1. Hano mafanaˈ kita to misakaretengay minengneng ci Yis to Fangcalay Cudad?

 HARATENGEN hena, ano itiraay kiso itatihi ni Yis, mamatengil iso samaanay cingra pasifanaˈ to tamdaw hani? Marariday cingra misaka dademak to Fangcalay Cudad, sahto o maharatengay i ponoˈ ko misowalan ningra! Soˈlinay haw i, o maˈoningay i Ratoh a Cudad, maharek ci Yis a mipaputisem, ˈayaw no patay ningra, sakadademakay cingra to sowal no Fangcalay Cudad. b (Limoˈot 8:3; ˈOlic 31:5; Luka 4:4; 23:46) Itini ilalomaˈ no tolo ira ko kalitosa miheca, marariday ci Yis i kaˈayaw no ˈalomanay miasip anca misaka dademak to Fangcalay Cudad, halo mitadtad to tatodong no sinael.—Matay 5:17, 18, 21, 22, 27, 28; Luka 4:16-20.

2. Itini kalomahadan ni Yis a tatokian samaanay matongal ko kafanaˈ to Fangcalay Cudad? (Nengnengen ko papotalay coka.)

² Itini ˈayaw no misatapang ci Yis mitosil i, halafinayto cingra mararid miˈosi ato mitengil to Kimad no Kawas. Tocerid masasowal ko paro no lomaˈ, maedeng marariday matengil ningra ko pisaka dademak ni Mariya aci Yosif to sowal no Fangcalay Cudad. c (Limoˈot 6:6, 7) Mafanaˈay kita, itini kahacecay Paselaˈan a Romiˈad malacafayay ci Yis to paro no lomaˈ tayra i kasaˈopoan. (Luka 4:16) Itini kasaˈopoan i, ano miˈosi ko tamdaw to Fangcalay Cudad misamacayay cingra mitengil. Ikorto, mafanaˈayto ko niyah miˈosi to Fangcalay Cudad. Telocto i, cowa ko kafanaˈ aca ni Yis, maolahayho to Kimad no Kawas, hanaca micadaay to sakayat no Kimad no Kawas. Haratengen ko nalifetan ni Yis i kaemangho  i fangcalay sefi. Itiya 12 ko mihecaan ningra, kawra oya matenesay to Rikec ni Mosi a singsi maemin ‘fahkaˈay to kacipinang ato sapacaˈof ningra.’—Luka 2:46, 47, 52.

3. Onini a lalakaw mamilengo to maanan?

³ Hatira kita ci Yisan, ano mararid micekiw to Fangcalay Cudad i, mamatongal ko kafanaˈ to lalomaˈay a lalakaw, halo matongal ko kaolah to Kimad no Kawas. Kawrira, samaan kita miˈosi to Fangcalay Cudad ngaˈ malifok ko taˈangayay a epoc hani? Haratengen ita ko nano sowal ni Yis to ˈaˈideman no pihakelongan. Itiya i, oya mitodongay mitilid to Fangcalay Cudad a tamdaw, o Farisay ato Satukay a tamdaw, soˈliˈlin marariday miˈosi to Fangcalay Cudad, mafanaˈay to lalomaˈay a lalakaw, kawra caay ka soˈlin a milifok to epoc. Somowalay ci Yis to tolo cowa ka toor nangra a demak, ora nano sowal ningra papadama kitaanan (1) pacakat to kacipinang, (2) mikilim to odoˈ no sinael, (3) mapahatatanam no Kimad no Kawas.

4. Pakayni i piˈosi to Fangcalay Cudad, mananamay ita ko maanan i Luka 10:25-29?

⁴ Makalimay kita cipinang to tatodong no sinael, ano caka cipinang i, cowa ko mamilifok to adihayay a epoc. Haratengen ko kasasowal ni Yis to cecay ‘matenesay to Rikec ni Mosi a tamdaw.’ (ˈOsien ko Luka 10:25-29.) Milicayay ci Yisan konini a tamdaw, sasamaan milifok to midaˈocay a ˈorip, padamaan ni Yis cingra mikitini i Kimad no Kawas mikilim to sapacaˈof. Licay han ni Yis cingra: ‘O maanan ko matiliday i Rikec ni Mosi hani? Mansanay ko kacipinang iso to maˈosiay iso hani?’ Sakadademakay cingra to sinael a pacaˈof, maolah to Kawas ato samatiyaen o niyah a maolah to tao sanay. Matatodongay ko caˈof ningra. (Lifi 19:18; Limoˈot 6:5) Kawra sinanoten kora dotoc a salicay ningra: ‘Cima ko kakaolahen ako a tamdaw saw?’ Ora salicay ningra paihkalay, cowa ka cipinang cingra to soˈlinay a tatodong no sinael, mansa cowa ka fanaˈ to sasamaan midoedo to sinael i kaˈorip.

5. Mitolon ato naˈonen ko piˈosi wa ira ko maanan kangaˈayan hani?

⁵ Palahaden ita ko ngaˈayay nanaman pacakat to sakacipinangaw to sinael a inaneng. Tanamen ko ilaenoay a sapaini. ˈAyaw no micekiw mitolonho. Sakacipinangaw to tatodong no sinael, misaaliay kita to sapadama ni Yihofa. Cangacangen Cingra pafeli to fangcalay saocor, padama kitaanan misamacay ko harateng. Dotoc naˈonen ko piˈosi, mihaen i, matongalto ko kacipinang iso to maˈosiay a lalakaw. Ngaˈayay tanamen iso pahadak ko ngihaˈ miˈosi, anca itini kapiˈosi pahecaden a mitengil ko milokoingan a Fangcalay Cudad. Mihaen hato maˈaraway no mata, matengilay no tangila, hato maˈoripayto ko maˈoningay i Fangcalay Cudad, mamatongal ko pitemer to falocoˈ iso. (Yosuwa 1:8) Maherek miˈosi to Fangcalay Cudad i, miliyawho mitolon. Miakoˈid ci Yihofaan pafeli to Fangcalay Cudad onini a sapakaolah, micangacangho Cingranan padama tisowanan misaka dademak to maˈosiay a lalakaw.

6. Licayen ko niyah to pina a salicay, halo saamotoˈen a mitilid ko kalimlaan, hano papadama tisowanan micalep ko kacipinang to sinael? (Nengnengen ko coka.)

⁶ To sakapicalepaw cipinang to Fangcalay Cudad, tanamen iso ko tosa sapaini. Pakayni to maˈosiay a lalakaw, ngaˈayay licayen ko niyah to pina a salicay. Tinakoen, ano miˈosi to cecay maˈoningay i Fangcalay Cudad i, saharateratengen: “O cima kora tamdaw? Cima ko somowalay? Cima ko sakasasowal ningra? Hano mahaen ko sowal ningra hani? Oniya demak icowaay, ihacowaay a mafekad?” O mahaenay a pilicay papadama tisowanan mafanaˈ to kalingad  no demak, mafanaˈ to masakalimlaan. O roma i, ano miˈosi kiso, amotoˈen a mitilid ko kalimlaan. Palatiliden ko nafalocoˈan iso, papadama tisowanan misolimet to harateng, cato ka tawal ko miˈosian a lalakaw. Tiliden ko pina a salicay, ato macekiway iso a masakalimlaan, tiliden to sasamaanen iso misaka dademak ko maˈosiay a lalakaw, anca kantangen a mitilid ko piharateng no miso. Mihaen ko piˈosi iso to Fangcalay Cudad mitilid to kalimlaan, hato o kisoto ko pasowalan ni Yihofa.

7. Micekiw to Fangcalay Cudad i, misaaliay kita to maanan a inaneng? Misamaanay hani? (Matay 24:15)

⁷ Somowalay ci Yis hahapinangen ita ko tatodong no sinael, tatodong i, sakacipinangaw kita to Kimad no Kawas kalimlaan ko inaneng a pafafidaˈ. (ˈOsien ko Matay 24:15.) O maanan ko inaneng a pafafidaˈ hani? O mahaenay a inaneng papadama to tamdaw pafafidaˈ to kalalaˈed ato kasasiroma no demak. O iraay ko mahaenay a inaneng a tamdaw cowa ko papotal aca ko minengnengan, tatangongol ko pinengneng ningra. Paihkalay ci Yis, ira ko inaneng ita a pafafidaˈ, wangaˈ pakahapinang to malaˈosiayto ko maanan a sapairasol. Ano miˈosi to romaroma a lalakaw no Fangcalay Cudad i, ira ko inaneng a pafafidaˈ ngaˈ, malifok ko adihayay a epoc.

8. Ano miˈosi kita to Fangcalay Cudad i, sasamaan misaka dademak to inaneng a pafafidaˈ?

⁸ Papafelien ni Yihofa to inaneng pafafidaˈ ko midokoay Cingranan a tamdaw. Mankora pasayra Cingranan a mitolon, micangacang to sapadama Ningra palahad to hatiniay a inaneng. (Taneng 2:6) O waywayan iso samaan malacecay to satolon hani? Songilaˈen mifolfol ko maˈosiay iso a sinael, sinanoten kora lalakaw iraay ko maanan noka pilingat to kafanaˈanto iso a demak. Sapihaenaw to demak, ngaˈayay sakadademaken ko sapicekiw to Fangcalay Cudad a lalosidan, tinakoen Pirorodan to Mitepangan Cudad no Misawacayay Tamdaw ni Yihofa. O mahaenay a lalosidan papadama tisowanan mihapinang to  tatodong no sinael, ato sasamaan misaka dademak to mananamayto a demak. (Hipray 5:14) Miˈosi to Fangcalay Cudad i, sakadademaken ko inaneng a pafafidaˈ, o kacipinang to sinael wa matongal ko tangongol.

9. Misakahmawan no Satukay tamdaw ko maanan masakalimlaan a kimad no Fangcalay Cudad hani?

⁹ O Satukay tamdaw tada mafanaˈay to saˈayaway lima maloloday cudad no Hipray Sowal Fangcalay Cudad, kawra misakahmawan nangra ko masakalimlaan a kimad. Tinakoen, marariday ko Satukay tamdaw tano patikolay maˈorip ko mapatayay a demak macacoli ci Yisan, samaanay ko pipacaˈof ni Yis cangranan. Licay hananay ni Yis cangra: ‘Pakayni to papatikol maˈorip ko mapatayay, itini i Rikec ni Mosi, o maˈoningay a sowal i matodohay a cicekaay a semot, hananay no Kawas ci Mosi, “o Kawas ni Apraham Kako, o Kawas ni Isak, o Kawas ni Yakop,” caho ka maˈosi namo saw?’ (Marko 12:18, 26) O Satukay tamdaw maedeng kinapinaayto miˈosi tonini a maˈoningay, nikawrira ora licay ni Yis paihkalay, misakahmawan nangra ko masakalimlaan a kimad no Fangcalay Cudad, to papatikol maˈorip ko mapatayay a tamdaw.—Marko 12:27; Luka 20:38. d

10. Ano miˈosi kita to Fangcalay Cudad i, sasinanoten ko maanan hani?

¹⁰ Mamananam ita ko maanan hani? Miˈosi to Fangcalay Cudad i, sinanoten ita kora sinael ato cecay maˈoningay i Fangcalay Cudad a kimad. Hamaan o kacipinang aca to pina kantangay a kimad, ao calepenho a misimsim, cipinang to tangongolay a kimad no sinael ato safalod.

11. Mikitini 2 Timoti 3:16, 17, sasamaan kiso mikilim to odoˈ no sinael?

¹¹ Ano miˈosi to Fangcalay Cudad i, sasamaan mikilim to odoˈ no sinael hani? Nengnengen ko 2 Timoti 3:16, 17 mansanay ko sowal. (ˈOsien.) Itini tonini sinael somowalay, polong a Fangcalay Cudad pakayni (1) sapasifanaˈ, (2) sapirikec, (3) sapisalof, (4) sapahatatanam, sahtoay o ciepocay. Soˈliˈlin, mikitini caay ka rarid a maˈosi a sinael, ngangaˈay kiso milifok tonini sepat a epoc. Folfolen to maanan ko sapasifanaˈ i tisowanan, haratengen pakayni ci Yihofaan, araaw Ningra ato safalod no Fangcalay Cudad, mamananam iso ko maanan. Haratengen konini maˈoningay itini i sapirikec iraay ko maanan a epocan, tinakoen onini a sinael patalahkalay, mararaway ko maanan a harateng ato waywayan, sasamaan padama kitaanan micoˈay to mararaway a harateng, padadotoc madimadi midoko ci Yihofaan. Haratengen konini sinael sasamaan kalasaka dademaken to sapisalof to caay ka tatodong a pinengneng, o hatiniay a pinengneng matengilay iso pasowal ko tamdaw i pitosilan alatek. Ngaˈayay haratengenho iso mikitini tonini sinael sasamaan mapahatatanam ko niyah, o papadama tisowanan minanam to pinengneng ni Yihofa. Ano haratengen iso konini  sepat a pakayraan mamahela ko adihayay odoˈ no sinael, mamalifokto ko adihayay a epoc itini i picekiw iso.

12. Hano milicay ci Yis to Farisay tamdaw ‘caho ka maˈosi namo saw?’ Saan hani?

¹² Milicayay ci Yis to Farisay tamdaw: ‘Caho ka maˈosi namo saw?’ Onini a salicay patalahkalay to mararaway falocoˈ nangra. (Matay 12:1-7) e Itiya i, mirikecay ko Farisay tamdaw to misafelitay ko nisawawaan ni Yis to Paselaˈan a Romiˈad a rikec. Tiya pacaˈof ci Yis to sapakokot nangra i, misadakay to tosa tinakoan itini Fangcalay Cudad ato cecay sinael i Hosia a mitadtad, o Farisay tamdaw cowa cipinang to tatodong no Paselaˈan a Romiˈad a rikec, caay ka siniˈada to tamdaw. Miˈosi cangra to Kimad no Kawas hano caka mapahatatanam hani? Samanen malitaˈangay cangra, maolahay mikimkim to raraw no tao, mansa caay ka cipinang to tatodong no Kimad no Kawas.—Matay 23:23; Yohani 5:39, 40.

13. Ano miˈosi to Fangcalay Cudad i, papairaen ita ko masamaanay a waywayan? Misamaanay?

¹³ Mikitini i sowal ni Yis mananamay ita, ano miˈosi to Fangcalay Cudad i, ira ko matatodongay a waywayan. Aka a hatira o Farisay tamdaw, pairaen ita ko misapoeneray, makahiyay mapasifanaˈ a falocoˈ. ‘Damsayen ita micada ko Kimad no Kawas, palamiten’ i falocoˈ ita. (Yakop 1:21) Ano damsay kita i, mamakahi papifalicen ko Kimad no Kawas i kitaanan. Edeng ano falahen ita ko malitaˈangay ato hinalikafay a waywayan i, wa mapahatatanamto no Kimad no Kawas, palahad to olah, siniˈadaay ato sidaˈitay a falocoˈ.

14. Sapihapinangaw to mapahatatanamay no Kimad no Kawas ko niyah hokira, sasamaan ko pidemak ita? (Nengnengen ko coka.)

¹⁴ Itini i picada ita to tao, patalahkalay to makahiyay kita mapahatatanam no Kimad no  Kawas hokira. O Farisay tamdaw cowa ka masemer no Kimad no Kawas ko falocoˈ nangra, telocto i, ‘pasetekan nangra ko raraw i awaay ko raraw a tamdaw.’ (Matay 12:7) Ano hatira kita to Farisay tamdaw a minengneng to tao i, patalahkalay to cowa ka mapahatatanam no Kimad no Kawas kita. Saharateratengen ita: “Marariday kako somowal to kangaˈayan no tao, anca mikimkimay to dangoc no tao han? Siniˈadaay kako to tao, makahi misodod, anca maolahay milikaf to tao, hinaˈintehay ko falocoˈ han?” O mahaenay noka pisinanot to niyahan, mamahapinang ita, papipahatatanamen ko Kimad no Kawas to harateng, falocoˈ ato waywayan ita.—1 Timoti 4:12, 15; Hipray 4:12.

15. Samaanay ko pinengneng ni Yis to Kimad no Kawas?

¹⁵ Maolahay ci Yis to Kimad no Kawas, o sapairasol i ˈOlic 40:8 mihadakay to nafalocoˈan ningra. Sanay ko sinael: ‘Kawas ako, tada maolah kako a midoedo to araaw Iso, o rikec Iso itiniay i kemod no falocoˈ ako.’ Tada maolahay ci Yis miˈosi to Fangcalay Cudad, mansa ano midoko cingra ci Yihofaan i, tada lipahakay, malaˈosiay ko kihcod a demak ningra. Ano misongilaˈ kita micekiw to Fangcalay Cudad, papitemeren ko Kimad no Kawas to falocoˈ ita i, mamalaˈosi ato lipahak ko kaˈorip ita.—ˈOlic 1:1-3.

16. Sapilifokaw to adihayay epoc i picekiw to Fangcalay Cudad i, mamisaˈicelho kiso i maanan a pakayraan? (Nengnengen ko sapatongal lalakaw “ Misinanot to Sowal ni Yis, Papadama Tisowanan Cipinang to Tatodong no Sinael.”)

¹⁶ O mamisinanot kita to sowal ni Yis, mitodong to ngaˈayay taˈarawan ningra, padadotoc pacakat to inaneng no niyah micekiw to Fangcalay Cudad. Ano sapitongalaw kita to kacipinang to sinael, kapitolon, minaˈon a miˈosi, licayen ko niyah to pina a salicay, halo amotoˈen a mitilid ko kalimlaan. Sakadademaken ita ko inaneng a pafafidaˈ, calepen mifolfol ko maˈosiay a lalakaw, halo minengneng to mitepangan a cudad. Kilimen ita ko odoˈ no sinael, mihaen ngaˈayto kita misaka dademak to sinael, mahawpay ko cowa ko kananaman ita a sinael. Pairaen ita ko matatodongay a waywayan micekiw to Fangcalay Cudad, ho ngaˈayto mapahatatanam no Kimad no Kawas kita. Itini tonini a pakayraan ano padadotoc kita misaˈicel, ngangaˈayto mikitini i picekiw milifok to adihayay a epoc, ngaˈayho matongal ko piingid ci Yihofaan.—ˈOlic 119:17, 18; Yakop 4:8.