1. Alatek wa misiˈayaw kita to manan sapalifet hani?

MISIˈAYAWAY kiso to taˈangayay a sapalifet nohatini han? Itini kasakopang iraay ko midokaˈay tisowanan a tamdaw alatek. (Yakop 3:2) Pakayni i pihakelongan o cafay iso matayal, cafay micudad milikafay tisowanan alatek. (1 Pitiro 4:3, 4) Paro no lomaˈ micongeday tisowanan mirienang to saˈopo ato mitosil alatek. (Matay 10:35, 36) Oniya sapalifet pasemsemay tisowanan, anca sapisawadaw sanay kiso to pihakelongan. Kawra ngaˈay tanektek ko pakasoˈlin iso, ano o mananto ko misiˈayawan iso a sapalifet, papafelien ni Yihofa kiso to taneng misiˈayaw, papafeliho tisowanan to ˈicel a mihadidi.

2. Mikitini Loma 15:4, miˈosi to Fangcalay Cudad pakayni kitanan iraay ko manan sadama hani?

² O Fangcalay Cudad misongilaˈ mitadtad to samanay misiˈayaw ko cowa ka lefot a tamdaw to pakidemay a sapalifet. Hano tiliden ni Yihofa koniya nalifetan hani? Samanen mitokelay Cingra kitanan pasayra cangranan minanam. Mikayatan ni Yihofa ko tarokos ci Pawloan pasowal toniya demak. (ˈOsien ko Loma 15:4.) Miˈosi toniya nalifetan ngaˈay pafeli kitanan to sahinom ato hatokel, kawra cowa ko piˈosi aca, papikayaten ita ko Fangcalay Cudad to harateng ita, mitemer to falocoˈ ita. Ano sakafanaˈaw kita to samaan miremo to cecay pasangaray, ngaˈay samaan ko demak hani? Ngaˈay misaka dademak to ilaenoay sepat pakayraan: (1) Mitolon, (2) Misaharaterateng, (3) Midotim, (4) Misakadademak. Dotoc, wa milengo kita toniya sepat pakayraan sasamaan ko pidemak. * Ikor wa misakadademak toniya pakayraan  a micekiw, minengneng to ngaˈay mikitini ci Tafitian aci Pawloan minanam to manan.

3. ˈAyaw no miˈosi kiso to Fangcalay Cudad sasamaan ko demak? Misamanay?

³ (1) Mitolon. ˈAyaw no miˈosi to Fangcalay Cudad, cangacangen ci Yihofa padama tisowanan mihapinang to sinael ira ko manan a epoc. Tinakoen ko sowal, ano mikilimay kiso to pakayraan a misaysay to pasangaray, cangacangen ci Yihofa padama tisowanan mihapinang to miligatay to safalod no Fangcalay Cudad, mafanaˈ to sasamaan ko demak.—Filipi 4:6, 7; Yakop 1:5.

4. Ano miˈosi to Fangcalay Cudad i sasamaan misaharateng to itiraay ko niyah?

⁴ (2) Misaharaterateng. Pafeliay ci Yihofa kitaanan to kadofahay sapiharateng a inaneng. Ano miˈosi to Fangcalay Cudad i, misaharateng i ponoˈ itiraay ko niyah, patinako to oyaan i Fangcalay Cudad a tamdaw kiso, misaharateng itiraay koniyah tora kitiraan, maˈaraway ko manan, matinakoay ko manan.

5. (1) O manan ko tatodong no midotimay hani? (2) Ano midotim i ngaˈayay miharateng to maanan salicay hani?

⁵ (3) Midotim. Midotim hananay o misongilaˈay a miharateng to miˈosian a lalakaw, ato milingatay koniya lalakaw to niyah. Midotim wa ngaˈay padama kitanan pakakiting to kalimlaan, matongal ko kacihapinang to lalangian. Ano miˈosi to Fangcalay Cudad caka midotim, malecaday o pinengneng aca to mafolfolay a coka caay ka makakadep. O midotimay malecaday o pakakitingay to mafolfolay a coka, masongilaˈ a mahapinang ko coka. Laenoay a salicay ngaˈay padama tisowanan a midotim: “Oniya tamdaw i Fangcalay Cudad samanay misaysay to pasangaray? Samanay ci Yihofa padama cingranan? Sasamaan kita misakadademak?”

6. Hano wa sakadademaken ita ko mananamay hani?

⁶ (4) Misakadademak. Sowal ni Yis, ano eca ka sakadademaken ita ko minanaman, malecaday patirengay i tafok to lomaˈ, kawra awaay ko kapo. Misamanay hani? Samanen ano tahalifa to taˈangay a fali anca taˈangay ko cedas, mapelal ko lomaˈ. (Matay 7:24-27) Malecaday, ano mitolon kita, miharateng, midotim, kawra ano caka sakadademaken ko mananamay i, malahoracay ko nano demak ita. Ano tahalifa to pasangaray anca sapalak, o pakasoˈlinay falocoˈ ita cowa ko papakaremo to sapalifet. Kawra ano sakadademaken ita ko minanaman, wa citaneng ko misaˈosian, rihaday ko falocoˈ, wa tanoktok ko pakasoˈlinay falocoˈ. (Isaya 48:17, 18) Dotoc, wa misakadademak kita to sepat a pakayraan, mikitini i nalifetan no Hongti ci Tafitian mananam ko manan.

7. Dotoc wa minengneng kita to maanan maˈoningay i Fangcalay Cudad a lalakaw?

⁷ Na misafelitan no pakasoˈlinan a paro no lomaˈ anca widang kiso han? Ano iraay i, miasip to nalifetan ni Tafiti wa padama tisowanan. O wawa ni Tafiti ci Apsalom misafelitay cingranan, sapiˈafasaw to saaroˈan no hongti. Nengneng ita samanay ci Tafiti miremo itiya.—2 Samuil 15:5-14, 31; 18:6-14.

8. Sapilifokaw to sadama ni Yihofa, ngaˈay kiso midemak to maanan?

⁸ (1) Mitolon. Itini ˈayaw no misongilaˈ miˈosi toniya maˈoningay i Fangcalay Cudad i, pasowalen ci Yihofa, masafelitay no tao kiso tada marorayay. (ˈOlic 6:6-9) Ihkalen ko sowal, ikor cangacangen ci Yihofa padama tisowanan mihapinang, o manan a safalod ngaˈay padama tisowanan miremo toniya pasangaray a pakayraan.

9. Tadtaden ko pakayraan ni Apsalom misafelit ci Tafitian.

⁹ (2) Misaharaterateng. Songilaˈen miharateng ko mifekaday a demak, haharatengen ko matinakoay no falocoˈ ni Tafiti. Itini halafinay  a tatokian i, o wawa ni Tafiti ci Apsalom padadotocay misolot to falocoˈ no tamdaw. (2 Samuil 15:7) Itini ka ngaˈayan a tatokian saan ko harateng ni Apsalom, ocoray to tamdaw tayra i cowacowa pala no Israil, misaday to sapiˈafasaw to saaroˈan no hongti. Mitahidangay cingra to ngaˈayay widang ni Tafiti ci Ahitofilan mirienang to kapot ningra. Ikor milasilay ci Apsalom malo hongtiayto, miocoray to tamdaw milepel ci Tafitian, sapipatayaw cingranan, itiya pakidemay ko adada ni Tafiti alatek. (ˈOlic 41:1-9) Matengil ni Tafiti to mitowakangay ci Apsalom, miliyasay to Yirusalim. Ikor malaloodayto cangra, mapadikay koya mitowakangay a sofitay, mapatayayto ci Apsalom.

10. Tahalifa toniya pasangaray a sapalifet, na ngangaˈay samaan ko kafalic ni Tafiti alatek?

¹⁰ Dotoc, haratengen tahalifa ci Tafiti toni kihcod hakowaay ko karoray. Maolahay cingra ci Apsaloman, tada pakasoˈlinay ci Ahitofilan, kawra oniya miingiday cingranan a tamdaw malacafayay a misafelit cingranan. Cowa ko pidokaˈ aca to falocoˈ ningra, sapipatayawho cingranan. Cowato ko papakasoˈlin to roma widang ci Tafiti alatek, cisasaay cangranan sahtoay mirienangay to kapot ni Apsalom. Oniyahto ko midimokosan, sacecay saan milaliw, tada matoled ko falocoˈ alatek. Kawra cowa ka pihaen ci Tafiti, malaˈosiay cingra milakowit toniya sapalifet. Samanay cingra pakadangar hani?

11. Samanay ci Tafiti miremo toniya pakidemay a sapalifet?

¹¹ (3) Midotim. Mikitini toniya maˈoningay mananam iso ko manan safalod hani? Haratengen hena: “Mihadakay ci Tafiti to manan ˈicel miremo to sapalifet?” Cowa ka ciˈangi ci Tafiti, kasimaansa ko pisaˈosi, cowa ka pakayni katalaw a cisasa ko harateng. Pasayraay ci Yihofaan micangacang cingra, talaˈayaw cingra a misaali to sadama no widang. Maharek misaˈosi ci Tafiti, tangsolay midemak. Soˈlin taˈangay ko macadaay a pidokaˈ, cowa ka cisasa to tao anca maketer. Kamayan cingra padadotoc mitiˈer ci Yihofaan, pakaˈsolinayho to widang ningra.

12. Samanay ci Yihofa padama ci Tafitian hani?

¹² Samanay ci Yihofa padama ci Tafitian hani? Ano padotoc micekiw kiso, wa mahapinag to pafeliay ci Yihofa ci Tafitian to ˈicel, padama cingranan milakowit toniya pasangaray. (ˈOlic 3:1-8; lalangian) Palaˈosian ni Yihofa ko misaˈosian ni Tafiti, padamaayho toya madimadiay ci Tafitian, misaˈicelay midipot cingranan a tamdaw.

13. Ano ira ko midokaˈay a tamdaw tisowanan, sasamaan kiso mitodong ci Tafitian hani? (Matay 18:15-17)

¹³ (4) Misakadademak. Haratengen: “Sasamaan kita mitodong ci Tafitian?” Wa tangsol kiso midemak misaysay to pasangaray. Ngaˈayay hapinangen iso ko pakayraan, mitoor to mihadakan ni Yis i Matay 18 fedengan a limoˈot a midemak, anca misaka dademak to lalomaˈay a safalod. (ˈOsien ko Matay 18:15-17.) Aka toor han ko maharatengay, patelas saan misaˈosi. Tolonen ci Yihofa, padama tisowanan rihaday ko falocoˈ, ira ko taneng a miremo to pasangaray. Aka malahdaw ko pakasoˈlin to widang, makahi micada to sapadama nangra. (Taneng 17:17) Sakakaay kalimlaan i, dofdofen ko pakaynian ni Yihofa i Fangcalay Cudad a sapaini tisowanan.—Taneng 3:5, 6.

14. Ano tahalifa kiso to manan a pasangaray i, ngaˈay miˈosi to saka 2 Timoti 1:12-16 ato 4:6-11, 17-22?

¹⁴ Mihadidiay kiso nohatini to pisafelit no paro no lomaˈ han? Itini kitiraan iso, pakidemay ko saconged anca masongilaˈay makeceng ko midokoay ci Yihofaan a demak han? Ano hatiraay i, ˈosien ko saka 2 Timoti 1:12-16 ato 4:6-11, 17-22, * wa milifok kiso to taˈangay a  sapakalalok. Oniya sowal sahtoay itiniay mapalit ci Pawlo a tiliden.

15. Ngaˈay kiso micangacang ci Yihofaan to manan?

¹⁵ (1) Mitolon. ˈAyaw no misatapang kiso miˈosi toniya sinael, pasowalen ci Yihofa tahalifaay kiso to manan pasangaray, samanay ko nafalocoˈan. Ihkalen ko sowal, cangacangenho ci Yihofa padama tisowanan mikitini nalifetan ni Pawlo mahapinang ko matatodongay a safalod, mafanaˈ to sasamaan miremo to pasangaray.

16. Kangtangen mitadtad ko pakayraan ni Pawlo.

¹⁶ (2) Misaharaterateng. Ngaˈay haratengen iso ko pakayraan ni Pawlo itiya. Mapalitay ci Pawlo itini Loma a kapalitan, macikeray no kadang. Soˈlin mapalitay cingra iˈayaw, kawra nohatini mafanaˈay cingra papatayento ko niyah. Maeminayto ko ˈicel ningra. Roma i, miliyasay ko widang cingranan. —2 Timoti 1:15.

17. Misiˈayaw to pasangaray, na ngangaˈay ci Pawlo samaan ko piharateng hani?

¹⁷ Itini toniya pakayraan, na mamakesem ci Pawlo alatek, ano caka fanekfek mitosil ko niyah, cowa ko mamalepel saan miharateng alatek. O aˈintel cingra toya Aciyaay miliyasay cingranan a tamdaw alatek, anca ecato pakasoˈlin to roma widang. Kawra, cowa ka haen ci Pawlo. Hano ngaˈay ci Pawlo padadotoc a pakasoˈlin to Kawas ato widang, matomes ko hatokel noikor?

18. Mihadakay ci Pawlo to maanan a ˈicel miremo to sapalifet?

¹⁸ (3) Midotim. Haratengen: “Mihadakay ci Pawlo to maanan a ˈicel miremo to sapalifet?” Soˈlin misiˈayaw to saroero no patay, kamayan pakahapinang ci Pawlo to demak, mafanaˈ to kalimlaan ko paˈodingar ci Yihofaan. Padotocayho ci Pawlo miharateng to pakalalok to tao, hanaca miceriday mitolon ci Yihofaan, misarocod a mitiˈer Cingranan. (2 Timoti 1:3) Cowa piharateng ci Pawlo to cima ko miliyasay cingranan, ao miharatengay o cima ko cowa piliyas cingranan, hanaca miakoˈid to mihadakan nangra a sapadama. Roma i, misamacayay cingra a micekiw to Fangcalay Cudad. (2 Timoti 3:16, 17; 4:13) Sakakaay kalimlaan i, pakasoˈlinay ci Pawlo tada maolahay ci Yihofa aci Yis cingranan, cowa piliyas cingranan, hanaca wa pakayni ka madimadi ningra a palifon cingranan.

19. Samanay ci Yihofa padama ci Pawloan mihadidi to sapalak?

¹⁹ Na pasowalan ni Yihofa ci Pawlo, wa pakayni pihakelongan micada cingra to sapalak. (Dmak 21:11-13) Samanay ci Yihofa padama ci Pawloan mihadidi to sapalak hani? Pacaˈofan ni Yihofa ko satolon ningra, pafeliho to ˈicel cingranan. (2 Timoti 4:17) Mikiˈokay ci Yihofa, o mamalifok ni Pawlo ko micangacangan ningra a sapalifon. Pakaynianho ni Yihofa i pina madimadiay a widang ni Pawlo, mihadak to ciepocay a sapadama cingranan.

20. Ngaˈay samaan ko demak ita, paihkal to malecaday kita ci Pawloan pakasoˈlin to sowal no Loma 8:38, 39?

²⁰ (4) Misaka dademak. Saharateratengen: “Sasamaan kita mitodong ci Pawloan hani?” O papahecaden ita ci Pawlo paˈayaw a misaday to falocoˈ, mafanaˈ to papakayni pihakelongan a tahacada ko niyah to sapalak. (Marko 10:29, 30) Sapitafoaw to madimadiay, wa micerid a mitolon, mitadiˈec ci Yihofaan, mitafoho to ngaˈayay nanaman a micekiw to Fangcalay Cudad. Aka mapawan kita, sakakaay kalimlaan i, misarocod paˈodingar ci Yihofaan. Ngaˈay pakasoˈlin kita, cowa ko mamifalah ci Yihofa kitaanan, ano cimato mananto a demak cowa ko papakaconged to olah Ningra kitaanan.—ˈOsien ko Loma 8:38, 39; Hipray 13:5, 6.

21. O manan ko padamaay ci Ayaan aci Heketoan miremo to masiˈayaway a pasangaray hani?

²¹ Ano samaanto ko pakayraan ita, wa ngaˈay mikitini i taˈarawan no Fangcalay Cudad  milifok to sapakalalok, milifok to ˈicel. Tinakoen, itini Dipong a misakafahay salikaka ci Aya, matalaway cingra itini kaˈalomanan a misawacay, kawra o nalifetan ni Yona padamaay cingranan miremo to ciˈangiyay a falocoˈ. Itini Intonisiya kapah a salikaka ci Heketo, o wama wina ningra cowa ko Misawacayay Tamdaw ni Yihofa, kawra o taˈarawan ni Rucu mitemeray to falocoˈ ningra, sakafanaˈaw ato sapidokoaw ci Yihofaan.

22. Ano minengneng to cingihaay a cohi ato “Taˈarawan no Pakasoˈlinay Falocoˈ” madadoedoay lalakaw i, sasamaan ko demak wa milifok to adihayay a epoc hani?

²² Ano sapitongalaw kiso cipinang to papakalalok a tamdaw i Fangcalay Cudad, icowa mikilim to milingatay a lalakaw hani? O ika ita, cingihaay a cohi ato “Taˈarawan no Pakasoˈlinay Falocoˈ” madadoedoay lalakaw, wa ngaˈay malecad o maˈoripay i ˈaˈayaw iso koniya maˈoningay. * ˈAyaw no minengneng, mitengil ato miasip kiso toniya mitepangan i, cangacangen ci Yihofa padama tisowanan mihapinang to ciepocay tisowanan a safalod. Haratengen to itiraay kiso i kaˈoripan nora tamdaw a kitiraan, midotim to samanay ko demak noniya madimadiay a sikawdan ni Yihofa, ato samanay ci Yihofa padama cangranan milakowit to pasangaray, dotoc sakadademaken ko mananamay iso. Akoˈiden ko nano demak ni Yihofa tisowanan. Sapaihkalaw to miakoˈiday falocoˈ, kilimen ko toki pakalalok ato padama to salikaka.

23. Pakayni Isaya 41:10, 13, mikiˈokay ci Yihofa to manan?

²³ Itini mikowanan ni Satan a hekal, wa adihay ko malifaay ita a pasangaray, latekay awaay ko pinang sasamaan ko demak. (2 Timoti 3:1) Kawra aka calemcem, aka matalaw. Ihkalay ko kafanaˈ ni Yihofa to malifaay ita a sapalifet. Ano misaali kita to sapadama i, mikiˈokay ci Yihofa tatano ciˈicelay a kawanan Ningra midama kitaanan. (ˈOsien ko Isaya 41:10, 13.) Pakasoˈlinay kita, misarocod kita micekiw to Fangcalay Cudad, wa milifok to sadama ni Yihofa, ira ko ˈicel miremo to masakenaay sapalifet.