1-2. O cecay pacekiwan misaaliay to sadama no nima malo Krisciyang?

ITINIAY i Fici ci Aymi sanay: “Maolahay kako to minanaman a sifanaˈ no Fangcalay Cudad, mafanaˈayho to soˈlinay a kimad konini. Kawra misatapang kako micawmaˈ to salikaka i, itiyaay misetek to falocoˈ a mifalic, patafang to tireng micada to paputisem.” O nalifetan ni Aymi mananamay ita ko cecay kalimlaan a demak, ano milifok ko pacekiwan to sadama no salikaka i kasakopang, matongalay ko kacakat, salikor malo Krisciyangay.

² Ngaˈay padama ko kahacecay a mitosilay to minanamay to Fangcalay Cudad a tamdaw malo Krisciyang, mirienang to kasakopang. (Ifiso 4:16) Ira ko cecay misakafahay ci Lyrani i Wanato, sanay cingra: “Palahad to wawa matenes misaaliay to sadama no polong niyaroˈ a tamdaw. Harateng ako malecaday padama to tamdaw malo Krisciyang, misaaliay to sadama no polong a kasakopang.” Palahad to wawa misaaliay to sadama no paro no lomaˈ, widang ato singsi, pakalalok cangra to wawa, pasifanaˈ to wawa to kalimlaan a kimad. Malecaday, o salikaka mihadak to sapaini to pacekiwan, pakalalok cangranan, patireng to ngaˈayay taˈarawan nangra, ngaˈayho padama cangranan padotoc macakat, malo Krisciyang.—Taneng 15:22.

3. Mikitini sowal ni Ana, Tolin aci Lyranian mananamay iso ko manan?

³ Maˈaraw no pacekiway a singsi ko pipadama no tao to pacekiwan noniyah, hano o mamahemek hani? Itini Moetowa ira ko cecay mikiriwiˈay misakafahay ci Ana, sanay cingra: “Itini adihayay demak misaaliay ko pacekiwan to sadama ngaˈ macakatay, edengan o singsi aca cowa ko mamalaˈosi.” Itini Moetowa o  roma mikiriwiˈay misakafahay ci Tolin, sanay cingra: “Adihayay tatokian, o sowal no roma salikaka mitemeray to falocoˈ no pacekiwan, o sowal nangra caayho ka harateng ako.” Sanay ci Lyrani: “Matinakoay no pacekiwan ko olah ato kaciharateng no roma salikaka, madoloayto pakahapinang to finawlan ni Yihofa kita.” —Yohani 13:35.

4. Oniya lalakaw wa milengo to maanan?

⁴ Kawra, saan ko harateng iso alatek: “Cowa ko pacekiway a singsi kako, sasamaan padama to pacekiwan a macakat hani?” Dotoc wa minengneng kita, micada kita to satahidang mirienang to pipacekiw no tao sasamaan ko demak, misatapang ko pacekiwan mirienang to saˈopo wa ngaˈay kita midemak to manan. Wa minengnengho kita, sasamaan ko malohemay malitengay padama to pacekiwan macakat, ho malaˈosi ko picada to paputisem a patosokan.

5. Ano micada kiso to satahidang mirienang to pipacekiw no tao, sasamaan minengneng to saaroˈan no niyah?

⁵ Itini pipacekiw to Fangcalay Cudad, pasifanaˈ to pacekiwan o ˈinorong no pacekiway a singsi. Ano mitahidang cingra tisowanan mirienang, o cafayto ningra kiso, o mamisongilaˈ a madadama. (Patnakay 4:9, 10) Ihkalen ko sowal, sasamaan ko demak no ngaˈayay a cafay hani?

6. ˈAyaw no mirienang kiso to cacekiwen lalakaw no tao, sasamaan mitoor to safalod no Taneng 20:18 a midemak hani?

⁶ Songilaˈen misaday ko cacekiwen lalakaw. Salakat, ngaˈay kiso milicay to singsi to pakayraan no pacekiwan. (ˈOsien ko Taneng 20:18.) Ngaˈay licayen iso: “Samanay ko lalengawan noniya pacekiwan hani? Minanamay kamo to manan lalakaw hani? Harateng iso itini manan pakayraan pakalalok cingranan hani? Iraay ko manan cowa ka ngaˈay sowalen anca demaken han? Ngaˈay kako samaan pakalalok to pacekiwan macakat hani?” Manaokaniw, cowa ko papasowal ko pacekiway singsi to mahimeday no pacekiwan, kawra ngaˈay siwkayen ningra ko pakayraan no pacekiwan, wa ira ko sadama. O cecay mikiriwiˈay nilnilen a mitosilay ci Ciyawi paliˈayaway pasowal to cafay to pakayraan no pacekiwan, sanay cingra: “Mihaenay, wa makalimto ko cafay ako sapipadamaaw toniya pacekiwan, wa mafanaˈho sasamaan pakalalok cingranan.”

7. Ano mirienang kiso to pipacekiw no tao i, hano iˈayawho misongilaˈ misaday to lalakaw hani?

⁷ Ano mirienang kiso to pipacekiw no tao i, ˈayawho misongilaˈ misaday to lalakaw. (Icra 7:10) Masowalay no salikaka ci Tolin i sawni: “Ano misongilaˈ misaday to lalakaw ko cafay, tada mahemekay kako, ano mihaen cingra wa ngaˈay pakalalok to pacekiwan.” Roma i, wa mahapinang no pacekiwan alatek, o pacekiway  a singsi ato kiso misongilaˈay misaday to lalakaw, mihaen ngaˈay to cingra minanam to ngaˈayay a taˈarawan namo. Ano cowa ka songilaˈ iso a misaday, ngaˈay palaken ko toki mafanaˈ to kalimlaan no lalakaw.

8. Sasamaan ko demak iso, ho ciepoc ko satolon noniyah?

⁸ Itini pipacekiw i, kalimlaan ko mitolonay, mihaenay iˈayaw miharateng, ano papitolon ko pacekiway a singsi tisowanan, ngaˈay kiso somowal to maanan, mahaenay a satolon iso wa ira ko epoc. (ˈOlic 141:2) Itini Dipong fafahiyan salikaka ci Hana minanam to Fangcalay Cudad i, miceriday ko pacekiway singsi ningra mitahidang to cecay fafahiyan salikaka mirienang to picekiw. O satolon noniya salikaka caay ka pawan ci Hana, sanay cingra: “Mahapinangay ako tangongolay ko kalawidang ningra ci Yihofaan, sapahecadaw kako cingranan. Itini satolon ningra masowalay ko ngangan no mako, tada ciharatengay cingra takowanan.”

9. Mikitini Yakop 1:19, sasamaan kiso malo ngaˈayay a cafay hani?

⁹ Madadama to pacekiway a singsi. Itini Nayciliya ira ko cecay mikiriwiˈay misakafahay ci Awmufopi, sanay cingra: “Misamacay ko ngaˈayay cafay, wa pakalalok cingra to pacekiwan, kawra cowa ka adihay ko sowal, samanen mafanaˈay cingra o pacekiway a singsi ko misikayay.” Hano mafanaˈ kiso i hacowa somowal o manan ko hasowal hani? (Taneng 25:11) Ano somowal ko singsi ato pacekiwan i, wa songilaˈen iso mitengil. (ˈOsien ko Yakop 1:19.) Mihaen, wa ngaˈay kiso i matatodongay a tatokian mihadak to matatodongay a sowal. Manaokaniw, o mamisongilaˈ kiso a mihapinang, aka adihay ko sowal, aka miketon to sowal no singsi, aka paliyas to lalangian. Ngaˈayay tano kantangay a sowal, cecay tinakoan anca salicay, mitadtad to kalimlaan. Soˈlin awa ko satongal a sowal iso, ngaˈayay pakahemeken ko pacekiwan, ciharateng cingranan, mihaen o ngangaˈay padama cingranan a macakat.

10. O nalifetan iso ira ko manan a sapadama to pacekiwan hani?

¹⁰ Paladaˈ to nalifetan no niyah. Ano iraay ko sadama to pacekiwan, ngaˈay kiso pasowal to samaanay kiso minanam to Fangcalay Cudad, samanay miremo to pasangaray, anca samanay mihapinang to padadotocay ci Yihofa padama tisowanan. (ˈOlic 78:4, 7) O nalifetan no miso wa ngaˈay pakalalok to pacekiwan alatek, tinakoen matongal ko pakasoˈlinay falocoˈ ningra, wa pakalalok cingranan sapicadaaw to paputisem, anca mahapinang sasamaan ko niyah miremo to misiˈayawan a pasangaray nohatini. (1 Pitiro 5:9) Itini Pracil cecay misakafahay salikaka ci Ciyapoliaye, maharatengay ningra ko malifokay a sapadama minanam to Fangcalay Cudad, sanay cingra: “Matengil ko nalifetan no salikaka, mahapinangay ako masongilaˈay ko kafanaˈ ni Yihofa to misiˈayawan no mita a  sapalifet. Ano ngaˈay pakadangar cangra, ano kakoto o papakadangar.”

11-12. Hano mahemek kita a militemoh to mirienangay to saˈopo a pacekiwan?

¹¹ Ano sapadotocaw macakat ko pacekiwan malo Krisciyang, wa mararid mirienang to saˈopo, mikitini saˈopo milifok to epoc. (Hipray 10:24, 25) Sakinacecay mirienang to saˈopo ko pacekiwan, o singsi ko mitahidangay alatek. Kawra, ikor tayra i kasaˈopoan, kita maemin ngaˈay midemak to pina a demak, pakalalok cingranan padadotoc mirienang to saˈopo. Ngaˈay kita midemak to manan hani?

¹² Mahemek a militemoh to pacekiwan. (Loma 15:7) Ano mahemekay kita a militemoh to pacekiwan, mamakalim cingra padotoc mirienang to saˈopo. Damsayen a mihamham cingra, siwkayen to roma tamdaw, kawra aka pakidemen ko kahemek, wa mangodo ko pacekiwan. Iraay ko mamidimokos cingranan aka kasaan miharateng, alatek cowaho ka hicera ko pacekiway a singsi, anca ˈifowaay to roma demak. Sinanoten mitengil ko sowal ningra, mikifalocoˈ a ciharateng cingranan. Mihaen ko demak iso, ira ko maanan sakangaˈay no pacekiwan hani? Nengnengen ko nalifetan ni Temiteli. Soˈlin cowaho ka halafin cingra micada to paputisem, kawra o damato a sikawdan cingra nohatini. Milomal ci Temiteli to sakinacecay mirienang to saˈopo i, sanay: “Maˈaraw no cecay salikaka kako marawraw a mitala i potal no Kasaˈopoan, talaˈayaway a ciharateng takowanan, pacafay takowanan micomod. ˈAlomanay ko mihamhamay takowanan, tada macekiday kako. Maolahay kako mirienang to saˈopo, ano ngaˈay to romiˈamiˈad a mirienang tada ngaˈayay. Itini roma pala cowaho ka ira ko mahaenay harateng ako.”

13. O waywayan iso ira ko manan ngaˈayay pilingat i pacekiwan hani?

¹³ Patireng to ngaˈayay taˈarawan. O ngaˈayay waywayan iso ngaˈay padama to pacekiwan mihapinang to soˈlinay Krisciyang kita. (Matay 5:16) Itini Moetowa o cecay misakafahay ci Witali, sanay cingra: “Maˈaraway ako ko salikaka i kasakopang samanay ko kaˈorip, samanay micada to tamdaw, samanay minengneng to demak, mahapinangay o soˈlinay Krisciyang ko Misawacayay Tamdaw ni Yihofa.”

14. Ngaˈayay a taˈarawan no miso hano papadama to minanamay to Fangcalay Cudad a tamdaw macakat hani?

¹⁴ Ano saka citatodongaw ko pacekiwan micada to paputisem, wa sakadademaken ko mananamay, mihaen to demak cowa ko madoloay. Kawra, ano mahapinang no pacekiwan ko pitoor iso to safalod no Fangcalay Cudad milifokay to adihayay a epoc, wa mapakalalok, makalim minanam tisowanan. (1 Korinto 11:1) Sanay ko sowal no salikaka ci Hana: “Mananamay ako i, sahto o misakadademakan no  salikaka. Mikitira cangranan mananamay ako sasamaan pakalalok to tao, misodod to tao, paihkal to olah i tao. Masowal nangra ko tao i, sahtoay o pakahemekay a sowal cowa ko milikafay. Makalimay kako malecad cangranan.”

15. Mikitini Taneng 27:17, hano wa malawidang kita to miceriday mirienang to saˈopo a pacekiwan hani?

¹⁵ Malawidang to pacekiwan. Miceridto mirienang to saˈopo ko pacekiwan i, padotocen ciharateng cingranan. (Filipi 2:4) Ngaˈay masasowal cingranan, matongal ko kafanaˈ cingranan. Ano mafalicayto cingra i, ngaˈayay pakahemeken cingra. Ngaˈayay licayen cingra samanay ko harateng minanam to Fangcalay Cudad, anca o pakayraan no lomaˈ ato katayalan, kawra hamaan milicay to kangodoan a sowal. Ano matongal ko kasasowal namo, wa matongal ko kafanaˈ cingranan. Ngaˈay malawidang to pacekiwan, ngaˈayto pakalalok cingranan macakat, malaˈosi ko patosokan patafang to tireng micada to paputisem. (ˈOsien ko Taneng 27:17.) Salikaka ci Hana o miceriday misakafahay nohatini, milomal cingra to pisatapang noniyah mirienang to saˈopo a pakayraan i, sanay: “Itini kasakopang malacafayay to faelohay a widang, hinatalaay mirienang to saˈopo, soˈlin maroray i mirienangayho. Mahemekay kako malacafay to faelohay widang, misetek ko falocoˈ ecato pisawidang to cowa pidoko ci Yihofaan a tamdaw. Makalimay kako miingid ci Yihofaan ato salikaka, hato micadaayto kako to paputisem.”

16. Wa ngaˈayho kiso midemak to manan, padama to pacekiwan ira ko masalalomaˈay no kasakopang saan ko harateng?

¹⁶ Itini padadotoc macakat ato kafalic no pacekiwan a tatokian, padamaenho iso cingra ira ko masalalomaˈay no kasakopang saan ko harateng. Cecay a pakayraan i tahidangen cingra tayni i lomaˈ micawmaˈ. (Hipray 13:2) Itini Moetowa ci Tanis mitikol miharateng i pinanamho noniyah to Fangcalay Cudad i, sanay: “Kinapinaay, micadaay kako ato fafahi to satahidang, malacafay to salikaka komaen ato masasowal. Matengilay niyam to samanay ci Yihofa padama cangranan, tada mapakalalokay. Padamaay koni tamiyanan misetek to falocoˈ midoko ci Yihofaan, mitokelay to makapahay a kaˈorip noikor.” Roma i, ikor no mala mitosilay ko pacekiwan, ngaˈayay tahidangen iso cingra malacafay mitosil. Itini Pracil salikaka ci Tiyake sanay: “Maharatengay ako ˈalomanay salikaka mitahidangay takowanan kalacafay cangranan mitosil, o sangaˈayay a pakayraan mafanaˈ to salikaka. Ikor adihay ko mananamay ako, matongalayho ko piingid ci Yihofaan aci Yisan.”

17. Sasamaan ko malohemay malitengay padama to pacekiwan?

¹⁷ Misadak to toki pakalalok to pacekiwan. Malo malohemay malitengay, ciharateng kamo to pacekiwan i, ngaˈay padama cangranan  padotoc macakat, ikorto malo Krisciyang. Itini ˈayaw ato ikor no masaˈopo, ngaˈay kiso micerid misadak to toki masasowal to pacekiwan han? Ano maharateng iso ko ngangan nangra, mikiriwiˈay i pakamay pacaˈof to salicay ngaˈay miowaw to ngangan nangra, o misaaretengan koniyah saan cangra miharateng. Roma i, wa ngaˈay kiso, mirienang to pipacekiw no cecay mitosilay han? Wa taˈangay ko sapakalalok to pacekiwan. Itiniay Nayciliya a salikaka ci Ciyci o miceriday misakafahay, sanay cingra: “ˈAlomanay pacekiwan mafanaˈ to kalacafayay takowanan a salikaka o malohemay malitengay i, safahekaˈ saan. O cecay pacekiwan sanay ko sowal: ‘O Fokosi ako caayka mahaen ko demak, o cihafayay aca ko milisoˈan ningra, pakiyaho ngaˈ tayraay milisoˈ.’” Oniya pacekiwan miceridayto a mirienang to saˈopo nohatini.

18. Pakayni Dmak 20:28, iraay ko maanan aretengay ˈinorong no malohemay malitengay? Sasamaan cangra milahci toniya ˈinorong hani?

¹⁸ Pahatatanam ato pakalaloken ko pacekiway a singsi. O malohemay malitengay, iraay ko taˈangayay a ˈinorong namo, o papadama to salikaka pacakat to inaneng pasifanaˈ to tamdaw. (ˈOsien ko Dmak 20:28.) Ano marawraw ko harateng no pacekiway a singsi, ngaˈay pasowalen iso cingra, makahiay kiso misikay to pacekiwan. Sanay ci Ciyci: “Miceriday milicay ko malohemay malitengay takowanan to pakayraan no pacekiwan. Itini pasifanaˈ to pacekiwan i, ano tahalifa kako to pasangaray, mihadakay cangra to ngaˈayay a sapaini.” O malohemay malitengay ngaˈay papakalalok to pacekiway a singsi, padadotoc a tanektek. (1 Tisalonika 5:11) Sanayho ci Ciyci: “Pakalalok takowanan ko malohemay malitengay, miakoˈid to mihadakan ako a ˈicel, tada mahemekay kako. O mahaenay a sapakahemek, malecaday o liˈetecay a nanom i kaciferangan, patanektekay to harateng ako. Ikorto matongalay ko pakasoˈlinay falocoˈ ako, pasifanaˈ to pacekiwan i matongalay ko hemek.”—Taneng 25:25.

19. Kita maemin wa ngaˈay pakayni i manan a demakan ko sakalipahak hani?

¹⁹ Soˈlin awaay ko pacekiwan ita nohatini, wa ngaˈayho padama to pacekiwan padadotoc a macakat. Ano mirienang kita to pipacekiw no tao i, ngaˈayay isalakat a misaday, ngaˈay ko kadadama to pacekiway a singsi pakalalok to pacekiwan, kawra aka adihay ko sowal. Misatapang ko pacekiwan mirienang to saˈopo i, malawidang kita cangranan, patireng to ngaˈayay taˈarawan nangra. Ngaˈayay mihadak to toki ko malohemay malitengay pakalalok to pacekiwan, pahatatanamenho ato pakahemeken ko pacekiway singsi. Mihadak kita to miming a ˈicel pakalalok to tamdaw miingid ato midoko ci Yihofaan, tada kalipahakanto a demak!