac pasifanaˈ to tamdaw to soˈlinay kimad. (2 Timoti 4:1-5) Roma i, manilnilay ci Timoti malo malohemay malitengay, pakaen to siri no Kawas. (1 Pitiro 5:2) Mitadiˈec ci Timoti to fangcalay saocor ni Yihofa ato sowal Ningra, oha ngangaˈay midipot toniya sapatorod.—2 Timoti 3:14-17.

Anini, patorodan no Kawas kita to soˈlinay kimad, miocor kitaanan pasifanaˈ to tamdaw mafanaˈ to soˈlinay kimad. (Matay 28:19, 20) Misaareteng kita toniya sapatorod, wa padotoc mitolon, micerid micekiw to Sowal no Kawas. (Loma 12:11, 12; 1 Timoti 4:13, 15, 16) Roma i, iraay ko roma ˈinorong no roma tamdaw, tinakoen malo malohemay malitengay anca miemin to toki misakafah. O mahaenay saaroˈan o papadama kitanan matongal ko pisapoener, matongal ko pitadiˈec ci Yihofaan. Misalimla kita to toki a matayal, mitadiˈec to sadama ni Yihofa, wa ngaˈayto kita a midipot to sapatorod.

Pahatatanam to tao o ˈinorong ni Timoti. Patalipaˈelalan ni Pawlo cingra: ‘O milasilan ako a demak ˈalomanay ko mamisawacay, o matengilay iso a demak patoroden ko madimadiay a tamdaw, ho ngaˈay madangar nangra ko pasifanaˈay a tayal.’ (2 Timoti 2:2) Mihaenay, o papaladaˈen ni Timoti ko mananamay no niyah i roma salikaka. Anini, o kantok no kasakopang o mamisarocod mihaen to demak, o cecay ngaˈayay a kantok mitokelay pakadangar ko tao to tayal, cowa ko mamaˈidi paladaˈ to nalifetan noniyah a matayal. Cowa ko cacalemcem cingra adihay ko kafanaˈan anca ikaka ko ngaˈay no demak no tao, miˈafas to na rorayan ningra. Mihaenay, ano pahatatanam ko kantok to tao i, cowa ko taˈeneran aca a sifanaˈ no tayal, wa padamaho to micadaay to sapahatatanam a salikaka palahad to sapihapinang ato sakacipinang a inaneng, malo matenesay a Krisciyang. Mihaen, o micadaay to sapahatatanam a ‘madimadiay tamdaw’ wa adihayto ko sadama to kasakopang.

O tikami ni Pawlo matomesay to damsayay, madeng misalimlaay ci Timoti. Ngaˈay maharateng ita, misaliyaliyawan ni Timoti a milomal ko kalimlaan a sapaini i tikami, hanaca misimsim to sasamanen misaka dademak.

Makalimay kita misaka dademak toniya sapaini. Ngaˈay samaan ko demak hani? Ano o mananto ko sapafeli no Kawas kitaanan a sidaˈit, padotocen ita a mirengreng, midipot toniya makapahay sapatorod, paladaˈen ko tao to mananamay noniyah a nalifetan ato sifanaˈ. Mihaen, malecad o nano sowal ni Pawlo ci Timotiyan, oha ngangaˈay kita misongilaˈ milaheci to ˈinorong no mita.—2 Timoti 4:5.