1-2. (1) Palimoˈotan ni Yihofa ko tatoloay tarokos sasamaan ko demak? Midofdofan nangra konini a limoˈot han? (2) Onini a lalakaw mamilengo to maanan?

ITINI Kongyen 32 miheca ikor no Pitaˈlifan a Lisin, tarokos ci Pitiro, Yakop aci Yohani maˈaraway ko kasapaan a mapolosi. Itini ˈakawangay a lotok, itiniay i cecay pala no Hirmon a lotok, mafalicay ko tireng ni Yis i kaˈayaw nangra, ‘mato cidal a maˈdil ko pising ningra, mato likat a tomeliˈ ko rikoˈ ningra.’ (Matay 17:1-4) Maharek konini a mapolosi i, matengilay no tarokos ko sowal no Kawas: ‘O wawa Ako konini, o kaolahan Ako, o mihaydaan Ako. Ka pidofdof kamo cingranan.’ (Matay 17:5) Hakelong no kaˈorip no tarokos soˈlinay mihaen ko demak, makalimay kita mitodong to taˈarawan nangra.

² Malengoay no fafekangay lalakaw, tengilen ko ngiha no ngaˈayay pakaenay ci Yis, tatodong i aka to piliyaw midemak to pina a demak. Onini a lalakaw mamilengo, palimoˈotan ni Yis o dademaken ita tosa a demak.

3. Mikitini Matay 7:13, 14, sasamaan ko pidemak ita hani?

³ ˈOsien ko Matay 7:13, 14. Sowal ni Yis iraay ko tosa fawahan o tatayra i tosa cowa ka lecad a lalan, o cecay i o “kakahaday” a lalan, o cecay i o “kaemingay” a lalan, awaayto ko saka tolo a lalan. Wa itini kita toniya tosa a lalan mipiliˈ, oniya pipiliˈ tada kalimlaan, samanen ano matatodong ko mipiliˈan, ngangaˈay kita milifok to midaˈocay a ˈorip.

4. O “kakahaday” a lalan o masamanay a lalan hani?

 ⁴ Haharatengen ita onini tosa a lalan cowa ka lecad. O “kakahaday” a lalan madoloay a rakaten, mansa maolahay ko ˈalomanay. Kaadayayan i, ˈalomanay tamdaw mipiliˈay tonini a lalan mihakelong to ˈalomanay a romakat, kawra cowa ka fanaˈ to maolahay ci Satan romakat ko tamdaw tonini a lalan. ˈArawhan o saka patay a lalan. —1 Korinto 6:9, 10; 1 Yohani 5:19.

5. Sapikilimaw ko roma tamdaw ato romakat tonini a “kaemingay” a lalan, mihadakay to maanan a ˈicel?

⁵ Masafelitay, o roma a lalan i “kaemingay.” Sowal ni Yis pakahelaay tonini a lalan a tamdaw cowa ka ˈaloman, misamaanay hani? Sinanoten, i dotoc a sinael patalipaˈelalay ci Yis to nisawawaan miliyas to makaniway a pairasolay. (Matay 7:15) Tonini a hekal adihayay ko pihakelongan, hanaca o soˈlinay kimad ko sapasifanaˈ no niyah sanay. Mansa maohotay ko ˈalomanay tamdaw, matoleday ko falocoˈ, telocto cato kakahi mikilim to sakaciˈorip a lalan. Kawra soˈlinay i, ngaˈayay mahela konini a lalan. Sowal ni Yis: ‘Micerid kamo mitoor to sowal ako a midemak, o soˈlinayto a nisawawaan ako, o mamafanaˈ kamo to soˈlinay kimad, papasalaten no soˈlinay kimad kamo.’ (Yohani 8:31, 32) O mahaenay ko pakayraan iso. Cowa ka maˈalol no tapelik, ao misaˈicelay mikilim to soˈlinay kimad. Misarocod kiso minanam to Kimad no Kawas, cipinangay to saali Ningra to tamdaw, hanaca misaˈicel midofdof to sapasifanaˈ ni Yis. Tinakoen, mananamay iso makalimay ci Yihofa mifalah kita to kimad no mararaway pihakelongan, ecato pisalisin to milingatay to lisin no mararaway pihakelongan. Mananamayho iso, sapitooraw to saali ni Yihofa, ecato pidemak to kapiliˈan Ningra a demak, pairaay to sapalifet. (Matay 10:34-36) Sapifalicaw cowa ko madoloay alatek, kawra cowa ka pisawad kiso, samanen maolahay kiso to kakarayan a Wama ci Yihofaan, makalimay pakahemek Cingranan. Mihaen kiso a misaˈicel, maedeng o mamaliko ci Yihofa tisowanan!—Taneng 27:11.

6. Mikitini i ˈOlic 119:9, 10, 45, 133, o maanan ko papadama kitaanan materek i “kaemingay” a lalan?

⁶ Romakat to kita i “kaemingay” a lalan i, sasamaan materek tonini a lalan hani? Haratengen ko cecay sapatinako: Itini kaemingay kincoay a lalan no lotok itatihi iraay ko ˈadipel. Onini a ˈadipel ngaˈayay midipot to parakatay to tosiya a tamdaw, hoeca ka pingata to ngapad anca materak i ngapad. Mihaenay, o parakatay a tamdaw cowa ka ngaliwngiw to miˈimeray ko ˈadipel to pasalat nangra. O patirengan ni Yihofa a palinian i Fangcalay Cudad malecaday o ˈadipel ngaˈay a midipot kitaanan, padama kitaanan materek i sakaˈorip a “kaemingay” a lalan.—ˈOsien ko ˈOlic 119:9, 10, 45, 133.

7. Kaemangay tamdaw o sasamaan ko pinengneng to misowalan ni Yis a “kaemingay” a lalan hani?

⁷ Kaemangay tamdaw, latekay pakidemay ko palinian ni Yihofa sanay kiso miharateng han? Makalimay ci Satan mahaen ko harateng iso. Oya romakatay i “kakahaday” a lalan a tamdaw hato lipahakay nengnengen, makalimay ci Satan micerid kiso ciharateng to o maanan ko demak nangra. Papiharateng cingra tisowanan o cafay iso micudad ato maˈaraway iso i wangcan a tamdaw ikakaay ko ngaˈay no kaˈorip tisowanan, kawra o palinian ni Yihofa micaraay tisowanan lipahak ko kaˈorip. *  Haratengen, cowa ka olah ci Satan mafanaˈ ko tamdaw to tatalacowa ko tolas no “kakahaday” a lalan. Kawra maharekayto ci Yihofa ihkal pasowal tisowanan, ano materek kiso i “kaemingay” a lalan, o aira ko ˈodingaray a hanoikor.—ˈOlic 37:29; Isaya 35:5, 6; 65:21-23.

8. O kaemangay tamdaw mikitini i taˈarawan ni Awlaf ngaˈay mananam ko maanan hani?

⁸ Nengnengen ita ko nalifetan no salikaka ci Awlaf. * ˈAlomanay cafay micudad miowingay ci Awlafan madadiˈi to tao, kawra mitadtaday cingra Misawacayay Tamdaw ni Yihofa mitooray to palinian no Fangcalay Cudad a maˈorip, cowa kangaˈay mihaen to demak. Matengil no roma fafahiyan cafay micudad ko sowal ningra, mihalakaay mikayhid cingranan, kawra tanektekay cingra minaˈay. Roma i, misiˈayawayho ci Awlaf to roma saroero. Sanay cingra: “Pasowalay ko singsi takowanan micangacang to ˈakawangay picudadan, mihaen ngaˈ misaareteng ko tao minengneng takowanan, pasowalayho ano awa ko ˈakawangay picudadan ako, caka hela ko ngaˈayay a  tayal, papasangar ko kaˈorip.” O manan ko padamaay ci Awlafan micoˈay to saroero hani? Sanay cingra: “Iraay ko papina ngaˈayay a widang ako i kasakopang, malecaday o paro no lomaˈ ako cangra. Misatapangay kako misarocod a minanam to Fangcalay Cudad, misarocod kako minanam i, matongalay ko pakasoˈlin to o soˈlinay kimad ko mananamay no niyah. Orato misetekay ko falocoˈ ako patafang to tireng micada to paputisem!”

9. Sasamaan ko demak ita ngaˈ ngaˈay materek i sakaˈorip a lalan?

⁹ Makalimay ci Satan miliyas kita to sakaˈorip a lalan, malacafay to ˈalomanay romakat i “sakalaˈafo” a lalan. (Matay 7:13) Kawra ano padadotoc kita midofdof ci Yisan, hanaca minengneng tonini kaemingay a lalan o sapidipot kitaanan, mihaen ngangaˈayto padotoc materek tonini a lalan. Dotoc, nengnengen ita ko misowalan ni Yis o dademaken ita roma a demak.

10. Mikitini Matay 5:23, 24, somowalay ci Yis mamidemak kita to maanan?

¹⁰ ˈOsien ko Matay 5:23, 24. Itini sinael somowalay ci Yis pakayni Yutaya tamdaw to cecay kalimlaan kitiraan. Haratengen hena, ira ko cecay tamdaw tayni i fangcalay sefi, tiya papafeli to sapatoˈaya i saysi a tatokian, fahal sa maharateng ko cecay salikaka iraay ko katatiihan no falocoˈ cingranan. Toniya tatokian terek hananay ningra ko sapatoˈaya i fangcalay sefi, salakatay midemak to cecay demak. O maanan a demak hani? Iraay ko maanan ikakaay ko kalimlaan to patoˈaya ci Yihofaan hani? Sanay ci Yis: ‘Ta tayraho toya salikaka a mararihaday.’

11. Samanay ci Yakop mararihaday ci Isauan hani?

¹¹ Pakayni mararihaday, ngaˈay kita mikitini nalifetan no ˈaˈideman no ngasaw ci Yakop adihay ko mananamay. Miliyas ci Yakop to nalacolan maedeng 20 miheca ikor, pakaynian no Kawas i coyoh palimoˈot cingranan minokay. (Satapangan 31:11, 13, 38) Kawra o pasangaray i, o kaka ni Yakop ci Isau na sapipatayaw cingranan. (Satapangan 27:41) Tada matalaway ci Yakop, calemcemay kamayanho ˈinteh ci Isau cingranan. (Satapangan 32:7) Samaanay cingra mararihaday to kaka hani? Salakat, fanekfekay cingra mitolon ci Yihofaan. Dotoc, pafeliay cingra to adihayay sapatelong i kaka. (Satapangan 32:9-15) Saikor, maˈaraw ningra ko kaka talaˈayaway paihkal to mangodoay harateng, pasayra i kaka a mitaˈong, cowa ka kinacecay kinatosa aca, ao kina pitoay. Tada misapoeneray ci Yakop, mikangodoayho to kaka, mansa mararihadayayto tatosa a malikaka.—Satapangan 33:3, 4.

12. Mikitini taˈarawan ni Yakop mamananam ita ko maanan?

¹² O midemakan ni Yakop itini ˈayaw ato ikor no miˈaraw to kaka ngaˈayay nanamen ita. Misapoeneray ci Yakop pasayra ci Yihofaan micangacang to sapadama, dotoc midemakay to matatodongay a demak, misarocod pairato lipahakay itini kalalitemohan nangra a tatokian. Masasoˈarawto i, ci Yakop aci Isau cowa ka lacongis to cima ko mararaway, samanen o patosokan ningra i, o mararihaday. Sasamaan kita mitodong to taˈarawan ni Yakop hani?

13-14. Ano pakararaw kita to salikaka, sasamaan ko pidemak hani?

¹³ Ano makalimay kita materek i sakaˈorip a lalan, o mamararihaday to salikaka. (Loma 12:8) Ano mahapinang ita pakararaway ko niyah to tao, sasamaanto hani? Papalecaden ita ci Yakop fanekfek a mitolon ci Yihofaan,  micangacang Cingranan padama kitaanan miliyaw a malakangaˈay to salikaka.

¹⁴ Wa ngaˈay kita milomal to niyah, licayen ko niyah to pina salicay, tinakoen: ‘Wa makahi kako misakahemaw to niyah, misapoener a miliˈay, mararihaday to salikaka han? Ano talaˈayaw kako mihaen to demak, sasamaan ko harateng ni Yihofa aci Yis hani?’ Miharateng kita toniya salicay, wa irato ko ˈicel midofdof ci Yisan, paihkal to misapoeneray, talaˈayaw mararihaday to salikaka. Itini tonini a pakayraan, ngaˈayay todongen ita ko taˈarawan ni Yakop.

15. Mitoor to sowal no Ifiso 4:2, 3 a midemak, hano papadama kitanan malakangaˈay to salikaka hani?

¹⁵ Haratengen hena, ano malalitemoh ci Yakop aci Isau i, pakayni sanengseng no niyah malacongis to cima ko mararaway, mamaharateng to sasamaan ko teloc. Mihaenay, ano mararihaday kita to salikaka i, pairaen ko misapoeneray a waywayan. (ˈOsien ko Ifiso 4:2, 3.) Itini Taneng 18:19 sanay: ‘Mapakararaw ko salikaka, saka rarihadayaw i, ikakaay ko pasangar to pilowid to niyaroˈ, ira ko lacongis i, eca ka saysayen, malecaday o sataeta no fawahan.’ Ano misapoener kita a miliˈay, wa ngaˈayto mifohat to ‘sataeta no fawahan,’ ho makahi ko tao malakangaˈay kitaanan.

16. O mamisongilaˈ kita miharateng to maanan hani? Misamaanay?

¹⁶ Oha mamisongilaˈ kita miharateng o maanan ko hasowal no niyah, ato sasamaan a somowal. Maharek kita miharateng tatalaˈayaw a mikilim to pakararawan ita a tamdaw, hanaca o patosokan ita o mamisarocod a mitapid to pairaan no niyah a dokaˈ. Satapang aca coka ngaˈay tengilen ko sowal no tao alatek, ano tangsol kita maketer, anca paˈading to niyah, ngangaˈay masaysay ko lacongis han? Maedeng cato ka ngaˈay. Haratengen, mararihaday to salikaka ikakaay ko kalimlaan to o cima ko matatodongay cima ko mararaway.—1 Korinto 6:7.

17. Mikitini ci Ciepotean o maanan ko mananamay no miso?

¹⁷ O salikaka ci Ciepote o ngaˈayay a taˈarawan to misaˈicelay micowat to rihadayay. Sanay cingra: “Cecay liyad o kalalaˈed ako ato fafahiyan wawa adihayay ko pasangaray. Itini tosa mihecaan a tatokian, misaˈicelay kako mikifalocoˈ rihaday a masasowal cingranan, sapiliyawaw malakangaˈay cingranan.” Midemakayho ci Ciepote to maanan hani?  Sanay cingra: “ˈAyaw no masasowal to wawa mitolonayho kako, hanaca maharek misaday i falocoˈ, soˈlin caka ngaˈay tengilen ko sowal ningra, coka tangsol maketer kako, ao misododay cingranan. Mananamay ako caka lacongis to cima ko matatodongay cima ko mararaway, mafanaˈay kako o ˈinorong no niyah i, misaˈicel miliyaw malakangaˈay to fafahiyan a wawa.” Samanayto ko minaroˈan hani? Sanay cingra: “Mararihadayayto kako ato paro no lomaˈ, mansa tada rihadayay ko falocoˈ ako.”

18-19. Ano pakararaw kita to tao i, mamisetek to falocoˈ samaan ko pidemak? Misamanay?

¹⁸ Ano mahapinang iso pakararaway ko niyah to cecay salikaka, mamisetek to falocoˈ samaan ko pidemak hani? Tooren ko sowal ni Yis misarocod mararihaday. Wa ngaˈay kiso pakayni tonini a demak mitolon ci Yihofaan, hanaca micangacang Cingranan pafeli to fangcalay saocor tisowanan. Misaˈicel kiso micowat to rihadayay, o midofdofay to sowal ni Yis, o mamilifok to soˈliˈlinay a lipahak.—Matay 5:9.

¹⁹ Tada miakoˈiday kita pakaynien ni Yihofa i ‘fafongohan no kasakopang’ ci Yis Kristo mikayat kitaanan. (Ifiso 5:23) Nanay malecad kita to tarokos ci Pitiroan, ci Yakop aci Yohanian, misetek to falocoˈ hakelong no kaˈorip midofdof ci Yisan. (Matay 17:5) Mananamay ita sasamaan mararihaday to pakararawan ita a salikaka. Misaˈicel kita mihaen to demak, hanaca materek i sakaˈorip a lalan, adihay ko mamalifok a sapalemed anini, noikor iraho ko awaay ko tolas a sapalemed.