Matawaay kako, samanen cowa ka fanaˈ kako to iraay ko pihakelongan ningra. Licay hananay ako: “Hakowaay ko kafanaˈan iso to Fangcalay Cudad hani?” Cowa ka tangsol sa pacaˈof takowanan. Ikor sanay cingra, o wina no mako o Misawacayay Tamdaw ni Yihofa, naitiniay cingra i winaan minanam to pakayniay Fangcalay Cudad. Tada fahkaˈay kako, mansa coracoran ako cingra pasowal to adihayay.

Salafii sanay kami masasowal toya dadaya. Pasowalay takowanan, ci Satan ko mikowanay tonini a hekal sanay ko Fangcalay Cudad. (Yohani 14:30) Pakayni takowanan o faelohay a pinengneng konini, makidatay ko sakafanaˈaw ako. O matengilay ako itiyaho o siniˈadaay ato masadafdafay ko pikowan no Kawas tonini a hekal sanay, kawra cowa ka lecad to maˈaraway ako a pakayraan. Soˈliˈlin 26 ho ko mihecaan, kawra maˈaraway ako ko adihayay cowa ka rihaday a demak.

O wama ako na o miontingay to Hikoki a Sofitay no Padaka, mansa kaemangho kako i, mafanaˈayto to mamafekad ko lalood, maherekayto ko sofitay misaday. Itini picudadan no mako i Kalefoniya a taykak, tada mafiyoray no kalalood no Finam kako. Mirienangay kako to mitowakangay a demak. Itiya mitatiway ko dimeng to sasetiˈ a milepel tamiyanan, mifahkolay to palosaˈay a afet mipohaw to mata niyam. Masasifoday ko hekal itiya, matomesay ko mitowakangay a demak. Mipatayan ko mirikecay tamdaw, ˈalomanay ko mirienangay to mifodifoday ato mitowakangay a demak. Matenakay ko masasiromaromaay a pinengneng no tamdaw, cowato kafanaˈ ko tamdaw o maanan ko papakasoˈlinen.

1970 miheca, mahelaay ako ko tayal itini i Alaska, mietan to adihayay a payci. Ikor, tayraay kako i Lonton, micakay to otofay itira, ikor pasitimolay ko rakat ako. Ikor no pina folad, tangasa kako i Afrika. Malitemohay ako ko ˈalomanay malecaday takowanan makalimay to pasalat a tamdaw, sapiliyasaw cangra to tatiihay pakayraan, ira ko ngaˈayay kaˈorip.

Pakayni to maˈaraway ato matengilay ako, hato matatodongay ko sowal no Fangcalay Cudad, onini a hekal maedeng iraay ko cecay tatiihay a coyoh a  mikowan. Ano hatiraay i, mimaanay ko Kawas hani? Tada sakafanaˈaw kako.

Ikor no pina folad, mahelaayto ako ko caˈof. Mafanaˈay kako to ˈalomanay madimadiay to Kawas a tamdaw, itini masamaamaanay a pakayraan patalahkalay to pakasoˈlin no falocoˈ, tada maolahay kako cangranan.

Minokayto i Lonton ikor, mirinnakay kako to wina no widang, pafeliay takowanan to cecay a Fangcalay Cudad. Ikor, tayraay kako i Amostetan no Helan. Kinacecayay itiniay kako i laeno no tinghoy no lalan miasip to Fangcalay Cudad, maˈaraway no cecay Misawacayay Tamdaw ni Yihofa. Ikor, padamaay cingra takowanan minanam to Fangcalay Cudad. Oranto i, tayraay kako i Tuplin no Ayelan, mahelaayto ko fenpo no Misawacayay Tamdaw ni Yihofa. Itiraay mafanaˈ kako ci Ase Masiwan, o citanengay ato adihayay ko nalifetan a salikaka cingra. Pasowalan ako to makalimay kako minanam to Fangcalay Cudad, mihayiay cingra pasifanaˈ takowanan.

Misarocoday kako a minanam, samacay hananay ako miˈosi ko mitepangan no Misawacayay Tamdaw ni Yihofa a cudad. Minengnengay kako to Fangcalay Cudad. Itiya hato matamaay ko kalimlaan a odoˈ! Itini saˈopo maˈaraway ako, ano o kaemangayto mafanaˈay pacaˈof to ‘hano ira ko tatiihay demak no hekal?’ ‘O cima ko Kawas?’ ‘Mapatay ko tamdaw samaanayto?’ O mahaenay a salicay mikitini nolitengan tahanini caay ka cipinang ko adihayay ko sifanaˈ a tamdaw. Itiya edengan ko Misawacayay Tamdaw ni Yihofa ko micawmaˈan ako, samanen cowa ka fanaˈ kako to romaroma tamdaw itira. Itini sapadama no salikaka, matongal matongalay ko kaolah ako ci Yihofaan, makalimay midoedo to araaw Ningra a midemak.

1972 miheca mipaputisemay kako. Ikor no cecay miheca, misatapangay kako misakafah, mirienangay to Niwli Kaˈamis a Ayelan, cowa ka ˈaloman ko tamdaw a kasakopang. Miesoyay kako to mimingay a lomaˈ, awaay ko tamdaw ingata, iraay ko papina a kolong. Pasayraay kako camiraan mihatatanam a mikimad, komaen to rengos a mitengil camira, hato misongilaˈay a mitengil. Soˈliˈlin cowa ka fanaˈ misalof to pikimad ako, kawra ira camira itira, ngaˈayay kako mihatatanam pamotek a minengneng to mitengilay. 1974 miheca, manilnilay kako malo mikiriwiˈay misakafahay. Cafay ako o salikaka ci Naycie Pite, hakelong nokaˈorip ngaˈayay ko kalawidang niyam.

Itiya, i Kaˈamis a Ayelan adihayay ko mariˈangay masasongtolay a demak. Panganganan no roma tamdaw ko Kaˈamis a Ayelan to “fakotang ato citimeraˈay a kitakit,” matatodongay koniya sowal, samanen o malaˈodotay i lalan, makakowangay ato  mafakohacay a citosiya marariday mifekad. Soˈliˈlin adihayay ko masasongtolay, cowa ka tomerep ko kasasifod no mirikecay ato pihakelongan, kawra o Tingsokiw ato Kristosinkiyo mafanaˈay to misatenokay ko saaroˈan niyam i mirikecay a demak. Mansa mitosil kami i, cowa ka piconged tamiyanan, cowa ka calemcem kami to sakarihadayaw no ˈorip. O itiraay tamdaw mafanaˈay icowa a kitiraan ato ihacowa a tatokian mamafekad ko masasongtolay a demak, hato paˈayaway cangra pasowal tamiyanan, mihaen ngaˈayto kami miliyas to katalawan.

Kawrira, kamayan malifa niyam ko pina katalawan a pakayraan. Cecay romiˈad, kako ato roma misakafahay ci Tanis Kaliken salikaka malacafayay ingata a niyaroˈ mitosil. Itira awaay ko Misawacayay Tamdaw ni Yihofa, na tayraay kami isaˈayaw. Itini i kakomaenan, o cecay fafahiyan mipakokotay to o sofitay no Ikok kami, samanen mangilayay ko sowal niyam. Mansa matalaway kami, ano sangaˈayen no tamdaw ko sofitay no Ikok to miming aca i, alatek kowangen ko toros anca mipatay. Miliyasay itira kami, sasienaw sato mitala to faso. Itiya i, iraay ko cecay tosiya tomirengay i kaˈayaw no kakomaenan. Mahadakay koya pakokotay a fafahiyan, masasowal a mitoroˈ pasayni tamiyanan. Oya tatosaay faˈinayan minaˈonay parakat to tosiya tayni i kaˈayaw niyam, ikor milicayay tamiyanan to kairaan no faso a toki. Irato ko faso i, pasowalan nangra koya parakatay a tamdaw, kawra cowa ka tengil niyam o maanan ko sowal nangra. Itini faso awaay ko romaroma mikalicay a tamdaw, miharateng kami maedeng miliyas kami to niyaroˈ ngaˈ itiya a midokaˈ tamiyanan. Kawra kafahkaˈan ko teloc, rihadayay kami maepod i faso. Tiya maepod kami milicayan koya parakatay a tamdaw: “Oya tatosaay tamdaw isawni sakafanaˈaw tamiyanan to o cima han?” Pacaˈof koya parakatay: “Mafanaˈay kako to o cima kamo, aka calemcem cangranan hananay ako pasowal, rihadayayto kamo sanay.”

1976 miheca, itiniay kako i Tuplin kasapala taykay mafanaˈ ci Pawlina Lomakesan, itiniay cingra i Ingkelan a mikiriwiˈay misakafahay. Madimadiay misapoeneray cingra, tada makapahay a fafahiyan salikaka. Cingra ato faˈinayan safa ci Lay nano miminganho mafanaˈayto to kimad. Ikor no cecay miheca, mararamodayto kako aci Pawlina. Padadotocay kami malo mikiriwiˈay misakafahay, itiniay i Kaˈamis a Ayelan a Palimina a matayal.

Cecay liyad, itiniay kami i Piefaste, Lontonteli ato pina katalawan a kilac malo kasakilac kantok ko tayal. ˈAlomanay salikaka samanen pakasoˈlinay ci Yihofaan, misawaday tono kalodoyongan a sowal, caayto ka ciˈinteh ato pisakakinih, tada mitemeray to falocoˈ niyam konini. Soˈlinay palemeden ni Yihofa cangra, midipot cangranan.

Itini Ayelan 10 mihecaan kako itira. 1981 miheca, matahidangay kako ato fafahi mirienang to saka 72 liyad Kiliyat Picudadan. Micudiyap ikor, maocoray kami tayra i Sayrariang Kaˈetipan no Afrika.

Malacafayay kami to 11 ngaˈayay salikaka itini lomaˈ no mikiriwiˈay manilnil a mitosilay. Cecayay ko cawka niyam, toloay ko kamisiˈan, tosaay ko kamaynoˈan, cecayay ko tingwa, cecayay ko sapifacaˈ to rikoˈ a kikay ato cecay sapiˈicang a kikay. Itira marariday fahal sa awa ko tingki. I fadahong sacikacikay sanay ko ˈedo, i kalaenoay a riwang iraay ko kacerakay ˈoner micomod.

Soˈliˈlin cowa ka ngaˈay ko kitiraan itira, kawra mikitini mitosilay a tayal malifokay niyam ko adihayay a lipahak. O itiraay a tamdaw mikangodoay to Fangcalay Cudad, makahiay a mitengil. ˈAlomanay tamdaw minanamay to Fangcalay Cudad, hanaca  micadaay to soˈlinay kimad. O itiraay a tamdaw panganganay takowanan ci ‘Lopa,’ ci Pawlinaan o ‘fafahi ni Lopa’ hananay. Mataˈlif ko cecay liyad, samanen matongalay ko tayal ako i fenpo, maˈesalay ko toki mitosil, misatapangay ko tamdaw pangangan cingranan to ‘Pawlina,’ kako saan i, malo ‘faˈinay ni Pawlina.’ Tada maolahay ci Pawlina mihaen ko tao pangangan tamiyanan.

O itiraay ˈalomanay salikaka tada manikaway, kawra padotocay ci Yihofa midimokos to saali nangra, latekay tano kafahkaˈan a pakayraan mihaen to demak. (Matay 6:33) Maharatengay ako ko nalifetan no cecay fafahiyan salikaka. O payci ningra maedeng o sapicakay aca toya romiˈad a kakaenen, kawra malifongay ko cecay faˈinayan salikaka, awaay ko payci micakay to cemel, haeming hananay noya fafahiyan salikaka pafeli to payci cingra. Toya romiˈad, iraay ko cecay fafahiyan fahal sanay mikilim toya fafahiyan salikaka, pafeli to payci papisakapah to fokes ningra. Adihayayho ko malecaday a nalifetan.

Siwaay mihecaan kami matayal i Sayrariang, ikor malinahay tayni Nayciliya a Pitil. O taˈangayay a fenpo konini, malecaday to iˈayaway a tayal ako. Kawra ci Pawlina, taˈangayay ko kafalic no tayal ningra, cowa ka mananamen. Iˈayaw i, folafolad 130 a tatokian mitosil cingra, adihayay ko macakatay a mipakingkiwan. ˈArawhan maocoray cingra tayra i mitataˈisay a tayal, mitapiday to rikoˈ to romiˈamiˈad. Halafin ngaˈ mananamayto cingra tonini a tayal. Ikor, maˈaraway ningra ko piakoˈid no salikaka tora tayal ningra. O roma sa i, kiemelay cingra mikilim to toki pakalalok to romaroma i Pitilay a salikaka.

Kafahalan niyam ko serangawan no Nayciliya, adihayayho ko nananamen niyam. Kinacecayay, o cecay faˈinayan salikaka tayniay mikilim takowanan, misiwkay to cecay faelohay matayalay i Pitil a fafahiyan salikaka. Sapimametaw kako to kamay ningra, ˈarawhan tangsol sanay mipitoros i kaˈayaw no mako. Macekokay kako! Maharatengay ako ko sowal i Dmak 10:25, 26 ato Paˈarawan 19:10, saan ko falocoˈ ako: “Lalangen ako cingra hokira?” O matayalay no Pitil cingra, mamafanaˈ cingra to mansanay ko sowal no Fangcalay Cudad sa kako.

Tada mangodoay kako itiya. Ikor, misolapay kako to mahaenay a pinangan, ˈarawhan ora demak nora fafahiyan salikaka o pinangan nangra, itini i Nayciliya ˈalomanay ko mihaenay to demak. Cowa ko fafahiyan aca, ano o faˈinayanto mihaenay ko demak. O mikangodoay a pakayraan nangra konini, cowa ko mitaˈongay a demak. ˈArawhan itini Fangcalay Cudad  iraay ko mahaenay a tinakoan. (1 Samuil 24:8) Mahemekay kako cowa ka somowal to pakangodoay tonini a fafahiyan salikaka itiya.

Itini i Nayciliya adihayay ko kafanaˈan niyam a salikaka, halafinayto a mihecaan padadotocay cangra paihkal to tanektekay a pakasoˈlin no falocoˈ. O cecay faˈinayan salikaka ci Isaya Yatapan a, kaemangho mafanaˈayto cingra to soˈlinay kimad, ikor ciadadaay to malonoˈay ko fanges a adada, patayraan cingra i pisaˈopoan to malonoˈay a tamdaw. Itira edengan cingra cecay ko Misawacayay Tamdaw ni Yihofa. Soˈliˈlin malifa ko adihayay pisafelit, kawra mapadamaay ningra ko 30 ciadadaay to fanges a tamdaw micada to soˈlinay kimad, itira mapatirengayto ko cecay kasakopang.

Isaka 1996 miheca, maocoray kako tayra i fenpo no Kenya. Masowalay ako i satapangan to tayniay kako i Kenya. Halafinayto a mihecaan, sakinacecay ako patikol tayni. Itiniay ko aroˈ niyam i Pitil, adihayay ko tayraay a milisoˈ a lafang, mahawpay ko lotong. Micacefitay camira to mitatiway to losay a fafahiyan salikaka. Iraay ko cecay romiˈad, masadak ko cecay fafahiyan salikaka i, cowa ka ˈedefen ningra ko sasingaran, minokayto cingra i, madakdakayto ko kakaenen, mitahkaay ko papina lotong a komaen. Tangsol cingra milekal a talapotal, ˈarawaw sato ko lotong miteloc to sasingaran a milaliw.

Kako aci Pawlina mirienangay to sano Swasili ko sowal a kasakopang, caho ka halafin, misikayay kako tono Kasakopang a Picekiw, kawrira o caciyaw ako malecaday o wawa. Talaˈayaway kako a misaday, hongaˈ mafanaˈ miˈosi to salicay. Kawra o caˈof no salikaka ano caka lecad to i fatacay i, mafokilayto kako a mitengil. Mangodoan nanay kako to salikaka. Kawra mihadidiay cangra takowanan. Misapoeneray a midama tonini a limasmas, tada matemeray ko falocoˈ ako.

Caho pakaala to cecay mihecaan i Kenya i, isaka 1997 miheca matahidangay kami tayra i Padaka i Pitil no Niwyok Prokelin. O tada kadofahay a kitakit konini, kawra adihayay ko sakayhid. (Taneng 30:8, 9) Ano hatiratira i, patalahkalay ko salikaka to tanektekay a pakasoˈlin no falocoˈ. Cowa pisaka dademak cangra to toki ato hafay micangacang to sakaadihayaw, ao misarocoday a midama to tayal no likakawa ni Yihofa.

Adihayay a mihecaan, maˈaraway niyam ko salikaka itini i masakenakenaay a pakayraan patalahkal to pakasoˈlinay falocoˈ. Itini Ayelan, misiˈayaway ko salikaka to mafodifoday a pakayraan. Itini Afrika, misiˈayaway ko salikaka to nikaw, o roma tamdaw mapacieciay a malaliyas. Itini i Padaka, misiˈayaway ko salikaka tono sakacihafayaw a sakayhid. Kawra cangra i, patalahkalay to tanektekay pakasoˈlin no falocoˈ, itini i masakenakenaay a pakayraan paihkalay to tangongolay a olah ci Yihofaan, maedeng mahemekay ci Yihofa tonini!

Tada maeferay ko toki, hato “ikaka no hacikay no satenooy ko nika kalamkam no romiˈad.” (Yopu 7:6) Nohatini, itiniayto kami i Niwyok Worwik a congpo matayal, i raringid niyam sahtoay o masasiolahay a salikaka. Malacafay to mahaenay a salikaka matayal, midama to Hongti ita ci Yis Kristoan, tada lipahakay, marenecay kami. Caayto ka halafin, polong a madimadiay tamdaw mamicada to sapalifon no Hongti ci Yis Kristo.—Matay 25:34.