1-2. Ano caayho ka saday iso micada to paputisem, hano aka matoled ko falocoˈ? (Nengnengen ko papotalay coka.)

 ANO ciharatengay kiso micada to paputisem, o ngaˈayay a patosokan konini! Maherekayto kiso misaday han? Ano hatiraay i, hanaca mihaiay ko malohemay malitengay, akato pisamisimisi, kalikien a micada to paputisem! Maherekto mipaputisem ikor, wa irato ko adihayay toki matayal saki ci Yihofaan, o caciepocto ko kaˈorip iso.

² O roma pakayraan i, iraay ko pasowalay tisowanan, papadadotocho kiso macakat ngaˈ ngaˈay micada to paputisem, latek mahapinangay iso to papadadotoc ko niyah a macakat. Ano mahaenay i, aka a matoled ko falocoˈ. Ano hakowaayto ko mihecaan, ngangaˈay kiso padadotoc macakat, salikor matoorto iso konini kalimlaan a patosokan.

3. Tapang no Iciyopiya mansanay ko sowal ci Filipan? Papiharatengay konini kitaanan to maanan a salicay?

³ ˈOsien ko Dmak 8:36, 38. Cecay tapang no Iciyopiya pasowalay to paratohay a Filipan, sanay ko sowal: ‘Iraay ko maanan lalangian ako eca picada to paputisem saw?’ Onini a Iciyopiya a tamdaw makalimay sapicadaaw to paputisem, kawra maharekayto cingra misaday han?

4. Hano mafanaˈ kita to sapipadadotocaw mitongal to kacipinang to Fangcalay Cudad koya tapang no Iciyopiya hani?

⁴ Onini tapang no Iciyopiya ‘na tayraay i Yirusalim midoko to  Kawas.’ (Dmak 8:27) Mihaenay haw i, maedeng o mihakelongay to Yutayakiyo cingra. Mikitini i Hipray Sowal Fangcalay Cudad mafanaˈay cingra to pinapina pakayniay ci Yihofaan a demak, nikawrira sakacipinangawho cingra to adihayay. Tiya malitemoh ni Filip i lalan cingra i, mimaanay cingra hani? Misarocoday cingra micekiw to maloloday cudad no pairasolay a Isaya. (Dmak 8:28) Ora miˈosian ningra lalakaw tada ikemoday a kimad, cowa ka renecen to pinapina taˈeneran a kimad, miharatengay cingra sapadadotocaw mitongal to kacipinang to Fangcalay Cudad.

5. Tapang no Iciyopiya samaanay misaka dademak to soˈlinay kimad?

⁵ Onini a tamdaw o ˈakawangay a tapang no Fafahiyan Hongti no Iciyopiya ci Kantaki, ‘mihimaway to kihcod a hafay no Hongti.’ (Dmak 8:27) Maedeng adihayay ko ˈinorong ningra, tada ˈifowaay ko demak. Kawra, kamayan cingra milimasmas to toki midoko ci Yihofaan. Cowa ko karenec aca cingra minanam to soˈlinay kimad, pahecadayho ko pidemak. Mikitini cingra i Iciyopiya malingad tayra i Yirusalim, pakayniay sapidokoaw ci Yihofaan i fangcalay sefi. Mihaen to demak adihayay ko mamapalak a toki ato payci, kawra pakayni sapidokoaw ci Yihofaan, ano hakowato ko mihadakan a ˈicel makahiay cingra.

6-7. Oya tapang no Iciyopiya hano ngaˈay padadotoc mitongal to olah i Kawas hani?

⁶ Oya tapang no Iciyopiya mikitiraay ci Filipan minanam to pina faelohay masakalimlaan a soˈlinay kimad, mahawpay ‘ci Misiya ci Yis’ sanay a soˈlinay kimad. (Dmak 8:34, 35) Mafanaˈ cingra to maanan ko demak ni Yis cingranan i, maedeng masemeray ko falocoˈ. Nohatini, mamisamaan ko demak ningra hani? Nao ngangaˈay cingra padadotoc a mala mihakelongay to Yutayakiyo a kangodoan no tamdaw, kawra matongalayto ko olah ningra ci Yihofaan aci Yisan, saka misetek to falocoˈ mifalic to nokaˈorip, micada to paputisem malo Krisciyang. Mahapinangay ni Filip to maherekayto cingra misaday, hato patadoay cingranan mipaputisem.

⁷ Ano todongen iso ko taˈarawan no tapang no Iciyopiya i, ngangaˈayto kiso micada to paputisem. Fafanekfekto ko falocoˈ a somowal: ‘Iraay ko maanan lalangian ako eca picada to paputisem saw?’ Dotoc mamilengo kita, sasamaan malecad toya tapang no Iciyopiya misaday to sapicadaaw to paputisem: Padadotoc minanam to soˈlinay kimad, pahecaden ko pidemak, hanaca padadotocen mitongal ko olah i Kawas.

8. Itini Yohani 17:3 mamisamaan kiso to demak sanay kora sowal hani?

⁸ ˈOsien ko Yohani 17:3. Pakayniay kiso tonini sowal ni Yis sapisatapangaw a minanam to Fangcalay Cudad han? Mahaenay ko ˈalomanay tamdaw. Kawra, ora sowal ni Yis paihkalay to papadadotoc kita mitongal to kafanaˈ to Kawas. (Patnakay 3:11; Yohani 17:3  ato roma pihongyak.) Minanam to sifanaˈ pakayni i Kawas awaay ko tolas. Ano adihay ko mananamay ita, mamatongal ko piingid ci Yihofaan.—ˈOlic 73:28.

9. Cipinangto to taˈeneran a kimad ikor i, mamidemakho kita to maanan?

⁹ Sakafanaˈaw ci Yihofaan mamikitini to taˈeneran a sifanaˈ a misatapang minanam. Itini Hipray a cudad, o ‘taˈeneran a kimad’ hananay no tarokos ci Pawlo ko hatiniay a sifanaˈ. Manaokaniw, cowa ko kalimlaan konini ‘salakatay a sapasifanaˈ’ caay ka saan, ao malecaday o nananomen no ˈengaenga a hacol konini salakatay a sapasifanaˈ. (Hipray 5:12; 6:1) Palimoˈotay cingra to polong a Krisciyang, aka aitini sa pinanam to taˈeneran a kimad, ao mamacakat cipinang to tangongolay a Kimad no Fangcalay Cudad. Pakayni tonini tangongolay a kimad palahaday kiso to makalimay a falocoˈ han? Mamakahi kiso padadotoc macakat, padadotoc mitongal to kafanaˈ ci Yihofaan ato araaw Ningra han?

10. Misamaanay hano cowa ka dolo ko minanamay a demak saan ko romaroma tamdaw?

¹⁰ Pakayni to ˈalomanay a tamdaw, cowa ko madoloay ko minanamay a demak. Kiso i? Itini picudadan, maolahay kiso miˈosi ato minanam han? Maolahay kiso minanam, hanaca adihayayto ko mananamay han? Anoca, tadancaay kiso micudad han? ˈArawhan i, ˈalomanay a tamdaw malecaday a pasangaran nanay. Aka calemcem, papadama ci Yihofa tisowanan. Malefotay Cingra, o sangaˈayay a Singsi Cingra.

11. Hano o ‘Tadamaanay a Singsi’ ci Yihofa saan ko sowal hani?

¹¹ Sowal ni Yihofa o ‘Tadamaanay a Singsi’ ita Cingra sanay. (Isaya 30:20, 21) O sidaˈitay Cingra, iraay ko mihadidiay patadoay to tamdaw miharateng a Singsi, o kangaˈayan no sito ko mikiliman Ningra. (ˈOlic 130:3) Caay ka pakidem ko saali Ningra kitaanan. Haratengen, ora kafahkaˈan a ponoˈ iso o Cingra ko misafacoay. (ˈOlic 139:14) Hofoc han kita iraayto ko kalim sakafanaˈaw. Makalimay ko Misangaˈay a Tatapangan tahadaˈoc kita minanam, hanaca mikitini milifok to lipahak. Mihaenay, aniniho ‘palahad to makalimay a falocoˈ’ to soˈlinay kimad no Fangcalay Cudad. (1 Pitiro 2:2) Patirengen ko ciepocay a patosokan micekiw, hanaca tooren ko milimasmasan a toki micekiw ato minanam to Fangcalay Cudad. (Yosuwa 1:8) Ira ko sapalemed ni Yihofa, maedeng mamatongal ko olah iso minanam ato misimsim to milingatay Cingranan a demak.

12. Misamaanay hano songilaˈen a micekiw ko hakelong no kaˈorip ni Yis ato mitosilay a demak ningra?

¹² Ceriden milimasmas ko toki, misongilaˈ a miharateng to hakelong no kaˈorip ni Yis ato mitosilay a demak ningra. Ano sapidokoaw kita ci Yihofaan i, o kakedecen mikotod ko pasaripaˈan ni Yis. Itini tonini pasangaray siˈayawen a lintad, tada mikiriwiˈay ko nika masakalimlaan a mihaen to demak. (1 Pitiro 2:21) Patodicekay ci Yis a pasowal, o mikotoday cingranan a tamdaw tatahasiˈayaw to adihayay sapalifet. (Luka 14:27, 28) Kawra pakasoˈlinay cingra, o soˈlinay mikotod cingranan a tamdaw o mamatira cingranan padadotoc a madimadi ci Yihofaan. (Yohani 16:33) Mankora, songilaˈen a micekiw ko hakelong no kaˈorip ni Yis, hanaca patireng to masahciay a patosokan, itini kalo romiˈad mitodong cingranan.

13. Oha padadotoc kiso micangacang ci Yihofaan to maanan? Misamaanay?

¹³ O kaira aca no sifanaˈ cangoˈotayho. Sakakaay a epoc no sifanaˈ o pipadama tisowanan micalep a mafanaˈ ci Yihofaan, hanaca palahad to pina makapahay a capeling, tinakoen o olah ato pakasoˈlin ci Yihofaan. (1 Korinto 8:1-3) Itini pipadadotoc iso minanam to soˈlinay kimad i, cangacangen ci Yihofa padama tisowanan palahad to tanektekay a pakasoˈlin. (Luka 17:5) O mamahemek Cingra pacaˈof to mahaenay a satolon. Ano pakayniay kita i matatodongay a kafanaˈ to Kawas a palahad to soˈlinay a pakasoˈlin, ngangaˈayto talaˈayaw a midemak.—Yakop 2:26.

14. Samaanay misaˈicel a pasowal ko tarokos ci Pitiro, mamisamaan kita mitoor to mananamay ita a midemak? (Nengnengen ko coka.)

¹⁴ To sapisaˈicelaw a somowal to papadadotoc ko Krisciyang mitoor to mananamay a midemak, somowalay ko tarokos ci Pitiro to pakayniay ci Nowaan a demak. Pasowalan ni Yihofa ci Nowa, o tatano lenlen Cingra palaˈafo to polong mariˈangay a tamdaw. Kawra, ci Nowa ato paro no lomaˈ o kafanaˈ aca to aira ko lenlen, caayho ko mamalidong. Sinanoten ko sowal ni Pitiro, ˈayaw no aira ko Lenlen, ‘misatapangayto misangaˈ to tamina’ cangra sanay. (1 Pitiro 3:20) Ci Nowa ato paro no lomaˈ ningra misongilaˈay a midoedo to sowal no Kawas a midemak, misangaˈ to taˈangayay a tamina. (Hipray 11:7) Palalitingan ni Pitiro ko demak ni Nowa to mipaputisemay, sowal sa cingra: ‘Miringiay tonini demak a paputisem, nohatini pakayniay noka patikol ni Yis Kristo a maˈorip milidongay tamowanan.’ (1 Pitiro 3:21) Kitinien i cecay a tatodong, o misadayan iso pakayni sapicadaaw to paputisem, ngaˈayay patatinakoen to nipisangaˈ ni Nowa ato paro no lomaˈ ningra to tamina a demak. To sapitooraw to patosokan no paputisem, mamisamaan ko demak iso hani?

15. O maanan ko tatodong no soˈlinay a pasasiyor?

¹⁵ Oha dademaken iso a cecay demak i, mikifalocoˈ a pasasiyor to raraw iso. (Dmak 2:37, 38) O tatodong no soˈlinay pasasiyor i, mamisongilaˈ a mifalic o sanay. O romaroma a demak o kaˈintehan ni Yihofa, tinakoen mitamakoay, somowal to kaacekan a sowal, malafoay madadiˈiyay a demak. Maherekayto kiso mifalah to mahaenay tatiihay a nanaman han? (1 Korinto 6:9, 10; 2 Korinto 7:1; Ifiso 4:29) Ano cowaho i, ka padadotoc misaˈicel a mifalic. Ngaˈayay tahidangen iso ko singsi no Fangcalay Cudad ato malohemay malitengay no kasakopang pafeli to sapadama ato sapaini tisowanan. Ano kaemangayho kiso itiniayho i lomaˈ, ka picerid misaali to sapadama no wama wina, padama tisowanan mifalah to mamiconged tisowanan micada to paputisem a tatiihay nanaman.

16. Mamisamaan kita micerid a mirienang to midokoay a demak?

¹⁶ O roma sa i, ka picerid kiso mirienang to midokoay a demak, mahawpay mirienang to saˈopo ato pakamay a pacaˈof. (Hipray 10:24, 25) Ano matoorayto iso ko tatodong a mitosil i, ka  picerid a mirienang tonini a demak. Ano adihay ko kapidemak iso, mamangalef ko hemek iso tonini milidongay to tamdaw a tayal. (2 Timoti 4:5) Ano kaemangay kiso itiniayho i lomaˈ, licayen ko niyah: “Patalipaˈelal ko wama wina ngaˈ mirienangay to saˈopo ato mitosilay demak kako han? Anoca o mako a harateng ko pihaen to demak han?” Ano talaˈayaw kiso a midemak i, paihkalay to pakasoˈlinay kiso ci Yihofaan, tangongolay ko kaolah ato piakoˈid Cingranan. O ‘mangodoay to Kawas a waywayan’ konini, o sapakaolah iso ci Yihofaan konini. (2 Pitiro 3:11; Hipray 13:15) Cowa ko nipaciecian kita, ao mikifalocoˈay a pafeli to sapakaolah ci Yihofaan, mihaen i, mamahemek Cingra. (Nengnengen ko 2 Korinto 9:7.) Mihaen kita to demak, samanen ciharatengay sapatafangaw ci Yihofaan to sangaˈayay no mita, hanaca o papalipahak konini kitaanan.

17-18. O manan ko papadama tisowanan padadotoc a macakat, matoor ko patosokan a mipaputisem? Misamaanay hani? (Taneng 3:3-6)

¹⁷ Sakalaˈosiaw no patosokan iso micada to paputisem i, o tatahalifa to pina a sacona. O romaroma tamdaw wa pakayni pihakelongan iso malikaf tisowanan alatek, anca misafelit a mihakokay tisowanan. (2 Timoti 3:12) Roma i, itini pisaˈicel iso miremo to tatiihay nanaman i, latekay miliyaway a mararaw ko demak. Anca, tona eca pakatoor kiso to patosokan, matoleday ko falocoˈ, sapisawadaw saan. Maanan ko papadama tisowanan padadotoc a mihadidi hani? O olah ci Yihofaan.

¹⁸ O olah iso ci Yihofaan tada o masakalimlaan, o sangaˈayay a makapahay a capeling no miso. (ˈOsien ko Taneng 3:3-6.) O mahaenay a olah i, cowa ko cecayay aca a liyad. Ira ko mahaenay a olah, soˈlinto tahasiˈayaw to sapalifet, cowa ko mamisawad kiso midoko ci Yihofaan. Marariday somowal ko Fangcalay Cudad to madimadiay a olah ni Yihofa to sikawdan Ningra, tatodong i, tangongolay ko olah Ningra cangranan, cowa ko mamiliyas a misawad cangranan. (ˈOlic 100:5) Tona o miringiay kiso to Kawas a sangaˈen, ngangaˈay kiso samaan matira Cingranan patalahkal to hatiniay a olah hani?—Satapangan 1:26.

19. Adihayay ko nano demak ni Yihofa tisowanan, sasamaan kiso mitongal to piakoˈid Cingranan hani? (Kalatiya 2:20)

¹⁹ Ngangaˈay kiso mikitini pipalahad to miakoˈiday falocoˈ a misatapang. (1 Tisalonika 5:18) To romiˈamiˈad ngaˈayay licayen ko niyah: “Samaanay ci Yihofa patalahkal to olah takowanan hani?” Dotoc itini satolon hadaken ko nano demak Ningra tisowanan, hanaca miakoˈid  Cingranan. Haenen oni Pawlo, mihapinang to pakayniay ci Yihofa to kaolah tisowanan, mansa mihaen ko pidemak. (ˈOsien ko Kalatiya 2:20.) Ngaˈayho licayen ko niyah: “Makalimay kako tano olah a patiko to olah han?” O olah ci Yihofaan papadama tisowanan micoˈay to sakayhid, itini sapalifet padadotoc a mihadidi, ngaˈayho mikowad tisowanan padadotoc mirienang to midokoay a demak, to romiˈamiˈad paihkal to tada maolahay kiso Cingranan.

20. Ano misaˈosiay kiso patafang to tireng ci Yihofaan i, mamisamaan ko demak hani? Onini a saˈosi hakowaay ko nika masakalimlaan hani?

²⁰ ˈAngongol ˈangongol ko olah iso ci Yihofaan i, mamakalim kiso mitolon ci Yihofaan, pasowal Cingranan to sapipatafangaw kiso to niyah i Cingranan. Haratengen, ano patafangto kiso ci Yihofaan i, aira ko matediay a hanoikor, ono ni Yihofato kiso tahadaˈoc. Patafang to tireng ci Yihofaan o miketonay to sowal kiso, ano tatiihto anca ngaˈayto ko kalingad no demak i, wa madimadi kiso midoko Cingranan. Mihaen kiso miketon to sowal, kinacecayay aca i hakelong no ˈorip. Soˈlinay haw i, miketon to sowal a patafang to tireng o karetengay a saˈosi. Nikawrira haratengen, itini hakelong no ˈorip iso adihayay ko misaˈosian, iraay ko pina to tada ngaˈayay, kawra orira saˈosi cowa ka mikikaka to patafangay to tireng a saˈosi ko nika ngaˈay. (ˈOlic 50:14) Halamhamay ci Satan misawad kiso to nika madimadi to ikakarayanay a Wama, mansa misaˈicelay a mihalaka to sapifasawaw to olah iso i Cingranan. Aka a malowid ni Satan! (Yopu 27:5) Ano ˈangongolay ko olah iso ci Yihofaan i, o mamatoor ko mipatafangay to tireng a miketonan a sowal iso, hanaca matongal matongal ko kapiingid to Wamaan.

21. Micada to paputisem hano cowa ko pihererekan, ao pisatapangan aca hani?

²¹ Maherek kiso patafang to tireng ci Yihofaan i, pasowalen ko malohemay malitengay no kasakopang, makalimay kiso micada to paputisem. Kawra haratengen, micada to paputisem cowa ko hererekan, ao pisatapangan, o pitekaan iso a midoko ci Yihofaan tahadaˈoc. Mihaenay, ano makalimay kiso micada to paputisem, aniniho tongalento ko olah to kakarayan Wama. Patirengen ko patosokan, to romiˈamiˈad tongalen ko olah no niyah ci Yihofaan. Mihaen ko demak iso, mamatoor ko patosokan micada to paputisem. Picadaan iso to paputisem a romiˈad o kalipahakan a romiˈad. Nikawrira, o makapahay nokaˈorip iso satapang sanayho. Nanay matongal ko olah iso ci Yihofaan aci Yisan, tahira i daˈoc!