1-2. Polong a Krisciyang hano cacipinag to milingatay i kakarayan patikol maˈorip a demak hani?

ANINI, ˈalomanay midokoay ci Yihofaan a tamdaw iraay ko hatokel itini fafekang no sera tahadaˈoc maˈorip. Kawra, iraayho ko manilnilay no fangcalay saocor a Krisciyang maˈorip toniya hekal, tokel nangra tatayra kakarayan maˈorip. Oniya Krisciyang sakafanaˈaw sasamaan ko ˈorip no niyah noikor. Mihaenay, iraay ko hatokel itini fafekang no sera maˈorip a Krisciyang hano cacipinag toniya demak hani? Samanen o mamalifok nangra a lemed noikor milingatay to itiniay kakarayan a patikol maˈorip. Mankora, o hatokel ita o tayra i kakarayan anca itini i fafekang no sera maˈorip, o cacipinang kita to itiniay i kakarayan patikol maˈorip.

² Itini saka 1 hahekalan, mikayatan no Kawas ko nisawawaan ni Yis mitilid to milingatay to i kakarayan patikol maˈorip a demak. Sowal ni Yohani: ‘O wawato no Kawas kita anini. Cowa ka hapinang ko noikor a pakayraan. Kawra soˈlinay mafanaˈ kita, ano paihkal to Cingra i, wa malecad kita Cingranan, samanen wa maˈaraw ita o masamanay Cingra.’ (1 Yohani 3:2) Mihaenay, o manilnilay no fangcalay saocor a Krisciyang cowa ka fanaˈ to pakayraan patikol maˈorip malo ˈadingo. Kawra ngaˈay pakasoˈlin, itiya wa maˈaraw nangra ci Yihofa. O Fangcalay Cudad cowa ka ihkal pasowal to milingatay i kakarayan patikol maˈorip a demak, kawra tarokos ci Pawlo pasowalay kitaanan, ci Kristo wa ‘papalahdaw to polong no mikowanay halo cifadangalay ato ciˈicelay a maemin’ ato palahdaw to ‘saikoray a ˈada o patay,’ itiya manilnilay no fangcalay saocor a  Krisciyang wa padadotoc kalacafay ci Kristoan. Ikor, ci Yis ato kalacafayay cingranan mikowan a tamdaw wa papidodof to kihcod ci Yihofaan, ano cangrato wa midodof ci Yihofaan. (1 Korinto 15:24-28) Itiya tada o kalipahakan a tatokian! *

3. Pakayni 1 Korinto 15:30-32, o hatokel patikol maˈorip samanay padama ci Pawloan?

³ O hatokel patikol maˈorip padamaay ci Pawloan miemem to masakenaay a sapalifet. (ˈOsien ko 1 Korinto 15:30-32.) Pasowalan ningra ko Korintoay a Krisciyang, ‘misiˈayaway to patay’ cingra to romiˈamiˈad, somowalayho ‘maraˈodotay to ˈaˈadopen i Ifiso’ ko niyah. Tatodong ni Pawlo i, soˈlinay cingra itini i karaˈodotan no Ifiso malaˈodot to ˈaˈadopen. (2 Korinto 1:8; 4:10; 11:23) Roma i, pakidemay ko macadaay ningra a sapalak no Yutaya tamdaw ato roma finacadan, oniya tamdaw malecaday o ˈaˈadopen a mariˈang. (Dmak 19:26-34; 1 Korinto 16:9) Ano samaanto ko pakayraan, katalawan ko pakayraan ni Pawlo, kawra tawlikay ko pinengneng ningra to hanoikor.—2 Korinto 4:16-18.

4. O hatokel patikol maˈorip iraay ko maanan sadama to aniniay a Krisciyang? (Nengnengen ko potalay coka.)

⁴ Itiniay kita i katalawan a lintad maˈorip. O roma salikaka madokaˈay no mariˈangay a waywayan, o roma itiniay malalooday a kitiraan, maroeroay ko ˈorip, o roma itiniay makecengay ko mitosilay tayal a kilac, misiˈayaway to sakalahdawaw no ˈorip ato pasalat a midoko ci Yihofaan. Kawra, oniya salikaka padadotocay madimadi ci Yihofaan, patirengay to nagˈayay taˈarawan ita. Cowa ka talaw cangra, mafanaˈay cangra soˈlin malahdaw ko ˈorip no hatini ngaˈayto, maharekayto ci Yihofa misaday to makapahay hanoikor nangra.

5. O masamanay harateng o mamifasaw to pakasoˈlin to papatikol maˈorip hani?

⁵ Patalipaˈelalay ci Pawlo to Krisciyang miliyas to cecay katalawan a harateng. Sowal no roma tamdaw: ‘Ano cowa ko papatikol maˈorip ko mapatayay tamdaw, mihaenay haratengay saan komaen mitaˈowak mamaan, o mamapatay nocila.’ O mahaenay harateng iraayto i salakat. Misaka dademakan ni Pawlo ko sowal i Isaya 22:13 alatek, o milengoan no sinael o waywayan no Israil tamdaw itiya. Haratengay sanay cangra maacang, cowa pisikol to kalalaˈed no niyah aci Yihofaan. O waywayan nangra i: ‘Awaay ko pinang to kaˈorip no tamdaw, ka ranikay a maacang.’ ˈAlomanay tamdaw anini mahaenay ko harateng. Kawra, paihkalay ko Fangcalay Cudad, o mahaenay a waywayan mikayatay to ka adayayan a teloc no Israil kitakit.—2 Rayray 36:15-20.

6. Pakasoˈlin kita to patikol maˈorip, o sasamaan mipiliˈ to hawidang hani?

⁶ Pakasoˈlin kita to papatikol maˈorip, o mamisongilaˈ mipiliˈ to hawidang. O Korintoay a Krisciyang o mamisawad micawmaˈ to cowa pakasoˈlin to papatikol maˈorip a tamdaw, malecaday kita anini. Mararid malacafay to maolahay maacang a tamdaw, o mamifiyor to pinengneng ita, mipalak to ngaˈayay nanaman, mangalef o mamidemak to kaˈintehan no Kawas a demak. Mihaenay, misaaretengay a palimoˈot ci Pawlo: ‘Ka talipaˈelal kamo, midemak to moecelay, aka mararaw.’—1 Korinto 15:33, 34.

7. Pakayni 1 Korinto 15:35-38, pakayni patikol maˈorip, cisasaay ko roma tamdaw to maanan hani?

⁷ ˈOsien ko 1 Korinto 15:35-38. O roma tamdaw cowa pakasoˈlin to patikol maˈorip, sanay cisasa alatek: “Samaan a patikol maˈorip ko mapatayay tamdaw hani?” O  sasinanoten ita samanay ko caˈof ni Pawlo toniya salicay, samanen ˈalomanay tamdaw anini pakayni pakayraan no mapatayay iraay koniyah a pinengneng. Mihaenay, samanay ko sowal no Fangcalay Cudad hani?

8. Ano tayra ko tamdaw i kakarayan wa ira ko masamanay a tireng, misaka dademakan ni Pawlo ko maanan sapatinako a mitadtad hani?

⁸ Mapatay ko tamdaw, manaholayto ko tireng. Ano ngaˈayay ci Yihofa mikitini i awaay a misangaˈ to maamaan, oha ngangaˈay patikol paˈorip to mapatayay tamdaw, pafeli cingranan to matatodongay a tireng. (Satapangan 1:1; 2:7) Tano tinakoan ci Pawlo a mitadtad, patikolen no Kawas paˈorip ko tamdaw i, cowa koya telang a tireng ko sapafeli cingranan. O cecay sapaloma kosamen i sera cicengoˈay, malo faelohay a pinaloma, o potal noniya pinaloma cowa kalecad to potal noya sapaloma. Tanonini a sapatinako ci Pawlo a mitadtad, ano patikolen no Kawas paˈorip ko tamdaw i, ngaˈayay ‘oniyah saan a harateng’ pafeli to tamdaw to faelohay tatirengan.

9. Itini 1 Korinto 15:39-41 milengoay to maanan cowa kalecad a tatirengan?

⁹ ˈOsien ko 1 Korinto 15:39-41. Sowal ni Pawlo, o masangaˈay maamaan cowa kalecad ko tatirengan. Tinakoen, o kolong, foting ato ˈayam iraay ko ˈirang ato heci, kawra cowa ka lecalecad ko tatirengan. Maˈaraway ita, o cidal ato folad i kakarayan cowa kalecad. Sanay ci Pawlo: “O ˈdil noniya foˈis ato roma foˈis, cowa kalecad.” Soˈlin cowa pakahapinang ko mata ita to kasasiroma no foˈis, kawra mahapinangay no kakakosiya ko kasasiroma no foˈis, iraay ko hangangayay foˈis, kohcalay foˈis, iraayho ko malecaday o cidal a foˈis. Sanayho ci Pawlo: “Iraay ko kakarayan a tatirengan, iraay kono sera a tatirengan.” O maanan ko tatodong no sowal ningra hani? O tamdaw ‘ono sera a tatirenagn,’ o ciˈirangay ciheciay a tireng, o coyoh iraay ko “no kakarayan a tatirengan,” ono ˈadingoan a tireng.

10. O patikolay maˈorip tayra i kakarayan a tamdaw wa ira ko masamanay a tireng?

¹⁰ Sinanoten dotoc samanay ko pitadtad ni  Pawlo, sanay cingra: “Mahaenay ko patikolay maˈorip a mapatayay. O mikosamaan o mamapalak a tireng, patikol maˈorip oya cowato ko mamapalak a tireng.” Mafanaˈay kita mapatay ko tamdaw mamanahol ko tireng, patikol i sera. (Satapangan 3:19) Ano mahaenay, hano somowal to “patikol maˈorip oya cowato ko mamapalak a tireng” hani? Itini, o misowalan ni Pawlo cowa ko itiniay fafekang no sera patikol maˈorip a tamdaw, tinakoen oya patikolan paˈorip ni Iliya, Ilisa aci Yis a tamdaw. O misowalan ningra oya patikol maˈorip tayra i kakarayan a tamdaw, wa ira ko “noˈadingoan a tireng” nangra.—1 Korinto 15:42-44.

11-12. Patikol maˈorip ci Yis tahalifaay to maanan a kafalic hani? O manilnilay no fangcalay saocor a Krisciyang wa tahalifa to maanan a kafalic hani?

¹¹ Itiniho i fafekang no sera ci Yis o ciˈirangay ciheciay ko tireng, kawra patikol cingra maˈorip malo ‘pafeliay to ˈorip ˈadingo a tireng,’ tayra i kakarayan. Malecaday, o manilnilay no fangcalay saocor a Krisciyang patikol maˈorip wa malo ˈadingo a tireng. Sanay ci Pawlo: ‘O tatirengan ita no hatini malecaday toya tano seraan misangaˈ a tamdaw, noikor o tatirengan ita wa malecad toya i kakarayanay.’—1 Korinto 15:45-49.

¹² Haratengen, patikol maˈorip ci Yis cowato ko ciˈirangay ciheciay a tireng, tada kalimlaan konini. Pakayni patikol maˈorip, dotoc mitadtaday ci Pawlo to cecay kalimlaan, sanay cingra: ‘Cowa ko mamicada to Hongti Kitakit ko ciˈirangay ciheciay a tireng.’ (1 Korinto 15:50) Mihenay, o tarokos ato roma manilnilay no fangcalay saocor a Krisciyang patikol maˈorip tayra i kakarayan i, o tatirengan nangra cowa ko mamapalak a ciˈirangay ciheciay a tireng. Ano mahaenay i, hacowa cangra patikol maˈorip hani? Sowal ni Pawlo mapatay cangra i cowa ko tatangsol patikol maˈorip, o hatiniay a patikol maˈorip ikorto ngaˈ mifekad. Mitilid ci Pawlo to saka 1 Korinto a tatokian, o roma Krisciyang “mapatayayto,” tinakoen tarokos ci Yakop. Roma a tarokos ato manilnilay no fangcalay saocor a Krisciyang oha mamapatay.—1 Korinto 15:6; Dmak 12:1, 2.

13. O patikolan ni Yis tayni kitaanan a tatokiyan, wa mifekad ko maanan a demak hani?

¹³ Ci Yis aci Pawlo na milengoay toniya mikiriwiˈay tatokiyan i likisi no tamdaw, o ‘patikolan ni Kristo tayni kitaanan a tatokiyan.’ Toniya tatokiyan, wa ira ko lalood, ˈatoray, lifong ato roma pades i polong no cikiw. Mikitini 1914 miheca misatapang, malaˈosiyayto koniya sapairasol. Roma i, masowalayho ni Yis ko mamifekad a demak toniya tatokiyan, sanay cingra: ‘Oniya ngaˈayay lihaf no Hongti Kitakit wa patenaken i palo no kakarayan, matengil no polong kasafinawlan, malaod ko toki irato ko salikoray romiˈad.’ (Matay 24:3, 7-14) Sowal ni Pawlo, itini ‘patikolan no tapang tayni kitaanan a tatokiyan,’ ‘oya malacecayay ci Kristoan mafotiˈayto a tamdaw’ wa patikol maˈorip tayra i kakarayan.—1 Tisalonika 4:14-16; 1 Korinto 15:23.

14. Anini, ano mapatay ko manilnilay no fangcalay saocor a Krisciyang wa mifekad ko maanan a demak?

¹⁴ Anini, ano mapatay ko manilnilay no fangcalay saocor a Krisciyang, wa tangsol patikol maˈorip tayra i kakarayan. Mikitini 1 Korinto 15:51, 52 mahapinang konini, sanay ci Pawlo: ‘Cowa ko hahalafin mafotiˈ kita o kahacecay tamdaw, kawra o mamafalic ko kahacecay tamdaw. O pifekad noniya demak cecayay a melet, itiya i salikoray a soni no laepa.’ Matatodongay koniya sinael no hatini! Tahalifaay to mahaenay patikol maˈorip a Krisciyang taˈangayay ko lipahak, samanen mikitiya misatapang ‘wa tahadaˈocto a malacafay to tatapangan’ cangra.—1 Tisalonika 4:17.

15. O patikolay maˈorip tayra i kakarayan a Krisciyang wa ira ko maanan a ˈinorong hani?

¹⁵ Oniya “cecay melet” patikol maˈorip tayra i kakarayan a Krisciyang wa ira ko maanan a ˈinorong hani? Pasowalan ni Yis cangra: ‘O pakalowiday a tamdaw, oya midoedoay to  limoˈot ako tangasa i paherekan i, wa pafelien ako cingra to fadangalan mikowan to kalo kitakit, malecad takowanan mikitini Wama milifok to fadangalan. O pakalowiday a tamdaw wa tano malad a cokol ko sapikowan to kalo kitakit, mipelpel to kalo kitakit, malecad o pipelpel to kapowa.’(Paˈarawan 2:26, 27) Mihaenay, wa itini cangra pikerid ni Yis tano malad a cokol mikowan to kalo kitakit.—Paˈarawan 19:11-15.

16. Mikitini maanan a tatodongan, o patay wa masongilaˈ a malowid?

¹⁶ Noikor, o manilnilay no fangcalay saocor a Krisciyang wa pakalowid to patay. (1 Korinto 15:54-57) Ikor no tayra i kakarayan cangra, wa mirienang to Armakiton a lalood, misongilaˈ palahdaw to polong tatiihay tamdaw ato demak. Roma i, wa ira ko taˈangayay ˈopo a Krisciyang wa ‘mikitini taˈangayay padiing a masadak,’ maˈorip micomod i faelohay hekal. (Paˈarawan 7:14) O mamaˈaraw nangra ko ˈalomanay mapatayay tamdaw patikol maˈorip, pakaˈaraw to piliyaw pakalowid to patay. Haratengen hena, oniya pakalowid wa taˈangay ko kalipahak no tamdaw! (Dmak 24:15) Saikor, oya parocokan ni Atam i tamdaw a patay wa masongilaˈ a malowid, o polong tahatolasay ko madimadi ci Yihofaan a tamdaw wa tahadaˈoc a maˈorip.

17. O saka 1 Korinto 15:58 pakalalokay kitaanan midemak to maanan hani?

¹⁷ Itini saka 1 Korinto pakayniay patikol maˈorip a sinael taˈangayay ko sahinom to tamdaw, aniniay a Krisciyang o mamiakoˈid to Kawas. Iraay ko adihayay a lalangian ita midoedo to limoˈot ni Pawlo, misarocod ‘matayal to tayal no tatapangan.’ (ˈOsien ko 1 Korinto 15:58.) Ano tahatolas ko madimadi ita, tawlik a matayal saki Yihofaan, wa irato ko toki soˈliˈlin a lipahak ko kaˈorip noikor. O mamalifok ita a sapalemed noikor, mataˈlifay ko maharatengay ita. Malaod ko toki wa mahapinang ita, o nano roray ita i tatapangan cowa ko malaholacay.