1. O taˈangayay paro no lomaˈ ni Yihofa hano makelec hani?

TADA mahemekay kita masalalomaˈ no taˈangayay paro no lomaˈ ni Yihofa! Oniya taˈangayay paro no lomaˈ rihadayay a makedec, misamanay hani? Cecay lalangian i, o kahacecay tamdaw misarocoday mikangodo to patirengan ni Yihofa no kakeridan a limasmas. Ano matongal ko kacipinang ita toniya limasmas, wa matongal ko kakelec.

2. Oniya lalakaw wa pacaˈof to manan a salicay?

² Oniya lalakaw wa milengo to kakeridan a limasmas i kasakopang. O papacaˈofen ita ko laenoay pina salicay: O maanan ko saaroˈan no fafahiyan salikaka? Soˈlinay o fongoh no polong a fafahiyan salikaka ko faˈinayan salikaka han? Iraay ko fadangalan no malohemay malitengay mikerid to salikaka, o tawki no lomaˈ iraay ko fadangalan a mikerid to fafahi ato wawa, kawra o fadangalan nangra o malecaday han? Lengoen nohatini, sasamaan kita minengneng to fafahiyan salikaka i kasakopang.

3. Sasamaan ko demak ita, wa masemer to nano demak no fafahiyan salikaka?

³ ˈAlomanay fafahiyan salikaka no kasakopang marorayay a midimokos to paro no lomaˈ, milasil to ngaˈayay lihaf ato padama to salikaka, tada masemeray kita cangranan. Haratengen ita samanay ci Yihofa aci Yis a minengneng to fafahiyan, o mamafanaˈ a masemer a micada to itihiay a fafahiyan salikaka.  Roma i, wa milengo kita to ngaˈayay taˈarawan no tarokos ci Pawlo.

4. O manan a sinael mitadtaday, o pinengneng ni Yihofa to fafahiyan ato faˈinayan malecayday a masakalimlaan?

⁴ Paihkalay ko Fangcalay Cudad misaaretengay ci Yihofa to fafahiyan, malecaday cangra o faˈinayan a masakalimlaan. Tinakoen itini saka 1 hahekalan, pafelian ni Yihofa ko roma tamdaw to fangcalay saocor, hato iraay ko kafahkaan a ˈicel nangra, mahawpay ko somowal to roma sowal, oniya tamdaw iraay ko faˈinayan ato fafahiyan. (Dmak 2:1-4, 15-18) Malecad o faˈinayan, roma fafahiyan manilnilay no fangcalay saocor, ngaˈay malacafay ci Yisan mala hongti. (Kalatiya 3:26-29) O tatahadaˈoc i fafekang no sera maˈorip a tamdaw iraay ko faˈinayan ato fafahiyan. (Paˈarawan 7:9, 10, 13-15) Ano faˈinayanto fafahiyanto, polong a Krisciyang o mamitosil pasifanaˈ to tamdaw. (Matay 28:19, 20) Itini Dmak mikiriwiˈay somowal to cecay fafahiyan salikaka ci Priskila, cingra ato faˈinay ci Akuila malacafayay padama ci Apolosan, pasayni toniya adihayay ko sifanaˈ a faˈinayan matatodong ko pitadtad to kimad no Fangcalay Cudad.—Dmak 18:24-26.

5. Paihkalay itini Luka 10:38, 39, 42 samanay ko picada ni Yis to fafahiyan?

⁵ Mikangodoay ci Yis to fafahiyan. Misakahmaway to fafahiyan ko Farisay tamdaw, cowa ka masasowal i kaˈalomanan a kitiraan to fafahiyan, mangalef eca ka malalengo cangranan to Fangcalay Cudad. Kawra cowa ka lecad ko pinengneng ni Yis ato Farisay tamdaw. Ano faˈinayanto fafahiyanto, milengoan ni Yis cangra to kalimlaan a kimad no Fangcalay Cudad. * (ˈOsien ko Luka 10:38, 39, 42.) Kalacafayanho ningra ko roma fafahiyana mitosil. (Luka 8:1-3) Roma i, miocoran ni Yis ko pina fafahiyan pasowal to tarokos patikolayto cingra a maˈorip. Pakayni toniya fafahiyan, o taˈangayay sakaliko konini!—Yohani 20:16-18.

6. Hano mafanaˈ kita to mikangodoay to fafahiyan ko tarokos ci Pawlo?

⁶ Mikangodoay to fafahiyan ko tarokos ci Pawlo. Mikiriwiˈan ningra patalipaˈelal ci Timoti, micada to matoˈasay fafahiyan haenen o wina ko picada, micada to kaemangay fafahiyan haenen o malikakaay. (1 Timoti 5:1, 2) Pakayni pipadama ni Pawlo, malo matenesayto a Krisciyang ci Timoti, kawra sanay ci Pawlo, salakatay padamaay ci Timotian minanam to Fangcalay Cudad i, o wina ato fofo ningra. (2 Timoti 1:5; 3:14, 15) Itini Loma cudad panganganan ni Pawlo ko pina fafahiyan salikaka mihamham. Masinanotay ningra adihayay ko midemakan no fafahiyan salikaka, pakapotalay a pakahemak cangranan.—Loma 16:1-4, 6, 12; Filipi 4:3.

7. Dotoc wa pacaˈof kita to manan a salicay?

⁷ Mahapinangay, o fafahiyan salikaka cowa pakalini to faˈinayan salikaka sanay a harateng cowa ko mikitiniay i Fangcalay Cudad. Hinapaladaˈay, matomesay to olah, adihayay ko midemakan no fafahiyan salikaka. Miakoˈiday ko malohemay malitengay cangranan micowat to rihaday ato kakelec no kasakopang. Kawra, iraay ko papacaˈofen a pina salicay. Tinakoen, itini roma kitiraan hano misaali ci Yihofa to fafahiyan salikaka citapodo hani? Ano o faˈinayan aca salikaka ko manilnilay malo malohemay malitengay ato dama sikawdan, sakoniya sowal o fongoh no polong a fafahiyan salikaka ko faˈinayan salikaka hokira?

8. Pakayni Ifiso 5:23, o fongoh no polong fafahiyan salikaka ko faˈinayan salikaka han? Tadtaden.

⁸ Kantangen ko sowal, cowa ka hatira! O fongoh no polong fafahiyan salikaka cowa ko faˈinayan salikaka, dengan ci Kristo. (ˈOsien ko Ifiso 5:23.) Itini paro no lomaˈ, o faˈinay  iraay ko fadangalan mikerid to fafahi, kawra o paputisemayto a faˈinayan wawa cowa ko fongoh no wina. (Ifiso 6:1, 2) Itini kasakopang, o malohemay malitengay iraay ko fadangalan mikerid to salikaka, kawra citolasay ko fadangalan nangra. (1 Tisalonika 5:12; Hipray 13:17) O cowaho ciramod a fafahiyan salikaka miliyas to lomaˈ wa padadotoc mikangodo to wama wina ato malohemay malitengay, kawra malecad to faˈinayan salikaka i kasakopang, edengan cecayay ko fongoh nangra, ci Yis.

9. Nolatekay hano cacitapodo ko fafahiyan salikaka?

⁹ Itini kasakopang, minilnilan ni Yihofa ko faˈinayan itini midokoay a demak mikerid, cowa ka pafelien ko fafahiyan toniya fadangalan. (1 Timoti 2:12) Misamanay hani? O lalangian malecaday o pinilnil Ningra ci Yisan mikerid to faˈinayan, ho masierod ko paro no lomaˈ ningra a malikakawa. Itini roma pakayraan, o mamidemak ko fafahiyan salikaka to nano demak no faˈinayan salikaka, toniya tatokian misaaliay ci Yihofa cangranan citapodo. * (1 Korinto 11:4-7) Misaali ci Yihofa to fafahiyan salikaka mihaen to demak, cowa ko misakahmaway to fafahiyan salikaka, pairaay to toki nangra paihkal to pikangodo toniya kakeridan a limasmas. Cipinang tonini, wa pacaˈof kita to laenoay salicay: O fadangalan no tawki no lomaˈ ato malohemay malitengay hakowaay ko taˈangay hani?

10. O cecay malohemay malitengay mikitini manan lalangian, sapatadoaw to salikaka patireng to rikec?

¹⁰ O malohemay malitengay maolahay ci Kristoan, maolahayho to patorodan ni Yihofa aci Yis cangranan midimokos a siri. (Yohani  21:15-17) Cecay malohemay malitengay mikitini ngaˈayay harateng, o wama no salikaka ko niyah saan ko pinengneng. Saan cingra miharateng alatek: O tawki no lomaˈ ano iraay ko fadangalan misaˈosi to rikec no lomaˈ, o malohemay malitengay wa ngaˈay patireng to rikec a midipot to siri no Kawas. O roma salikaka talaˈayaway misaali to malohemay malitengay mihaen to demak, patado cangranan a misaˈosi. Salicay i, o fadangalan no malohemay malitengay ato tawki no lomaˈ soˈlinay malecad han?

11. O fadangalan no tawki no lomaˈ ato malohemay malitengay iraay ko maanan kalecadan?

¹¹ Mitadtaday ko sowal no tarokos ci Pawlo, o fadangalan no tawki no lomaˈ ato malohemay malitengay iraay ko kalecadan. (1 Timoti 3:4, 5) Tinakoen, mitokelay ci Yihofa to paro no lomaˈ midofdof to tawki no lomaˈ, mitokelay to salikaka midofdof to malohemay malitengay. (Kolosay 3:20) Mitokelay ci Yihofa to tawki no lomaˈ ato malohemay malitengay mikaolah to mikeridan nangra a tamdaw, midimokos to saali nangra i noˈadingoan ato nafalocoˈan. Malecad o tawki no lomaˈ, o malohemay malitengay ano tahalifa ko salikaka to pasangaray i, wa mihadak to sapadama. (Yakop 2:15-17) Roma i, mitokelay ci Yihofa to malohemay malitengay ato tawki no lomaˈ pasifanaˈ to tamdaw to palinian Ningra,  hanaca ‘aka mitaˈlif to sowal no Fangcalay Cudad.’ —1 Korinto 4:6.

12-13. Paihkalay ko Loma 7:2, o fadangalan no tawki no lomaˈ ato malohemay malitengay iraay ko maanan kasasiromaan?

¹² Kawra, o fadangalan no malohemay malitengay ato tawki no lomaˈ iraay ko taˈangayay kasasiroma. Tinakoen, minilnilan ni Yihofa ko malohemay malitengay itini kasakopang midemak to misawkitay a demak, pafeli cangranan to fadangalan a mifalah to cowa ka pasasiyor a mararaway tamdaw.—1 Korinto 5:11-13.

¹³ Roma pakayraan, pafelian ni Yihofa ko tawki no lomaˈ to pina fadangalan, awaay kono malohemay malitengay. Tinakoen, iraay ko fadangalan no tawki no lomaˈ patireng ato midemak to rikec no lomaˈ. (ˈOsien ko Loma 7:2.) Iraay ko fadangalan ningra misaˈosi pina ko toki to dadaya minokay ko wawa. Ano eca pidofdof ko wawa to rikec no lomaˈ, iraay ko fadangalan ningra mirikec to wawa. (Ifiso 6:1) Manaokaniw, o ciolahay a tawki no lomaˈ ˈayaw no mamisaˈosi to rikec no lomaˈ wa malalengoho to fafahi, samanen ‘o cecayay ko tireng’ ningra ato fafahi. *—Matay 19:6.

14. (1) Mikitini Marko 10:45, nilnilen ni Yihofa ci Yis malo fongoh no kasakopang hano tada matatodongay hani? (2) O Malohemay Malitengay i Congpo iraay ko manan ˈinorong? (Nengnengen ko sapatongal lalakaw “ O ˈInorong no Malohemay Malitengay i Congpo.”)

¹⁴ Pakyni sapatefoc, milidongan ni Yihofa ko kahacecay tamdaw no kasakopang. (ˈOsien ko Marko 10:45; Dmak 20:28; 1 Korinto 15:21, 22) Kinafalahay ci Yis to ˈorip malo  sapatefoc, nilnilen no Kawas cingra malo fongoh no kasakopang tada matatodongay. Malo fongoh no mita, iraay ko fadangalan ni Yis patireng to palinian no waywayan, dadofdofen no kahacecay tamdaw, kahacecay paro no lomaˈ ato kahacecay kasakopang. (Kalatiya 6:2) Kawra, cowa ko pisaˈosi aca ni Yis to safalod, midimokosayho ato maolahay kitanan o kahacecay tamdaw.—Ifiso 5:29.

15-16. Mikitini sowal ni Mari salikaka aci Panciming salikaka mananam iso ko manan?

¹⁵ Midofdof ko fafahiyan salikaka to sakayat no mikeriday a salikaka, o mikangodoay ci Kristoan, samanen minilnilan ni Kristo cangra midimokos to fafahiyan salikaka. Itiniay i Padaka ci Mari mihadakay to nafalocoˈan no fafahiyan salikaka, sanay: “Malo fafahi ato fafahiyan salikaka, misalimlaay kako to saaroˈan noniyah. Wa padadotoc kako a misaˈicel, micerid patalipaˈelal to niyah mikangodo to patirengan ni Yihofa no kakeridan a limasmas. Kawra, o faˈinay ako ato kasakopangay faˈinayan salikaka mikangodoay takowanan, pakahemekay to mihadakan ako ˈicel, patongalay to kadolo ako a midofdof cangranan.”

¹⁶ Mikangodo ato masemer ko faˈinayan salikaka to fafahiyan salikaka, paihkalay konini to cipinangay cangra to limasmas no kakeridan. Itiniay i Ikok salikaka ci Panciming sanay: “Mikitini tireng no fafahiyan salikaka adihayay ko mananamay ako, adihayay ko ngaˈayay picekiw ato pitosil a pakayraan nangra, mihadakayho to pakalalokay to tamdaw a sapacaˈof i kasaˈopoan. Tada taˈangayay ko sapadama no fafahiyan salikaka to kasakopang.”

17. Hano wa mikangodo kita to limasmas no kakeridan?

¹⁷ Itini kasakopang, faˈinayan aca fafahiyan, o tawki no lomaˈ anca malohemay malitengay, o kahacecay tamdaw ano cipinang ato mikangodo to limasmas no kakeridan, polong a kasakopang wa makedec a rihaday. O kalimlaan i, wa patongal kita to ˈdil no ciolahay a Wama ci Yihofaan.—ˈOlic 150:6.