1. Mikitini Matay 24:9, kaˈintelen no tamdaw kita hano cowa ko kafahkaan hani?

MISANGAˈ ci Yihofa kitaanan mafanaˈto a maolah to tamdaw, mitokelay kaolahen no tao. Ano ˈintel ko tamdaw kitaanan, wa masomad kita, wa matalawho alatek. Itiniay Iwropa fafahiyan salikaka ci Ciyawcena, sanay: “14 ko mihecaan ako i, pakayni pidoko ci Yihofaan tada ˈintelay ko wina takowanan, tada masomaday kako, matoˈorayho, misatapangay cisasa to cowa kangaˈay ko demak no niyah.” * Cecay ci Tanilo a salikaka sanay: “Samanen o Misawacayay Tamdaw ni Yihofa misetiˈay ko sofitay takowanan, mapoˈiyay, miroeroayho. Tada matalaway kako itiya, masamsamay sanay ko harateng.” Kaˈintelen no tamdaw o kasomadan, kawra cowa ka fahka kita, samanen maharekayto ci Yis pasowal o kakaˈintelen no tamdaw kita .—ˈOsien ko Matay 24:9.

2-3. Hano kaˈintelen no tamdaw ko nisawawaan ni Yis hani?

² Hano kaˈintelen no tamdaw ko nisawawaan ni Yis hani? Samanen malecaday kita ci Yisan ‘cowa ko noniya hekal.’ (Yohani 15:17-19) Soˈlin mikangodoay kita to mikowanay no hekal, kawra cowa pidoko kita to kitakit ato mitaypiyaway to kitakit a dafong. Dengan ci Yihofa ko midokoan ita, dengan o fadangalan Ningra ko midopoan, ci Satan ato ‘telotelocˈ ningra awaay ko fadangalan ni Yihofa mikowan sanay. (Satapangan 3:1-5, 15) Pasowalen ita ko tamdaw dengan o Hongti Kitakit no Kawas ko hatokel no tamdaw, hanaca cato ka halafin wa palaˈafoento noniya Hongti Kitakit ko polong misaˈadaay a lekakawa. (Taniil 2:44; Paˈarawan 19:19-21) Pakaynien i misamimingay tamdaw o ngaˈayay lihaf konini, kawra o tatiihay tamdaw cowa ka olah mitengil to mahaenay a lihaf. —ˈOlic 37:10, 11.

 ³ O roma lalangian kaˈintelen no tamdaw kita i, mitooray kita to palinian ni Yihofa a maˈorip. O ˈakawangay a palinian ni Yihofa taˈangayay ko kasasiroma to palinian no hekal. Tinakoen, o Sotom ato Komora a finawlan maenepay to malafoay madadiˈiyay a waywayan, telocto palaˈafoan ni Yihofa, nohatini pakapapotal sanay ko ˈalomanay tamdaw midama to mahaenay waywayan. (Yuta 7) Samanen midopoay kita to ˈakawangay a palinian ni Yihofa, malikafay ko tamdaw kitaanan, malaliway ko harateng ita sanay.—1 Pitiro 4:3, 4.

4. O maanan a capelin wa ngaˈay padama kitaanan milowid to ˈintelay?

⁴ Ano ˈintel ko tao kitaanan, pakangodo kitanan i, o manan ko papadama kitanan padotoc mihadidi hani? Misaaliay kita to tanektekay a pakasoˈlinay falocoˈ, wa padamaen ni Yihofa kita. O pakasoˈlinay falocoˈ malecaday o taˈangayay sapatada, “sapipadeng to nipaeferan no palafoay a cinamalay a panaˈ a maemin.” (Ifiso 6:16) Kawra cowa ko pakasoˈlinay aca falocoˈ, pairaenho ko olah, misamaanay? Samanen o olah “caay ka ranikay maketer.” Ano ira ko olah ita i, ano samaanto ko dokaˈ, wa ngaˈay padadotoc a masasodod ato miemem. (1 Korinto 13:4-7, 13) Dotoc nengnengen ita, hano maolah ci Yihofaan, maolah to salikaka, maolahho to ˈada, ngaˈay padama kitaanan milowid to ˈintelay.

5. Maolahay ci Yis ci Yihofaan, mansa ira ko ˈicel midemak to manan?

⁵ Itini ˈayaw no patayen no ˈada toya dadaya, pasowalan ni Yis ko madimadiay a nisawawaan: ‘Maolah kako to Wama, lahcien ako ko limoˈot no Wama i takowanan.’ (Yohani 14:31) Maolahay ci Yis ci Yihofaan, mansa ira ko ˈicel misiˈayaw to sapalifet. Maolah kita ci Yihofaan, wa ngaˈay padadotoc tanektek i pasangaray.

6. Mikiti i Loma 5:3-5, o sikawdan ni Yihofa samanay ko waywayan a misiˈayaw to kaˈintel no tao hani?

⁶ Mikitini nolitengan tahanini, o sikawdan ni Yihofa pakayni kaolah Cingranan hato ngaˈayay mihadidi to sapalak. Tinakoen, tiya miconged ko saˈakawangay hoing no Yutaya to tarokos a mitosil i, maolahay cangra to Kawas, mansa misetek to falocoˈ ‘midofdof to pikowan no Kawas, eca ko tamdaw ko dofdofen.’ (Dmak 5:29; 1 Yohani 5:3) Anini, o ciˈicelay a mikowanay mariˈangay a mipalak to salikaka ita, kawra iraay ko madimadiay a olah no salikaka to Kawas, mansa tanektek a tomireng, eca ka ngiyangi. Pakayni kita pihakelongan kaˈintelen no tamdaw, cowa ka toled, malikoay ko harateng.—Dmak 5:41; ˈosien ko Loma 5:3-5.

7. Ano misafelit ko paro no lomaˈ i, sasamaan ko demak ita hani?

⁷ Pakayni kitaanan, o pisafelit no paro no lomaˈ pasangaray a siˈayawen. Ikor no minanam kita to Fangacalay Cudad, malipalaway no tamdaw kita sanay ko harateng no paro no lomaˈ, anca masingkiay kita sanay. (Nengnengen ko Marko 3:21) Alatek pakidem ko pisafelit nangra kitaanan. Cowa ko fafahkaˈ kita tonini, samanen sanay ko sowal ni Yis: ‘O ˈada no tamdaw o paro no lomaˈ.’ (Matay 10:36) Manaokaniw, ano samaanto ko pinengneng no paro no lomaˈ, cowa ko sasaˈadaen ita cangra. Soˈlinay i, ano matongal ko olah ita ci Yihofaan, wa matongal ko olah to itihiay tamdaw. (Matay 22:37-39) Kawra, cowa ko papakayni kita pikangaˈay to tamdaw a misafelit to rikec ato safalod no Fangcalay Cudad.

8-9. O cecay fafahiyan salikaka micada to pakidemay a pisalifet i, o maanan ko padamaay cingranan padadotoc tanektek hani?

⁸ Masowalay i fafekang ci Ciyawcena pakidemay ko pisafelit no wina, kamayan a tanektek, eca ka ngiyangi. Sanay ci Ciyawcena: “Salakat, kako ato wina malacafayay to Misawacayay Tamdaw ni Yihofa minanam to Fangcalay  Cudad, kawra ikor no 6 folad sapirienangaw kako to saˈopo, mafalicayto ko waywayan no wina. Mahapinangay ako micawmaˈay cingra to misafelitay to kimad a tamdaw, saka dademakan ningra ko sowal nangra a miˈodis takowanan. Mapoˈi takowanan, mikonoc to fokes ako, miˈemec to takolaw ako, mifalahayho to cudad ako. Itini 15 ko mihecaan ako micada to paputisem. Sapicongedaw ko wina takowanan midoko ci Yihofaan, patayraay takowanan i pisaˈopoan to kaemangay a lekakawa, itira iraay ko miselipay to etok anca mararaway ko demak a tamdaw. O cecay na mamidipot tisowanan, ciharateng tisowanan a tamdaw, mihaen a mariˈang tisowanan, tada kasomadanto.”

⁹ Samanay ci Ciyawcena misiˈayaw toniya sapalifet hani? Sanay cingra: “Pisatapangan no wina misafelit takowanan a romiˈad, malahciay ako miasip ko Fangcalay Cudad. Tanektekay ko pakasoˈlin ako mahlaayto ako ko soˈlinay kimad, hanaca miingiday ci Yihofaan saan ko harateng. Miceriday kako mitolon Cingranan, matinakoay ko pipacaˈof Ningra. Itini kako pisaˈopoan a kitiraan i, mitahidangay ko cecay fafahiyan salikaka tayra i lomaˈ ningra, malacafay micalep a micekiw to Fangcalay Cudad. Toya tatokian, taˈangayay ko sapakalalok no salikaka i kasakopang, malecad o paro no lomaˈ ko pinengneng takowanan. Mahapinangay ako, ano cimato ko misafelitay, ikakaay ko ˈicel ni Yihofa cangranan.”

10. Pakasoˈlinay kita ci Yihofaan wa midemak to maanan hani?

¹⁰ Sowal no tarokos ci Pawlo: Awaay ko maanan ‘mamiconged to olah no Kawas kitaanan.’ (Loma 8:38, 39) Micadaan ita a roray cecayay aca liyad, kawra itiniay itihi ita ci Yihofa malacafay kitanan, mihinom kitanan, pafeli to ˈicel kitaanan. O nalifetan ni Ciyawcena paihkalay, wa pakayni ci Yihofa i kanonoˈan a salikaka pafeli kitanan to sadama.

11. O misowalan ni Yis itini Yohani 15:12, 13 a olah iraay ko maanan sapadama to nisawawaan hani? Patinakoen.

¹¹ Itini ˈayaw no kinafalah a dadaya, patalipaˈelalan ni Yis ko nisawawaan masasiolah. (ˈOsien ko Yohani 15:12, 13.) Mafanaˈay ci Yis, o cowa pisateked a olah wa padama to nisawawaan a makelec, milowid to ˈintelay. Haratengen ita ko tinakoan no Tisalonika kasakopang. Oniya kasakopang misatapang tomireng micadaayto sapalak, kawra padotocay a madimadi ko salikaka, paihkal to ciolahay falocoˈ,  patirengay to ngaˈayay taˈarawan. (1 Tisalonika 1:3, 6, 7) Pakalalokan ni Pawlo cangra padotoc paihkal to olah, ‘masongilaˈ ko pidemak.’ (1 Tisalonika 4:9, 10) O mahaenay a olah ngaˈayay pakalalok ato mihinom to matoleday a tamdaw, midama to malonayay tamdaw. (1 Tisalonika 5:14) Soˈlinay cangra mitoor to sapaini ni Pawlo a midemak. Mansa ikor no cecay miheca, itini saka tosa a tikami ni Pawlo sanay, ‘o olah nangra to salikaka padotocay a matongal.’ (2 Tisalonika 1:3-5) O olah to salikaka padamaay cangranan itini pasangaray pakayraan ato sapalak padotoc a mihadidi.

12. O cecay kitakit a salikaka itini kalalood samanay paihkal to masasiolahay hani?

¹² Nengnengen ita nohatini ko nalifetan ni Tanilo ato fafahi ningra. Tiya midapdap ko lalood i niyaroˈ nangra i, padotocayho cangra mirienang to saˈopo ato mitosil, ira ko miming a kakaenen, paladaˈay to salikaka. Ikor cecay romiˈad, ˈalomanay cikowangay a sofitay tayraay i lomaˈ ni Tanilo, sanay ci Tanilo: “Pacieciay cangra takowanan papisawad to pihakelongan, ikor no minaˈay kako, misetiˈay takowanan, itini fafekang no fongoh ako mikowang, miroero sapipatayaw takowanan. ˈAyaw no miliyas, patalaway cangra to mamiˈodang to fafahi ako. Tangsolay ko salikaka midemak, pakalic tamiyanan i ciˈacefelay tayra i roma niyaroˈ. Caay ka pawan kako to paihkalan no salikaka a olah. Tahira kami toya niyaroˈ i, pafeliay ko itiraay salikaka to kakaenen, pacafayho mikilim to katayalan ato kitiraan. Mihaenay haw i, ikor micadaay kako to milaliway to pades a salikaka.” O nalifetan nangra mitadtaday, o olah no Krisciyang soˈlinay padama kitanan ano tahacada to kaˈintel kamayan a mihadidi.

13. O fangcalay saocor hano ngaˈay padama kitanan milowid to ˈintelay, padadotoc a midoko ci Yihofaan hani?

¹³ Palimoˈotan ni Yis ko nisawawaan mikaolah to ˈada nangra. (Matay 5:44, 45) Mihaen ko demak madoloay han? Cowa. Kawra tiˈeren ko fangcalay saocor no Kawas, wa madangar ita. O minaroˈan no fangcalay saocor mahawpay ko olah, ato mihadidiay, sidaˈitay, damsayay, pakaˈmetay to tireng. (Kalatiya 5:22, 23) Oniya capeling wa padama kitanan milowid to ˈintelay. ˈAlomanay misafelitay a tamdaw ikorto mafalicay ko waywayan, samanen maˈaraway ko faˈinay, fafahi, wawa anca fiyaw paihkalay toniya makapahay capeling no Krisciyang. Itini lalomaˈ nangra iraay ko malo kanonoˈan salikaka  ita. Mansa, ano pasangaray kiso maolah to ˈintelay tisowanan a tamdaw, wa cangacangen ko Kawas pafeli to fangcalay saocor tisowanan. (Luka 11:13) Ngaˈay kiso pakasoˈlin, ano mitoor to limoˈot no Kawas a midemak, sahtoay o ngaˈayay.—Taneng 3:5-7.

14-15. Micada to pakidemay pisafelit no faˈinay ci Yasmin, samanay padama ko Loma 12:17-21 cingranan padadotac paihkal to olah i faˈinay?

¹⁴ Nengengen ita itini i taliyok no Israil nalifetan no salikaka ci Yasmin. Malo Misawacayay Tamdaw ni Yihofa cingra i, hato malipalaway cingra saan ko faˈinay, mihaenay papisawaday to pihakelongan. Pakangodoay cingranan ko faˈinay, mitahidangayho to salawina, ato ˈaˈideman no pihakelongan ato misakawasay patalaw cingranan, mirikec cingranan mipalakay to paro no lomaˈ no niyah. Itini misikay to saˈopo micomoday i kasaˈopoan ko faˈinay ningra, miceliˈ a mapoˈi to salikaka. Micada to mahaenay a demak, masomaday ci Yasmin, marariday tomangic.

¹⁵ Tayra i Hongti Kitakit Kasaˈopoan ci Yasmin i, mihinomay ko salikaka cingranan, pakalalok cingranan. Pakalalokay ko malohemay malitengay cingranan misakadademak to safalod no Loma 12:17-21. (ˈOsien). Sowal ni Yasmin: “Cowa ko madoloay mihaen to demak, kawra micangacangay kako ci Yihofaan padama takowanan, misarocod mitoor to limoˈot no Fangcalay Cudad a midemak. Padeteng sanay pakadit ko faˈinay to cawka, tayra kako milosimet. Mapoˈi cingra takowanan, tano damsayay kako pacaˈof. Adada cingra i, misongilaˈan ako midipot cingra.”

16-17. Pakayni i nalifetan ni Yasmin mananamay iso ko manan?

¹⁶ Ci Yasmin paihkalay to olah i faˈinay, iraayto ko ngaˈayay minaroˈan. Sanay cingra: “Matongalay ko pakasoˈlin no faˈinay takowanan, samanen mafanaˈay cingra o soˈliˈlinay ko sowal ako. Ano milengo kami to pihakelongan a salicay i, mikangodoay cingra mitengil to sowal ako. Mihaiay cingra cowato ko mamiconged takowanan. Nohatini, pakalalokay cingra takowanan lipahak a mirienang to saˈopo. Ngaˈayayto ko kalalaˈed niyam, dipayarayto ko lomaˈ. O tokel ako cecay romiˈad wa micada ko faˈinay to soˈlinay kimad, malacafay takowanan midoko ci Yihofaan.”

¹⁷ O tinakoan ni Yasmin paihkalay, o olah “padadotoc a masasodod, . . . padadotoc a mitokel, padadotoc a mihadidi.” (1 Korinto 13:4, 7) Taˈangay ko ˈicel no ˈintelay, taˈangay ko pidokaˈ to tamdaw. Kawra ikakaay ko ˈicel no olah, wa milowid to falocoˈ no tao,  ngaˈay pakahemek to falocoˈ ni Yihofa. Kawra, o misafelitay a tamdaw padadotoc miˈintel kitaanan, kamayan kita ngaˈay lipahak ko falocoˈ, misamanay hani?

18. Kaˈintelen no tamdaw kita i, hano kamayanho a lipahak hani?

¹⁸ Sanay ci Yis: “Ano kaˈintelen no tamdamdaw kamo, o malemeday kamo.” (Luka 6:22) Caka olah kita kaˈintelen ato micada to sapalak. Nikawrira, kaˈintelen no tamdaw kita, hano kamayanho a lipahak hani? Toloay ko lalangian. Saka cecay, padotoc a mihadidi kita ngaˈay milifok to pihayda ni Yihofa. (1 Pitiro 4:13, 14) Saka tosa, ano mapalifet ko pakasoˈlinay falocoˈ ita mamatongal ko tanoktok. (1 Pitiro 1:7) Saka tolo, wa milifok kita to kalimlaan a sapalifon, o midaocay a ˈorip.—Loma 2:6, 7. 

19. Masetiˈ no tamdaw ko tarokos i, hano kamayanho ngaˈay lipahak hani?

¹⁹ Patikol maˈorip ci Yis caka halafin, matinakoayto no tarokos ko hatiniay misowalan ni Yis a lipahak. Roma tamdaw misetiˈ cangranan, miconged cangranan mitosil, kawra tada lipahakay cangra. Misamanay? ‘Matatodongay a mapakangodo tona mitoor ci Yisan a lipahak ko falocoˈ’ nangra. (Dmak 5:40-42) O olah nangra ci Yisan mataˈlifay ko kaciˈangi to ˈada, soˈlin kaˈintelen no tamdaw, kamayan padadotoc milasil to ngaˈayay lihaf. Anini, ˈalomanay salikaka padotocay madimdi midoko ci Yihofaan i pasangaray a pakayraan. Mafanaˈay cangra, cowa ko mamapawan ci Yihofa to midemakan nangra, ato pakayniay i ngangan Ningra paihkalan a olah nangra.—Hipray 6:10.

20. Dotoc a lalakaw wa milengo to maanan?

²⁰ ˈAyaw no mahererek koniya lekakawa, o padotoc kita kaˈintelen no tamdaw. (Yohani 15:19) Kawra cowa ko mamatalaw kita. Malecad misowalan i laenoay a lalakaw, mamidipot ci Yihofa to madimadiay Cingranan a tamdaw. Paˈicel cangranan. (2 Tisaloniak 3:3) Mihaenay, wa padadotoc kita maolah ci Yihofaan, maolah to salikaka, maolahho to ˈada ita. Mihaenay, wa ngaˈay kita padadotoc makelec, tanektek ko pakasoˈlinay a falocoˈ, paˈodingar ci Yihofaan, wa ngaˈay misawacay to ikakaay ko ˈicel no olah to ˈicel no ˈintelay.