1. Hano mamiakoˈid kiso ci Yihofaan pafeli to Fangcalay Cudad hani?

 TADA miakoˈiday kita to Kawas ci Yihofaan pafeli to Fangcalay Cudad! Itini tonini cudad, maˈoningay ko adihayay citanengay a sowal, padama kitaanan misiˈayaw to masakenakenaay a pasangar anini. Roma i, pakafanaˈay Cingra kitaanan, iraay ko makapahay a hatokel noikor. Masakalimlaan i, ci Yihofa pakayniay i Fangcalay Cudad pahapinang kitaanan to adihayay ko makapahay capeling Ningra. Ano misongilaˈay kita misimsim tonini a capeling i, mamasemer ko falocoˈ ita, sapiingidaw Cingranan, mala ngaˈayay widang Ningra.—ˈOlic 25:14.

2. Na pakaynian ni Yihofa i masamaanay a pakayraan patalahkal to milingatay Cingranan a demak?

² Makalimay ci Yihofa mafanaˈ ko tamdaw Cingranan. Itini nolitengan, pakaynian Ningra i nitiihan, mapolosi ato coyoh patalahkal to milingatay Cingranan a demak. (Saˈosi 12:6; Dmak 10:3, 4) Kawra ano awaay ko mitiliday to lihaf no nitiihan, mapolosi ato coyoh i, samaan kita a mafanaˈ to lalakaw halo misongilaˈ a minanam hani? Mihaenay, mikayatan ni Yihofa ko tamdaw ‘mitilid i maloloday cudad’ to papasifanaˈen Ningra kitaanan a demak. (Yirimiya 30:2) ‘Malefotay ko lalan no Kawas,’ mansa pakasoˈlinen ita pakaynian Ningra i Fangcalay Cudad masasowal kitanan, hanaca mamalifok ita ko adihayay a haepoc.—ˈOlic 18:30.

3. Tano maanan ni Yihofa a pakayraan miterek ko Fangcalay Cudad? (Isaya 40:8)

³ ˈOsien ko Isaya 40:8. Mikitini nolitengan tahanini, o madimadiay midoko to Kawas a tamdaw mikitiniay i Kimad no Kawas milifok to ciepocay a sakayat. Tada kasemeranto konini! Toloayto caˈol a miheca matilid ko Fangcalay Cudad, nitilidan i mamapohed a cayliyaw, anini awaayto ko salakatay nitilidan a  Fangcalay Cudad. Kawra, palimoˈotan ni Yihofa ko tamdaw mitodong a miliyaw mitilid to Fangcalay Cudad. Soˈlin o mitodongay a miliyaw mitilid a tamdaw cowa ko malefotay, kawra minaˈonay a misinanot cangra. Tinakoen o Hipray Sowal Fangcalay Cudad, o cecay mikakingkiway sanay ko sowal: “Awaay ko romaroma nolitengan a cudad malecaday to Fangcalay Cudad, saliyaliyaw hananay mitodong a mitilid, kawra cowa ka falic ko lalomaˈay a lalakaw.” Soˈliˈlin halafinayto matilid ko Fangcalay Cudad, o mamapohed a cayliyaw a tiliden, soˈliˈlin o mitodongay miliyaw mitilid a tamdaw cowa ko malefotay, ngaˈayay pakasoˈlinen ita, o maasipay ita anini i Fangcalay Cudad, oyananto a lalasilen ni Yihofa a lihaf.

4. Onini lalakaw mamilengo to maanan?

⁴ ‘Masakenakenaay a fangcalay a sapakaolah, masakenakenaay a malefotay a sapalifon’ sahtoay o sapafeli ni Yihofa kitaanan. (Yakop 1:17) O masakalimlaan a sapakaolah ni Yihofa kitaanan ko Fangcalay Cudad. O sapatelong hananay i, pakafanaˈay kitaanan to hakowaay ko kacipinang nora patelongay i kitaanan ato saali no mita. Hatiraayto, pasifanaˈay ko Fangcalay Cudad kitaanan to adihayay pakayni ci Yihofaan a demak, mamahapinang to hakowaay ko kacipinang Ningra kitaanan ato saali no mita. Itini tonini lalakaw, mamilengo to ngangaˈay kita mikitini i Fangcalay Cudad mahapinang ko tolo a capeling ni Yihofa: Taneng, masadafdafay ato olah. Dotoc i, nengnengen ita samaanay patalahkal ko Fangcalay Cudad to tada citanengay ko Kawas.

5. Samaan mahapinang ita to iraay ko taneng no Kawas i Fangcalay Cudad?

⁵ Mafanaˈay ci Yihofa misaaliay kita to citanengay a sakayat Ningra, mansa pafeliay to Fangcalay Cudad. O Fangcalay Cudad mahawpay ko taneng no Kawas, ciepocay ko pifiyor to tamdaw, mifalicay to kaˈorip no tamdaw. Satapang a pina cudad no Fangcalay Cudad o ci Mosi ko mitiliday, pasowalay cingra to finawlan no Kawas: ‘Pakayni tamowanan, onini a sowal cowa ko mamalahorac, o sakaˈorip namo.’ (Limoˈot 32:47) Itiyaho, midofdofay to Kimad no Kawas a tamdaw malaˈosiay a raheker ko kaˈorip nangra. (ˈOlic 1:2, 3) Tahanini, kamayanay mifalic to kaˈorip no tamdaw, o ˈicel nira cowa ka malowan. Itini jw.org wangcan iraay ko “Minanam to Fangcalay Cudad a Mafalic ko Nokaˈorip” sanay a lalakaw, mataˈlifay ko 50 a nalifetan no salikaka. Ano ˈosien iso ko nalifetan nangra, mamahapinang to tada ciˈicelay ko Fangcalay Cudad mifalic to kaˈorip no salikaka.—1 Tisalonika 2:13.

6. O kalo a cudad awaay ko mikikakaay to Fangcalay Cudad hano saan ko sowal hani?

⁶ O kalo a cudad awaay ko mikikakaay to Fangcalay Cudad, misamaanay hani? Samanen o Papitiliday to Fangcalay Cudad a Yihofa o malefotay ko ˈicel, tahadaˈocay a materek, iraay ko sakakaay a taneng. Haratengen hena, ˈalomanay a mitiliday to kalo cudad a tamdaw mapatayayto, awaayto ko epoc nonini a cudad. Kawra o safalod no Fangcalay Cudad cowa ka taˈlif, malifokay no kahacecay lintad a tamdaw ko adihayay a epoc. Cowa konini aca, ano micekiw kita to Fangcalay Cudad halo midotim to mananamay a lalakaw i, oya Papitiliday to Fangcalay Cudad a Kawas sakadademakay to fangcalay saocor Ningra, padama kitaanan mihapinang to sasamaan kita itini nokaˈorip midofdof to Kimad Ningra. (ˈOlic 119:27; Malaki 3:16; Hipray 4:12) O midaˈocay a maˈorip ko Papitiliday to Fangcalay Cudad, tada ciharatengay Cingra to sapipadamaaw tisowanan. Onini coko papaˈicel tisowanan, sapiceridaw micekiw to Kimad Ningra hokira?

7. Itini nolitengan, o Fangcalay Cudad samaanay padama to finawlan no Kawas makakedec a malacecay?

⁷ O Fangcalay Cudad pakakedecay a palacecay to finawlan no Kawas, mahapinangay ita,  iraay ko taneng no Kawas i Fangcalay Cudad. Micomodto ko Israil tamdaw to Mikiˈokan no Kawas a Pala i, maliwasakay cangra icowacowa a kitiraan. O romaroma malo mifotingay, o romaroma malo mipakaenay to siri, o romaroma o maomahay. Halafinto i, o maroˈay itini cecay kitiraan a Israil tamdaw alatek caayto ka cikihar to itiraay i roma pala a finawlan. Nikawrira, milimasmasay ci Yihofa, palisopsop to Israil tamdaw, mitengil to piasip ato pitadtad no tamdaw to Kimad Ningra. (Limoˈot 31:10-13; Nihimiya 8:2, 8, 18) Haratengen hena, ano tayni i Yirusalim ko cecay madimadiay midoko to Kawas a Israil tamdaw, maˈaraw ko ˈalomanay finawlan naitini icowacowa pala no kitakit malisopsop tayra i, maedeng masemeray ko falocoˈ! Pakaynian to mahaenay a limasmas, palacecayan ni Yihofa ko finawlan Ningra a makakedec. Mapatirengto ko kasakopang no Krisciyang i, o masakenakenaay a tamdaw ko palaˈosiay to finawlan no Kawas. Masasiromaay ko sasowalen nangra, masasiromaay ko serangawan nangra, iraay ko cihafayay iraay ko manikaway nangra, kawra makakedecay cangra malacecay midoko to Kawas. Samanen maolahay cangra to Kimad no Kawas. O roma sa i, o faelohay a mihakelongay ano sapilayapaw to sapadama no salikaka, makakedec cangranan, wangaˈ cipinang to Kimad no Kawas.—Dmak 2:42; 8:30, 31.

8. Anini, samaanay padama ko Fangcalay Cudad to finawlan no Kawas padadotoc makakedec?

⁸ Anini, o citanengay a Kawas padadotocay tano Fangcalay Cudad pasifanaˈ to finawlan Ningra, makakedec malacecay cangra. O  masakenakenaay sapahaled to pakasoˈlin no mita a kakaenen, o misalalangiay to Fangcalay Cudad a sangaˈen. Marariday kita malisopsop, itini i kasaˈopoan ato pitaykayan mitengil to piasip no tamdaw, mitadtad ato milengo to Fangcalay Cudad. Mahapinangay ita, o Kawas ci Yihofa tano Fangcalay Cudad, padama to finawlan Ningra ‘makakedec a midoko Cingranan’.—Cifaniya 3:9.

9. Ano cacipinang to Fangcalay Cudad i, aira ko masamaanay a capeling ngaˈ? (Luka 10:21)

⁹ Nengnengen ko roma a wacay to citanengay ci Yihofa. O pitilid to Fangcalay Cudad tada mikiriwiˈay, adihayay a sinael no Fangcalay Cudad, edengan o misapoeneray ko falocoˈ a tamdaw ko cipinangay. (ˈOsien ko Luka 10:21.) Miasipay to Fangcalay Cudad ko paro no kakarayanay a tamdaw. O cecay mikakingkiway tamdaw somowalay, o Fangcalay Cudad i, ‘o saˈalomanay ko miˈosiay, o masongilaˈay a maˈosi’ sanay. Kawra, edengan o misapoeneray ko falocoˈ a tamdaw ngaˈ, soˈlinay a cipinang to Kimad no Kawas, hanaca midoedoay to mananamay a midemak.—2 Korinto 3:15, 16.

10. Mikitiniayho kita i maanan a pakayraan mahapinang, o iraay ko taneng ni Yihofa ilalomaˈ no Fangcalay Cudad hani?

¹⁰ Mikitiniho kita i roma pakayraan a mihapinang, o iraay ko taneng ni Yihofa ilalomaˈ no Fangcalay Cudad. Cowa ka tano Fangcalay Cudad aca pasifanaˈ ci Yihofa to polong finawlan Ningra, mikayatay ato mihinomay to kahacecay a tamdaw. Mankora, ano miˈosi kita to Fangcalay Cudad i, o mamatinako ko kaciharateng ni Yihofa kitaanan. (Isaya 30:21) Misiˈayaw kiso to pasangaray i, kinapinaay a mahapinang iso ko cecay sinael hato mikiriwiˈay pakayni tisowanan a tiliden han? Haratengen hena, o Fangcalay Cudad o sapaˈaraw to ˈalomanay tamdaw, kawra matatodongay to saali no miso, milingatay to nokaˈorip iso. Hano mahaen hani? Cecayay aca ko lalangian: Papitiliday to Fangcalay Cudad a Yihofa o tada citanengay a Kawas.—2 Timoti 3:16, 17.

11. Mikayat ko Kawas to tamdaw mitilid to Fangcalay Cudad i, samaanay paihkal to cowa pisakakinih Cingra?

¹¹ O masadafdafay o roma a capeling ni Yihofa, milingatay to cowa pisakakinih ko masadafdafay. (Limoˈot 32:4) O cowa pisakakinih ci Yihofa. (Dmak 10:34, 35; Loma 2:11) Ano nengnengen ita tano maanan a sasowalan a tiliden ko Fangcalay Cudad i, o mamahapinang konini. O saˈayaway a 39 lolod no Fangcalay Cudad tano Hipray a sowal tiliden, samanen o finawlan no Kawas itiya cipinangay tonini a sowal. Kawra, tahinito isaka 1 hahekalan i, o Krisiyato a sowal ko misaka dademakan no ˈalomanay tamdaw. Mansa, o ikoray a 27 lolod tano Krisiyato a sowal tiliden. Mahapinangay, cowa pisaˈosi ci Yihofa tano cecay aca a sasowalen mitilid to Fangcalay Cudad. Anini, maedeng 80 walwal ko tamdaw no hekal masasiromaay ko sasowalen, samaan ngaˈ mafanaˈ ko ˈalomanay tamdaw ci Yihofaan hani?

12. Itini salikoray a lalintadan, samaanay malaˈosi ko Taniil 12:4?

¹² Pakaynian ni Yihofa ci Taniilan mikiˈok, itini salikoray a lalintadan, ‘o soˈlinay a sifanaˈ,’ ‘kakadofah,’ itiyato i, cacipinang to kimad no Fangcalay Cudad ko ˈalomanay tamdaw. (ˈOsien ko Taniil 12:4.) Samaanay malaˈosi konini sapairasol hani? O cecay pakayraan i, milingatay to pihongyak to Fangcalay Cudad ato mitepangan a cudad, ato mipalilaman. O Fangcalay Cudad i, o saadihayay ko sasowalen, saadihayay ko mapalilamay. O mitolican no misasingdiay a Fangcalay Cudad tada matekesay, kawra o finawlan ni Yihofa maharekayto a mihongyak to mataˈlifay ko 240 a sasowalen, caay pilipayci a palilam to tamdaw. Telocto i, polong a kasafinawlan ngangaˈay cipinang to ‘ngaˈayay lihaf no Hongti Kitakit’ itini ˈayaw no salikoray  a romiˈad. (Matay 24:14) Caay pisakakinih ko Kawas, maolahay to tamdaw maemin, mansa makalimay Cingra ˈaloman ˈaloman ko tamdaw pakayni i Fangcalay Cudad mafanaˈ Cingranan.

13. Samaan kita mikitini i Fangcalay Cudad mihapinang to ciolahay ci Yihofa? (Yohani 21:25)

¹³ Ihkalay pahapinang ko Fangcalay Cudad, o sakakaay a capeling ni Yihofa o olah. (1 Yohani 4:8) Haratengen hena, i Fangcalay Cudad papitiliday ci Yihofa to maanan, caay papitilid to maanan. O kihcod hakafanaˈan ita pasowalan Ningra kita, ngaˈayho kita malo widang Ningra, ira ko rahekeray nokaˈorip nohatini, noikoran milifokho to midaˈocay a ˈorip. Tona tada maolahay ci Yihofa kitaanan, mansa cowa ka haemin han a mitilid ko maamaan i Fangcalay Cudad, ano mahaen i, cato ka tomesengen kita.—ˈOsien ko Yohani 21:25.

14. Sasamaanho a mahapinang ita ko olah ni Yihofa naitini i Fangcalay Cudad?

¹⁴ Haratengen hena, itini Fangcalay Cudad cowa ka pafeli ci Yihofa kitaanan to adihayay a saˈosi, miˈimer to cecacecay a demak ita, ao mitiliday to adihayay nalifetan no tamdaw, sapairasol ato ciepocay a sapaini, ho ngaˈay kita o niyah sa misimsim a misaˈosi. Mihaenay i, mitemeray to falocoˈ no mita ko Kimad no Kawas, wa mikifalocoˈto kita maolah ato midofdof Cingranan. Tano mikangodoay a pakayraan ci Yihofa a masasowal kitaanan, patalahkalay konini to ciolahay Cingra kitaanan.

15. (1) Sasamaan mikitini Fangcalay Cudad mahapinang ita to tada ciharatengay ci Yihofa kitaanan? (2) Nengnengen ko coka. Kaemangay fafahiyan wawa, kapah salikaka ato matoˈasay fafahiyan salikaka, makamiharatengay to cimaanan a tamdaw i Fangcalay Cudad hani? (Satapangan 39:1, 10-12; 2 Hongti 5:1-3; Luka 2:25-38)

¹⁵ Patalahkalay ko Fangcalay Cudad to tada  ciharatengay ci Yihofa kitaanan. Hano haenen ko sowal hani? Itini Fangcalay Cudad adihayay ko maˈoningay a nalifetan no ˈalomanay tamdaw. O ‘malecaday to pinangan ita’ cangra, mansa ngangaˈay malecad ko harateng ita cangranan. (Yakop 5:17) Kalimlaan i, maˈaraw to samaanay ci Yihofa micada cangranan, mamatongal ko kacipinang ita, ‘ci Yihofa matomesay to damsayay, hanaca siniˈadaay to tamdaw.’—Yakop 5:11.

16. Maˈoningay i Fangcalay Cudad a mararaway tamdaw, mikitini picada ni Yihofa cangranan mahapinangay ko maanan? (Isaya 55:7)

¹⁶ Mikitini Fangcalay Cudad ngaˈayay mahapinang ita to maolahay ci Yihofa kitaanan. Sowal no Fangcalay Cudad, soˈlinto mararaw kita, cowa ka sawaden ni Yihofa kita. Soˈliˈlin misaliyaliyaw pakararaw ci Yihofaan ko Israil tamdaw, kawra mikifalocoˈay pasasiyor cangra, ikor misododan ni Yihofa cangra. (ˈOsien ko Isaya 55:7.) Isaka 1 hahekalan a Krisciyang mahapinangay nangra to iraay ko olah no Kawas to tamdaw. Itini kasakopang na iraay ko pakidemay ko raraw a tamdaw, padadotocay mihaen to cecay liyad, kawra ikor pasasiyorayto cingra. O tarokos ci Pawlo itini sakayat no Kawas pakalalokay to salikaka ‘misodod cingranan, mihinom cingranan.’ (2 Korinto 2:6, 7; 1 Korinto 5:1-5) Ano mararaw ko midokoay ci Yihofaan a tamdaw i, cowa ka tahadaˈoc sa ci Yihofa misawad cangranan, ao maolahay Cingra padama cangranan, misalof cangranan, mitahidangho cangranan a patikol i tatihi Ningra, tada kasemeranto konini! Anini, mamihaen ci Yihofa micada to mikifalocoˈay pasasiyor a mararaway tamdaw.—Yakop 4:8-10.

17. O Fangcalay Cudad hano o mikiriwiˈay a sapakaolah?

¹⁷ Pafelian ni Yihofa kita to Fangcalay Cudad. Mananamayto ita onini a sapakaolah hano tada mikiriwiˈay. O Fangcalay Cudad pasifanaˈay kitaanan tadamaanay ko taneng ni Yihofa, cowa pisakakinih, matomesay ko olah. Patalahkalayho ko Fangcalay Cudad, makalimay ci Yihofa mafanaˈ kita Cingranan, malo widang Ningra.

18. Sasamaan kita paihkal to miakoˈiday ko niyah ci Yihofaan, pafeli to Fangcalay Cudad onini ‘makapahay a sapakaolah?’

¹⁸ Aka mapawan kita o ‘makapahay a sapakaolah’ no Kawas ko Fangcalay Cudad. (Yakop 1:17) Papadadotoc kita tano waywayan paihkal to nika piakoˈid Cingranan. Mitolon kita misongilaˈ a micekiw to Kimad no Kawas halo midotim to lalomaˈay a lalakaw. Ano mihaen kita i, o papakasoˈlinto toya tadamaanay Papitiliday to Fangcalay Cudad a Yihofaan, papalemed kitaanan, papadama kitaanan ‘mahela ko sifanaˈ no Kawas.’—Taneng 2:5.