1. Pakayni hahacowa ira ko kahererekan, pasowalan ni Yis ko nisawawaan to maanan? Patalipaˈelalan ningra cangra to maanan hani?

 ˈAYAW no patayen ci Yis to pina romiˈad, sasepatay a nisawawaan ningra milicayay cingranan: ‘Noikor wa ira ko maanan tahapinangan . . . patalahkal to itiniayto i salikoray ˈawaled konini a lekakawa?’ (Matay 24:3) Sapilicayaw cangra ci Yisan alatek, sasamaan cangra mafanaˈ hahacowa mahererek ko lekakawa no Yutaya. O sapacaˈof ni Yis cowa ko pilingat aca to kahererekan no lekakawa no Yutaya, milingatayho to salikoray ˈawaled no kaˈoripan ita a lekakawa. Pakayni hahacowa ira ko salikoray romiˈad, sanay ci Yis: ‘Oya romiˈad, oya tatokian, awaay ko mafanaˈay, cowa ka fanaˈ ko coyoh, cowa ka fanaˈ ko Wawa, edengan o Wama ako ko mafanaˈay.’ Dotoc, patalipaˈelalan ningra ko nisawawaan ‘ka picerid mapalal,’ ‘ka padotoc mitapal.’—Marko 13:32-37.

2. Misamaanay hano itiniay i lekakawa no Yutaya maˈorip a Krisciyang papadadotoc a mitapal?

² Saka 1 hahekalan a Yutaya Krisciyang papadadotoc a mitapal wangaˈ, samanen milingatay konini to ˈorip nangra. Pasowalan ni Yis ko nisawawaan, sasamaan mahapinang nangra to mamahererekto ko lekakawa no Yutaya. Sanay cingra: ‘Maˈaraw namo ko pilikot no sofitay to niyaroˈ no Yirusalim i, mafanaˈto to mamalaˈafo koniya niyaroˈ.’ Mifekad konini a demak i, o mamitengil ko nisawawaan to sapatalipaˈelal ni Yis, ‘milaliw tayra i lotok.’ (Luka 21:20, 21) Tiya palaˈafoen no sofitay no Loma ko Yirusalim i, polong mitengilay tonini sapatalipaˈelal a tamdaw madipotay ko ˈorip nangra.

3. Onini lalakaw mamilengo to maanan?

³ Anini, itiniayto kita i salikoray a ˈawaled nonini mariˈangay a lekakawa a maˈorip, mankora o papadadotoc kita talipaˈelal a mitapal. Onini lalakaw mamilengo, sasamaan kita misinanot to kalingad no demak no hekal, ira ko matatodongay pinengneng to demak. Mamilengoho ko lalakaw, mamisamaan kita  misinanot to niyah, ato sasamaan ciepoc a misaka dademak to ˈosaw a toki.

4. Hano mamisinanot kita to kalingad no demak no hekal iraay ko maanan a kalaliting to sapairasol no Fangcalay Cudad?

⁴ O caciharateng kita to kalingad no demak no hekal, samaanay malaˈosi ko sapairasol no Fangcalay Cudad. Misamaanay hani? Pasowalay ci Yis, ano maˈaraw ita mifekad ko maanan a demak i, o mamafanaˈ mangataayto mahererek ko hekal ni Satan. (Matay 24:3-14) Pakalalokay ko tarokos ci Pitiro kitaanan misinanot to kalaˈosi no sapairasol, samanen o papadama konini kitaanan padadotoc a tanektek a pakasoˈlin. (2 Pitiro 1:19-21) Roma i, salikoray a cudad no Fangcalay Cudad mitekaay a pasowal: ‘O sapafeli no Kawas ci Yis Kristoan a sapaˈaraw konini, o mamifekad noikor a demak, pasayra i koli no niyah a mitadtad.’ (Paˈarawan 1:1) Mihaenay i, o caciharateng kita to kalingad no demak no hekal, to sakafanaˈaw to samaanay malaˈosi ko sapairasol no Fangcalay Cudad. Alatek makalimay kita to sapilengoaw to tao pakayni tonini a demak.

5. Aka a pisamaan to demak kita? Mamisamaan to demak kita? (Nengnengen ko coka.)

⁵ Nikawrira, ano milengo to sapairasol no Fangcalay Cudad to tamdaw i, aka saolatekay sa pasowal. Misamaanay hani? Samanen cowa ka olah kita mikidat ko sowal ita to sakaliwasakaw no kasakopang. Tinakoen, alatek matengil ita ko ˈaˈideman no mirikecay somowal to ngangaˈay cangra misaysay to kasasongtol no kitakit, paira to dipayal rihaday no tamdaw ano saan. Itiya i, cowa ka ngaˈay kita saolatekay sa miharateng, to malaˈosiayto ko sapairasol no 1 Tisalonika 5:3, ao mamisinanot to safaelohay a mitepangan no likakawa no Kawas. Ano malalengo kita to salikaka pakayni tonini sapairasol i, salalangien ko safaelohay a lalakaw, hongaˈay malacecayto ko pinengneng no mita, micowat to kakedec no kasakopang.—1 Korinto 1:10; 4:6.

6. Mikitini 2 Pitiro 3:11-13 mananamay ita ko maanan?

⁶ ˈOsien ko 2 Pitiro 3:11-13. Pakayni to sasamaan minengneng to sapairasol no Fangcalay Cudad, sowal no tarokos ci Pitiro papadama kitaanan padadotoc matatodong ko pinengneng. Patalipaˈelalay cingra kitaanan ‘halamhamen mitala ko kaira no romiˈad ni Yihofa, pakifalocoˈen to mangataayto ko romiˈad.’ Hano mamihaen kita to demak hani? Cowa ko pakayniay sakafanaˈaw to pifekadan ni Yihofa ‘tora romiˈad, tora tatokian’ no Armakiton, ao pakayniay kaciharateng ita iˈayaw no kaira nora taˈangayay a romiˈad, ‘ira ko makoracay a capeling, mangodoay a waywayan.’ (Matay 24:36; Luka 12:40) Falicen ko sowal i, mamitafo kita to moecelay a capeling, halo misaˈicel ko niyah pakayni ci Yihofaan dademak samanen maolahay kita Cingranan. Sapitooraw tonini a patosokan, mamisinanot kita to niyah.

7. Ano ‘sapisinanotaw kita to niyah’ i, sasamaan ko pidemak? (Luka 21:34)

⁷ Pasowalan ni Yis ko nisawawaan cowa ko pisinanot aca to kalingad no demak no hekal, patalipaˈelalayho to nisawawaan ka pisinanot to niyah. Itini Luka 21:34 pasowalay to nisawawaan papihaen to demak. (ˈOsien.) Sanay cingra: ‘Ka pinaˈon kamo.’ Onini a sowal itini sapatongal a mihongyakan i, ‘ka pisinanot kamo to niyah’ sanay. Ano misinanot ko tamdaw to niyah, pakayni mamipalak to kalawidang ningra aci Yihofaan a demak, o papadotoc a talipaˈelal, hanaca misaˈicel miliyas  to mahaenay a demak. Ano mihaen, o ngangaˈayto materek cingra i olah no Kawas.—Taneng 22:3; Yuta 20, 21.

8. O manan ko sapalimoˈot no tarokos ci Pawlo to Krisciyang hani?

⁸ Tarokos ci Pawlo palimoˈotay to Krisciyang papisinanot to niyah. Tinakoen, sanay pasowal to Ifisoay a Krisciyang: ‘Ka pisinanot kamo to niyah sasamaan ko waywayan a midemak, aka a matiya o mafolaay a tamdaw, ka matiya o citanengay a tamdaw.’ (Ifiso 5:15, 16) Ci Satan cowa ka tomerep a mipalak to kalawidang ita aci Yihofa, mansa patalipaˈelalay ko Fangcalay Cudad kitaanan ‘padadotoc a mihapinang to maanan ko araaw ni Yihofa.’ Mihaen i, ano samaanto ci Satan miˈodis kitaanan, cowa ko mamapalak ko kalawidang ita aci Yihofa.—Ifiso 5:17.

9. Sasamaan kita mihapinang to araaw ni Yihofa hani?

⁹ O Fangcalay Cudad cowa ka pihacecay mihadak to maanan a demakan ko mamipalak to kalawidang ita aci Yihofa. Ano cowa ka ihkal ko sowal no Fangcalay Cudad to cecay a demak o tatiihay hokira, wa o niyah ko mamihapinang a misaˈosi. Sakatatodongaw ko pisaˈosi, o hahapinangen ita ko ‘araaw ni Yihofa.’ Sasamaan ko pidemak hani? Mamicerid kita micekiw to Kimad no Kawas, misongilaˈ a midotim. Ano iraay kono ‘ni Kristo a harateng’ ita, mamatongal ko kacipinang to araaw ni Yihofa, wa madoloto ‘malo citanengay a tamdaw kita.’ Soˈliˈlin awa ko patodicekay a saˈosi, wa ngaˈay citaneng ko pisaˈosi ita. (1 Korinto 2:14-16) Ilaeno lalengoen ita, o romaroma katalawan ihkalay a mahapinang, kawra o romaroma katalawan pasangaray mahapinang.

10. Laliyasen ita ko maanan tatiihay a demak?

¹⁰ O ihkalay mahapinang a katalawan, mahawpay ko mikalonaay, haliepahay, cowa pakaˈimer to kakaenen, tatiihay a sasowalen, malaˈodotay a kamok ato maˈodangay a lalakaw, o hatiniay a demak oha laliyasen ita. (ˈOlic 101:3) O ˈada ita ci Akoma Satan mikakilimay to toki sapipalakaw to kalawidang ita aci Yihofa. (1 Pitiro 5:8) Ano eca ka padadotoc talipaˈelal kita, aitini i ponoˈ ato falocoˈ ita mikosam cingra to ˈinap, misamangahay, maˈanofay, ˈintehay, misatakaraway ato mangolaway a sapaloma. (Kalatiya 5:19-21) Satapangho i, o hatiniay a harateng cowaho ka pakidem alatek, kawra ano caka tangsolen ita a mifaˈenot, hahatira o ciwarakay a semot lomahad, salikor mamidokaˈ kitaanan.—Yakop 1:14, 15.

11. O laliyasen ita a cecay cowa ka hapinang a katalawan o maanan hani? Misamaanay?

¹¹ O laliyasen ita a cecay cowa ka hapinang a katalawan i, o tatiihay a cawmaˈ. Haratengen ko cecay pakayraan. O cafay iso matayal cowa ko Krisciyang, makalimay kiso ngaˈay ko pinengneng ningra to Misawacayay Tamdaw ni Yihofa, mansa misangaˈayan iso cingra, mararidayho padama cingranan. Latekay malacafayay kiso cingranan malahok. Caka halafin, mararidayto kamo mihaen to demak. Latekay somowalay cingra to kaacekan a demak, satapangho cowa ka pahecad kiso to sowal ningra, kawra mataˈlif ko cecay liyad, mananamayto kiso to mahaenay a sowal, cowato ka tatiih ko harateng. Cecay romiˈad, oniya cafay matayal mitahidangay tisowanan ano paselaˈ matayal komaen to epah, hayi sanay kiso. O piharateng iso hatini malecad malecadayto toniya cafay matayal, caka halafin, o waywayan iso mahecadayto toniya cafay matayal. Manaokaniw, makalimay kita mikangodo ato mikangaˈay to polong a tamdaw, kawra haharatengen ita, micawmaˈan ita a tamdaw o tataˈangay ko pifiyor kitaanan. (1 Korinto 15:33) Sapidofdofaw kita to sapatalipaˈelal ni  Yis misinanot to niyah, laliyasen ita ko cowa pidoedo to palinian ni Yihofa a tamdaw, aka picawmaˈ cangranan. (2 Korinto 6:15) Hahapinangen ita ko mahimeday a katalawan, hanaca tangsol palaliyoc a miliyas.

12. O nisawawaan ni Yis itini pitala to pihererekan a romiˈad, midemakayho to maanan hani?

¹² O nisawawaan ni Yis cowa ka tatala sa to pihererekan a romiˈad, eca ka pimaan. Pafelian ni Yis cangra to tayal, palimoˈot cangranan itini i ‘Yirusalim, polong no Yutiya, Samariya, tangasa i sara:ayay a pala’ milasil to ngaˈayay lihaf. (Dmak 1:6-8) Tada o karetengay a ˈinorong konini! Misaˈicelay cangra milasil to ngaˈayay lihaf, soˈlinay a ciepoc ko pisaka dademak to toki no niyah.

13. Hano mamisaˈicel kita ciepoc a misaka dademak to toki hani? (Kolosay 4:5)

¹³ ˈOsien ko Kolosay 4:5. Sapisinanotaw kita to niyah, oha mamisongilaˈ miharateng to sasamaan ciepoc a misaka dademak to toki. Kita o kahacecay tamdaw o tatahalifa to ‘cowa ka harateng a pakayraan’ alatek. (Patnakay 9:11) O tatalifahal sa a mapatay kita alatek.

14-15. Sasamaan kita misaˈicel ciepoc a misaka dademak to toki? (Hipray 6:11, 12) (Nengnengen ko coka.)

¹⁴ Ano sapisaˈicelaw ciepoc a misaka dademak kita to toki i, dadoedoen ko araaw ni  Yihofa a dademak, halo mitongal to kalawidang Cingranan. (Yohani 14:21) Kita i, ‘fanekfeken aka mangiyangi, adihayen ko pidemak to tayal no Tapang.’ (1 Korinto 15:58) Mihaenay, ano tahatolasto ko ˈorip ita, anca ano mahererekto konini a lekakawa i, aawa ko kiyam no falocoˈ ita.—Matay 24:13; Loma 14:8.

¹⁵ Anini, padadotocay ci Yis mikayat to nisawawaan ningra itini icowacowa a patenak to ngaˈayay lihaf no Hongti Kitakit no Kawas. Midemakayto cingra to dademaken ningra a tayal, pakaynian i likakawa no Kawas pahatatanam kitaanan micowat to mitosilay a tayal, hanaca pafeliay kitaanan to sapitosil a masakenakenaay a lalosidan. (Matay 28:18-20) Mihaenay, o mamidemak kita to dademaken ita a tayal, malalok a mirienang to mitosilay pakafanaˈay to tamdaw a tayal, hanaca i pitalaan to hakairaan no romiˈad ni Yihofa a tatokian padadotoc a mitapal. Ano dofdofen ita ko sapalimoˈot no Hipray 6:11, 12, o papadotocto mitala to hatokel ‘tahira i salikoray a romiˈad.’—ˈOsien.

16. Mamisetek kita to falocoˈ samaan ko pidemak hani?

¹⁶ Maherekayto ci Yihofa misaˈosi to romiˈad ato toki to sapalaˈafoaw to hekal ni Satan, o papalaˈosien Ningra ko polong mipairasolan no Niyah a sowal. Soˈliˈlin nolatekay halafinayho ko sakahererekaw nonini lekakawa sanay kita alatek, kawrira o romiˈad ni Yihofa ‘cowa ko mamanayar!’ (Hapakuk 2:3) Mihaenay i, nanay misetek kita to falocoˈ ‘padadotoc mitiˈer a mihamham ci Yihofaan, mihadidi mitala to pilidong no Kawas [kitaanan].’—Mika 7:7.