Miˈosi ko roma tamdaw tonini a maˈoningay iraay ko mahaenay a salicay, kawra itini tonini a sinael tatosaay ko ci Mifiposit hananay a tamdaw. Onini a maˈoningay padamaay kitaanan minanam to pina kalimlaan a kimad.

Hongti no Israil ci Sawlo papitoay ko faˈinayan wawa ato tatosaay a fafahiyan wawa. Sakakaay wawa ningra ci Yonatan. O roma fafahi ningra ci Ricpa mahofocay to roma a wawa, ci Mifiposit ko ngangan. Sasinanoten i, o cecay wawa ni Yonatan ci Mifiposit ko ngangan. Sakoniya sowal i, o cecay wawa ni Sawlo ato cecay fofo mahecaday ko ngangan ci Mifiposit hananay.

Iraay ko cecay liyad, tada ˈintehay ci Sawlo to itiniay lalomaˈ no Israil Kipiyon a tamdaw, sapipatayaw to polong nangra. Ano nengnengen i, ˈalomanay ko mapatayay a Kipiyon a tamdaw. Mihaen ko demak ni Sawlo tada mararawayto, misamaanay hani? Samanen itini lintad ni Yosuwa, o ˈaˈideman no Israil tamdaw maharekayto makakiˈok to Kipiyon a tamdaw, miketon to sowal cowa ko mamidokaˈ cangranan.—Yosuwa 9:3-27.

Onini a sakiˈok tahira i lintad ni Sawlo kamayanho ira ko epoc. Kawra misafelitay ci Sawlo tonini a sakiˈok, mihalaka to sapalaˈafoaw to polong a Kipiyon a tamdaw, telocto ‘cikiyamay cingra ato finacadan ningra to palakisay to ˈirang.’ (2 Samuil 21:1) Ikor no mala hongti ci Tafiti, o maˈosaway a Kipiyon a tamdaw pasowalay ci Tafitian to nano raraw ni Sawlo, orato milicayan ni Tafiti cangra, sasamaan patefoc to nano raraw ni Sawlo, ho ngaˈay miliyaw ko Israil tamdaw milifok to sapalemed ni Yihofa. Cowa pisaali ko Kipiyon a tamdaw to sapatefoc a payci, ao misaaliay to sapipatayaw to papitoay a wawa ato fofo ni Sawlo. (Saˈosi 35:30, 31) Mihaiyan ni Tafiti ko saali nangra.—2 Samuil 21:2-6.

Itiya mapatayayto ci Sawlo aci Yonatan i kalaloodan, kawra o wawa ni Yonatan ci Mifiposit maˈoripayho. Kaemangho ci Mifiposit tahalifaay to latiih hato mapiˈiway, cowa pirienang cingra to akong ningra mipatay to Kipiyon a tamdaw. Roma i, na makakiˈokay ci Tafiti aci Yonatan, miketon to sowal mamikangaˈay cingra to fofo ningra, mansa wawa ni Yonatan ci Mifiposit pakayniay tonini a sakiˈok a madipot. (1 Samuil 18:1; 20:42) Sowal no Fangcalay Cudad: ‘Hongti ci Tafiti samanen itini ˈaˈayaw ni Yihofa makakiˈokay to wawa ni Sawlo ci Yonatanan, maolahay misalimla to fofo ni Sawlo, wawa ni Yonatan ci Mifipositan.’—2 Samuil 21:7.

Mihaiyan ni Tafiti ko saali no Kipiyon a tamdaw, pafeli cangranan to tatosa wawa ni Sawlo ato lima a fofo, o cecay a wawa ci Mifiposit. (2 Samuil 21:8, 9) Mihaen ko demak ni Tafiti, patikolay to kiyam ni Sawlo i palakisay to ˈirang.

Onini a maˈoningay cowa ko likisi aca, ihkalay ko sowal no rikec no Kawas: ‘O wawa cowa ko papakayni i raraw no wama a patayen.’ (Limoˈot 24:16) O tatosaay a wawa ni Sawlo ato lalimaay a fofo ano awaay ko raraw i, cowa ko mamihayi ci Yihofa mihaen ko demak ni Tafiti. Sanayho ko sowal nonini a rikec: ‘O kahacecay tamdaw edeng pakayni i raraw no niyah a patayen.’ Ano nengnengen i, oniya papitoay a wawa ato fofo ni Sawlo milingatay to pipatay to Kipiyon a tamdaw, mihaenay pakayniay cangra i raraw no niyah mihadak to sapatefoc.

Paihkalay konini a maˈoningay, midemak ko cecay tamdaw to tatiihay a demak ikor cowa ka ngaˈay mikilim to sapaˈading o mitooray to limoˈot ko niyah dademak saan ko sowal, iraay ko ˈinorong ningra mitamorong to nano demak no niyah. Sanay ko Taneng: ‘Sadafdafen ko karomakatan iso a lalan, mihaen o ngangaˈay kiso itini i polong a lalan tanektek a talaˈayaw. Aka talawiri talawana, ka piliyas to tatiihay a demak ko waˈay iso.’—Taneng 4:24-27; Ifiso 5:15.