1. Palimoˈotan no tarokos ci Pitiro ko salikaka sasamaan ko pidemak? Cato ka madangar no niyah hano saan ko harateng ita?

NA PAFELIAN no tarokos ci Pitiro ko saka 1 hahekalan manilnilay no fangcalay saocor a Krisciyang to cecay sapalimoˈot, sanay cingra: ‘Todongen koya mitahidangay tamowanan a makoracay a Kawas, ka makorac kamo i polong no demak,’ malecad o matiliday i Fangcalay Cudad: ‘Ka makorac kamo, samanen o makoracay Kako.’ (1 Pitiro 1:15, 16) O tokel ita o tatayra i kakarayan, anca i fafekang no sera milayap to midaˈocay orip, mamidofdof toniya sapalimoˈot. Mikitini sowal ningra mahapinang ita, ngangaˈay kita mitodong to makoracay a saˈakawangay a taˈarawan no Kawas ci Yihofaan, papadotoc makorac i polong no demak. Kawra cowa ko malefotay kita, o sasoˈlin a madangar konini han? Soˈlin na mararaway ci Pitiro to pina raraw, kawra o tinakoan ningra mitadtaday o cowa ka lefot a tamdaw ngangaˈay malo makoracay a tamdaw.

2. Onini a lalakaw mamitadtad to maanan a salicay?

² Onini a lalakaw mamitadtad to ilaenoay a salicay: O maanan ko makoracay? Samanay ko Fangcalay Cudad somowal to kakorac ni Yihofa? Samaan ko demak ita ngaˈay makorac i polong no demak? Padotoc makorac ato miingid ci Yihofaan iraay ko maanan a kalaliting hani?

3. (1) Harateng no ˈalomanay tamdaw o masamaanay ko makoracay a tamdaw? (2) Saka tatodongaw no kacipinang to tatodong no makoracay, o mamisalalangian kita to maanan?

³ Masowal ko makoracay a tamdaw, o maharatengay no ˈalomanay tamdaw o micaˈedongay to mikiriwiˈay a rikoˈ no pidoyongan, cowa ka tawa ko pising a tamdaw, kawra o makoracay a tamdaw cowa ka mahaen. Sowal no Fangcalay Cudad o “lipahakay a Kawas” ci Yihofa, somowalayho o lipahakay ko midokoay Cingranan a tamdaw. (1 Timoti 1:11; ˈOlic 144:15 ato  roma pihongyak.) Itini saka 1 hahekalan, o roma tamdaw maolahay micaˈedong to mikiriwiˈay a rikoˈ, ‘sapisolotaw to harateng no tao itini kaˈayaw no ˈalomanay tamdaw midemak to moecelay a demak.’ Na pakidemay ko pirikec ni Yis to mahaenay a tamdaw. (Matay 6:1; Marko 12:38) Malo soˈlinay a nisawawaan ni Yis, wa misalalangian kita to pitadtad no Fangcalay Cudad cipinang to o maanan ko makoracay. Pakasoˈlinay kita, o makoracay ato matomesay to olah a Kawas caay ko mamiocor kitanan midemak to cowa ka dangar ita a demak. Mihaenay, ano palimoˈotay ci Yihofa ‘Ka makorac kamo,’ o mamalaˈosi ita konini a saali. Manaokaniw, makorac kita i polong no demak, sasalakatho cipinang to o maanan ko tatodong no makoracay.

4. Itini Fangcalay Cudad o “fangcalay” ato “makoracay” o maanan ko tatodong?

⁴ O maanan ko makoracay hani? Itini Fangcalay Cudad o “fangcalay” ato “makoracay” o mitoroˈan i, pakayniay i waywayan ato pihakelongan a kakorac, iraay ko ono Kawas sanay a tatodong. Sakoniya sowal, ano padotoc kita mitoor to ˈakawangay palinian no waywayan, mitoor to mihaydaan ni Yihofa a pakayraan midoko Cingranan, hanaca ira ko tangongolay a kalawidang Cingranan, o makoracayto a tamdaw. Ci Yihofa Kawas o malefotay a makorac, kita saan o cowa ka lefot, kawra kamayan makahi Cingra malawidang kitaanan, tada kasemeranto konini.

5. Mikitini i sowal ato demak no coyoh, mahapinangay ita to o masamaanay a Kawas ci Yihofa?

⁵ O soˈliˈlinay makorac ci Yihofa, itiniay taliyok no kamaroˈan Ningra a coyoh salafin na taˈangay ko ngiha milasil: ‘Kakeridan no sofitay i kakarayan ci Yihofa tada makoracay! tada makoracay! tada makoracay!’ (Isaya 6:3) Oniya coyoh ngaˈayay ko kalalaˈed to makoracay a Kawas, pakasoˈlinay cangra to makoracay ko niyah. Soˈlinay, o kasadakan no coyoh a kitiraan malo fangcalayto. Tinakoen, itini i cinamalay a kilang masadak ko coyoh paˈaraw ci Mosian i, ora kitiraan malo fangcalayto a pala.—Kasadakan 3:2-5; Yosuwa 5:15.

6-7. (1) Mikitini Kasadakan 15:1, 11, samanay ci Mosi somowal to makoracay ko Kawas? (2) O maanan ko papatalipaˈelal to Israil tamdaw o makoracay ko Kawas? (Nengnengen ko papotalay coka.)

⁶ Mikerid ci Mosi to Israil tamdaw mitaˈlif to Kahngangay a Riyar ikor pasowalay cangranan, o Kawas nangra ci Yihofa o makoracay. (ˈOsien ko Kasadakan 15:1, 11.) O midokoay to masakenaay a makaniway a kawas a Icip a tamdaw cowa ka makorac, mahecaday ko Kanan tamdaw, samanen o pidoko nangra mahawpay ko tano wawaan a sapatoˈaya ato masakenaay kaacekan a maˈodangay. (Lifi 18:3, 4, 21-24; Limoˈot 18:9, 10) Kawra ci Yihofa cowa ka lecad to midokoan no roma tamdaw a makaniway a kawas, cowa ka pisaali Cingra to midokoay Cingranan a tamdaw midemak to malafoay demak, o malefotay a makoracay a Kawas Cingra. Sapatalipaˈelalaw to Israil tamdaw tonini, o taˈangayay saysi i kaˈayaw no tamohong a tadaekim a paya matiliday ko ‘oni Yihofa ko Makoracay’ sanay a sowal.—Kasadakan 28:36-38.

⁷ O pakaˈaraway to tadaekim a paya a tamdaw o mamafanaˈ to makoracay ci Yihofa. Kawra o cecay Israil tamdaw ano awaay ko toki pakaˈaraw toniya tadaekim a paya, cowa ko mamafanaˈ to o makoracay ci Yihofa han? O mamafanaˈ! O polong faˈinayan, fafahiyan ato wawa no Israil iraay ko toki mitengil to miˈosian no tamdaw a lalakaw no Rikec ni Mosi. (Limoˈot 31:9-12) Ano iraay kiso itiya, mamatengil iso ko ilaenoay a sowal: ‘Ci  Yihofa Kako o Kawas namo . . . Ka makorac kamo, samanen o makoracay Kako.’ ‘Itini pinengneng Ako ka padotoc kamo makorac, samanen Kako ci Yihofa o makoracay.’—Lifi 11:44, 45; 20:7, 26.

8. Mikitini Lifi 19:2 ato 1 Pitiro 1:14-16 mananam ita ko maanan?

⁸ Nengnengen ko miˈosian no tamdaw a cecay sowal no Rikec ni Mosi, onini a sowal maˈoningay i Lifi 19:2. Pasowalan ni Yihofa ci Mosi: “Palimoˈoten iso ko polong finawlan no Israil, pasowal cangranan: ‘Ka makorac kamo, samanen Kako ci Yihofa o Kawas namo o makoracay.’” Palimoˈot ci Pitiro to Krisciyang padotoc makorac i, misaka dademakay tonini a sowal alatek. (ˈOsien ko 1 Pitiro 1:14-16.) Paihkalay ko sowal ni Pitiro, soˈlin cowato ko mamidofdof kita to Rikec ni Mosi, kawra kakamayan mitoor to sowal no Lifi 19:2 a midemak. O makoracay ci Yihofa, polong maolahay Cingranan a tamdaw mamisaˈicel padotoc a makorac. O hatokel ita ano tatayra i kakarayan anca itini fafekang no sera milayap to midaˈocay ˈorip, mamisaˈicel mihaen to demak.—1 Pitiro 1:4; 2 Pitiro 3:13.

9. Micekiw to Lifi 19 fedengan pairaay to maanan a sapadama kitaanan?

⁹ Makalimay kita pakahemek to makoracay a Kawas, mansa makalimay sakafanaˈaw to sasamaan ko demak no niyah ngaˈ malo makoracay a tamdaw. Toniya pakayraan pafeliay ci Yihofa kitaanan to ihkalay a sakayat, ilalomaˈ no pina kalimlaan a lalakaw maˈoningay i Lifi 19 fedengan. O mikakingkiway to sowal no Hipray ci Markos Kalis sanay: “O Lifi 19 fedengan o komodan no Lifi a cudad alatek, hanaca o kalimlaan a fedengan no saˈayaway a lima no Fangcalay Cudad.” Sinanoten, o satapang no Lifi 19 fedengan sanay: “Ka makorac kamo.” Dotoc mamitadtad kita to ikoray a pina sinael, nengnengen sasamaan misaka dademak to ilalomaˈay a safalod i nokaˈorip.

10-11. O Lifi 19:3 somowalay to mamisamaan ko demak no mita? Mihaen ko demak hano kalimlaan?

¹⁰ Palimoˈotan ni Yihofa ko Israil tamdaw ka makorac ikor, dotoc sanay: ‘Kahacecay tamdaw kangodoen ko wama wina namo . . . Ci Yihofa Kako o Kawas namo.’—Lifi 19:2, 3.

¹¹ Tada kalimlaan konini a limoˈot, songilaˈen  ita midofdof. Kinacecayay, o cecay tamdaw milicayay ci Yisan: “O maan a ngaˈayay a demak ko dadoedoen ako ta ciˈorip kako to midaˈocay a ˈorip saw?” (Matay 19:16-19) Itini sapacaˈof masowalay ni Yis, o mamikangodo cingra to wama wina no niyah. Na mirikecan ni Yis ko Farisay ato pasifanaˈay to rikec a tamdaw, samanen miharatengay cangra to masakenaay a pakayraan, miliyas to ˈinorong a midimokos to wama wina. Mihaen cangra ‘o palasawaday to Kimad no Kawas.’ (Matay 15:3-6) O “Kimad no Kawas” mahawpay ko saka lima no moetepay a rikec, ato sowal i Lifi 19:3. (Kasadakan 20:12) Haratengen, maharek ci Yihofa pasowal to ‘ka makorac kamo, samanen ci Yihofa Kako o Kawas namo o makoracay’ ikor, tangsolay somowal to limoˈot no Lifi 19:3.

12. Sasamaan kita mitoor to sapalimoˈot no Lifi 19:3 a midemak?

¹² Sapidofdofaw to sapalimoˈot ni Yihofa, ngaˈay kita miharateng, ‘itini pikangodo to wama wina a pakayraan samanay ko demak ako?’ Ano cangoˈotay ko demak no niyah saan kiso miharateng, sasaˈicelen a misalof, soˈlin caka ngaˈay mifalic to isaˈayaway, kawra ngaˈay kiso misetek to falocoˈ, anini misatapang adihay ko midemakan saki wama wina. Ngaˈay kiso mipalak to adihayay toki malacafay cangranan alatek, itini nodafongan anca i nofalocoˈan padama cangranan, ngaˈayho padama cangranan padadotoc miingid ato midoko ci Yihofaan. Mihaen ko demak iso o midofdofay to sapalimoˈot no Lifi 19:3.

13. (1) O Lifi 19:3 somowalayho to maanan a limoˈot? (2) Mikitini Luka 4:16-18, itini maanan pakayraan ngaˈay kita pasayra ci Yisan minanam?

¹³ Pakayni makoracay, masowalay no Lifi 19:3 ko roma pakayraan, o Paselaˈan a Romiˈad a limasmas. Manaokaniw, cowa ko mamidofdof ko Krisciyang to Rikec ni Mosi, to lipalipay cowa ko mamidofdof to Paselaˈan Romiˈad. Kawra haratengen ita samanay ko Israil tamdaw midofdof to Paselaˈan Romiˈad, ato mikitini toniya limasmas malifokay nangra ko maanan a epoc, wa adihay ko mananamay. O Paselaˈan Romiˈad o mamisawad ko tamdaw to tayal paselaˈ hanaca o pidokoan to Kawas a romiˈad *, mansa itini Paselaˈan Romiˈad tayraay ci Yis i kasaˈopoan no Nacali miˈosi to Kimad no Kawas. (Kasadakan 31:12-15; ˈOsien ko Luka 4:16-18.) Palimoˈotay ci Yihofa i Lifi 19:13 sanay: ‘O dadoedoen ko paselaˈan Ako a romiˈad.’ Toniya sapalimoˈot miocoray kitaanan mitongal to toki midoko to Kawas. Itini tonini a pakayraan iraay ko sasalofen no niyah saan kiso han? Ano micerid kiso mipalak to toki mirienang to midokoay to Kawas a demak, ngangaˈay palahad to tangongolay a kalawidang ci Yihofaan, o kalimlaan no padotocay a makorac konini.

14. Misaliyaliyaway ko Lifi 19 fedengan somowal to maanan kalimlaan a kimad?

¹⁴ O Lifi 19 fedengan misaliyaliyaway somowal to cecay kalimlaan a kimad, ngaˈay padama kitaanan padotoc makorac. Saka 4 sinael saikor sanay: ‘Ci Yihofa Kako o Kawas namo.’ Oniya sowal kina 16 masadak ko malecaday sowal toniya fedengan, maharatengay ita ko saka cecay no moetepay a rikec: ‘Ci Yihofa Kako o Kawas iso . . . Edeng Kako, aka pitaˈong kiso to roma a Kawas.’ (Kasadakan 20:2, 3) O padotocay makorac a Krisciyang cowa ko mamisaareteng minengneng to kahacecay tamdaw anca romaroma demak ikaka to Kawas a kalimlaan. Roma i, malo Misawacayay Tamdaw ni Yihofa, mamisetek kita to falocoˈ  eca ka pidemak to pakangodoay anca pakaditay to fangcalay ngangan no Kawas a demak. —Lifi 19:12; Isaya 57:15.

15. Midotim to Lifi 19 fedengan milingatay to patoˈayaay a sinael padama kitanan makalim samaan ko pidemak hani?

¹⁵ O Israil tamdaw ano mihayi to o Kawas nangra ci Yihofa i, o mamidofdof to rikec Ningra. Sowal no Lifi 18:4: ‘Ka pidoedo kamo to limoˈot Ako, midofdof to rikec Ako, mitoor a midemak. Ci Yihofa Kako o Kawas namo.’ O Lifi 19 fedengan mahawpay ko pina ‘rikec,’ tinakoen 5-8, 21, 22 sinael milengoay to milingatay to patoˈayaay a limasmas, ano patoˈaya ko Israil tamdaw i, cowa ka ngaˈay pakadit to fangcalay dafong ni Yihofa. Midotim to safalod nonini a sinael, padamaay kitanan makalim mitoor to misowalan no Hipray 13:15, tano mihaydaan ni Yihofa a pakayraan, tano sapakahemek a sapatoˈaya patafang Cingranan.

16. O manan a safalod no Lifi 19 fedengan pasifanaˈay kitanan, o midokoay to Kawas a tamdaw o mamafafidaˈ to cowa ka pidoko to Kawas a tamdaw?

¹⁶ Mamalo makoracay a tamdaw caay ko mamatalaw kita eca ka malecad to ˈalomanay tamdaw. Mihaen ko demak cowa ko madoloay alatek, samanen nolatekay cafay micudad, cafay misasingdi, cowa pidoko to Kawas a paro no lomaˈ anca roma tamdaw, pacieciay kitanan midemak to cowa ka tatodong to Krisciyang a demak alatek, itini toniya pakayraan o mamipiliˈ kita. O maanan ko papadama kitaanan hani? O Lifi 19:19 mahawpay ko cecay a safalod, sanay: “Aka ka cirikoˈ kamo to masasiromaay ko keliw a rikoˈ.” Onini a rikec ngaˈay pafafidaˈ to Israil tamdaw ato taliyokay a ˈalafang a tamdaw. Manaokaniw anini cowa pisafelit kita to tamdaw micaˈedong to masasiromaay ko keliw a rikoˈ, tinakoen pacacamolen ko palomaan a takomod ato misangaˈan no tamdaw a keliw a rikoˈ. Kawra o pihakelongan ato waywayan no tao misafelitay to safalod no Fangcalay Cudad, soˈlin o cafay ita micudad cangra, cafay misasingdi anca salawina, cowa ka ciharateng kita malecad cangranan. Manaokaniw, maolahay kita to paro no lomaˈ ciharatengayho to itihiay a tamdaw, kawra itini kalimlaan a demak, malo finawlan ni Yihofa makahiay kita eca ka malecad to ˈalomanay tamdaw. Haratengen, o tatodong no makoracay iraay ko pafafidaˈ malo no Kawas sanay a tatodong. Ano makalimay kita malo makoracay a tamdaw, mamisaˈicel mihaen ko demak. —2 Korinto 6:14-16; 1 Pitiro 4:3, 4.

17-18. Mikitini Lifi 19:23-25 mananam ita ko maanan kalimlaan a kimad?

¹⁷ ‘Ci Yihofa Kako o Kawas namo’ oniya sowal patalipaˈelalay to Israil tamdaw, o sasaaretengen nangra i o kalalaˈed no niyah aci  Yihofaan. Itini Lifi 19:23-25 mitadtaday to ngaˈayay cangra samaan ko demak. (ˈOsien.) Micomod ko Israil tamdaw i Mikiˈokan no Kawas a Sera ikor, ano paloma to cilosayay a kilang, o heci no kilang i satapang no tolo miheca cowa ka ngaˈay kaenen, o polong a losay no saka sepat miheca papatafangen ci Yihofaan, tahira i saka lima miheca ngangaˈay cangra komaen to losay no kilang. Oniya rikec pacipinangay to Israil tamdaw, o sasaaretengen nangra minengneng cowa ko sakangaˈay no niyah. Papakasoˈlin cangra to mamidimokos ci Yihofa to sakaˈorip nangra, o pidoko ci Yihofaan o sakakaay kalimlaan. Pakalalokan ni Yihofa cangra hinapaladaˈ a pakiyaho, o mipanayan patayraen i pidokoan Cingranan a kitiraan. O ngangaˈay rihaday ko Israil tamdaw, cowa ko papacahiwen ni Yihofa cangra.

¹⁸ O sarikec no Lifi 19:23-25, papiharatengay kitanan to sowal ni Yis Pasifanaˈ i Lotok, sanay cingra: ‘Aka to . . . macariraw to komaen to maanan, minanom to manan.’ Sanayho cingra: ‘O misaalian namo kihcod a dafong, mafanaˈay ko kakarayan a Wama namo.’ Midipotan ni Yihofa ko ˈayam, o mamidipot kitaanan. (Matay 6:25, 26, 32) Masongilaˈay ko pakasoˈlin ita tonini. Itini tekedan papadama kita to misaaliay a salikaka, makahiho pakiyaho i kasakopang. Hinapaladaˈ kita, caay ko mamapawan ci Yihofa, papacoˈay Cingra kitaanan. (Matay 6:2-4) Mihaen ko demak ita paihkalay to cipinangay ko niyah to kalimlaan no Lifi 19:23-25 a kimad.

19. Onini a lalakaw mitadtaday to pina sinael no Lifi 19 fedengan, mikitini mananam iso ko maanan?

¹⁹ Maharek mitadtad to sinael no Lifi 19 fedengan ikor, mahapinangay ita itini maanan a pakayraan padadotoc makorac. Misaˈicel kita makorac i polong no demak, o mitodongayto ci Yihofaan. (1 Pitiro 1:15) ˈAlomanay cowa ka pidoko ci Yihofaan a tamdaw maˈaraway ko ngaˈayay a waywayan ita, ilalomaˈay a tamdaw matemeray ko falocoˈ panokay to ˈdil i Kawas. (1 Pitiro 2:12) Kawra itini Lifi 19 fedengan adihayay ko odoˈ ngaˈayay kadkaden. Dotoc lalakaw mamilengo to roma sinael, nengnengen ita itini maanan a pakayraan malecad to sapalimoˈot no tarokos ci Pitiro, malo makoracay a tamdaw.