1. O finawlan no Kawas paihkalay to maanan ngaˈayay a harateng?

 ITI:YAHO paˈayawayto ko Fangcalay Cudad, o finawlan no Kawas itini sakayat ni Yis ‘mikifalocoˈ makahi mihadak to niyah,’ matayal saki Yihofaan. (ˈOlic 110:3) Matatodongayto konini a sapairasol anini. O finawlan ni Yihofa to mihecahecaan mihadakay to adihayay toki mitosil pasifanaˈ to tamdaw, mihaen ko demak nangra mikifalocoˈay a makahi, cowa pisaali to sapalifon. Roma i, mahemekay ko ˈalomanay tamdaw matayal saki tao, mahawpay ko padama to salikaka tanektek ko kalalaˈed to Kawas, itini nafalocoˈan midama cangranan, ato mihadak to ciepocay a sapadama. Itini kasakopang, mikeriday a salikaka adihayay ko mapalakay a toki misaday to kamok no saˈopo ato milisoˈ to salikaka. O manan ko pakalalokay to finawlan no Kawas mikifalocoˈ makahi a padama to tamdaw hani? O olah, maolahay cangra ci Yihofaan maolahayho to tao.—Matay 22:37-39.

2. Mikitini Loma 15:1-3, patirengay ci Yis to maanan a taˈarawan no mita?

² Ci Yis o saali no tao ko salakatan a miharateng, o ngaˈayay a taˈarawan no mita, o mamisaˈicel kita pasayra cingranan minanam. (ˈOsien ko Loma 15:1-3.) Mihaen ko demak ita wa adihay ko malifokay, samanen pasowalay ci Yis: ‘O paladaˈay ikakaay ko hemek to milayapay.’—Dmak 20:35.

3. Onini a lalakaw mamilengo to maanan?

³ Onini a lalakaw mamilengo, pakayni sapadamaaw to tao kinafalahay ci Yis to maanan, ato sasamaan kita pasayra cingranan a minanam. Wa minengnengho kita sasamaan paˈicel to  makalimay harateng no niyah, matongal ko kalim matayal saki tao.

4. Samaanay ko demak ni Yis, paihkal to o saali no tao ko salakatan ningra a miharateng?

⁴ Soˈlin malotayay ci Yis, kawra makahiayho padama to tamdaw. Kinacecayay, itiniay ci Yis i ngata no Kapirnaum, iraay ko ˈalomanay tamdaw mikilim cingranan. Misalafiiay ci Yis itini i lotok mitolon, maedeng tada malotayay itiya. Maˈaraw ningra ko ˈalomanay samaanay ko harateng hani? Siniˈadaay cingra to manikaway ato adadaay a tamdaw ilalomaˈ nangra, cowa ko piadah aca cangranan, mihadakayho to cecay a kimad, oya kafanaˈan no tamdaw ‘o pasifanaˈ i lotok,’ tada mitemeray to falocoˈ no tamdaw konini a kimad.—Luka 6:12-20.

5. Itini kalotayan a tatokian i, o tawki no lomaˈ sasamaan mitodong ci Yisan?

⁵ O tawki no lomaˈ mamisaˈicel mitodong ci Yisan. Haratengen hena, cecay faˈinayan salikaka mawmah to cecay romiˈad, tahalomaˈ i tada malotayayto. Soˈlin sapisawadaw to Pakalomaˈay a Pidoko toya dadaya saan ko harateng ningra, kawra micangacangay cingra ci Yihofaan pafeli to ˈicel cingranan, hato ngaˈayay misikay to Pakalomaˈay a Pidoko. Soˈlinay pacaˈofen ni Yihofa ko satolon ningra! Toya dadaya, mananamay no wawa ko kalimlaan a demak, pakaynien i wama wina, awaay ko maanan a demak mikikakaay to pidoko ci Yihofaan.

6. O maanan a tinakoan ngaˈay mitadtad, makahiay ci Yis mipalak to toki padama to tamdaw?

⁶ Makahiay ci Yis mipalak to toki padama to tamdaw. Ngaˈay harateng iso, tiya mafanaˈ to mipatayan ko paputisemay a Yohani i, hakowaay ko adada no falocoˈ ningra a masomad han? Sowal no Fangcalay Cudad: ‘Matengil ni Yis konini a lihaf ikor i, mikalicay to tamina miliyas itira, tayra i awaay ko adeses a kitiraan, caay kaciharateng makalisanga no tamdaw.’ (Matay 14:10-13) Ano masomad ko ˈalomanay tamdaw i, caay kaciharateng makalisanga no tao ko niyah, mansa cipinang kita to hano ciharateng ci Yis cecay aca to cecay liyad. Kawra awaay ko pakayraan ni Yis mihaen ko demak, samanen o ˈalomanay tamdaw isalakatay a tahira toya awaay ko adeses a kitiraan. Samanay ko harateng ni Yis hani? Maharatengay ningra tada misaaliay to sapasifanaˈ ato sahinom  ko ˈalomanay tamdaw ‘siniˈadaay cangranan,’ tangsolay padama cangranan, hanaca cowa ko mimingay aca ko sapasifanaˈ ni Yis cangranan, ao ‘pasifanaˈay cangranan to adihayay a demak.’—Marko 6:31-34; Luka 9:10, 11.

7-8. Tinakoen mitadtad, maˈaraw no malohemay malitengay ko misaaliay to sapadama a salikaka i, sasamaan mitodong ci Yisan.

⁷ Iraay ko olah a malohemay malitengay mamisaˈicel mitodong ci Yisan. Tada miakoˈiday kita to malohemay malitengay maroray ko falocoˈ ato tireng, pakayni kitaanan mihadak to niyah. Soˈlinay i adihayay a demak nangra cowa kaˈaraw ita. Tinakoen, ano tahalifa ko salikaka to macalohay papaisingen a pakayraan i, Mirinnakay to Ising a Iing a salikaka tangsolay mihadak to sadama. Adihayay a tatokian, o hatiniay a pakayraan itiniay i lafii a mifekad. Kawra, onini a ciolahay a malohemay malitengay ato paro no lomaˈ nangra maolahay to salikaka, mansa isalakatay cangra miharateng to saali no salikaka cowa ko niyah ko miharatengan.

⁸ Roma i, fanekfekay ko malohemay malitengay mirienang to padamaay to tahapadesay a tayal, ato patirengay to Hongti Kitakit Kasaˈopoan ato romaroma a demak. Itini kasakopang, pakayni sapasifanaˈaw cangra, pakalalok ato padama to salikaka, adihayay ko mapalakay a toki, awaay ko sasowalen. O mamikifalocoˈ kita miakoˈid to hatiniay a salikaka ato paro no lomaˈ nangra, nanay pakayni paihkal nangra to cowa pisateked a harateng palifon ci Yihofa cangranan. Manaokaniw, malecad to romaroma a Krisciyang, mamisadafdaf ko harateng no malohemay malitengay, aka misakahmaw to roma a demak. Cowa ka ngaˈay cangra adihay ko toki midimokos to demak no kasakopang, telocto misakahmaw to saali no paro no lomaˈ.

9. Mikitini Filipi 2:4, 5, o polong a Krisciyang o papalahad to masamaanay a harateng ato waywayan hani?

⁹ ˈOsien ko Filipi 2:4, 5. Cowa ko malohemay malitengay aca, kita o kahacecay tamdaw o mamitodong ci Yisan, mihadak to niyah matayal saki tao. Sowal no Fangcalay Cudad ci Yis ‘micadaay to tatirengan no koli.’ (Filipi 2:7) Sasamaan kita mitodong cingranan hani? Makahiay kita malo koli ni Yihofa ato malo sikawdan no salikaka, makalimay matongal ko kangaˈay no demak ci Yihofaan ato salikaka, malecad o cecay ngaˈayay koli anca ngaˈayay sikawdan misaˈicelay pakahemek to tawki. Sapihaenaw to demak, ngaˈayay haratengen ita ko ilaenoay a sapaini.

10. Ngaˈayay licayen ita ko niyah to maanan a salicay?

¹⁰ Haratengen samaanay ko waywayan no niyah. Ngaˈayay licayen ita ko niyah to pina salicay: “Hakowaay ko kalim ako makahi kinafalah a padama to tao hani? Ano ira ko mitahidangay takowanan a tamdaw milisoˈ to cecay matoˈasay a salikaka kalacafay cingranan, anca miˈorong to cecay matoˈasay a fafahiyan salikaka mirienang to saˈopo, samaanay ko harateng ako hani? Ano misaaliay to mamiasik to pitaykayan, anca misaaliay to tatomadawen ko Hongti Kitakit Kasaˈopoan, wa tangsol kako makahi padama han?” Haratengen, patafang kita to tireng ci Yihofaan i, maharekay to miketon patafang to kihcod no niyah Cingranan. Halamhamay Cingra kitaanan caka pisateked misaka dademak to toki no niyah, ˈicel ato dafong padama to tamdaw. Maˈaraw Ningra mihaen ko demak ita, madeng o mamahemek. Ano mahapinang ita iraay ko sasalofen no niyah, sasamaan ko pidemak hani?

11. O satolon sasamaan padama kitanan palahad to makahiay matayal saki tao a harateng hani?

¹¹ Mikifalocoˈ mitolon a micangacang ci Yihofaan. Ano mahapinang ita iraay ko fafalicen no niyah, kawra awaay ko ˈicel mihaen to demak, ka pasayra ci Yihofaan micangacang a mitolon. Soˈliˈlin mikifalocoˈ a pasowal ci Yihofaan, mingitangit Cingranan padama kitaanan ‘ira ko makalimay harateng ato ˈicel a midemak.’—Filipi 2:13.

12. O kapah a salikaka sasamaan mitongal to tayal i likakawa no Kawas hani?

¹² Ano o kapah a salikaka kiso, ngaˈayay cangacangen ci Yihofa padama tisowanan makalim matayal saki kasakopang. Itini roma kitakit, o kaˈaloman no malohemay malitengay ikakaayto dama sikawdan ko adihay, hanaca ˈalomanay dama sikawdan cowa ko kaemangay. Pakayni i noka padotoc a macowat ko likakawa, misaaliay kita to ˈalomanay kapah salikaka padama midimokos to siri no Kawas. Ano makahiay kiso midemak to masakenaay a tayal, o lalipahak kiso. Misamaanay hani? Samanen padama kiso to tao, o papakahemek ci Yihofaan, patireng to ngaˈayay ngangan no niyah, wa ira ko marenecay a harateng.

13-14. Ngaˈay kita samaan padama to salikaka? (Nengnengen papotalay a coka.)

¹³ Misinanot to saali no tao. Palimoˈotan no tarokos ci Pawlo ko Hipray a Krisciyang: ‘Aka mapawan to ngaˈayay demak ato paladaˈay, samanen maolahay ko Kawas to hatiniay a sapatoˈaya.’ (Hipray 13:16) Onini a sapalimoˈot taˈangayay ko sapadama cangranan, samanen caka halafin itiniay i Yutiya a Krisciyang o mamisawad to tayal, miliyas to lomaˈ no niyah ato cowa ko Krisciyang a salawina, o ‘mamilaliw tayra i lotok.’ (Matay 24:16) Maedeng misaaliay cangra madadama ngaˈ milakowit to pasangaray. ˈAyaw nonini, ano mitoorayto cangra to sapalimoˈot ni Pawlo, paladaˈ to dafong no niyah, wa madoloto cangra mananam to faelohay nokaˈorip.

¹⁴ Ano misaaliay ko salikaka to sapadama i,  cowa pifanaˈ kitaanan alatek. Tinakoen, malahdaw ko fafahi no cecay salikaka, tada masomaday ko falocoˈ, misaaliay cingra patado ko tao mitangtang alatek, tayra i lomaˈ ningra pacafay a dademak, anca ano masadak cingra i pacafay pakalic cingranan. Kawra cowa kaciharateng cingra miafad to tao alatek, mansa caka pasowal to tao padama cingranan. Kawra, ano talaˈayaw kita mihaen to demak, maedeng o mamiakoˈid cingra. Aka piharateng kita to iraay ko padamaay cingranan a tamdaw, anca miharateng ano misaaliay cingra to sapadama o papasowal kitaanan. Ngaˈayay haratengen ita: ‘Ano kako konini, tokel ako sasamaan padama ko tao takowanan hani?’

15. Ano makalimay kita matayal saki tamdaw, o mamalo masamaanay a tamdaw?

¹⁵ Madolo a ingiden, makahi padama to tamdaw. Itini kasakopang iso maedeng iraay ko roma salikaka madoloay ingiden, ano hacowa to tatokian makahiay padama to tamdaw, cowa ko papiharateng to tao hato miafaday cangranan. Makalimay kita malecad cangranan! O cecay 40 ko mihecaan a malohemay malitengay ci Aylon iraay ko mahaenay a patosokan. Midotimay cingra to taˈarawan ni Yis, sanay: “ˈIfowaay ci Yis, kawra ano cima to maolahay mikilim cingranan, caka talaw micangacang to sadama ningra, samanen soˈliˈlinay a ciharateng ci Yis cangranan sanay cangra miharateng. Soˈlinay makalim kako malecad ci Yisan, itini pinengneng no tao o madoloay a ingiden, matomesay ko olah ato damsayay a tamdaw.”

16. Mikitini ˈOlic 119:59, 60, sasamaan ko demak ita matongal ko kangaˈay no demak mitodong ci Yisan?

¹⁶ Awaay ko pakayraan ita malefot ko pitodong ci Yisan, kawra aka matoled kita. (Yakop 3:2) Haratengen, o cecay sito misatapang aca awaay ko pakayraan melecad o singsi ngaˈay  ko midemakan, kawra mikitini cingra i kararaw a minanam, misarocod mitodong to singsi, o papadadotoc a macakat. Malecaday, ano misaˈicel kita micekiw to Fangcalay Cudad, misaka dademak to mananamay, hanaca misalof to dangoc no niyah, mihaen mamatongal ko kangaˈay no demak mitodong ci Yisan.—ˈOsien ko ˈOlic 119:59, 60.

17-18. Minanam kita ci Yisan mikifalocoˈ makahi a padama to tamdaw, wa ira ko manan a malifokay hani?

¹⁷ O makahiay matayal saki tamdaw a harateng iraay ko midengaay a ˈicel. Cecay malohemay malitengay ci Timo sanay: “Itini kasakopang roma kapah salikaka padadotocay macakat, o damato a sikawdan nohatini, ilalomaˈ iraay ko kaemangayho. Kalikiay ko kacakat nangra, o cecay lalangian i maˈaraway ko roma tamdaw makahiay mihadak to niyah matayal saki tamdaw, makalimay sapahecadaw cangranan. O hatiniay a kapah salikaka cowa pisateked a matayal, taˈangayay ko sapadama to kasakopang, tada o ngaˈayay a dama no malohemay malitengay cangra.”

¹⁸ Anini ˈalomanay tamdaw no hekal misatekeday ko harateng, kawra cowa ka lecad ko finawlan ni Yihofa. Ci Yis mikifalocoˈay makahi mihadak to niyah matayal saki tamdaw, tada mitemeray to falocoˈ no mita, misetek to falocoˈ pasayra cingranan minanam. Soˈlin awaay ko pakayraan ita malefot ko pitodong cingranan, kawra o ngangaˈay kita ‘mikelec a mikotod to pasaripaˈan ningra.’ (1 Pitiro 2:21) Misarocod kita mitodong ci Yisan, mikifalocoˈ makahi a padama to tamdaw, o mamilifok to pihayda ni Yihofa, ira ko marenecay ato lipahakay.