Saka 20 hahekalan 20 mihecaan, i ˈayaw no mararamod ko wama wina ako mafanaˈayto soˈlinay kimad. Itini 1939 miheca hofocen kako. Kaemangho kako i, paro no lomaˈ itiniay i Ikok kami, maceriday malacafay to wama wina mirienang to saˈopo no Krisciyang, ikor panganganay kako to Mitosilay a Mihatatanamay. Tahanini maharatengayho ako sakina cecay ako mikimad, tomirengay kako i hako ngaˈ manengnengay ako ko ˈalomanay tamdaw. Itiya i enemayho ko mihecaan ako, manengneng ako ko ˈalomanay tamdaw i, marawraway kako.

Pafelian no wama kako to cecay sapisiwkay a kato, ˈorongan ako a mitosil. Falo ko mihecaan ako i, sakinacecayay ako a mikongkong to fawahan. Miˈosian no cilomaˈay kora kato, ikor tangsolay micada to cecayay a cudad “O Kawas o Soˈlinay”. Mahemekay kako, tangsolay mifanaˈ to wamaan. Mirienang to mitosilay ato saˈopo tadamahemekay ko falocoˈ ako, misatapangay miharateng miemin to toki a matayal saki Yihofaan.

Miyoyakan no wama ko Mikecolay casi ikor, mangalefayto ko kaolah ako to soˈlinay a kimad. Maolahay kako miˈosi to folafoladan a casi. Matongalmatongal ko pakasoˈlinay falocoˈ ako ci Yihofaan i, misaˈosiay to kako patafangen ako ko ˈorip i Cingraanan.

1950 miheca, paro no lomaˈ niyam malo taypiyaway mirienang to taykay i Niwyok to “Pikowan no Kawas Macowatay” a taykay. Ka 8 Folad 3 Romiˈad Pisepatan a lalangian i “Milakowitay to Riyar Mitosilay a Romiˈad.” Toya romiˈad, ikor Malohemay Malitengay i Congpo salikaka ci Papo mikimaday to paputisem a kimad. I salikoray noniya kimad i, milicayan ningra ko  mamicada to paputisem a tamdaw to tosa salicay. Tomirengay kako taˈangayan a pacaˈof: “Hai!” Itiya 11 ko mihecaan ako, kawra pahawangay kako to masakalimlaan no kaˈorip ako. Cowaho kafanaˈ kako a midangoy, matalaway to nanom. Pacafayan no faki kako tayra i paputiseman, pasowalayho takowanan hamaan matalaw. Mihaenay i, caho kapalipaˈ to sera maharekayto ko paputisem. Cecay salikaka maharek paputisem takowanan i, o roma salikaka tangsolay miˈafofo takowanan a pasadak. Mikitiya i, padotocay ci Yihofa mipamoecel to lalan ako.

Mangata micodiyap kako makalimay malo misakafahay, kawra palimoˈotay ko singsi papicangacang to ˈakawangay picudadan. Itini saroero hai sanayto kako, micudad i taˈangayay picudadan. Kawra, kalikiay mahapinang ako awaay ko pakayraan noniyah misamacay micudad, mitafoho to tanektekay a pakasoˈlin no falocoˈ, misaˈosiay kako misawad micudad. Mitolonay kako ci Yihofaan, ikor tano damsayay a sasowalen mitilid to sapisawad micudad a tikami, hanaca mahererek ko saka cecay miheca miliyasayto picudadan. Ikor, misarocoday kako a mitadiˈec ci Yihofaan, tangsolay misatapang misakafah.

1957 miheca 7 folad, itiniay kako i Wilingpole mimingay a niyaroˈ misatapang misakafah. Mitahidangan ako itiniay i Lonton i Pitil a salikaka misiwkay to hacafay ako misakafah. Ikor, salikaka ci Potewisi malo cafayay ako. Tada malalokay cingra, o ngaˈayay a singsi ako, padamaay takowanan misilsil to toki a mitosil. Cowa ko salikaka aca ci Wisi ato kako, itini kasakopang iraay ko enem matoˈasay a salikaka. Milimasmasay kako to polong a saˈopo ato kamok, pairaay to toki takowanan paihkal to pakasoˈlinay falocoˈ, paˈicelay to pakasoˈlin ako ci Yihofaan.

Ikor pakayni pinaˈay ako malasofitay mapalitay to cecay liyad. Ikor matedal, mafanaˈay kako to cecay mikiriwiˈay misakafahay ci Papara. Itiniay kami i 1959 miheca mararamod, makahiay kami tatosa micada to sanilnil no likakawa, tayra i cowacowa a matayal. Salakat manilnilay kami tayra i kaetip no Ikok Lankaysiya a niyaroˈ. Ikor, itini 1961 miheca 1 folad, matahidangay kami tayra i Pitil no Lonton mirienang to cecay folad a SKE. Caka harateng mahererek ko pihatatanam, manilnilay kako malo kasakilac a kantok. Orato, tayraay kako i Pominhan a niyaroˈ o tosa lipay, micada toni kasakilac kantok a pahatatanam. Malacafayay ci Papara malingad. Ikor minokayay kami i Lankaysiya a niyaroˈ ato Caycin a niyaroˈ, misatapang to tayal no kasakilac kanto.

1962 miheca 8 folad, itini pahahanan niyam a tatokian macadaay ko tikami no Fenpo, lalomaˈ no tikami iraay ko sapisingsi to Kiliyat Picudadan a cudad. Ikor no mikifalocoˈ ako aci Papara mitolon, mitilidan koya sapisingsi, tangsol a patayra i Fenpo. Ikor no 5 folad, tayraay kami i Niwyok Prokelin mirienang to saka 38 liyad a Kiliyat  Picudadan, micada to 10 folad a pihatatanam to Fangcalay Cudad.

Itini Kiliyat Picudadan, matongalay ko kacipinang niyam to Fangcalay Cudad ato likakawa no Kawas, matongalayho ko kafanaˈ to kasacefang no salikaka ita. Itiya 20 ira ko pina ko mihecaan niyam, mikitini tireng no cafay micudad adihayay ko mananamay. Mahemekay kako kalacafay to cecay singsi matayal, o salikaka ci Folite Loseke cingra. O kalimlaan a sapasifanaˈ ningra i, ano mihadak to limoˈot tooren ko moecelay a palinian, misalalangian to Fangcalay Cudad. Mikitini kami i misapoeneray ko falocoˈ a salikaka ci Maykemilonan adihayay ko mananamay. Itini pihatatanaman padamaay cingra tamiyanan mihapinang, itini 1914 miheca tangasa 1919 miheca o palifetan a tatokian, padotocay ko Kawas a mikayat to finawlan Ningra.

Mangata mahererek ko picudad i, pasowalay ko salikaka ci Nolo tamiyanan, wa manilnil kami tayra i Purunti no Afrika. Tangsolay kami tayra i tosokowan no Pitil mikilim to Ninkang, minengneng hakowaay ko mitosilay i Purunti, kawra cowa ka hela ko lalakaw. ˈArawhan o cowaho ka tosilen a kilac koniya katayalaan niyam, tayra i cowa ko kafanaˈan niyam a Afrika, tada marawraway kami, calemcemay ko falocoˈ! Kawra ikor no mikifalocoˈ a mitolon i, rihadayayto kami.

Itini Purunti, sahtoay caka lecad. O fali, serangawan ato sasowalen, sahtoay o kafahalan niyam. Wa minanam kami tono Frans a sowal, mikilimho to kitiraan a pala. Tahira kami tosa romiˈad, o cafay micudad i Kiliyat ci Hali Anot mikaletoay a minengneng tamiyanan. Padamaay cingra mikilim to lomaˈ, ikor malo sakacecay lomaˈ no mikiriwiˈay manilnil a mitosilay. O mikowanay itira cowa ka fanaˈ to Misawacayay Tamdaw ni Yihofa, caka halafin misatapangay misafelit tamiyanan. Nanam sanayho kami to faelohay katayalan, pasowalay ko mikowanay tamiyanan, ano awaay ko mingkiw a matayal, cowa ka ngaˈay padotoc materek itira. Ka adayayan, mapacieciay kami miliyas to Purunti, tayra i roma kitakit, itini Okanta.

Itiya awaay ko mingkiw niyam i Okanta, soˈlin calemcemay ko falocoˈ, kawra misetekay to falocoˈ mitadiˈec ci Yihofaan. Iraay ko cecay matayalay itira Kanata a salikaka pacafayay tamiyanan  mitadtad to pakayraan niyam i mikowanay, orato mihaiyay koya tapang to pina folad misingsi to sakatelek a minkiw. Mahapinangay ako, soˈlinayto padama ci Yihofa tamiyanan.

O pakayraan no Okanta cowa kalecad to Purunti. Soˈlin 28 ko Misawacayay Tamdaw ni Yihofa itini, kawra halafinayto ko mitosilay a tayal itini. Itini kilac adihayay ko somowalay tono Padaka sowal, kawra kahnayay mahapinang niyam, wa mafanaˈ kami tono itiniay a sowal ngaˈ, ngaˈay padama to makalimay a tamdaw. O pitosilan niyam a kilac i Kanpola, ono Lokanta ko sowal, mansa minanam kami toniya sowal. Pinaay miheca minanam kami ngaˈ malaymayay, kawra soˈlinay ciepoc ko mitosilay a tayal niyam! Cipinangay kami to pacekiwan sasamaan a macakat, oniya pacekiwan misatapangay mifohat to falocoˈ, mihadak to pinengneng nangra to mananamay a kimad.

Ngaˈay mahela ko misapoeneray ko falocoˈ maolahay to soˈlinay kimad a tamdaw, tada palipahakay tamiyanan. Ikor, manilnilay malo milisoˈay ko tayal, matongalay ko hemek ako. Itini sakayat no Kenya a Fenpo, misatapangay kami to “misolapay a piliwko,” minengneng to icowaay ko misaaliay minilnil to mikiriwiˈay a misakafahay. Marariday ko itiraay tamdaw misalafang tamiyanan, soˈlin cowaho pakaˈaraw cangra to Misawacayay Tamdaw ni Yihofa, kawra mahemekay mihamham tamiyanan, patahkaayho tamiyanan.

Ikor, misatapangay kako to roma piliwko. Mikitiniay kako i Kanpola malingad, mikalic to ciˈacefelay tosa romiˈad tayra i minato no Kenya a Mongpasa, ikor mikalic to tamina tayra i Saysee, milisoˈ to potipot no Intiya Riyar. Ikor mikitini 1965 tangasa 1972 miheca, kalacafayay ci Papara takowanan milisoˈ to Saysee. Satapang aca 2 ko mitosilay itira, ikorto iraay ko cecay kapot, ikor tomirengay ko fanekfekay a kasakopang. Roma i, tayraay kako i Eriteriya, Aysayepiya ato Sotan, milisoˈ to itiraay a salikaka.

Itini Okanta, ikor no milood ko sofitay, sasifod sanayto ko niyaroˈ. Toniya pasangaray a romiˈad mananamay ako, mitoor to limoˈot no Fangcalay Cudad a midemak o sainanengay, ‘oni Kaysa i, pafelien ci Kaysaan.’ (Marko 12:17) Cecay liyad, misaaliay ko mikowanay to polong no roma kitakit a tamdaw tayra i ngataay a dimeng mitingki, tangsolay kami mihaen to demak. Ikor no pina romiˈad, parakat kako to tosiya ato roma mikiriwiˈay manilnil a mitosilay mitaˈlif to Kanpola, milaoday ko dimeng milicay tamiyanan. Matalaway kako itiya, sakahadakaw sanay ko falocoˈ. Sowal nangra o sopay kami sanay, mitengtengay tamiyanan tayra padimengan. Mitadtadan niyam o pipasifanaˈ aca to Fangcalay Cudad, cowa pirienang tono mikowanay a demak, somowalho to maharekayto kami mitoor to saˈosi a mitingki, kawra cowa pakasoˈlin cangra. Ikor, iraay ko kowang a dimeng mitengtengay tamiyanan tayra i ngata no lomaˈ no mikiriwiˈay manilnil a mitosilay a padimengan. Kao ngaˈayay, mafanaˈay ko itiraay a dimeng tamiyanan, maharatengay to maharekayto kami a mitingki, orato mitedalay tamiyanan. Sangaˈay sanay ko harateng!

Toya tatokian, marariday malitemoh niyam ko sapiˈeteng no sofitay, iraho ko malasangay a sofitay. Ano tahalifa to mahaenay a pakayraan, mitolonay kami, ikor rihadayayto ko falocoˈ, pataˈlifay ko sofitay tamiyanan. Kawra kaadayayan  i, itini 1973 miheca, palimoˈtay ko mikowanay polong a mikiriwiˈay manilnil a mitosilay wa miliyas to Okanta.

Orato, mafalicey ko sapinilnil tamiyanan. Anini wa tayra kami i kaetip a Afrika i Ketetiwa, miliyawho a mananam to faelohay serangawan, saromiˈad kami pasowal tono Frans a sowal, malacafayto cowa ka hecad kitakit a mikiriwiˈay manilnil a mitosilay a maˈorip. Kawra, manengneng niyam ko misapoeneray a tamdaw maolahay mitengil to ngaˈayay lihaf, onini miliyaway kami mitinako to sapadama ni Yihofa. Malacafay kako ci Paparaan, ano pakasoˈlin kami mitiˈer ci Yihofaan, misamocelan Ningra ko lalan niyam.

Ikor, adadaay ci Papara to ekang. Kinapinaay kami minokay tayni i Iwropa paising. Tahira i 1983 miheca, mafanaˈayto kami cowa to ko padadotoc itini Afrika a dademak, oniniyan tada masomaday kami!

Itini kami dademak i Loton a Pitil i, mangalefay ko adada ni Papara, salikor mapatayay. O paro no lomaˈ no Pitil pafeliay takowanan to adihayay a sadama ato sapalalok. O cecay mararamoday padamaay takowanan to adihayay, ho ngaˈay mananam to nika awa ko raramod nokaˈorip, padadotoc mitiˈer ci Yihofaan. Ikor, malitemohay ko cecay maolahay ci Yihofaan a salikaka, o ngangan ningra ci An. Itiya i cecayay lipay kina toloay tayni i Pitil a matayal, isaˈayaw malo mikiriwiˈay misakafahay. Itini kami 1989 miheca mararamod, salikor itini sanay kami i Loton Pitil matayal.

Mikitini 1995 tahira 2018 miheca i, ira ko tatodong ako mitaypiyaw to Conpo, milisoˈ to 60 a kasakitakit. Ihkalay mahapinang, itini cowacowa pala, i masakenaay a pakayraan, palemedan ni Yihofa ko finawlan Ningra.

2017 miheca milisoˈay kami to Afrika, minokayay kako tayra tora Purunti. Sakinacecay ni An tayra i Purunti. Manengneng ningra itira a pitosilay kafahkaan ko nika cakat, mahemekay kami! Maharateng itini 1964 miheca, na itiraay kako cecay a maci pakalomalomaˈan a mitosil, nohatini makapahayto ko Pitil itira. Nohatini, mitosilay no Purunti mataˈlifayto ko 15,500 tamdaw.

2018 miheca, mafanaˈ kako to mamilisoˈ to icowacowaay kitakit i, tada mahemekay, samanen i lalomaˈ iraay ko Ketetiwa! Tayraho to Apirang, hato mahecaday to minokayay tayni i nalacolan. Itini lalomaˈ i Pitil i, manengnengay ako ko ciwming no tingwa, mahapinang ako i fiyaw ci Sosu salikaka. Maharateng ako itiya miheca itiraho kako i Apirang i, ono niyaroˈ a kantok cingra. Kawra mararaway kako, cowa ko kafanaˈan ako a Sosu, o wawa ningra kora.

Soˈlinayto, kamayan ci Yihofa mitafo to mikiˈokan. Mikitini toya masakenakenaay milifetan ako ihkalay mahapinang, edengan pakasoˈlinen ita mitiˈer ci Yihofa, soˈlinayto pamocelen Ningra ko lalan ita. Nohatini matomeseay ko pitala ita, padotoc romakat to iˈayaway a lalan, pakasoˈlin oniniyan sakatayra i faelohay hekal a lalan wa mangalef ko noka taengad.—Taneng 4:18.