1. ˈAlomanay mirienangay to saˈopo no mita a tamdaw mahapinangay nangra ko maanan hani? (Nengnengen ko coka.)

 HARATENGEN hena, o cecay mararamoday sakinacecay tayra i Hongti Kitakit Kasaˈopoan no Misawacayay Tamdaw ni Yihofa mirienang to saˈopo. Macadaay nangra ko pihamham no ˈalomanay, maˈarawayho ko matomesay a olah no kasakopang, matemeray ko falocoˈ nangra. Itini pinokayan a lalan, pasowalay ko fafahi to faˈinay: “Soˈlinay cowa ka lecad ko Misawacayay Tamdaw ni Yihofa, tada maolahay kako malacafay cangranan.”

2. O roma tamdaw hano sawad sa midoko ci Yihofaan hani?

² O olah no salikaka tada mikiriwiˈay. Kawra, cowa ko malefotay ko Misawacayay Tamdaw ni Yihofa. (1 Yohani 1:8) Mansa ano matongal ko kafanaˈ ita to salikaka, alatek madoloayto maˈaraw ko dangoc nangra. (Loma 3:23) Kaadayayan i, pakayni to dangoc no tao o roma tamdaw tatiihay ko falocoˈ, sawad sanayto midoko ci Yihofaan.

3. O maanan ko tahapinangan no soˈlinay Krisciyang? (Yohani 13:34, 35)

³ Liyawen minengneng ko lalangian a sinael nonini a lalakaw. (ˈOsien ko Yohani 13:34, 35.) O maanan ko tahapinangan no soˈlinay Krisciyang hani? Cowa ko malefotay, ao ciolahay falocoˈ. Sinanoten cowa ka pasowal ci Yis ‘pakayni toninian mafanaˈ kamo to nisawawaan ako kamo,’ ao ‘pakayni toninian mafanaˈ ko polong a tamdaw to nisawawaan ako kamo’ sanay. O sowal ni Yis paihkalay, ano ira ko cowa pisateked a olah no kalalaˈed no nisawawaan i, cowa ko cangra aca, ano o papotalay no kasakopang a tamdaw  papakahapinang to o soˈlinay mikotoday ci Kristoan a tamdaw cangra.

4. Pakayni soˈlinay Krisciyang, o roma tamdaw iraay ko maanan a sasa no falocoˈ hani?

⁴ Wa saan a miharateng ko cowa ko Misawacayay Tamdaw ni Yihofa alatek: “O tahapinangan no soˈlinay Krisciyang hano o olah hani? Samaanay ci Yis tano olah micada to tarokos hani? Sasamaan mitodong to taˈarawan ni Yis hani?” Soˈlinay i, ngangaˈay kita miharateng tonini a salicay, samanen o papadama konini kitaanan misongilaˈ paihkal to olah, mangalef ano maˈaraw ko dangoc no tao i, ngaˈay padadotoc tano olah micada cangranan.—Ifiso 5:2.

5. Tadtaden o maanan ko tatodong no Yohani 15:12, 13?

⁵ Ihkalay ci Yis a mitadtad, o soˈlinay mihakelong cingranan a tamdaw paihkalay to mikiriwiˈay a olah. (ˈOsien ko Yohani 15:12, 13.) Sinanoten, palimoˈotay ci Yis to nisawawaan ningra sanay: “Samatiyaen o nika olah Ako i tamowanan ko nika sasiolaolah namo.” O masamaanay a olah konini hani? Padadotocay ci Yis mitadtad, o hatiniay a olah o kinafalahay to niyah a olah, ira ko mahaenay a olah, makahiay ko Krisciyang pakayni i salikaka kinafalah to ˈorip no niyah. b

6. Samaanay ko Kimad no Kawas somowal to kalimlaan ko olah?

⁶ Tada kalimlaan ko olah sanay ko Kimad no Kawas. ˈAlomanay tamdaw maolahay tonini sinael: “O olah ko Kawas.” (1 Yohani 4:8) ‘Matiraen o niyah a maolah to tao.’ (Matay 22:39) ‘O olah mitahepoay to adihayay a raraw.’ (1 Pitiro 4:8) ‘Midaˈocay ko olah.’ (1 Korinto 13:8) Oniya pina sinael ato roma sinael pakafanaˈay kitaanan, palahad ato paihkal to olah hatiniay makapahay a capeling o tada kalimlaan.

7. Misamaanay hano awaay ko pakayraan ni Satan pakakedec a palacecay to tamdaw, masasiolaolah cangra?

⁷ Alatek mamihaen ko ˈalomanay tamdaw a miharateng: “Polong a pihakelongan somowalay to o soˈlinay kimad ko pasifanaˈan no niyah, kawra cowa ka lecad ko kacipinang nangra to Kawas.  Mamisamaan mafanaˈ kita to icowaay a pihakelongan ko soˈlinay hani?” Patirengay ci Satan to adihayay mararaway a pihakelongan, tada masasifoday, awaay ko pinang mihapinang to soˈlinay to makaniway. Kawra awaay ko pakayraan ningra patireng to cecay masakapotay salikaka i polong no hekal, pakakedec a palacecay to naitiniay icowacowa pala a tamdaw, masasiolaolah cangra. Edengan ci Yihofa ko pakadangaray, samanen o soˈlinay olah hananay o naitiniay ci Yihofaan. O cecay masakapotay a tamdaw ira ko fangcalay saocor no Kawas wangaˈ mapalemed ni Yihofa, ngaˈayay patalahkal to hatiniay a olah. (1 Yohani 4:7) Mankora saan ko sowal ni Yis, edengan o soˈlinay mikotod cingranan a tamdaw ko patalahkalay to caay pisateked a olah.

8-9. ˈAlomanay tamdaw tona maˈaraway ko Misawacayay Tamdaw ni Yihofa to masasiolaolahay cangra, iraayto ko masamaanay a piharateng nangra?

⁸ Malecad o paliˈayawan ni Yis, maˈaraw no ˈalomanay tamdaw ko paihkalan no salikaka a soˈlinay olah, mahapinangay to o soˈlinay mikotod ci Kristoan a tamdaw cangra. Tinakoen, faˈinayan salikaka ci Yien maharatengay ningra ko sakinacecay mirienang to taykay. Itiniay i ngata no lomaˈ ningra a piontoan ko taykay, sanay cingra: “ˈAyaw no pina folad, minengnengay kako to masasiayay tonini a piontoan, ˈarawhan o taykay no Misawacayay Tamdaw ni Yihofa caay ka lecad ko piharateng ako. Mahapinangay ako, tada makakangodoay ko Misawacayay Tamdaw ni Yihofa, sanengsengay ko caˈedong, ano o wawato nangra mitengilay to sowal. Cowa konini aca, tada rihadayay ko falocoˈ nangra, marenecay nengnengen. Onini coko sahtoay o kangalayan ako saw? O lalakaw noya taykay awaay ko maharatengay ako, kawra ngaˈayay waywayan no Misawacayay Tamdaw ni Yihofa, caay ko mamapawan ako.” c Ira ko hatiniay ngaˈayay waywayan no salikaka, samanen soˈlinay a masasiolaolah cangra. Maolahay kita to salikaka, mansa tano sidaˈitay micada ato mikangodo cangranan.

⁹ Ta misatapang ko salikaka ci Yohani mirienang to saˈopo no Misawacayay Tamdaw ni Yihofa i, iraay ko malecaday a piharateng. Sanay ko sowal ningra: “O itiraay tamdaw mangaˈayay damsayay ko kapicada to tao . . . nengnengen cangra hato o kawasto a fangcal. O roma i, soˈlinay cangra ira ko maolahay falocoˈ, onini ko pakasoˈlinay takowanan to o matatodongay ko pihakelongan nangra.” d O mahaenay a nalifetan marariday a misawacay, o Misawacayay Tamdaw ni Yihofa o soˈlinay a Krisciyang.

10. Itini masamaanay a pakayraan, o mamikiriwiˈ kita patalahkal to olah no soˈlinay Krisciyang? (Nengnengen ko sapatongal lalakaw.)

¹⁰ Malecad to masowalay i satapangan no lalakaw, sahtoay cowa ko malefotay ko salikaka, latekay mararaway ko sowal anca mararaway ko demak, paketeray kitaanan. e (Yakop 3:2) Toniya tatokian, ngangaˈay kita pakayni i sasowalen waywayan patalahkal to olah no soˈlinay Krisciyang. Itini toniya demak, sasamaan kita mitodong to ngaˈayay a taˈarawan ni Yis hani?—Yohani 13:15.

11. Ci Yakop aci Yohani patalahkalay to maanan a kadangocan? (Nengnengen ko coka.)

¹¹ Cowa ka halamham ci Yis to mamalefot ko nisawawaan ningra. Ano patalahkal cangra to maanan a kadangocan i, mitawmecay to olah ci Yis a mifikel cangranan, halamhamay cangranan milifok to pihayda ni Yihofa. Kinacecayay, tarokos ci Yakop aci Yohani mitahidangay to wina midemak to cecay a demak, tayra ci  Yisan micangacang papikamaroˈen cangra i tadamaanay a saaroˈan i Hongti Kitakit. (Matay 20:20, 21) Mihaen cangra to demak patalahkalay to malitaˈangay a waywayan, sapikikakaaw to roma a tamdaw.—Taneng 16:18.

12. Edengan ci Yakop aci Yohani ko mararaway ko waywayan han? Tadtaden mamaan.

¹² Cowa aca ci Yakop aci Yohani ko patalahkalay to mararaway a waywayan, romaroma a tarokos iraay ko mahaenay a kadangocan. Sowal no sinael: ‘Matengil no romaroma mamoetep a tamdaw konini a demak i, maketeray tora tatosaay malikakaay.’ (Matay 20:24) Ano haratengen i, ci Yakop, ci Yohani ato romaroma tarokos maedeng malapoˈiay somowal to tatiihay a sowal. Latek sanay ko sowal no romaroma tarokos: “Cima kamo saw? Sapilifokaw saan to tadamaanay a saaroˈan i Hongti Kitakit! Cowa ko kamo aca ko mipadangay ci Yisan, malecaday kami tamowanan ira ko tatodong milifok to mikiriwiˈay a fadangalan.” Soˈlinayto a mahaen ko kalacongis no tarokos hokira, itiya cangra maemin cowa patalahkal to olah no salikaka.

13. Ano patalahkal ko tarokos to kadangocan i, samaanay micada ci Yis cangranan? (Matay 20:25-28)

¹³ Samaanay ci Yis misaysay tonini a demak hani? Cowa ka keter cingra, cowa ka pasowal to mamifalic cangranan, mikilim to romaroma misapoeneray ko falocoˈ marariday patalahkal to olah a tamdaw mikotay cangranan. Mafanaˈay ci Yis makahiay ko tarokos midemak  to matatodongay a demak, mansa mihadidiay a pasifanaˈ cangranan. (ˈOsien ko Matay 20:25-28.) Soˈliˈlin cowa ko sakinacecay nangra a malacongis konini to cima ko satadamaanay, kawra cowa ko salikorayto konini, ˈarawhan kamayan tano olah ci Yis micada cangranan.—Marko 9:34; Luka 22:24.

14. Samaanay ko kalomahadan a lalengawan no tarokos hani?

¹⁴ Maedeng miharatengay ci Yis, to mafiyoray no kalomahadan a lalengawan ko tarokos. (Yohani 2:24, 25) Itiniay i serangawan no Yutaya a maˈorip cangra, o kakeridan no pihakelongan misakaretengay to ˈakawangay a ngangan ato saaroˈan. (Matay 23:6; nengnengen ko Sapicekiw a Fangcalay Cudad i Matay 23:6 to pitadtad to Kaˈayaway Kamaroˈan i Kasaˈopoan sanay a ika.) O roma sa i, o harateng nora ˈaˈideman ikakaay ko nika moecel no niyah to tao sanay. f (Luka 18:9-12) O mahaenay a kalomahadan mafanaˈay ci Yis to mamisamaan mifiyor to tarokos mahaen ko kapinengneng to niyah ato tao. (Taneng 19:11) Matatodongay ko pinengneng ni Yis cangranan, mansa ano mararaw cangra i, cowa ka pakidem a maketer cangranan. Mafanaˈay cingra to sapidemakaw to matatodongay demak ko tarokos, mankora mihadidiay cingra padama cangranan mifalah to maˈanofay ato malitaˈangay a falocoˈ, minanam tano olah a micada to tao.

15. Mikitini ci Yakopan aci Yohanian mamananam ita ko maanan?

¹⁵ Mikitini ci Yakopan aci Yohanian mamananam ita ko adihayay demak. Ci Yakop aci Yohani sapicangacangaw to ˈakawangay a saaroˈan i Hongti Kitakit, caay ko matatodongay mihaen to demak, kawra ano romaromato a tarokos caay ka tatodong mihaen to demak, samanen mipalakay to sakakedecaw nangra. Nikawrira, mitawmecay ci Yis to olah, tano sidaˈitay a pakayraan mikayat toya 12 a tarokos. O maan ko mamananam ita hani? Aka nanengneng sa to midemakan no tao, pakayni to raraw ato dangoc no tao, sasinanoten ko niyah to samaanay ko piharateng no miso. Sasamaanen midemak hani? Ano macangalan nanay kiso to demak no salikaka i, ngaˈayay licayen ko niyah: “Hano maketer kako tora midemakan ningra hani? Patalahkalay konini to iraay ko maanan a dangoc ako to raremoen ako han? Iraay ko maanan a kacarirawan ningra han? Soˈlinto ano iraay ko lalangian a maketer, ngangaˈay kako misodod cingranan, patalahkal to cowa pisateked a olah cingranan han?” Ano tawmecen ita ko olah micada to salikaka i, misawacayay konini to o soˈlinay a Krisciyang ko niyah.

16. Mikitini taˈarawan ni Yis mamananamho ita ko maanan hani?

¹⁶ Ngangaˈay kita mikitini i taˈarawan ni Yis a minanam, mamisaˈicel kita cipinang to salikaka. (Taneng 20:5) Manaokaniw, cowa ko mamahaen kita ci Yisan mitaˈesel a minengneng to falocoˈ no tamdaw, kawra ngangaˈay kita misaˈicel patado to salikaka a miharateng, sododen ko dangoc nangra. (Ifiso 4:1, 2; 1 Pitiro 3:8) Ano cipinangay kita to lalengawan no salikaka i, mamadoloto mihaen to demak, nengnengen ko cecay tinakoan.

17. O cecay kasakilac kantok matongalto ko kacipinang to cecay faˈinayan salikaka i, ikor iraayto ko maanan ngaˈayay a minaroˈan?

¹⁷ Itini Kakawalian no Afrika cecay kasakilac kantok na pasangaran malacafay to roma faˈinayan salikaka. Samaanay cingra midemak hani? Sanay cingra: “Cowa ka liyasen ako konini salikaka, sakacipinangaw kako cingranan.” Mihaen to demak ikor, onini a kasakilac kantok  mafanaˈayto to kalomahadan a lalengawan nonini a salikaka, taˈangayay ko kapifiyor to pinangan ningra. Sanay ko sowal nonini kasakilac kantok: “Tada misaˈicelay konini a salikaka miremo to pifiyor no kalomahadan a lalengawan ningra, hanaca adihayayto ko kacakat ningra. Mafanaˈ toninian i, tada masemeray kako cingranan. Ikor, malo ngaˈayayto a widang kami.” Ano misaˈicel kita cipinang to salikaka i, mamadoloto paihkal to olah i cangranan.

18. Ano mapakararaw no nima a salikaka kita i, ngaˈayay licayen ko niyah to maanan a salicay? (Taneng 26:20)

¹⁸ Ano mapakararaw no salikaka kita, latek kakilimen ita cingra masasowal. Kawra o sangaˈayay i, licayenho ko niyah: “Cipinangay kako to emin a demak han?” (Taneng 18:13) “Latek cowa ko mipadetengan nora salikaka han?” (Patnakay 7:20) “Itiyaho kako iraay ko mahecaday a raraw han?” (Patnakay 7:21, 22) “Ano tayra kako mikilim cingranan i, mamangalef a tatiih kora demak han?” (ˈOsien ko Taneng 26:20.) Ano songilaˈen ita miharateng konini salicay, latek mamahapinang to mamitawmec kita to olah a mihadidi tora salikaka.

19. Mamisetek kiso to falocoˈ misamaan ko pidemak hani?

¹⁹ O Misawacayay Tamdaw ni Yihofa o soˈlinay a mikotoday ci Yisan a tamdaw. Kawra sasamaan kita paihkal to soˈlinay a Krisciyang ko niyah hani? Ano mapakararaw no nima salikaka anca patalahkal to maanan a dangoc ko salikaka i, wa kamayan kita mitawmec to caay ka pisateked a olah micada cangranan. Mihaen to demak ngangaˈay padama to tao pakahapinang to matatodongay ko pihakelongan no mita, padama cangranan kalacafay kitaanan midoko to matomesay ko olah a Kawas ci Yihofa. Nanay misetek to falocoˈ kita padadotoc patalahkal to soˈlinay ciolahay a falocoˈ, paihkal to soˈlinay a Krisciyang ko niyah.