1. Hano patinako ni Yis ko nisawawaan to lopayˈay siri?

PALINIAN ni Yis ko kalalaˈed no niyah ato nisawawaan to kalalaˈed no pakaenay tamdaw ato lopayˈay siri. (Yohani 10:14) Matatodongay konini a sapatinako, samanen mafanaˈay ko lopayˈay siri to pakaenay tamdaw, mitengilay to sakayat ningra. Miliwko ko cecay tamdaw i, pakaˈaraway to mahaenay a demak, sanay cingra: “Sapisasingaw kami to siri, mitahidang camiraan. Kawra cowa pisikol camira tamiyanan, samanen cowa ka fanaˈ camira to ngiha niyam. Ikor, tayniay ko cecay pakaenay to siri a wawa, kinacecayay cingra miowaw, toor sanay to ko lopayˈay siri cingranan.”

2-3. (1) Samaan ko demak no nisawawaan ni Yis o mitengilay to ngiha ningra? (2) Onini lalakaw ato ilaenoay a lalakaw ngaˈay milengo to maanan?

² O nalifetan nonini a tamdaw papiharatengay kitaanan to nano sowal ni Yis. Pakayni lopayˈay siri ningra, oya nisawawaan ningra, sanay cingra: “O mamitengil cangra to ngiha ako.” (Yohani 10:16) Kawra itiniayto ci Yis i kakarayan nohatini, sasamaan kita mitengil to ngiha ningra hani? O mamidofdof to sapasifanaˈ ningra, hanaca saka dademaken itini kaˈorip.—Matay 7:24, 25.

³ Onini a lalakaw ato ilaenoay lalakaw mamilengo to sapasifanaˈ ni Yis kitaanan pina a kimad. Sowal ni Yis o roma demak cowato kangaˈay kita miliyaw midemak, o roma demak oha dademaken no mita. Onini lalakaw sasalakat milengo to ngaˈayay pakaenay no mita palimoˈot kitaanan to tosa cowato kangaˈay miliyaw demaken a demak.

4. Mikitini i Luka 12:29, pakayniay kita i maanan a demakan a macariraw alatek?

⁴ ˈOsien ko Luka 12:29. Palimoˈotan ni Yis ko nisawawaan akato pakayni saali no dafongan a ‘macariraw.’ Mafanaˈay kita o limoˈot ni Yis o inanengay a matatodong, makalimay sapitooraw a midemak, kawra pasangaray mihaen to demak saan ko harateng nolatekay. Misamaanay hani?

5. O roma tamdaw hano pakayni i dafong a cariraw?

 ⁵ Alatek pakayniay kita i sakaˈorip macariraw ko harateng. Samaanen o kitiraan no roma tamdaw cowa kangaˈay ko kicay, pasangaray mietan to payci paliliˈ to lomaˈ. Roma salikaka citatodongay mietan to payci paliliˈ to lomaˈ a tamdaw mapatayay, awaayto ko sakaˈorip no paro no lomaˈ. Roma i, o katenak no lifong i 2019 miheca malahdaway ko tayal no ˈalomanay tamdaw. (Patnakay 9:11) Ano tahalifa kita to mahaenay pakayraan ato malecaday a pasangaray, sasamaan padadotoc midofdof to limoˈot ni Yis, ecato pakayni i dafong a cariraw hani?

6. Tarokos ci Pitiro na tahalifaay to maanan?

⁶ Kinacecayay, ci Pitiro ato roma tarokos itini Kalili a riyar tahalifaayto faliyos. Fahal sanay, maˈaraway nangra ci Yis romakatay i fafekang no riyar. Sanay ko sowal ni Pitiro: ‘Tapangaw, ano kiso i, palimoˈoten kako romakat i fafekang no nanom tayra tisowanan.’ Pasowalan ni Yis cingra: ‘Katayni!’ ‘Maepoday ci Pitiro i tamina romakat i fafekang no nanom, pasayra ci Yisan a romakat.’ Kawra ikor i, manengneng ni Pitiro ko faliyos matalaway, orato matekengay. Saan miowaw: ‘Tapangaw, paˈoripen kako!’ Layaˈ sanay ci Yis to kamay misolot cingranan. Mikitini  mananamay ita ko maanan hani? Tiya misamocek ci Pitiro ci Yisan i, ngaˈayay cingra romakat i taˈangayay ko tapelik a riyar. Kawra maˈaraw ningra ko faliyos i, cisasaay makokiˈay ko falocoˈ, telocto misatapangay a matekeng.—Matay 14:24-31.

7. Mikitini ci Pitiroan mananam ita ko maanan?

⁷ Mikitini ci Pitiroan ngaˈay mananam ita ko maanan hani? Tiya maepod cingra i tamina i, maedeng caay ka harateng pakayni kaciˈangi no niyah a mateken. Harateng ningra na raromakat tayra ci Yisan, kawra cowa ka padotoc minengneng ci Yisan, ao misatapangay calemcem to faliyos. Anini, misaaliay kita to pakasoˈlinay falocoˈ ngaˈ ngaˈay misiˈayaw to masakenaay sapalifet, malecad ci Pitiroan ira ko pakasoˈlinay falocoˈ ngaˈ ngaˈay romakat i fafekang no nanom. Ano mapawan kita ci Yihofaan ato sakiˈok Ningra, o mamisatapang a ‘mateken,’ matahepo no cariraw. Ano o mananto ko malifaay ita a ‘faliyos’ i kaˈorip, haharatengen iraay ko ˈicel ni Yihofa padama kitaanan. Ngaˈay kita samaan ko pidemak hani?

8. Sasamaan kita a midemak ecato ka pakidem ko cariraw to dafong?

⁸ Ano tahalifa to pasangaray i, pairaen ko pasoˈlin no mita, aka pakidem ko cariraw. Haratengen ita, mikiˈokay ko kakarayan Wama ci Yihofa ano isalakat kita micangacang to Hongti Kitakit, o mamidimokos Cingra to sakaˈorip no mita. (Matay 6:32, 33) Padotocay Cingra mitoor to sakiˈok, caay ka pisamangah. (Limoˈot 8:4, 15, 16; ˈOlic 37:25) O ˈayam ato hana ano midimokosan Ningra, hano calemcemho kita to manan ko kakaenen manan ko cacaˈedongen hani? (Matay 6:26-30; Filipi 4:6, 7) O maolahay to wawa a wama wina o mamidimokos to wawa. O kakarayan a Wama ita ano maolahay kitaanan, mana mifalah Cingra kitaanan eca pisikol hokira? O mamidimokos Cingra kitaanan, aka cisasa kita!    

9. Mikitini nalifetan no cecay mararamoday mananam iso ko maanan hani?

⁹ Nengnengen ita ko cecay tinakoan. Sapiˈorongaw to itiniay milaliway to pades a fafahiyan salikaka mirienang to saˈopo, cecay misakafahay a mararamoday mataˈlifay ko cecay toki parakat to tosiya micada cangranan. Sanay ko faˈinayan salikaka: “Maharek ko saˈopo, mitahidangan niyam ko salikaka tayni i lomaˈ komaen, ikor maharatengay awaay ko maanan i lomaˈ.” Sasamaanto hani? Padadotocay ko salikaka pasowal: “Tahini kami i lomaˈ i, maˈaraway ko tosa taˈangayay lofok a kakaenen, kawra coka fanaˈ kami o cima ko miteliay. Maedeng o ci Yihofa ko midimokosay tamiyanan.” Ikor, mapalakay ko matelangay a tosiya nangra, soˈlin awaay ko payci pasangaˈ, kawra misaaliay cangra tonini a tosiya sapitosil, patayraan nangra ko tosiya paˈaraw to tawki no pasangaˈan. Fahal sanay ko cecay tamdaw micomod, milicayay: “O nima a tosiya konini?” Sowal no salikaka o ningra a tosiya, o papasangaˈen. Sanay koniya tamdaw: “Ngaˈayto, maolahay ko fafahi ako to mahaenay a tosiya, hanaca o mahaenay a kodong. Hakowa ko payci aki.” Mihaenay, iraayto ko payci no salikaka, ngaˈay micakay to faelohay tosiya. Sanay ko sowal no salikaka: “Tada mahemekayto kami! Cowa ko fahal sanay konini, o ci Yihofa ko padamaay tamiyanan!”

10. Itini ˈOlic 37:5 pakalalokay kitaanan misamaan ko pidemak?

¹⁰ Ano dofdofen ita ko sapasifanaˈ no ngaˈayay pakaenay ci Yis, eca ka pakidem cariraw to dafong, o ngangaˈay pakasoˈlin o mamidimokos ci Yihofa kitaanan. (ˈOsien ko ˈOlic 37:5; 1 Pitiro 5:7) Haratengen ko masowalay a pakayraan i  saka lima fatac. Halafinayto,  pakaynian ni Yihofa i tawki no lomaˈ ato tawki no katayalan mirenec to sakaˈorip ita to romiˈamiˈad alatek. Ano cato kangaˈay ko tawki no lomaˈ mietan to payci, anca malahdaway ko katayalan, pakayniento ni Yihofa i roma a pakayraan mihaen to demak. Ngaˈay rihaday ko falocoˈ ita, o dadimokosen Ningra kita. Dotoc, nengnengen ita ko limoˈot no ngaˈayay pakaenay o roma caka ngaˈay liyawen midemak a demak.

11. Mikitini Matay 7:1, 2, palimoˈotay ci Yis kitaanan aka piliyaw midemak to maanan? Hano caay ko madoloay nolatekay?

¹¹ ˈOsien ko Matay 7:1, 2. Mafanaˈay ci Yis cowa ko malefotay ko tamdaw, hanaca madoloay milikaf to tao, mansa pasowal ci Yis: ‘Aka piliyaw  patelas misawkit to tamdaw.’ Sapitooraw kita to sowal ni Yis a midemak, kawra caay pakaremo nolatekay. Ano mahapinang ita mikakilimay ko niyah to dangoc no tao, sasamaanto hani? Tengilen ko sowal ni Yis, misaˈicel aka piliyaw mihaen ko demak.

12-13. Midotim to pakayraan ni Yihofa micada ci Tafitian hano ngaˈay padama kitaanan ecato piliyaw malikaf to tao hani?

¹² Ngaˈay kita misongilaˈ miharateng to taˈarawan ni Yihofa. O kangaˈayan no tamdaw ko misinanotan Ningra, mikitini picada Ningra ci Tafitian ngaˈay mahapinang ita. Na pakidemay ko raraw ni Tafiti, tinakoen maˈaˈodangay cingra aci Patsipa, mipatayayho to faˈinay ningra. (2 Samuil 11:2-4, 14, 15, 24) Telocto madokaˈay ko niyah pakarorayayho to fafahi ato paro no lomaˈ no niyah. (2 Samuil 12:10, 11) Kinacecayay, cowa pisarocod ci Tafiti mitadiˈec ci Yihofaan, haratengay sanay misaˈosi to sofitay no Israil tamdaw. Harateng ningra malikoay to kaˈaloman no sofitay alatek, miharatengayho ira ko taˈangayay sofitay o ngangaˈay midipot to rihaday no kitakit. O waywayan ningra mikayatay to pitefad ni Yihofa to lifong, telocto pitoay emang ko mapatayay a Israil tamdaw.—2 Samuil 24:1-4, 10-15.

¹³ Ano itiniay kiso i lintad no Israil maˈorip, sasamaan ko pinengneng iso ci Tafitian hani? Awaay ko tatodong ningra milifok to sasodod ni Yihofa wa saan kiso miharateng han? Kawra cowa pihaen ci Yihofa miharateng. Maˈaraway ningra ko madimadi ni Tafiti i hakelong no kaˈorip, hanaca makahiay mikifalocoˈ pasasiyor. Mihaenay, soˈlin pakidemay ko raraw ni Tafiti, kamayan sododen ni Yihofa cingra. Mafanaˈay ci Yihofa tada maolahay ci Tafiti Cingranan, makalimayho midemak to matatodongay a demak. O minengnengan ni Yihofa o kangaˈayan no mita, coko papakayni ko piakoˈid ita Cingraanan han?—1 Hongti 9:4; 1 Rayray 29:10, 17.

14. Samaan ko pinengneng ita to tao ecato piliyaw a malikaf cangranan?

¹⁴ Ano makahiay ci Yihofa misodod to dangoc no mita, o mamihaen kita masasisodod, o ngaˈayay no tao ko nengnengen. Mikilim ato milikaf madoloay, kawra mahecaday ko harateng ci Yihofaan a tamdaw soˈlin maˈaraw ko dangoc no tao, ngangaˈayho malacafay to tao. O cecay cowaho karenacen a odoˈ coka ngaˈay nengnengen alatek, kawra mafanaˈay ko inanengay tamdaw, ano keriten ato renacen, o mamatedito konini a odoˈ. Papalecaden ita ci Yihofa aci Yis, aka haharateng han ko dangoc no tao, saadihayen misinanot ko kangaˈayan nangra.

15. Miharateng kita to kaˈorip no tao hano ecato ka patelas malikaf to tao?

¹⁵ Cowa ko pisinanot aca to kangaˈayan no tao, mamiharateng kita to kaˈorip no tao, hoeca ka patelas malikaf to tao. Haratengen ko taˈarawan ni Yis. Kinacecayay, maˈaraway ni  Yis ko cecay maponengay a fafahiyan i fangcalay sefi miparoay to tosa laliping a payci i hako. Cowa piharateng ci Yis: “Cowa ka ngaˈay cingra adihay to miming ko miparoan han?” Cowa ka pakidem cingra miharateng to hakowaay ko miparoan nonini maponengay a payci. Misimsiman ningra o nafalocoˈan ato kaˈorip nonini a maponengay. Mafanaˈay to misarocoday cingra a midemak, mansa itini kaˈayaw no ˈalomanay pakahemek cingranan.—Luka 21:1-4.

16. Mikitini nalifetan ni Wironika mananam iso ko maanan?

¹⁶ Nengnengen ita ko nalifetan no fafahiyan salikaka ci Wironika, o mamafanaˈ ano misimsim to kaˈorip no tao tada kalimlaan. Itini kasakopang ningra iraay ko cecay awaay ko faˈinay a wina, o niyah ko palahaday to cecay a wawa. Sanay ci Wironika: “Maˈaraw ako cangra cowa picerid mirienang to saˈopo ato mitosil, tatiihay ko pinengneng cangranan. Ikor, iraay ko toki ako malacafay tonini salikaka mitosil, itiyaay mafanaˈ to masamoˈay ko wawa ningra. Pakayni sakaˈorip ato padotoc midoko ci Yihofaan, o dademaken i, maeminayto ningra a midemak. Latekay tatiihay ko tireng no wawa, hato mirienangay cingra to saˈopo no roma kasakopang. Itiyaay kako mafanaˈ, cowa ko madoloay konini a salikaka. Maˈaraw cingra adihayay ko mihadakan saki Yihofaan, tada masemeray kako cingranan, hanaca mangodoay cingranan.”

17. O sapalimoˈot no Yakop 2:8 samaan ko pidemak ita? Ngaˈay kita samaan mitoor to sowal no sinael a midemak?

 ¹⁷ Ano mahapinang ita iraay ko masofaway no niyah minengneng to tao, sasamaanto hani? Haharatengen ita, maolah to tao malecad maolah to niyah. (ˈOsien ko Yakop 2:8.) Ngaˈay kita fanekfek mitolon ci Yihofaan, micangacang Cingranan padama kitanan mifalah to masofaway a harateng. Ikor ngaˈay kita talaˈayaw masasowal tora tamdaw, mitongal to kacipinang cingranan. Tinakoen, tahidangen cingra malacafay mitosil anca malacafay komaen. Itini kacipinang ita tonini a tamdaw a tatokian, misaˈicel mitodong to taˈarawan ni Yihofa aci Yis, o ngaˈayay ningra ko nengnengen. Mihaen, o ngangaˈayto kita mitoor to sapasifanaˈ no ngaˈayay pakaenay ci Yis a midemak, ecato piliyaw patelas misawkit to tamdaw.

18. Sasamaan ko demak ita o mitengilay to ngiha no ngaˈayay pakaenay tamdaw?

¹⁸ Malecad o lopayˈay siri mitengilay to ngiha no pakaenay tamdaw, o nisawawaan ni Yis mitengilay to sowal ningra. Ano mihadak kita to ˈicel, ecato piliyaw calemcem to nodafongan, ecato piliyaw malikaf to tao, ci Yihofa aci Yis o papalemed kitaanan. Ano o “mimingay ˈopo a siri” anca “roma lopayˈay a siri” kita, nanay padadotoc kita midofdof to ngiha no ngaˈayay pakaenay ci Yis. (Luka 12:32; Yohani 10:11, 14, 16) Ilaenoay a lalakaw mamilengo to palimoˈotan ni Yis i nisawawaan ningra o dademaken tosa a demak.