Cowa ka haen ko tatodong noniya sinael. Tatodong i, soˈlin misaliyaliyaw tahapades ko tamdaw, wa ngaˈayho miliyaw a talifak.

Haratengen ko fafekang ato laeno no sinael: ‘Aka itini i lomaˈ no moecelay tamdaw a mihokhok, misahalaka to tatiihay demak, aka pipeleng to paselaˈan ningra a kitiraan. Kina pito mapolin ko moecelay tamdaw, miliyaway lomowad. Tahapades ko tatiihay tamdaw, cowato pakalowad. Ano mapolin ko ˈada, aka mahemek kiso, mahafikod cingra, aka mahemek ko falocoˈ iso.’—Taneng 24:15-17.

Harateng no roma tamdaw, mitoroˈan no 16 sinael i, mararaw ko tamdaw wa ngaˈay miliyaw a talifak sanay. Tatosaay misasingsiyay no Ikok itini cudad nangra milengoay, “nolitengan ato aniniyay lintad a mitosilay tamdaw marariday mihaen mitadtad toniya sinael.” Somowalayho cangra tatodong no pihaen mitadtad, o cecay ngaˈayay tamdaw soˈlin pakidem ko raraw, ngaˈayayho a padotoc maolah to Kawas, wa milifok to pihayda no Kawas, samanen ano mararaw cingra pasasiyoray sanay. Oya cowa kakahi milowid to raraw a tamdaw maolahay to mahaenay pitadtad, harateng nangra, soˈlin misaliyaliyaw mararaw koniyah, o sasododen no Kawas cangra sanay.

Kawra, cowa ka haen ko tatodong no saka 16 sinael.

Itini 16 ato 17 sinael mihongyakan to ‘mapolin’ a Hipray tilid cowa kalecad ko tatodong. O mitoroˈan noniya sowal o soˈlinay mapolin anca matefad, tinakoen, mapolin ko kolong i lalan, mikitini fadahong matefad ko tamdaw, matefaday ko fakeloh i sera. (Limoˈot 22:4, 8; Amos 9:9) Oniya sowal iraay kono tinakoan a tatodong, sanay ko sowal no Fangcalay Cudad: ‘Masemer ci Yihofa to lalan no tamdaw, wa mikayat to hawang ningra. Soˈlin mapolin cingra, cowa ko papakidem ko kapolin, samanen midamaan ni Yihofa ko kamay ningra.’—ˈOlic 37:23, 24; Taneng 11:5; 13:17; 17:20.

Mihongyakan itini ‘mapolin’ a sowal no Hipray, sinanoten ko pitadtad ni Polonpoteli, sanay cingra: “Oniya Hipray a sowal cowa pitoroˈ to mararaway.” Mihaenay roma micekiway to Fangcalay Cudad sanay mitadtad to 16 sinael: “Midokaˈ ko tamdaw to finawlan no Kawas, saikor o mamalahorac, pakangodo to niyah, samanen o mamiliyaw a lomowad ko finawlan no Kawas, o papasokiyaw ko tatiihay tamdaw!”

Mihaenay, misowalan no Taneng 24:16 cowa ko mararaway, o misaliyaliyaway micada to sasetiˈ ato katoled. Itini ciraraway a hekal, misiˈayaway ko moecelay tamdaw to tatiih no tireng ato roma pasangaray, micadaay to sapalak no mirikecay alatek. Kawra wa ngaˈay pakasoˈlin cingra, o dadamaen no Kawas cingra, padama cingranan malaˈosi ko piremo to pasangaray. Haratengen: Kinapinaay pakaˈaraw kita ikor no mifekad ko demak iraay ko epoc no finawlan no Kawas hani? Pakasoˈlinay kita, ‘midamaan ni Yihofa ko mamapolin a tamdaw, palowad to mapaekelay a tamdaw.’—ˈOlic 41:1-3; 145:14-19.

Mihaenay, maˈaraw no moecelay tamdaw ko tao tahalifa to pades cowa ko mamahemek. Sowal no Fangcalay Cudad: ‘O mikangodoay to Kawas a tamdaw wa ira ko ngaˈayay minaroˈan, samanen mangodoay cangra to Kawas.’ Mafanaˈ tonini tada pakalalokay to moecelay a tamdaw. —Patnakay 8:11-13; Yopu 31:3-6; ˈOlic 27:5, 6.