Cacekiwen Lalakaw 10
Hano Mamicada to Paputisem Hani?
‘Kamo kahacecay tamdaw ka picada to paputisem.’—DMAK 2:38.
RADIW 29 Madimadi ko Waywayan
KALIMLAAN NO LALAKAW a
1-2. Itini pitaykayan, samaanay ko demak no mamicada to paputisem a tamdaw hani? Onini a lalakaw mamilengo to maanan?
TIKOLEN miharateng hena, misadayayto ko salikaka mamicada to paputisem. Itiya, matengil iso tano tanektekay ciˈicelay a ngihaˈ pacaˈof cangra to pakayniay paputisem a tosa a salicay i, maˈarawho iso o salawina nangra ato widang mahemek a masedi ko pising. Mahadak i nanom ko micadaay to paputisem a tamdaw i, maˈaraw iso ko pising nangra mahemekay a masedi, matengilho ko pipaepa no ˈalomanay tamdaw. Ano saˈosien i, to lipalipayan iraay ko masapatekay a tamdaw mihaenay ko demak, patafang to tireng micada to paputisem malo Misawacayay Tamdaw ni Yihofa.
2 Ciharatengay kiso sapicadaaw to paputisem han? Ano hatiraay i, o cowa ka palecad kiso tonini a tatiihay a hekal, samanen ‘micangacangay ci Yihofaan’ kiso. (ˈOlic 14:1, 2) Onini a lalakaw mikiriwiˈay pakayni tisowanan ko pitilid, ano matoˈasayto kaemangayto, oha ngangaˈay kiso mikitini milifok to haepoc. Ano maherekayto kiso micada to paputisem i, onini a lalakaw papaˈicel tisowanan misetek to falocoˈ tahadaˈoc a mihodop ci Yihofaan. Malacafay kita minengneng, o pihodop ita ci Yihofaan a tolo lalangian.
MAOLAHAY KISO TO SOˈLINAY KIMAD ATO MOECELAY
Mikitini nolitengan tahanini, padadotocay ci Satan paoraf to fangcalay ngangan ni Yihofa (Nengnengen ko saka 3-4 fatac)
3. O midokoay ci Yihofaan a tamdaw hano maolahay to soˈlinay kimad ato moecelay hani? (ˈOlic 119:128, 163)
3 Palimoˈotan ni Yihofa ko finawlan Ningra ‘maolah to soˈlinay kimad.’ (Cikariya 8:19 ato roma pihongyak.) Palimoˈotay ci Yis to nisawawaan ningra micangacang to moecelay. (Matay 5:6) O cecay tamdaw ano maolahay to soˈlinay kimad ato moecelay, wa ira ko ciˈicelay a kalim, sapidemakaw to matatodongay i pinengneng ni Yihofa, makapahay halo makoracay a demak. Maolahay kiso to soˈlinay kimad ato moecelay han? Maedeng hatiraayto. ˈIntehayho kiso to misamangahay ato kihcod mararaway tatiihay a demak. (ˈOsien ko ˈOlic 119:128, 163.) O misamangahay patalahkalay to mariˈangay a waywayan ni Satan onini mikowanay to hekal. (Yohani 8:44; 12:31) O cecay a patosokan ningra i, paorafay to fangcalay a ngangan no Kawas ci Yihofa. Mikitini i misafelitay a demak i Itin, ci Satan padadotocay a mitenak to mangah a sowal, mitongangan to Kawas ci Yihofaan. Sanay ko sowal ningra, ci Yihofa misatekeday cowa ka pisasoˈlin a Mikowanay, maˈidiay pafeli to ngaˈayay i tamdaw sanay. (Satapangan 3:1, 4, 5) Pakayniay ci Yihofaan a mangah ni Satan padadotocay a miwarak to falocoˈ ato ponoˈ no tamdaw. Ano caay ka olah ko tamdaw to soˈlinay kimad, o mamakayhid ni Satan cangra midemak to masakenakenaay cowa ka moecel ato tatiihay a demak.—Loma 1:25-31.
4. Ci Yihofa o ‘pafeliay to soˈlinay kimad a Kawas,’ hano saan ko sowal hani? (Nengnengen ko coka.)
4 Ci Yihofa o ‘pafeliay to soˈlinay kimad a Kawas,’ tada hinapaladaˈay Cingra, pakafanaˈ to maolahay Cingranan a tamdaw mafanaˈ to adihayay soˈlinay kimad. (ˈOlic 31:5 ato roma pihongyak.) Mikitini milifok cangra to pasalat, ho caayto ka masaˈfit no mangah ni Satan. Roma i, pasifanaˈan ni Yihofa ko sikawdan Ningra misasoˈlin ko waywayan, moecel ko pidemak. Mansa mamilifok cangra to rihaday no falocoˈ, maseneng ko kaˈorip. (Taneng 13:5, 6) Itini pinanaman iso to Fangcalay Cudad i, coko matinakoayto iso ko sapadama ni Yihofa han? Mananamayto iso, o pakayraan ni Yihofa a dademak o saki polong a tamdaw ato kisowanan, sahto o sangaˈayay. (ˈOlic 77:13) Mihaenay i, sapidopoawto kiso to moecelay palinian ni Yihofa. (Matay 6:33) Sapiˈadingawho kiso to soˈlinay kimad, misawacay to polong paorafay ci Yihofaan a sowal, sahtoay o patelasay a sowal. Sasamaan ko pidemak iso hani?
5. Sasamaan kiso midopo to soˈlinay kimad ato moecelay hani?
5 Ngaˈayay kiso pakayni i mipiliˈan iso a nokaˈorip, paihkal i polong a tamdaw to midopoay kiso to soˈlinay kimad, cowa pitengil to mangah ni Satan, ciharatengay kiso sapicadaaw to pikowan ni Yihofa, midemak to matatodongay hananay Ningra a demak. Sasamaan midemak hani? Itini i satolon pasowal ci Yihofaan, papatafangen iso ko hakelong no ˈorip i Cingranan, ikor micada to paputisem, itini kaˈayaw no ˈalomanay paihkal to patafangayto kiso to tireng ci Yihofaan. O olah to soˈlinay kimad ato moecelay, o taˈangayay a ˈicel micoroh to tamdaw micada to paputisem.
MAOLAHAY KISO CI YIS KRISTOAN
6. Mikitini i ˈOlic 45:4 mahapinangay, iraay ko maanan lalangian no mita a maolah ci Yis Kristoan hani?
6 Hano maolah kiso ci Yis Kristoan hani? Nengnengen ko ˈOlic 45:4 samaanay somowal pakayni ci Yisan. (ˈOsien.) Fanekfekay ko olah ningra to soˈlinay kimad, misapoeneray ko waywayan, midemakay to moecelay. Kiso ano maolahay to soˈlinay kimad ato moecelay i, o mamaolah i cingranan. Maedeng maharatengayho iso, na timoloay ci Yis a miˈading to soˈlinay kimad ato moecelay. (Yohani 18:37) Samaanay ci Yis pasifanaˈ kitaanan minanam to misapoeneray hani?
7. Samaanay ci Yis patalahkal to misapoeneray, masolotto kiso hani?
7 Patirengay ci Yis to taˈarawan, pakacipinang kitaanan o maanan ko tatodong no misapoeneray. Tinakoen, kihcod a ˈdil panokayan ningra i kakarayan a Wama, ao cowa ko niyah. (Marko 10:17, 18; Yohani 5:19) Maˈaraw iso ko pisapoener ni Yis, samaanay ko harateng iso hani? Coko maolahay kiso cingranan, sapikotodaw cingranan han? Maedeng hatiraayto. Misamaanay hano misapoener ci Yis hani? Samanen maolahay cingra to kakarayan Wama, mitodong to ngaˈayay taˈarawan Ningra a misapoener. (ˈOlic 18:35; Hipray 1:3) Malefotay ci Yis a mitodong to masakenakenaay makapahay a capeling ni Yihofa, coko tangongolay a masolot ningra kiso han?
8. Hano maolah kita to Hongti ita ci Yisan?
8 Maolahay kita to Hongti ita ci Yisan, samanen o sangaˈayay a Mikowanay cingra. Micadaay cingra to sapahatatanam ato sapanilnil ni Yihofa. (Isaya 50:4, 5) Patalahkalay to cowa pisateked a olah i micadaay to pikowan ningra a tamdaw, makahiay kinafalah to ˈorip i cangranan. (Yohani 13:1) O Hongti ci Yis soˈlinay o mamilifok to mikifalocoˈay a olah no mita. Sanay cingra, o soˈlinay maolah cingranan a tamdaw i, o widang ningra, mamidofdof cangra to sapalimoˈot ningra. (Yohani 14:15; 15:14, 15) Ngaˈay a mala widang nonini tadamaanay a Hongti, tada kalikoan ita!
9. O paputisem no Krisciyang ato ni Yis iraay ko maanan kalalecadan hani?
9 O cecay sapalimoˈot ni Yis to nisawawaan i, papicadaay cangranan to paputisem. (Matay 28:19, 20) Ano cingrato mihaenay a midemak. Itini i pina pakayraan, o pipaputisem ningra ato nisawawaan cowa ka lecad. (Nengnengen ko sapatongal lalakaw “ O Paputisem ni Yis ato Paputisem no Nisawawaan Samaanay ko Kasasiroma.”) Kawra o paputisem nangra iraay ko kalalecadan. Mipaputisem ci Yis i, patafangay to niyah mamidoedo to araaw no kakarayan a Wama. (Hipray 10:7) Malecaday, mipaputisem ko nisawawaan ningra i, patalahkalay cangra to mipatafangayto to niyah to mamatayal saki ci Yihofaan, ikor mamisamacay to falocoˈ midoedo to araaw no Kawas, ao cowa ko mamicangacang to notekedan a patosokan. Mihaen cangra to demak o mitodongay to taˈarawan no Tapang ci Yis.
10. Ano maolahay kiso ci Yisan hano mamicada to paputisem?
10 Pasoˈlinay kiso o foseniˈan a wawa ni Yihofa ci Yis, o minilnilan ni Yihofa to mamikowan kitaanan a Hongti. Mafanaˈay kiso tada misapoeneray ci Yis, malefotay a mitodong to kakarayan a Wama. Mananamay iso, na pafecolan ningra ko macahiway a tamdaw, mihinom to matoleday ko falocoˈ a tamdaw, ato miadah to adadaay a tamdaw. (Matay 14:14-21) Mahapinangay iso anini samaanay cingra mikayat to kasakopang ningra. (Matay 23:10) Mafanaˈayho kiso, o malo Hongtiay no Hongti Kitakit no Kawas, ano ikor wa adihayho ko hadademaken ningra saki kitaanan. Sasamaan kiso paihkal to maolahay ci Yisan hani? Mamikotod cingranan, mitodong to taˈarawan ningra. (Yohani 14:21) Ano sapihaenaw kiso to demak, papatafang to tireng ci Yihofaan, halo micada to paputisem.
MAOLAHAY KISO TO KAWAS CI YIHOFAAN
11. Sakakaay masakalimlaan a lalangian no tamdaw micada to paputisem o maanan hani? Misamaanay hano saan ko sowal hani?
11 Sakakaay masakalimlaan a lalangian no tamdaw micada to paputisem o maanan hani? Ngaˈay kita mikitini i sowal ni Yis mahela ko caˈof. Somowalay cingra to sakakaay a sapalimoˈot no Kawas to tamdaw: ‘Sarocoden ko falocoˈ, sarocoden ko harateng, sarocoden ko ˈicel, tano polong a ˈorip a maolah to Kawas iso ci Yihofaan.’ (Marko 12:30) Mihaenay kiso a maolah ci Yihofaan han?
Kahacecay ngaˈayay a demak no kaˈorip, ato noikoran lalayapen a kihcod a sapalemed, sahtoay naitiniay ci Yihofaan (Nengnengen ko saka 12-13 fatac)
12. Misamaanay hano maolah kiso ci Yihofaan hani? (Nengnengen ko coka.)
12 Adihayay ko lalangian ita a maolah ci Yihofaan. Tinakoen, mafanaˈayto kiso o ‘pipowaran no ˈorip’ Cingra, mafanaˈayho ‘maamaan ngaˈayay a sapakaolah, maamaan malefotay a sapalifon’ sahtoay ono Ningra a sapafeli to tamdaw. (ˈOlic 36:9; Yakop 1:17) Itini kaˈorip iso maamaan ngaˈayay a demak, sahtoay o naitiniay i hinapaladaˈay iraay ko olah a Kawas ci Yihofaan.
13. O sapatefoc o masakalimlaan a sapakaolah hano saan ko sowal hani?
13 O sapatefoc i, o sapafeli ni Yihofa kitaanan a masakalimlaan a sapakaolah. Misamaanay hano saan ko sowal hani? Haratengen hena, o kalalaˈed ni Yihofa ato Wawa Ningra hakowaay ko katangongol. Sowal ni Yis ‘maolahay ko Wama takowanan,’ sanayho cingra ‘maolahay kako to Wamaan.’ (Yohani 10:17; 14:31) Itini i masawalwalay a mihecaan, o kalalaˈed Nangra tatosa maedeng padadotocay matongal ko katangongol. (Taneng 8:22, 23, 30) Manengneng ni Yihofa ko kanonoˈan a Wawa misemsem a tahapatay i, maedeng tada adadaay ko falocoˈ Ningra. Tona tangongolay ko olah ni Yihofa to tamdamdaw—mahawpay kiso, hayi sanay Cingra mikinafalah to kanonoˈan a Wawa, hato iraayto ko sakatahadaˈocaw iso maˈorip ato romaroma tamdaw. (Yohani 3:16; Kalatiya 2:20) Mafanaˈ to maolahay ci Yihofa kitaanan, wa soˈlinto a maolah kita Cingranan!
14. O maanan ko sangaˈayay a mipiliˈan iso a patosokan no kaˈorip hani?
14 Matongal ko kacipinang iso ci Yihofaan, mamatongal a tangongol ko olah iso i Cingranan. Maedeng ciharatengay kiso sapadadotocaw a miingid Cingranan, tahira i daˈoc. Mamadangar iso mihaen to demak. Pakalalokay Cingra tisowanan a misaˈicel a pakahemek to falocoˈ Ningra. (Taneng 23:15, 16) Cowa ko pakayni aca i sasowalen, ngaˈayayho pakayni i waywayan a mihaen to demak. O pakayraan no kaˈorip iso paihkalen to soˈlinay maolah kiso Cingranan. (1 Yohani 5:3) O mahaenay a nokaˈorip iso o sangaˈayay a mipiliˈan a patosokan no kaˈorip.
15. Sasamaan kiso paihkal to olah no niyah ci Yihofaan hani?
15 Ano ihkalen ko sowal, sasamaan kiso paihkal to olah no niyah ci Yihofaan hani? Salakat, mikiriwiˈ a mitolon ci Yihofaan, pasowal to misetekay kiso to falocoˈ patafang to hakelong no ˈorip i Cingranan. (ˈOlic 40:8) Ikorto i, mipaputisem kiso a paihkal to patafangayto kiso to tireng ci Yihofaan. Itini saˈayaw nonini a lalakaw somowalay, tada kahemekan konini, tona o pitekaan konini, o faelohayho a pisatapangan. Ikorto i, mamisafaeloh kiso to pakayraan a maˈorip, caayto ka pakayni i niyahan a maˈorip, ao pakayniay ci Yihofaan a maˈorip. (Loma 14:8; 1 Pitiro 4:1, 2) Misaˈosi tonini a masakalimlaan demak tada cowa ko madoloay, kawra ano mihaen kiso a misaˈosi i, airato ko sangaˈayay nokaˈorip iso. Misamaanay hano saan ko sowal hani?
16. Mikitini i ˈOlic 41:12 mamahapinang ita, sasamaan ci Yihofa palifon to patafangay to hakelong no ˈorip a midokoay Cingranan a tamdaw?
16 Ci Yihofa o hinapaladaˈay a kakarayan Wama. Ano o mananto ko sapafeli iso Cingranan, o sapafeli Ningra tisowanan wa mikikaka ko kaadihay. (Marko 10:29, 30) Soˈlinto itini salikoray a pasangaray a lintad, ngangaˈay pakahemeken Ningra kiso, marenecen ciepoc ko kaˈorip. Kawra o satapanganho konini, ikor no mipaputisem kiso padadotocen iso ko pidemak. Tatahadaˈoc kiso midoko to ciolahay a kakarayan Wama, papadadotoc a matongal ko olah iso ato Cingranan. O kaˈorip iso mamalecad Cingranan a halafin, tatahira i daˈoc.—ˈOsien ko ˈOlic 41:12.
17. Ngaˈay kiso pafeli ci Yihofaan to maanan masakalimlaan sapakaolah hani?
17 Ikor no mipatafang to tireng micada to paputisem kiso i, irato ko toki iso pafeli ci Yihofaan to masakalimlaan a sapakaolah. Haratengen hena, o kahacecay ngaˈayay a demak no kaˈorip iso, kahacecay kalipahakan tatokian, sahtoay o sapafeli Ningra tisowanan konini, o manan ko sapatiko iso Cingranan hani? Ci Yihofa o Tatapangan no kakarayan ato sera, iraayho ko maanan kaawaan Ningra saw? Wa ngaˈayho kiso pafeli Cingranan to maanan hani? O makalimay a falocoˈ iso, misarocoday a falocoˈ matayal saki Cingranan. Onini ko sapafeli iso a sapakaolah ci Yihofaan, ˈarawhan o sangaˈayay a pisakadademak iso to hakelong no ˈorip. (Yopu 1:8; 41:11; Taneng 27:11) Ano patelocen ko sowal i, misetek kiso to falocoˈ a micada to paputisem i, o sakakaay a lalangian maolahay kiso ci Yihofaan.
O MANANHO KO MITALAAN HANI?
18. Ngaˈay licayen iso ko niyah to maanan a salicay hani?
18 Mamicada kiso to paputisem han? Nohatini, sasamaan ko caˈof iso hani? Onini a salicay awaay ko papatado tisowanan a pacaˈof. Songilaˈen iso a miharateng: “O mananho ko mitalaan ako hani?” (Dmak 8:36) Lomalen ko sapicada to paputisem a tolo lalangian. Saka cecay, maolahay kiso to soˈlinay kimad ato moecelay. Ngaˈayay licayen ko niyah: “Halamhamay kako ira ko cecay a romiˈad sahto o soˈlinay ko sowal no tamdaw, o moecelay ko pidemak han?” Saka tosa, maolahay kiso ci Yis Kristoan. Ngaˈayay licayen ko niyah: “Halamhamay kako mala Hongti ako ko Wawa no Kawas, mitodong to taˈarawan ningra han?” Saka tolo, sakakaay i, maolahay kiso ci Yihofaan. Ngaˈayay licayen ko niyah: “Halamhamay kako midoko ci Yihofaan, pakahemek to falocoˈ Ningra han?” Ano “hay” sa kiso pacaˈof i, misamaanay hano caho picada to paputisem aki? O mananho ko mitalaan iso saw?—Dmak 16:33.
19. Hano cowa ko sasamisi kiso to mamicada to paputisem hokira? Tano tinakoen a mitadtad. (Yohani 4:34)
19 Ano samisimisiay kiso to mamicada to paputisem hokira, haratengen ko nisowalan ni Yis a cecay sapatinako. (ˈOsien ko Yohani 4:34.) O pidemak ni Yis to araaw no kakarayan Wama patinakoan to kakaenen. Misamaanay hani? Samanen ciepocay kitaanan ko kakaenen. Mafanaˈay ci Yis, ano o mananto ko saali ni Yihofa kitaanan, sahtoay ciepocay kitaanan. O mamidokaˈ kitaanan a demak, cowa pisaali ci Yihofa papidemak kitaanan. O araaw ni Yihofa tisowanan mahawpay ko mamicada kiso to paputisem, ngaˈayay pakasoˈlinen iso, mitengil tonini a sapalimoˈot o sakaciepoc tisowanan. (Dmak 2:38) Ano ira ko mipakaenay tisowanan to saˈaredetay a kakaenen i, cowa ko sasamisimisi kiso. Nohatini, sapicadaaw to paputisem a toki itiniayto i kaˈayaw iso, o mananho ko sasamisimisien iso hani?
20. Dotoc a lalakaw mamilengo to maanan?
20 O mananho ko tatalaen iso hani? “Cowaho pisaday kako.” Wa saan ko sowal no ˈalomanay tamdaw alatek. Soˈlinayto, patafang ci Yihofaan to hakelong no ˈorip a micada to paputisem, tada o masakalimlaan a saˈosi i nokaˈorip iso. Mankora mamisongilaˈ kiso a misimsim, mipalak to toki ato ˈicel misaday to sapicadaaw to paputisem. Ano ciharatengay kiso to sapihaenaw i, nohatiniho ngangaˈay kiso misamaan to demak hani? Dotoc a lalakaw mamilengo tonini a salicay.
RADIW 106 Mala Widang ni Yihofa
a Pakaynien to kahacecay mipakingkiwan ko sowal, micada to paputisem o kalimlaan konini. O maanan ko mamikowad to pakingkiwan to sapicadaaw tonini demak hani? O olah. Mihaenay i, maolah to maanan ato maolah cimaanan hani? Mikitini kita tonini a lalakaw mahela ko caˈof tonini tosa a salicay, mamananamho ita maherek micada to paputisem ikor, o kaˈorip no tamdaw wa ira ko maanan kafalic.
