1. Hano micangacang ci Yis ci Yihofaan midipot to nisawawaan ningra hani?

ITINI ˈayaw no kinafalah ci Yis a dadaya, padotocay miharateng to mamasiˈayaw no nisawawaan a pasangaray noikor. Tada maolahay cingra toniya widang, mansa micangacang to kakarayan Wama ‘midipot cangranan, hoeca ka malaˈosi ci Satan.’ (Yohani 17:14, 15) Mafanaˈay ci Yis ikor no patikor cingra i kakarayan, wa padotoc ci Akoma Satan miˈodis to midokoay ci Yihofaan a tamdaw. Tada misaaliay ko finawlan ni Yihofa to sadipot.

2. Hano pakasoˈlin kita papacaˈofen ni Yihofa ko satolon ita hani?

² Tada maolahay ci Yihofa ci Yisan, mansa pacaˈof to satolon ningra. Ano misarocod kita pakahemek ci Yihofaan o mamaolah Cingra kitaanan, ano micangacang kita to sadama ato sadipot Ningra i, o papacaˈof Cingra. O sidaˈitay a Wama ci Yihofa, wa padotoc Cingra midimokos to wawa Ningra. O mamihaen ko demak Ningra, samanen milingatay to ngangan Ningra konini.

3. Nohatini hano mikikakaay ko saali ita to sadipot ni Yihofa hani?

³ Mikikakaay to salakatay ko pisaali ita to sadipot ni Yihofa. Malaplapayto ci Satan nai kakarayan, ‘tada mangolaway.’ (Paˈarawan 12:12) Miolatan ningra ko tamdaw, mipalak cingra kitaanan o ‘midokoay to Kawasˈ Sanay. (Yohani 16:2) Roma i, mipalak ko cowa pidoko to Kawas a tamdaw kitaanan, samanen cowa kalecad kita cangranan. Ano o mananto a pakayraan, cowa ko mamatalaw kita, samanen sanay ko Fangcalay Cudad: “O soˈlinay a tatiˈeren ko Tapang. Saka, o papatanekteken Ningra kamo a midipot a paliyas to demak ni Satan.” (2 Tisalonika 3:3) Sasamaan ci Yihofa midipot kitaanan hani? Dotoc, nengnengen ita ko tosa pakayraan Ningra.

4. Mikitini Ifiso 6:13-17, patadoay ci Yihofa kitaanan misaday to maanan?

⁴ Patadoay ci Yihofa kitaanan misaday to sapilood a rikoˈ, ho ngaˈay kita miconged to saˈodis ni Satan. (ˈOsien ko Ifiso 6:13-17.) Tanektekay koniya sapilood a rikoˈ, wa masongilaˈ ko pidipot kitaanan. Kawra sapilifokaw kita to sadipot, cacaˈedongen ko polong a sapilood a rikoˈ, hanaca ano samaanto cowa ka ngaˈay hepolen. Nengnengen ita o kahacecay no sapilood a rikoˈ o maanan ko mitaypiyawan.

5. Soˈlinay kimad a safaked mitaypiyaway to maanan? Hano kalimlaan koniya safaked hani?

⁵ Soˈlinay kimad a safaked mitaypiyaway to soˈlinay kimad no Fangcalay Cudad. Hano kalimlaan koniya safaked hani? Samanen ‘o wama no misamangahayˈ ci Satan. (Yohani 8:44) Mafanaˈay milipalaw cingra, pinaay patek miheca ko nalifetan, ‘miapohay to polong a tamdaw no hekal.’ (Paˈarawan 12:9) Kawra, o mamidipot ko soˈlinay kimad no Fangcalay Cudad kitaanan eca ka lipalaw ningra. Sasamaan ko demak ita, misafaked to soˈlinay kimad hani? Wa minanam kita to pakayniay ci Yihofaan a soˈlinay kimad, wa ‘itini sakayat no fangcalay saocor, mitoor to soˈlinay kimad a midoko Cingranan.’ Roma i, ano samaanto ko pakayraan, malo soˈliˈlinay a tamdaw kita.—Yohani 4:24; Ifiso 4:25; Hipray 13:18.

6. O moecelay a satada to falohang mitaypiyaway to maanan? Hano kalimlaan ko picaˈedong ita toniya satada no falohang hani?

⁶ O moecelay a satada to falohang mitaypiyaway to moecelay a palinian ni Yihofa. Hano kalimlaan ko picaˈedong ita toniya satada no falohang hani? Malecad o sapatada midipotay to falocoˈ no sofitay, o moecelay a satada ngaˈayay midipot to falocoˈ ita, ho eca ka manahol no hekal. (Taneng 4:23) Mitokelay ci Yihofa kitaanan misarocod a maolah Cingranan, matayal saki Cingranan. (Matay 22:36, 37) Mihaenay, mihalakaay ci Satan mikalisanga to falocoˈ ita ecato misamacay. Sakalaˈosiaw noniya araaw, mikayhiday cingra kitaanan maolah to demak no hekal, oniya demak sahtoay o kapiliˈan ni Yihofa. (Yakop 4:4; 1 Yohani 2:15, 16) Ano caka laˈosi ko sakayhid, tano patalaway miroero cingra, sapacieciaw kitanan misafelit to palinian ni Yihofa.

7. Samaan ko demak ita, o micaˈedongay to moecelay a satada to falohang?

⁷ Sapicaˈedongaw kita to moecelay a satada to falohang, o mamicada to palinian ni Yihofa, mitoor toniya palinian a maˈorip. (ˈOlic 97:10) Harateng no roma tamdaw pasangaray ko palinian ni Yihofa, adihayay ko sarikec. Kawra ano sawaden ita ko safalod no Fangcalay Cudad, malecaday o malalooday a sofitay, karetengen to satada no falohang a mihelong. Tada mafolaay konini! Pakaynien i maolahay ci Yihofaan a tamdaw, o limoˈot Ningra ngaˈayay milidong to ˈorip, ‘cowa ko karetengay a ˈinorong.’—1 Yohani 5:3.

8. Misowalan ni Pawlo paˈayaw misaday milasil to ngaˈayay lihaf, malecad o cicokapay, o maanan ko tatodong no sowal ningra?

⁸ Palimoˈotay ci Pawlo kitaanan paˈayaw misaday milasil to rihadayay a ngaˈayay lihaf, malecad o cicokapay. Sakoniya sowal, wa micerid kita a misaday, milasil to ngaˈayay lihaf no Hongti Kitakit i tamdaw. Misawacay kita to tamdaw, wa matongal ko tanektek no pakasoˈlin no niyah. Itini cowacowa pala, mametay to toki ko finawlan ni Yihofa misawacay to tamdaw, tada kasemeranto konini. Tinakoen, itini picudadan anca katayalan, itini pisasingdian anca pakalomalomaˈ a mitosil i, itini picakayan to dafong, milisoˈ to salawina, masasowal to kafanaˈan a tamdaw i, anca cakangaˈay masadak a pakayraan, fanekfekay cangra milasil to ngaˈayay lihaf. Ano pakayni katalaw ecato  pitosil kita, malecad o mihelongay to cokap a sofitay. Wa madolo madokaˈ ko waˈay noniya sofitay, pasangarto a miconged to saˈodis no ˈada, awa ko pakayraan midemak to limoˈot no tapang.

9. Hano mamitatoy kita to pakasoˈlin no falocoˈ a taˈangayay sapatada hani?

⁹ O pasoˈlin no falocoˈ a taˈangayay sapatada mitaypiyaway to pakasoˈlin ita ci Yihofaan, pakasoˈlinay kita to mamalaˈosi ko sakiˈok Ningra. O mahaenay a pakasoˈlin wa padama kitaanan ‘sapipadeng to nipaeferan no palafoay a cinamalay a panaˈ a maemin.’ Hano mitatoy kita to taˈangayay sapatada hani? Samanen mihaen kita ecato ka fiyor no misafelitay to kimad a sasowalen, ano likafen no tamdaw cowa ko tatalalikor. Ano eca pitatoy to pasoˈlinay falocoˈ a taˈangayay sapatada, ano miowing ko tao kitanan misafelit to palinian ni Yihofa i, wa awato ko ˈicel ita mitafo to saaroˈan. Mihaenay, samaan ko demak o mitatoyay to taˈangayay sapatada hani? Ano paˈading kita to pihakelongan i picudadan anca katayalan, ano minaˈay kita to ˈakawangay a lifon eca ka mafiyor ko midokoay a tayal, ano eca pisikol kita to pisafeli padotoc a midoko ci Yihofaan, o mitatoyay kita to taˈangayay sapatada a midipot to niyah.—1 Tisalonika 2:2; Hipray 13:5, 6; 1 Pitiro 3:15.

10. O sakalidong a kafong mitaypiyaway to maanan? Hano papadotoc kita a misakafong?

 ¹⁰ O sakalidong a kafong mitaypiyaway to sapafeli ni Yihofa kitaanan a hatokel, oniya hatokel o sapalifon Ningra to midofdofay Cingranan a tamdaw. Soˈlin mapatay, papatikolen Ningra a paˈorip kita. (1 Tisalonika 5:8; 1 Timoti 4:10; Titus 1:1, 2) Malecad o kafong midipotay to fongoh no sofitay, o sakalidong a kafong wa midipot to sapiharateng a ˈicel ita, padama kitanan miharateng to sakiˈok no Kawas, cowa ko papakidem ko pinengneng to malifaay a pasangaray. Mihaenay, samaan ko demak o misakafongay to sakalidong a kafong hani? Pairaen ita ko malecaday no Kawas a harateng. Tinakoen, cowa ko papatoroden ita ko tokel i hafay, ao Kawas ko patoroden. Mihaen, o misakafongay to sakalidong a kafong.—ˈOlic 26:2; 104:34; 1 Timoti 6:17.

11. O manan ko fonos no fangcalay saocor hani? Hano mamafanaˈ kita misaka dademak toniya fonos hani?

¹¹ Fonos no fangcalay saocor o Kimad no Kawas Fangcalay Cudad. Taˈangayay ko ˈicel noniya fonos, ngaˈayay mitihedak to masakenaay a mangah, padama to tamdaw mifalah to tatiihay nanaman, ecato ka apoh no mararaway sasowalen, milifok to soˈlinay a pasalat. (2 Korinto 10:4, 5; 2 Timoti 3:16, 17; Hipray 4:12) Misongilaˈ kita micekiw, micada to sapahatatanam no likakawa, wa mafanaˈ misaka dademak toniya fonos. (2 Timoti 2:15) Cowa konini aca sapilood a rikoˈ, misaka dademakayho ci Yihofa to roma pakayraan midipot kitaanan. O maanan a pakayraan hani?

12. Misaaliayho kita to manan ngaˈay micoˈay ci Satanan ato sikawdan ningra? Misamanay?

¹² Iraay ko nalifetan a sofitay mafanaˈay, cowa ko cecayay cingra a milowid to adihayay sofitay, misaaliay cingra to sadama no cafacafay. Malecaday, cowa ko cecayay kita a micoˈay ci Satanan ato sikawdan ningra, misaaliay kita to sadama no salikaka. Pafeliay ci Yihofa kitaanan to masacaˈolay masaefanay a cafay milood, o ‘kasacefang no salikakaˈ i polong no hekal. —1 Pitiro 2:17.

13. Mikitini Hipray 10:24, 25, mirienang to saˈopo wa ira ko manan haepoc ita?

¹³ O cecay malifokay ita a sadama i, mirienang to saˈopo. (ˈOsien ko Hipray 10:24, 25.) Matoleday kita no latekay, kawra papadama ko saˈopo patalifak kitaanan. O kimad ato sapaˈaraw no saˈopo misalalangiay to Fangcalay Cudad, ngaˈay padama kitaanan misetek to falocoˈ padadotoc a midoko ci Yihofaan. Matengil ko nai falocoˈay a caˈof no salikaka, ato kasasowal cangranan i ˈayaw ato ikor no saˈopo, taˈangayay ko sapakalalok kitaanan. (1 Tisalonika 5:14) O saˈopo pairaay to toki ita mitinako to lipahak padama to tao. (Dmak 20:35; Loma 1:11, 12) Roma i, pacakatay ko saˈopo to ‘sapilood a ˈicelˈ no mita, ho ngaˈay kita padotoc a midemak to mitosilay, tinakoen pasifanaˈ kitanan misaka dademak to sapasifanaˈ a lalosidan. Mihaenay, ˈayaw no saˈopo songilaˈen misaday, ano masaˈopo misamacay a mitengil, ikor no saˈopo saka dademaken ko minanaman, mihaen o mamalo ‘sofitay ni Kristoˈ kiso.—2 Timoti 2:3.

14. Iraayho ko sadama no nima kitanan hani?

¹⁴ Roma i, iraay ko masawalwalay ciˈicelay a coyoh midamaay kitaanan. Haratengen hena, cecay ko coyoh hakowaay ko malowiday a ˈada, haratengenho cecay ˈopo a coyoh hakowaay ko taˈangay no ˈicel! (Isaya 37:36) Awaay ko tatiihay coyoh papakalowid to kakarayan sofitay ni Yihofa. O malefotay ko ˈicel ni Yihofa, ano kalacafay Cingra kitaanan, ano hakowato ko ˈaloman no misafelitay, cowa ko papakafilo kitaanan! (Kakitaan 6:16) O sowal ato demak no cafay matayal, cafay micudad anca cowa pihakelong a salawina, ano patalaway kitaanan, o haharatengen konini. Aka mapawan, cowa ko  cecayay kita a milood! Midofdof kita to limoˈot ni Yihofa, o papadama Cingra kitaanan.

15. Mikitini Isaya 54:15, 17, ano cima to hano cowa ko papakaconged to finawlan no Kawas padadotoc mitosil hani?

¹⁵ O makowanay ni Satan a hekal adihayay ko lalanigan mikaˈintel kitaanan. Misatenokay ko saaroˈan no mita, manaˈayay mirienang to malalooday. Milasilay kita to fangcalay ngangan no Kawas, pakafanaˈ to tamdaw edeng o Hongti Kitakit Ningra ko papaira to soˈlinay dipayar. Miˈadingay kita to moecelay a palinian no Kawas. Mitihdakay kita to pising ni Satanan, pakafanaˈ to tamdaw o misamangahay ato mipatayay to tamdaw a mariˈangay. (Yohani 8:44) Roma i, milasilay kita to mamalaˈafoto ko hekal ni Satan. Soˈlin miconged ci Satan ato sikawdan ningra to mitosilay tayal, cowa ko tatomerep kita. Wa padadotocho kita pahemek ci Yihofaan, tano masakenaay a pakayraan misawacay to tamdaw. Soˈlin taˈangayay ko ˈicel ni Satan, kawra cowa ko papakaconged milasil to ngaˈayay lihaf no Hongti Kitakit i paro no kakarayan, misamaanay hani? Lalangian i, padadotocay ci Yihofa midipot to finawlan Ningra.—ˈOsien ko Isaya 54:15, 17.

16. Itini taˈangay padiing a tatokian, ci Yihofa wa samaan tano kafahkaan a pakayraan milidong kitanan hani?

¹⁶ Itini ˈaˈayaw mamifekad ko maanan a demak hani? Itini taˈangay padiing a tatokian, ci Yihofa wa tano kafahkaan a pakayraan milidong kitanan. Salakat, ocoren Ningra ko hongti no hekal palaˈafo to Papilon, itini palaˈafoan to mararaway a pihakelongan a tatokian, wa milidong Cingra to midokoay Cingranan a tamdaw. (Paˈarawan 17:16-18; 18:2, 4) Ikor, itini Armakiton wa palaˈafoen Ningra ko hekal ni Satan, itiya wa milidong Cingra to madimadiay a finawlan Ningra. —Paˈarawan 7:9, 10; 16:14, 16.

17. Hano papadotoc kita mikelec to kalawidang aci Yihofaan hani?

¹⁷ Ano padadotoc kita mikelec to kalawidang aci Yihofaan, cowa ko papaira to midaˈocay a dokaˈ kitanan ci Satan. Soˈlinay, o mamalaˈafo, tahadaˈoc malahdaw i, ci Satan. (Loma 16:20) Mihaenay, wa caˈedongen ita ko sapafeli ni Yihofa a sapilood a rikoˈ, ano samaanto aka mihelong! Aka cecay aca milood, kalacafayen ko salikaka madadama, midofdofho to limoˈot ni Yihofa. Mihaen ko demak iso, wa ngaˈay pakasoˈlin o sidaˈitay a Wama papaˈicel tisowanan, padadotoc a midipot tisowanan.—Isaya 41:10.