1-2. (1) Anini ˈalomanay tamdaw hano pasangar pakasoˈlin to cifadangalay a tamdaw? (2) Onini a lalakaw mamilengo to maanan?

 ANINI ˈalomanay tamdaw pasangaray pakasoˈlin to cifadangalay a tamdaw, maˈaraway nangra o sifo ato holic misakakinihay midama to cifadangalay a tamdaw, kawra cowa ka ciharateng to sakangaˈay no manikaway a tamdaw. Matatodongay ko sowal no Fangcalay Cudad: ‘O tamdaw ko mikowan to tamdaw, pasemsemay to tamdaw.’ (Patnakay 8:9) Maˈarawayho no tamdaw ko malafoay a waywayan no ˈaˈideman no pihakelongan, mansa malahdaw ko pakasoˈlin to Kawas. Mihaenay, pasangaran nanay kita a padama to sito no Fangcalay Cudad mafanaˈ a mitadiˈec ci Yihofaan ato mikeriday i likakawa Ningra a tamdaw.

² Manaokaniw cowa ko sito aca no Fangcalay Cudad ko maminanam mitadiˈec ci Yihofaan ato likakawa Ningra, soˈlin halafinayto midoko ci Yihofaan a tamdaw, o papadadotoc pakasoˈlin ci Yihofaan, pakasoˈlin sahtoay o sangaˈayay ko pakayraan Ningra a dademak. Itini roma a pakayraan, o pakasoˈlin ita Cingranan micadaay to sapalifet alatek. Onini a lalakaw mamilengo to tolo a pakayraan: (1) Maasip ko pina maˈoningay no Fangcalay Cudad, (2) macada ko mikitiniay i likakawa ni Yihofa a sakayat, (3) noikor tahalifa to pasangaray a pakayraan.

3. Ano maasip ko pina maˈoningay no Fangcalay Cudad i, o pakasoˈlin ita ci Yihofaan hano mamicada to sapalifet alatek?

 ³ Ano maasip ita ko pina maˈoningay i Fangcalay Cudad i, cowa ka cipinang hano mahaen ko picada ni Yihofa to cecay tamdaw, anca hano misaˈosi to cecay demak? Tinakoen,  maˈoningay itini Saˈosi o cecay Israil tamdaw itini Paselaˈan a Romiˈad mipodpoday to kasoy, telocto mipatayan ni Yihofa. Ikor no halafinay miheca mifekad konini a demak, mikitini maˈoningay no saka 2 Samuil, o hongti ci Tafiti maˈaˈodangay mipatayayho to tamdaw, kawra misododan ni Yihofa cingra. (Saˈosi 15:32, 35; 2 Samuil 12:9, 13) Saan kita miharateng alatek: ‘Ci Tafiti midemakay to maˈaˈodangayho ato mipatayay to tamdaw a taˈangayay raraw, misododan ni Yihofa cingra, o roma tamdaw kahmaway ko raraw, hano patayen ni Yihofa cingra hani?’ Sapacaˈofaw tonini a salicay, haratengen ko tolo a demak.

4. O Satapangan 18:20, 21 ato Limoˈot 10:17 samaanay padama kitaanan pakasoˈlin to sasawkit ni Yihofa?

⁴ Cowa pihacecay ko Fangcalay Cudad mifanaˈ kitanan to kihcod mifekaday a demak. Tinakoen, mafanaˈay kita soˈliˈlinay ci Tafiti pasasiyor to nano raraw no niyah. (ˈOlic 51:2-4) Kawra oya mipodpoday to kasoy i Paselaˈan a Romiˈad a tamdaw samanay hani? Makesemay cingra to nano raraw no niyah han? I saˈayaw na misafelitay cingra to sarikec ni Yihofa han? Padeteng sanay cingra eca pitengil to limoˈot anca saliyaliyaw sanay eca ka falic han? Cowa ka somowal ko Fangcalay Cudad. Kawra, ngaˈayay pakasoˈlin kita, na cowaho ka ‘pisakakinih’ ci Yihofa. (Limoˈot 32:4) O sasawkit Ningra misalalangiay to mifekaday a wacay, cowa ka lecad cingra to tamdaw pakasoˈlin to matengilay, misakakinih to tamdaw, o sasawkit Ningra cowa ko mamafiyor no roma lalangian. (ˈOsien ko Satapangan 18:20, 21; Limoˈot 10:17.) Ano matongal ko kafanaˈ ita ci Yihofaan ato palinian Ningra, mamatongal ko pakasoˈlin to sasawkit Ningra. Soˈliˈlin miasip kita to Fangcalay Cudad i, cowa ka tangsol mahela ko caˈof no pina salicay. Kawra adihayay ko kafanaˈ ita ci Yihofaan, mansa ngaˈay pakasoˈlin to ‘moecelay ko kihcod a demak’ Ningra.—ˈOlic 145:17.

5. O moecelay a palinian ita hano iraay ko dangoc? (Nengnengen ko sapatongal lalakaw “ O Moecelay a Palinian Ita Iraay ko Dangoc.”)

⁵ Samanen cowa ko malefotay, o moecelay a palinian ita iraay ko dangoc. O mitooran ni Yihofa to tireng no Niyah misangaˈ kitanan, mansa iraay ko moecelay a harateng. (Satapangan 1:26) Kawra pakayni ka eca kalefot, mafanaˈayto kako to kihcod a demak saan ko niyah miharateng, o pisawkit ita mararawayho alatek. Haratengen ko tinakoan ni Yona, mafanaˈ cingra  cowa ko papalaˈafoen ni Yihofa ko Ninifi a tamdaw i, tada maketeray. (Yona 3:10–4:1) Haratengen o pisaˈosi ni Yihofa pairaay to maanan ngaˈayay minaroˈan. Itini niyaroˈ no Ninifi 12 emang ko mikifalocoˈay pasasiyor a malidongay a tamdaw! Mahapinangay mararaway ko pisawkit i, o ci Yona cowa ko ci Yihofa.

6. Hano awaay ko ˈinorong ni Yihofa mitadtad to lalangian Ningra midemak to cecay a saˈosi hani?

⁶ Awaay ko ˈinorong ni Yihofa pasayni i tamdaw mitadtad to hano mahaen ko misaˈosian Ningra. Soˈlinay na pasowalan ni Yihofa ko sikawdan Ningra, maharekayto anca mamisamaan ko saˈosi no Niyah, papipaihkal cangranan to harateng no niyah. (Satapangan 18:25; Yona 4:2, 3) Latekay, mitadtaday Cingra to lalangian a misaˈosi. (Yona 4:10, 11) Kawra wa ngaˈay eca pihaen ko demak Ningra. O Misangaˈay a Tatapangan Cingra, mihaenay itini ˈayaw anca ikor no pidemak, awaay ko ˈinorong Ningra milicay to sapaini ita.—Isaya 40:13, 14; 55:9.

7. Sasamaan ko pidemak cowa ko madoloay saan kita miharateng alatek? Misamaanay?

⁷ O pakayraan ni Yihofa a dademak o sangaˈayay, cowa ko cacisasa kita tonini, kawra sapakasoˈlinaw to minilnilan Ningra a tamdaw cowato ka dolo alatek. Saan kita miharateng: “O mikeriday a salikaka i likakawa ano misaˈosi i, midoedoay to sakayat ni Yihofa, anca tano niyah sanay a harateng ko pidemak han?” O roma nolitengan a tamdaw mahaenay ko harateng alatek. Nengnengen aca ko masowalay itini  saka tolo fatac a tinakoan. Tiya milasil ci Mosi to papatayen koya misafelitay to Paselaˈan a Romiˈad a tamdaw i, o paro no lomaˈ ningra cisasaay alatek: “Soˈlinay maharekayto a milicay ci Mosi ci Yihofaan han?” Maˈaˈodang ci Tafiti to fafahi no Heti tamdaw ci Uriya kawra cowa ka patayen, o widang ni Uriya saan miharateng alatek: “Maedeng misaka dademakay ci Tafiti to fadangalan no hongti, hato maliyasay ko sakapatay.” Haratengen pakasoˈlinay ci Yihofa to minilnilan Ningra a tamdaw, ano eca pakasoˈlin kita to mikeriday a salikaka, cowato ka ngaˈay pasowal to pakasoˈlinay ko niyah ci Yihofaan.

8. O pakayraan no aniniay a kasakopang no Krisciyang a dademak, iraay ko maanan kalecadan to saka 1 hahekalan a kasakopang? (Dmak 16:4, 5)

⁸ Anini itini fafekang no sera minilnilan ni Yihofa ko ‘madimadiay citanengay a koli’ mikayat to likakawa Ningra. (Matay 24:45) O madimadiay citanengay a koli ciˈinorongay mikayat to finawlan no Kawas, hanaca pafeli to sakayat to malohemay malitengay i kasakopang, malecad o demak no malohemay malitengay no saka 1 hahekalan. (ˈOsien ko Dmak 16:4, 5.) Itini kasakopang, o malohemay malitengay midoedoay tonini a sakayat midemak. Ano midofdof kita to sakayat no mikitiniay likakawa ato malohemay malitengay, paihkalay to pakasoˈlinay kita to pakayraan ni Yihofa a dademak.

9. Itini masamaanay a pakayraan, pasangaren kita a palecad to saˈosi no malohemay malitengay alatek? Misamanay?

⁹ Itini roma pakayraan, latekay pasangaray kita palecad to saˈosi no malohemay malitengay. Tinakoen, toniya pina miheca adihayay kasakopang ato kasakilac pakomodan. Latekay, mitahidangay ko malohemay malitengay to papina salikaka malinah tayra i faelohay kasakopang, mihaen o ngangaˈayto misaka dademak to Kasaˈopoan. Ano mitahidang ko malohemay malitengay kitaanan mihaen to demak, o tatangoˈol kita miliyas to paro no lomaˈ anca o widang. Hatiraay, pasowalan ni Yihofa ko malohemay malitengay, o kahacecay a mitosilay tatalacowaen a kasakopang misilsil hani? Cowa ka pihaen. Mahaenay, pasangarento kita a midoedo to saˈosi nangra a midemak alatek. Kawra, haratengen pakasoˈlinay ci Yihofa to  malohemay malitengay, paiken cangranan patado to kasakopang a misaˈosi, ano kitato o papakasoˈlin cangranan. *

10. Mikitini Hipray 13:17, hano papalecaden ita ko malohemay malitengay?

¹⁰ Soˈlin cowa ka lecad to maharatengay ita ko saˈosi no malohemay malitengay, hano kakamayen kita a midama cangranan hani? Samanen mihaen to demak, o ngangaˈay midama to kakelec no finawlan no Kawas. (Ifiso 4:2, 3) Roma i, misapoener ko kahacecay tamdaw midama to saˈosi no kasacefang no malohemay malitengay, o mamacowat ko kasakopang. (ˈOsien ko Hipray 13:17.) Sakakaay i, pakasoˈlinay ci Yihofa tonini a malohemay malitengay, patorod cangranan midimokos kitaanan, mihaenay ano palecad kita cangranan o paihkalay to pakasoˈlinay ko niyah ci Yihofaan.—Dmak 20:28.

11. Haratengen ita ko maanan, o mamatongal ko pakasoˈlin to malohemay malitengay, makahi midoedo to sakayat nangra?

¹¹ Sasamaan kita mitongal to pakasoˈlin to malohemay malitengay, makahi a midoedo to sakayat nangra hani? Haratengen ita, ano misaysay cangra to milingatay to demak no kasakopang i, mitolonay ci Yihofaan, micangacang Cingranan pafeli to fangcalay saocor. Misongilaˈayho cangra misimsim to safalod no Fangcalay Cudad ato mikilim to mihadakan no likakawa no Kawas a sakayat. Makalimay ko malohemay malitengay pakahemek ci Yihofaan, misarocoday misongilaˈ a midimokos to finawlan Ningra, onini madimadiay a salikaka cipinangay, samaan ko pidemak nangra to ˈinorong o papasowal ci Yihofaan. (1 Pitiro 5:2, 3) Haratengen, onini hekal pakayni kasangasaw, pihakelongan ato mirikecay maliwasakay, kawra makelecay a malacecay kita midoko to tada cecayay a Kawas. Ngaˈay makelec ko likakawa no Kawas, sahtoay o sapalemed ni Yihofa kitaanan.

12. Ano mihapinang ko malohemay malitengay to soˈlinay pasasiyor ko mararaway tamdaw i, mamiharateng to maanan a lalangian?

¹² Patorodan ni Yihofa ko malohemay malitengay to kalimlaan a ˈinorong, o mamitafo to kakorac no kasakopang. Ano ira ko tamdaw pakidemay ko raraw, o malohemay malitengay o mamitoor to saali ni Yihofa, misawkit tonini a tamdaw wa ngaˈay materek i kasakopang hokira. Adihayay ko haharatengen no malohemay malitengay a demak, minengneng tonini mararaway a tamdaw soˈliˈlinay mikifalocoˈ a pasasiyor. O sowal aca to makesemay ko niyah, kawra ˈintehay ko falocoˈ to na midemakan no niyah tatiihay a demak han? Misetekay to falocoˈ ecato piliyaw mararaw to malecaday a demak han? O noka raraw ningra, pakayniay pifiyor no tatiihay widang, mamakahi cingra ecato picawmaˈ to mahaenay tamdaw han? Wa mikifalocoˈ a micangacang ko malohemay malitengay mitolon, misimsim to mifekaday a demak ato safalod no Fangcalay Cudad, ato waywayan noniya tamdaw pakayni i raraw no niyah, ikor mamisaˈosi cangra o ngangaˈay materek i kasakopang konini a tamdaw. Itini roma pakayraan, mamisaˈosi cangra mifalah tonini mararaway a tamdaw.—1 Korinto 5:11-13.

13. Ano mafalah ko paro no lomaˈ anca o widang ita, wa ira ko maanan a sasa ita hani?

¹³ Itini masamanay a pakayraan, o pakasoˈlin ita to malohemay malitengay o mamicada to sapalifet alatek? O mafalahay tamdaw ano cowa ko paro no lomaˈ anca ngaˈayay widang ita, wa madolo micada to misaˈosian no malohemay malitengay alatek. Kawra o mafalahay tamdaw ano ngaˈayay ko kalalaˈed kitaanan, cowato ka lecad ko pakayraan. Cacisasa kita miharateng alatek: “Misongilaˈay ko malohemay malitengay miharateng to kihcod  a lalangian han? O saˈosi nangra soˈlinay o harateng ni Yihofa han?” Sasamaan kita ngaˈ ira ko matatodongay a pinengneng to saˈosi no kasacefang no malohemay malitengay hani?

14. Ano misaˈosi ko malohemay malitengay mifalah to paro no lomaˈ anca widang ita, o haharatengen ita ko maanan?

¹⁴ Haratengen ita o mifalahay o limasmas ni Yihofa, ngaˈayay midipot to kasakopang, ciepocayho to mararaway a tamdaw. O cowa kakahi pasasiyor a tamdaw ano padotoc materek i kasakopang, wa ira ko tatiihay pifiyor to romaroma tamdaw. (Kalatiya 5:9) Roma i, harateng no mararaway tamdaw cowa ka pakidem ko raraw no niyah saan, mihaenay awaay ko ˈicel mifalic to harateng ato waywayan no niyah, telocto eca ka ngaˈay miliyaw milifok to pihayda ni Yihofa. (Patnakay 8:11) Ngaˈay kita pakasoˈlin, cowa ko papatelas ko malohemay malitengay a mifalah to cecay tamdaw. Malecaday to misawkitay no Israil, cipinangay cangra to niyah ‘cowa ko pakayniay i tamdaw ko pisawkit, ao pakayniay ci Yihofaan.’—2 Rayray 19:6, 7.

15. Nohatini hano ikakaay to salakatay ko sapitongalaw ita pakasoˈlin to sakayat ni Yihofa?

¹⁵ Mangataayto malaˈafo konini a hekal. Nohatini ikakaay to salakatay ko sapitongalaw ita to pakasoˈlin, o sangaˈayay ko pakayraan ni Yihofa a dademak. Misamanay hani? Samanen itini taˈangayay padiing a tatokian, o macadaay ita a sakayat kafahkaan nengnengen, cowa ka tada matatodong. Kawra, cowa ko ka cisasaan a tatokian itiya! Cowa ko papasowal ci Yihofa kitaanan, pakaynien Ningra i mikeriday a salikaka mihadak ko sakayat alatek. Cowa ka ngaˈay cisasa tonini a sakayat, miharateng: “Soˈlinay o mikitiniay ci Yihofaan konini a sakayat han? Anca o harateng aca no mikeriday a salikaka hokira?” Itini tonini kalimlaan a tatokian, o pakasoˈlin ita ci Yihofaan ato likakawa Ningra o papakaremo to sapalifet, o tahapinangan i samanay ko pinengneng ita to mihadakan no likakawa a sakayat anini ko piˈarawan. Nohatini ano pakasoˈlin kita to mikeriday a salikaka, makahi a midoedo to sakayat nangra, itini i taˈangayay padiing a tatokian o mamihaen ko demak ita.—Luka 16:10.

16. Cato ka halafin, o pakasoˈlin ita to sasawkit ni Yihofa sasamaan micada to sapalifet?

¹⁶ Iraay ko cecay demak o haharatengen ita. Nohatini, maedeng makalimay kita ira ko ˈalomanay tamdaw ngaˈay malidong, mikiriwiˈay oya cowa pihakelong a paro no lomaˈ. Kawra o cima ko mamalidong cima ko cowa malidong cowa ko kita ko mamisaˈosi. (Matay 25:34, 41, 46) Itini Armakiton, pakaynien ni Yihofa ci Yisan midemak to salikoray a pisawkit. (Matay 25:31-33; 2 Tisalonika 1:7-9) Maraod ko toki papakasoˈlin kita to sasawkit ni Yihofa han? Anca pakayni  kita i katoled sawad saan midoko ci Yihofaan han? Aniniho, o papaˈicelento ita ko pakasoˈlin ci Yihofaan, mihaen o mamasongilaˈ ko pakasoˈlin ita Cingranan noikor.

17. O sasawkit ni Yihofa itini faelohay hekal papaira to maanan makapahay minaroˈan?

¹⁷ Haratengen hena, o sasawkit ni Yihofa itini faelohay hekal papaira to makapahay a minaroˈan! Toniya hekal awaayto ko mararaway pihakelongan, maˈanofay a lekakawa no misasingdiay, ato pairaay to saroero ato pades a sifo. Cowato ko tatahalifa kita to adada, matoˈas ato masomad to kapatay no salawina. Ci Satan ato tatiihay coyoh mamapalit to 1,000 miheca, o pairaan no pitowakang nangra a tatiihay demak o mamasongilaˈ a malahdaw. (Paˈarawan 20:2, 3) Itiya, o mamahemek kita cowa ka cisasa ko niyah to pakayraan ni Yihofa a dademak.

18. Itini Saˈosi 11:4-6 ato 21:5 maˈoningay ko tinakoan no Israil a demak, mikitini mamananam ita ko maanan?

¹⁸ Itini faelohay hekal, tatahalifa kita to pasangaray pakayraan alatek, palifet to pakasoˈlin ita ci Yihofaan. Haratengen ko tinakoan no Israil tamdaw. Miliyas cangra to kala koli i Icip caka halafin, o roma tamdaw caka tahakaen to kakaenen no Icip misatapangay ngaliwngiw, mapiliˈay to sapafeli ni Yihofa a mana. (ˈOsien ko Saˈosi 11:4-6; 21:5.) Mahererek ko taˈangayay padiing, wa ira ko mahaenay a pasangaray no mita han? Sapatikolaw mikorac pala lakoing to cikiw hakowaay ko hademak, cowa ka fanaˈ kita. Salakat adihayay ko hatayal alatek, wa ira ko cowa ka depocan a demak alatek, o papakayni ko ka ngaliwngiw ita to sapafeli ato limasmas ni Yihofa han? Ngaˈayay pakasoˈlinen ko cecay demak, nohatini ano miakoˈiday kita to kihcod sapafeli ato limasmas ni Yihofa, noikor o mamiakoˈid ci Yihofaan.

19. Sasamaan kiso mihererek to kalimlaan nonini a lalakaw hani?

¹⁹ O papakasoˈlinen ita to o sangaˈayay ko pakayraan ni Yihofa a dademak. Roma i, papakasoˈlinen ita ko mikeriday a salikaka, samanen pakasoˈlinay ci Yihofa cangranan, pakasoˈlin to mamitoor cangra to sakayat Ningra a midemak. Aka mapawan kita to pakaynian ni Yihofa ci Isayaan mihadak a sapalimoˈot: ‘Aka marawraw, sarocoden mitadiˈec Kako, o caciˈicel kamo.’—Isaya 30:15.