Ano safafahien ningra ci Rucu o mamafiyor ko saparocek a hafay no niyah, hano saan ko sowal “Nora tamdaw” hani? (Rucu 4:1, 6)

Itini i lintad no Fangcalay Cudad, o ciramodayto a tamdaw ano awaayho ko wawa mapatayto i, wa makidat ko pina a salicay: Tinakoen, ilaenoay no ngangan ningra saparocek a hafay sasamaanen midemak hani? O ngangan nonini a lalomaˈan o mamalahdawto han? O Rikec ni Mosi mihadakay to caˈof nonini a salicay.

Ano mapatay ko ciseraay a tamdaw i, o salikaka ningra anca ingataay a salawina ngangaˈay micada tonini sera. Ano pakayniay i nikaw paliwalen no tamdaw ko sera no niyah, o salikaka ningra anca ingataay a salawina ngangaˈay micakay patikol tonini sera. Mihaen i, onini a sera o mamaterek itini i lalomaˈan.—Lifi 25:23-28; Saˈosi 27:8-11.

O ngangan nonini a mapatayay a lalomaˈan sasamaan a materek hani? Sararamoden no faˈinayan salikaka ko fafahi noya mapatayay, mahaenay ko pakayraan ci Rucuan. Ano sararamoden no faˈinayan salikaka ko fafahi noya mapatayay, o mihofocan nangra a wawa wa masalalomaˈto i ngangan noya mapatayay, hanaca o mamicada to parocekan a hafay noya mapatayay. Onini a sidaˈitay a limasmas o sapidimokosaw to fafahi noya mapatayay.—Limoˈot 25:5-7; Matay 22:23-28.

Nengnengen ko tinakoan ni Naomi. O faˈinay ningra ci Ilimilik, ikor mapatayay ci Ilimilik ato tatosa faˈinayan a wawa nangra, telocto awaayto ko mamidimokos ci Naomian. (Rucu 1:1-5) Minokay tayra i Yuta ikor, corcoran ni Naomi ko kadafo ningra ci Rucu tayra ci Powacan papicakay to sera no lalomaˈan nangra, samanen ci Powac o salawina ni Ilimilik. (Rucu 2:1, 19, 20; 3:1-4) Kawra mafanaˈay ci Powac iraayho ko cecay a tamdaw saingataay a salawina, iraay ko saˈayaway a fadangalan ningra a micakay. “Nora tamdaw” hananay no Fangcalay Cudad cingra.—Rucu 3:9, 12, 13.

Satapang aca, mihayian “Nora tamdaw” a micakay. (Rucu 4:1-4) Soˈliˈlin o mamipalak cingra to payci, kawra mafanaˈay cingra cowato ko caciwawa ci Naomi a micada to parocekan ci Ilimilikan a hafay. Ano mahaen i, ono mirato noikor konini a sera, malo hafay ningra. Ano nengnengen i, tada o ngaˈayay a pihalaka koni.

Mafanaˈ to sasafafahien “Nora tamdaw” ci Rucu i, mafalicayto ko harateng, sowal sa: ‘Manaˈay kako a micakay, latek maˈafas ko raroceken a hafay no wawa ako.’ (Rucu 4:5, 6) Misamaanay hano pacekos ko falocoˈ ningra hani?

Ano safafahien “Nora tamdaw” ci Rucu anca o roma tamdaw ko cifafahi, hanaca mahofoc to cecay faˈinayan wawa, oninito a wawa ko mamicada to sera ni Ilimilik. Mihaen ko demak “Nora tamdaw” hano mamifiyor to hafay no niyah hani? Cowa ka somowal ko Fangcalay Cudad. Ilaeno iraay ko pina lalangian alatek.

• Saka cecay, mamipalak cingra to payci a micakay to sera ni Ilimilik, nengnengen hato mamasipon, samanen onini a sera saikor cowa kono mira, o wawa ni Rucu ko mamicada.

• Saka tosa, iraay ko ˈinorong ningra midimokos to sakaˈorip ni Naomi aci Rucu.

• Saka tolo, Ora tamdaw aci Rucu ano masofoc to roma a wawa, ano ikor onini a wawa mamililam to hafay no isaˈayaway a wawa “Nora tamdaw.”

• Saka sepat, ano awaay ko wawa “Nora tamdaw,” o mihofocan ni Rucu a wawa o mamicada to sera ni Ilimilik ato sera “Nora tamdaw.” Ano mahaen i, o hafay “Nora tamdaw” mamalo hafayto no ilaenoay no ngangan ni Ilimilik a wawa, cowa ko ilaenoay no ngangan “Nora tamdaw.” Ora tamdaw cowa ka makahi pakayni i sapadamaaw ci Naomian a malahdaw ko hafay no niyah, mansa micaˈi ci Powacan midemak tonini a demak. Makahiay ci Powac mihaen to demak, samanen ciharatengay cingra ‘miterek to hafay i ngangan no mapatayay.’—Rucu 4:10.

Kaciharatengan “Nora tamdaw” sapiterekaw to ngangan ato hafay no niyah. Misatekeday cingra, o niyah aca a sakangaˈay ko miharatengan, telocto cowa ka terek ko ngangan ningra, mapawanayto no tamdaw. Malawaay ningra ko malifokay ni Powac a sapalemed, malo tatoˈasan ni Misiya cingra. Tada kaadayayan ko teloc “Nora tamdaw!” Cowa ka ngaˈay cingra pakayni i misatekeday a harateng eca ka padama to cisaaliay a tamdaw.—Matay 1:5; Luka 3:23, 32.