1-2. (1) Mikitini fafekangay a lalakaw mananamay ita ko maanan? (2) Onini a lalakaw mamilengo to maanan?

ITINI fafekangay a lalakaw, mananamay ita ko ciepocay a safalod no Lifi 19 fedengan. Tinakoen itini Lifi 19:3, palimoˈotan ni Yihofa ko Israil tamdaw mikangodo to wama wina. Anini o sasaka dademaken ita ko malecaday a safalod, misongilaˈ midimokos to tireng, nafalocoˈan ato noˈadingoan a saali no wama wina. Malecaday a sinael somowalay to kalimlaan ko pidofdof to Paselaˈan Romiˈad, soˈlin cowato ko mamidofdof ko Krisciyang to Paselaˈan Romiˈad, kawra o mamicerid milimasmas to toki midoko to Kawas. Saka dademaken ita ko mananamay, o mitooray to sowal no Lifi 19:2 ato 1 Pitiro 1:15, misaˈicel padadotoc a makorac.

² Onini a lalakaw mamilengo to roma kalimlaan no Lifi 19 fedengan, mahawpay samaan ko picada to masamoˈay ko tireng a tamdaw, sasamaan itini misasingdiay a demak mitafo to soˈliˈlinay a falocoˈ, ato sasamaan maolah to tao. O makoracay ko Kawas, mansa makalimay kita malo makoracay a tamdaw. Dotoc songilaˈen ita minanam konini a lalakaw.

3-4. Mikitini Lifi 19:14, o sasamaan ko picada no Israil tamdaw to madoˈengay ato mapohaway a tamdaw?

³ ˈOsien ko Lifi 19:14. Misaaliay ci Yihofa to finawlan Ningra ngaˈay ko picada to masamoˈay ko tireng a tamdaw. Tinakoen, palimoˈotan Ningra ko Israil tamdaw ‘aka piˈkak to madoˈengay a tamdaw,’ tatodong nonini aka piroero to madoˈengay a tamdaw anca somowal to mariˈangay a  sowal cangranan. Tada tatiihay ko hatiniay a demak! Samanen cowa ka pakatengil ko madoˈengay a tamdaw, awaay ko pakayraan paˈading to niyah.

⁴ Itini 14 sinael, palimoˈotanho no Kawas ko finawlan ‘aka pitenaˈ to lalan no mapohaway a tamdaw.’ O cecay cudad sanay, itini taliyok no Israil a pala nolitengan, o masamoˈay ko tireng a tamdaw marariday ˈafasen anca masamsamay. O romaroma cangoˈotay ko siniˈada a tamdaw padetengay midokaˈ anca mikalona to mapohaway a tamdaw, miteli to sapitenaˈ i kaˈayaw nangra. O hatiniay a waywayan tada mariˈangayto! Mansa, milasil ko Kawas to rikec i Lifi 19:14, o papadama to Israil tamdaw cipinang o sasiniˈada cangra to malonayay a tamdaw.

5. Sasamaan kita paihkal to siniˈadaay a falocoˈ i masamoˈay ko tireng a tamdaw?

⁵ Tada siniˈadaay ci Yis to masamoˈay ko tireng a tamdaw. Kinacecayay, mitahidangay cingra to tamdaw pasowal to paputisemay a Yohani to nano demak ningra, saan: ‘Pakaˈaraw ko mapohaway, romakat ko mapiˈiway, maadah ko ciadadaay to fanges, pakatengil ko madoˈengay, patikol maˈorip ko mapatayay.’ Maˈaraw no ˈalomanay tamdaw ko kafahkaan a demak ni Yis pakahemekay to Kawas. (Luka 7:20-22; 18:43) Sapitodongaw kita ci Yisan, mihaenay tatano sidaˈitay, patado miharateng, mihadidi micada to masamoˈay ko tireng a tamdaw. Soˈlin cowa pafeli ci Yihofa kitaanan to kafahkaan a ˈicel miadah to tamdaw, kawra wa ngaˈay kita pasowal to tamdaw to pakayniay faelohay hekal a ngaˈayay lihaf, padama to mapohaway tamdaw ato cowa pakaˈaraw to tedi no soˈlinay kimad a tamdaw cipinang, noikor polong a tamdaw papatikol a tanektek ko tireng, aira ko ngaˈayay kalawidang ci Yihofaan. (Luka 4:18) Matengil no ˈalomanay tamdaw konini a ngaˈayay lihaf, mikifalocoˈay a pakahemek to Kawas.

6. O lalakaw no Lifi 19 fedengan samaanay padama kitaanan matongal ko kacipinang to Moetep a Rikec?

⁶ Itini pina sinael no Lifi 19 fedengan mitongalay mitadtad to lalakaw no Moetep a  Rikec. Tinakoen, o saka falo kantangay somowal: ‘Aka pitakaw.’ (Kasadakan 20:15) Mansa mihaen ko harateng no roma tamdaw, ano eca ka haeminen nangra miala ko dafong no tao, o midofdofayto tonini a sarikec sanay, kawra itini roma pakayraan misafelitay cangra tonini a sarikec.

7. O cecay misasingdiay tamdaw itini maanan pakayraan misafelitay to saka falo a sarikec alatek?

⁷ Tinakoen, o cecay misasingdiay tamdaw cowa ka piala ko niyah to dafong no tao saan miharateng, mihaenay caay ka pitakaw sanay. Kawra misasingdi cingra samaanay hani? Sowal no Lifi 19:35, 36 saan: “Ano o pifakeciwto, ano o pitingtingto, ano o pilatangto i, aka pisafanaˈ.” Mihaenay, ano cowa ko matatodongay a sapitingting ato sapilatang ko sapilipalaw no misasingdiay to lafang, malecaday o mitakaway. Nengnengen ita ko roma sinael no Lifi 19 fedengan, mamatongal ko kacipinang tonini.

8. (1) O Lifi 19:11-13 hano ngaˈay padama to Israil tamdaw misaka dademak to safalod saka falo a sarikec? (2) Mikitini mananam ita ko maanan?

⁸ ˈOsien ko Lifi 19:11-13. Satapang no 11 sinael “aka pitakaw,” kawra saka 13 sinael palalitingay to mitakaway ato makaniway a waywayan misasingdi, saan ‘aka milipalaw.’ Mihaenay, ano milipalaw ko misasingdiay tamdaw to tao, malecaday o mitakaway. O saka falo no Moetep a Rikec o mararaway ko mitakaway sanay, o lalakaw no Lifi padamaay to Israil tamdaw cipinang sasamaan a misaka dademak to safalod nonini a sarikec. O mamisongilaˈ kita miharateng to pinengneng ni Yihofa to milipalaway ato mitakaway. Ngaˈayay licayen ita ko niyah: ‘Maharek kako miasip to Lifi 19:11-13, mahapinangay ako itini kaˈorip no niyah, mangalef itini misasingdiay ato katayalan, iraay ko sasalofen han?’

9. O saˈosi no Lifi 19:13 pairaay to maanan sadipot to mawmahay tamdaw?

⁹ Miciyaay to tao matayal a Krisciyang mamisinanotho to roma pakayraan. Itini Lifi 19:13 sanay: “Aka panayaren ko pipalifon to matayalay iso a tamdaw to cecacecay aca a dadaya.” Nolitengan a Israil ono mawmahay a lekakawa, o lifon no mawmahay toya romiˈad misaˈosito. Sowal ni Yihofa: ‘O manikaway cingra, o sakaˈorip ko lifon.’ (Limoˈot 24:14, 15; Matay 20:8) Ano panayaren no tawki ko lifon, o mawmahay ato paro no lomaˈ ningra o mamacahiw toya romiˈad.

10. Mikitini Lifi 19:13 ngaˈay mananam ita ko maanan?

¹⁰ Anini, o lifon no ˈalomanay tamdaw cowa ko pakaromiˈadan a misaˈosi, ao pakafoladan anca cecay folad kinatosa misaˈosi, kawra o safalod no Lifi 19:13 o sasinanoten no mita. O roma tawki misamsamay to mawmahay, mimingay ko sapalifon cangranan, samanen awaay ko papiliˈen no mawmahay, itira sanay cingranan matayal. O hatiniay a demak malecaday o miˈafasay to lifon no mawmahay, caay kangaˈay mihaen ko demak no Krisciyang! Dotoc, nengnengen ita ngaˈayho mikitini Lifi 19 fedengan mananam ko maanan.

11-12. Misaka dademak ci Yis to Lifi 19:17, 18 pakayniay i sapitadtadaw to maanan?

¹¹ Mikitini Lifi 19:17, 18. (ˈOsien.) Ngaˈay mahapinang ita, coko pisaali aca no Kawas kitaanan aka midokaˈ to tao, palimoˈotayho kitanan ‘kaolah to tao malecad o kaolah to niyah.’ Ano sapakahemekaw kita to Kawas, o mamihaen ko pidemak.

¹² Mitadtaday ci Yis to kalimlaan no Lifi 19:18. Kinacecayay, o cecay Farisay a tamdaw milicayay cingranan: ‘Itini sarikec o maanan a limoˈot ko sataˈangayay hani?’ Sanay ci Yis  ‘sataˈangayay, sakalimlaan a limoˈot’ i, ‘eminen ko falocoˈ, eminen ko harateng, tano polong no ˈorip a maolah ci Yihofaan,’ ikor misaka dademakay cingra to Lifi 19:18 a sinael, sanay: Saka tosa malecaday, ‘kaolah to tao malecad o kaolah to niyah.’ (Matay 22:35-40) Paihkal to olah i tamdaw adihayay ko pakayraan, mikitini i Lifi 19 fedengan ngaˈay mananam ita ko pina a pakayraan.

13. O pakayraan ni Yosif a dademak hano malecaday to Lifi 19:18 han ko sowal?

¹³ O roma pakayraan ita paihkal to olah i tao, o mitooray to limoˈot no Lifi 19:18 a midemak. Sanay ko sinael: ‘Aka miˈodis, aka ˈinteh ko falocoˈ to tao.’ O roma tamdaw ˈintehay ko falocoˈ to cafay matayal, cafay micudad, salawina anca paro no lomaˈ, mangalef halafinay maketer ko harateng. O moetepay kaka ni Yosif na mihaenay ko demak cingranan, sapipatayawho cingranan. (Satapangan 37:2-8, 25-28) Kawra ci Yosif cowa ka tano mariˈangay ko sapatikol to mariˈangay, tiya ira ko ˈicel ningra miˈodis i, makahiay cingra misodod. Cowa ka ˈinteh ko falocoˈ ni Yosif, o pakayraan ningra dademak malecaday to Lifi 19:18.—Satapangan 50:19-21.

14. Anini hano mamitoor kita to safalod no Lifi 19:18 a midemak hani?

¹⁴ Cowa ka ˈinteh ci Yosif anca miˈodis to kaka, ao misododay cangranan, patirengay to ngaˈayay taˈarawan no aniniay Krisciyang. Ano makalim kita pakahemek ci Yihofaan, pasayra ci Yosifan minanam. Wa ngaˈayho kita mikitini taˈarawan a satolon ni Yis mihapinang to mamisodod to pakararaway kitaanan a tamdaw. (Matay 6:9, 12) Palimoˈotay ko tarokos ci Pawlo to Krisciyang sanay: ‘Kanonoˈan a widang, aka o niyah ko miˈodis.’ (Loma 12:19) Sanayho cingra: ‘Ano iraira ko katatiihan no falocoˈ no nima namo i cimaanan i, kasasihepol, mikifalocoˈ a masasisodod.’ (Kolosay 3:13) O safalod ni Yihofa cowa ka mafalic, mihaenay o tatooren ita ko safalod no Lifi 19:18 a midemak.

15. Eca ka ˈinteh ko falocoˈ hano masakalimlaan? Tano sapatinako mitadtad.

¹⁵ Ano pakararawen no tamdaw ato soˈlinay a dokaˈ malecaday sanay ko piharateng, o  roma cowa ka samaan, o roma i pakidemay. Tinakoen, ano mifohat kita to tikami i, caka pinaˈon makeritay ko tarodoˈ, soˈlin adadaay, kawra kahnayay maadah. Ikor no tosa romiˈad, icowaay koya dokaˈ caayto ka harateng ita alatek. Malecaday, o macadaay ita a pipakararaw cowa ka samaan, tinakoen cowa ko padetengan no tao a sowal ato midemakan mimingay ko pidokaˈ kitaanan, kahnayay kita misodod cangranan. Roma pakayraan i, ano tangongol ko pidokaˈ, misaaliay to tatapiden ato tatafoen. Ano tatefing han ita kora dokaˈ, mamatongal kora dokaˈ. Kaadayayan i, o roma tamdaw micada to pakidemay a pakararaw i, haharateng sanay to hakowaay ko kasomad no niyah, hakowaay ko taˈangay no dokaˈ. Mihaen ko demak nangra malecaday o mitatefingay tora dokaˈ, o mamitongal to roray no niyah. Soˈlinay i, ano tooren ko limoˈot no Lifi 19:18 a midemak coko aikaka ko kangaˈay han?

16. Mikitini Lifi 19:33, 34, o Israil tamdaw sasamaan micada to pacarcaray a ˈalafang tamdaw? Mananamay ita ko maanan?

¹⁶ Palimoˈotan ni Yihofa ko Israil tamdaw kaolah to tao malecad o kaolah to niyah, cowa ko finawlan aca ko kakaolahen nangra. Soˈlinay i, o mamaolah ko Israil tamdaw to ˈalafang a tamdaw, Lifi 19:33, 34. (ˈOsien.) Ihkalay mitadtad konini. Sanay ko sinael, o kakangaˈayen nangra micada ko ˈalafang a tamdaw, o picada to ˈalafang a tamdaw “malecad o picada to finawlan,” “maolah cangranan” malecad o kaolah to niyah. Tinakoen, saˈosi no rikec o mamihayi ko Israil tamdaw to manikaway a tamdaw ato ˈalafang a tamdaw mipodpod to maˈosaway a pinaloma. (Lifi 19:9, 10) Anini, o mamisaka dademak ko Krisciyang to malecaday a safalod. (Luka 10:30-37) Itini icowacowa pala adihayay ko pacarcaray a tamdaw, itini kilac ita ˈalomanay alatek. Ano o mananto ko tireng ato mihecaan nangra, o kakangodoen ita cangra.     

17-18. (1) O Lifi 19:2 ato saka 1 Pitiro 1:15 pakalalokay kitanan midemak to maanan? (2) Tarokos ci Pitiro pakalalokay to Krisciyang midemak to maanan kalimlaan a tayal?

¹⁷ Lifi 19:2 ato saka 1 Pitiro 1:15 palimoˈotay to finawlan no Kawas padadotoc a makorac, o Lifi 19 fedengan padamaay kitanan cipinang sasamaan ko pidemak. Malengoay ita  ko pina sinael, mananamay o mamidemak to maanan, caka ngaˈay midemak to maanan. * Ngaˈayho kita mikitini Krisiya Sowal Fangcalay Cudad mahapinang, makalimay ci Yihofa kitaanan padadotoc mitoor tonini a safalod midemak. Kawra, somowalayho ci Pitiro to roma kalimlaan a demak.

¹⁸ O mamirienang kita to masakenakenaay midokoay a demak, mamisaˈicelho mikangaˈay to tamdaw. Kawra, mikiriwiˈay ci Pitiro pakalalok to Krisciyang midemak to cecay kalimlaan a tayal. Itini iˈayaw no palimoˈot cingra to Krisciyang makorac i polong a demak i, salakatay somowal: ‘Ka talifak ko harateng namo, misaday a midemak.’ (1 Pitiro 1:13, 15) O maanan a demak hani? Sanay ci Pitiro, iraay ko tokel tayra i kakarayan a Krisciyang o mamilasil to makapahay a capeling no Kawas. (1 Pitiro 2:9) Soˈlinay i, polong a Krisciyang anini iraay ko tatodong mirienang tonini a kalimlaan, o papaira to haepoc no tamdaw a tayal. Malo makoracay a finawlan ni Yihofa kita, ngaˈay micerid fanekfek a mirienang to mitosilay pasifanaˈay to tamdaw a tayal, tada masakalikoanto! (Marko 13:10) Ano misaˈicel kita misaka dademak to safalod no Lifi 19 fedengan, o ngangaˈay misawacay to maolahay ko niyah to Kawas, maolahayho to tao. Mihaen ko demak ita o misaˈicelay makorac i polong no demak.