1. O wama wina iraay ko maanan a kalim no falocoˈ hani?

 O WAMA wina, maedeng ciharatengay kamo padama to wawa mafanaˈ ato maolah ci Yihofaan. Kawra, cowa ka ˈaraw no tamdaw ko Kawas, sasamaan kamo padama to wawa pakasoˈlin to soˈlinay ira ko Kawas, hanaca padama cangranan miingid Cingranan hani?—Yakop 4:8.

2. O wama wina sasamaan pasifanaˈ to wawa mafanaˈ to capeling ni Yihofa hani?

² O cecay kalimlaan a pakayraan padama ko wama wina to wawa miingid ci Yihofaan i, pasifanaˈen cangra to Fangcalay Cudad. (2 Timoti 3:14-17) Nikawrira masowalay no Fangcalay Cudad ko roma pakayraan. Itini Taneng maˈoningay ko pipalimoˈot no cecay wama to wawa, patalipaˈelalan ningra ko wawa, aka pisakahmaw to patalahkalan no nisangaˈan a maamaan a makapahay capeling ni Yihofa. (Taneng 3:19-21) O wama wina ngaˈayay tano nisangaˈan a maamaan padama to wawa mafanaˈ to capeling ni Yihofa, onini lalakaw mamilengo to pina pakayraan.

3. O wama wina sasamaan padama to wawa?

³ Sowal no Fangcalay Cudad: ‘Oya caay ka ˈaraw a capeling no Kawas, ihkalay a mahapinang, mikitira to nisangaˈan Ningra a maamaan mahapinangayto.’ (Loma 1:20) O wama wina i, maolahay kamo kalacafay to wawa tayra i papotal a misalama alatek, kalasaka dademaken konini a toki padama to wawa mihapinang, o ‘nisangaˈan a maamaan’ ni Yihofa atora kasapaan a capeling Ningra iraay ko maanan a kalaliting. Dotoc nengnengen ita, wama wina sasamaan mikitini a mitodong to taˈarawan ni Yis.

4. Samaanay ci Yis tano nisangaˈan a maamaan pasifanaˈ to nisawawaan? (Luka 12:24, 27-30)

 ⁴ Sinanoten samaanay ci Yis tano nisangaˈan a maamaan pasifanaˈ to nisawawaan. Kinacecayay, papiharatengan ningra ko nisawawaan to tinakoan no palang ato hana. (ˈOsien ko Luka 12:24, 27-30.) Soˈliˈlin ano o mananto a pinaˈorip ato pinaloma ko sapatinako ni Yis o ngangaˈayto, kawra oyaan a kananaman no nisawawaan a ˈayam ato hana ko mipiliˈan ningra. Maedeng na maˈarawayto no nisawawaan ko palang maˈefer i kakarayan, ato kafociyar no hana itini kohkohan. Haratengen hena, itiya kasomowal ni Yis i, pasayraayho mitoroˈ cingra to palang ato hana alatek. Maherek cingra somowal tonini tinakoan ikor i, samaanay ko sowal ningra hani? Padamaay cingra to nisawawaan mihapinang to hinapaladaˈay sidaˈitay a Wama. Ano midimokosan ni Yihofa ko palang ato hana i, maedeng o mamidimokos to madimadiay a sikawdan no Niyah, pafeli cangranan to kakaenen ato cacaˈedongen a rikoˈ.

5. Sasamaan ko wama wina tano nisangaˈan a maamaan pasifanaˈ to wawa mafanaˈ ci Yihofaan?

⁵ O wama wina i, tatodongen namo ko pakayraan ni Yis a pasifanaˈ han? Ngaˈayay kamo masasowal ato wawa to kaolahan no niyah to maanan a nisangaˈan, tinakoen o kaolahan namo a pinaˈorip anca pinaloma. Aka mapawan a somowal to mikitini i maˈaraway iso paihkalay to o masamaanay a Kawas ci Yihofa, dotoc licayen ko wawa maanan ko kaolahan ningra a pinaˈorip anca pinaloma. Ano tano kaolahan no wawa a nisangaˈan a maamaan milengo cingranan to makapahay capeling ni Yihofa, o mamisongilaˈ cingra mitengil.

6. Mikitini i wina ni Kristofo mamananam ita ko maanan?

⁶ O wama wina mamipalak to adihayay a toki micekiw, ho ngaˈay tano maanan a pinaˈorip anca pinaloma pasifanaˈ to wawa a mafanaˈ ci Yihofaan hani? Cowa ka hatira. Haratengen ko tinakoan ni Yis, cowa ka sakoˈedaw sa mitadtad ci Yis to nanaman no palang a mikilim to kakaenen ato ˈalamat no hana. Manaokaniw, latek sapicalepaw ko wawa to sakafanaˈaw, kawra tano cecay tosa kantangay a sowal anoca sadaken ko salicay maedengayto mafohat ko falocoˈ no wawa. Maharatengayho ni Kristofo kaemang cingra mihaenay ko wina pasifanaˈ cingranan. Sanay ko sowal ningra: “To sapadamaaw tamiyanan lipahak to i taliyokay a nisangaˈan a maamaan, tano cecay tosa aca a kantangay a sowal mikayat tamiyanan ko wina. Patinakoen ano maˈaraw niyam ko takaraway lotok i, sanay cingra: ‘Nengnengen konini lotok tada kasemeran! Ci Yihofa coko mikikakaay ko nika tadamaan saw?’ Anoca itini kami i lawac no riyar i, sanay cingra: ‘Nengnengen ko tapelik hakowaay ko kaciˈicel nira! O ˈicel no Kawas coko awaay ko tolas saw?’ Mahaenay a kantangay a mikidatay to harateng a sowal tada taˈangayay ko pifiyor tamiyanan.”

7. Sasamaan ko demak iso, pahatatanam to wawa misolap a minengneng to nisangaˈan a maamaan ato misimsim to capeling ni Yihofa?

⁷ Lomahadto ko wawa i, ngaˈayay pahatatanamen iso cangra micalep a miharateng, o nisangaˈan ni Yihofa a maamaan patalahkalay to o masamaanay a Kawas Cingra. Ngaˈayay sowalen ko cecay a nisangaˈan, dotoc licayen ko wawa: “Mikitini mahapinangay iso o masamaanay a Kawas ci Yihofa hani?” O caˈof no wawa o mamacekok a mahemek kiso alatek.—Matay 21:16.

8. ‘Romakat i lalan’ i, o wama wina no Israil tamdaw iraay ko toki misamaan to demak?

⁸ Palimoˈotan ni Yihofa ko wama wina no Israil tamdaw, ‘romakat i lalan’ i, pasifanaˈen ko wawa mafanaˈ to sarikec ni Yihofa. (Limoˈot 11:19) Ano romakat i inaka a lalan ko Israil tamdaw i, maˈaraway ko masakenakenaay a hana rengos, ˈayam ato romaroma pinaˈorip, itiya iraayto ko toki no wama wina mikidat to hemek no wawa  pakayni i nisangaˈan a maamaan. Anini, o wama wina malecaday ira ko toki tano nisangaˈan a maamaan pasifanaˈ to wawa. Nengnengen ko papina wama wina samaanay a midemak.

9. Mikitini tinakoan ni Punisa aci Kaciya mamananam iso ko maanan?

⁹ Ci Punisa o cecay a wina, itiniay i taˈangayay maci no Intiya ko aroˈ, sowal sa cingra: “Ano tayra kami i inaka a milisoˈ to paro no lomaˈ i, sakadademakan ako konini toki padama to wawa cipinang to tadamaanay a nisangaˈan ni Yihofa. Ano miliyas ko wawa to kahadangan a lalan ato maci i, madoloay lipahak a minengneng to nisangaˈan ni Yihofa.” Malacafay ko wawa ato wama wina lipahak a minengneng to makapahay pala i, o mahaenay a ngaˈayay tatokian, cowa ko mamatawal nangra i hakelong no ˈorip. Itiniay i Moltowa ci Kaciya a fafahiyan salikaka, sowal sa cingra: “Milomalay tono kaemanganho, cowa ka tawal ako ko pikalacafay to wama wina itini i inaka a tatokian. Tada miakoˈiday kako cangranan nano kaemang pasifanaˈay cangra takowanan papisongilaˈ a misolap a minengneng to nisangaˈan ni Yihofa, mikitira mahapinang to o masamaanay a Kawas ci Yihofa.”

10. Ano pasangaray ko wama wina miˈorong to wawa miliyas to maci i, sasamaan ko pidemak hani? (Nengnengen ko sapatongal lalakaw “ Sapafeli to Wama Wina Ngaˈayay a Lalosidan.”)

¹⁰ Ano awaay ko pakayraan iso tayra i inaka, sasamaan ko pidemak hani? Faˈinayan salikaka ci Amoe itiniay Intiya ko kitiraan, sanay cingra: “Itini kitiraan ako a pala, koˈedaway ko toki no wama wina a maomah, hanaca tayra i inaka adihayay ko mamapalak a payci. Kawra, itini kaemingay a koing anca itini fadahong no lomaˈ, ngangaˈay kita misolap a minengneng to nisangaˈan ni Yihofa, hanaca milengo to masakenakenaay makapahay capeling Ningra.” Songilaˈen iso minengneng, itini ngata no lomaˈ iso, mamahela ko adihayay nisangaˈan a maamaan pasifanaˈ to wawa iso. (ˈOlic 104:24) Alatek mamaˈaraw iso ko ˈayam, fao, pinaloma ato romaroma nisangaˈan ni Yihofa. Itiniay i Towic fafahiyan salikaka ci Kalina sanay: “Maolahay ko wina to hana.  Kaemangho malacafay kami misalama i, maˈaraw ningra ko makapahay a hana toroˈ sanay paˈaraw takowanan.” Ngaˈayay sakadademaken iso ko mitepangan no likakawa no Kawas adihayay a ika ato cudad pasifanaˈ to wawa. Ano icowato a kitiraan, ngangaˈay kiso padama to wawa misongilaˈ misolap a minengneng to nisangaˈan a maamaan, halo padama cangranan mihapinang to makapahay capeling no Kawas. Dotoc lengoen ita ko pina a capeling.

11. O wama wina ngaˈayay samaan padama to wawa mihapinang to ciolahay ci Yihofa?

¹¹ Sapadamaaw to wawa mihapinang to ciolahay ci Yihofa, ngaˈayay lengoen ko adihayay pinaˈorip samaanay tano lopayˈay a pakayraan midimokos to wawa no niyah. (Matay 23:37) Ngaˈayay sowalen iso ko nika kadofah no masasiromaay a nisangaˈan i cikiw, malifokay ita ko adihayay a hemek. Sanay ko sowal ni Kalina: “Itini i papotal a misalama i, papitomerepay ko wina takowanan, misongilaˈ a minengneng to kahacecay a hana, ato kakapah nira samaanay patalahkal to ciolahay ci Yihofa. Ikor no pina miheca i, kamayan kako misinanot misolap a minengneng to masakenakenaay a hana, tona adihayay ko kasasiroma no hana, kasapaan ko pisafaco ato makapahay a kodong tada kasemeranto. Onini a hana padadotocay patalipaˈelal takowanan, tada maolahay ci Yihofa kitaanan.”

12. O wama wina sasamaan padama to wawa mihapinang to taneng ni Yihofa hani? (ˈOlic 139:14) (Nengnengen ko coka.)

¹² Padamaen ko wawa mihapinang to ikakaay ko taneng ni Yihofa to tamdaw. (Loma 11:33) Tinakoen, ngaˈayay sowalen iso malo oˈol ko nanom ikor i, maˈeferay tayra i roma a pala. (Yopu 38:36, 37) Ngaˈayayho somowal kiso to kasapaan a pisafaco to tireng no tamdaw. (ˈOsien ko ˈOlic 139:14.) Faˈinayan salikaka ci Folatimir mihaenay ko pipasifanaˈ to wawa, sanay cingra: “Cecay romiˈad patingsiya ko wawa i, mapolinay a madokaˈ. Ikor no pina romiˈad, maadahayto koya dokaˈ ningra. Pasowalan ako ato fafahi cingra, misangaˈ ci Yihofa to ˈalamat no tireng no tamdaw iraay ko ˈicel miadah to niyah, o misangaˈan no tamdaw a maamaan awaay ko hatiniay a ˈicel, tinakoen mapalak ko paliding awaay ko pakayraan o niyah sa ko misalof. Padamaay konini to wawa ako matongal ko kafanaˈ tada citanengay ci Yihofa.”

13. O wama wina sasamaan padama to wawa pakahapinang to ˈicel no Kawas? (Isaya 40:26)

¹³ Ci Yihofa mitahidangay kitaanan papicaˈa  pasikakarayan, saharateratengen to samaanay Cingra misaka dademak to awaay ko tolas a ˈicel, masierod ko kacomikay no polong a dohaw. (ˈOsien ko Isaya 40:26.) Haenen iso pakalalok ko wawa a midemak. Itiniay i Taiwan ko aroˈ a fafahiyan salikaka ci Tingting, milomalay to kaemangho cingra a nalifetan, sowal sa: “Kinacecayay miˈorongan no wina kako pakopang a milafin i palapalaan, minengnengay kami to toˈemanay a kakarayan. Itiya i, calemcemay kako to cowa ko papakaremo to saroero no cafacafay a micudad, eca ka madimadi ci Yihofaan. Papiharatengan no wina kako, orira masawalwalay a foˈifoˈis, tano ˈicelan ni Yihofa a misangaˈ, maedeng tatano malecaday a ˈicel padama takowanan misiˈayaw to maamaan a sapalifet. Itiya toya piliwko niyam mahapinangay ako ko nika tadamaan ni Yihofa, ikor nora i, ciharatengay kako to sapitongalaw to kafanaˈ ci Yihofaan, hanaca misetekay ko falocoˈ to papadadotoc midoko Cingranan.”

14. O wama wina sasamaan pakayni i nisangaˈan a maamaan pasifanaˈ to wawa to o lipahakay a Kawas ci Yihofa?

¹⁴ Mikitini kita i nisangaˈan ni Yihofa a kihcod ngaˈay mahapinang to o lipahakay a Kawas Cingra, hanaca mafanaˈay pakatawa. Mahapinangay no kakakusiya, adihayay a pinaˈorip mahawpay ko ˈayam ato foting maolahay misalama. (Yopu 40:20) Ano maˈaraw no wawa iso ko pisalama no pinaˈorip i, coko lipahakay cangra hokira? Alatek maˈaraway nangra ko cecay posi milepelay to maporoday a keliw, anca maˈaraw ko papina waco misalama a malatiˈil. Ano miliyaw a mapakatawa no kahemekan a kawing no pinaˈorip ko wawa i, mameten konini a toki pasowal cangranan, o lipahakay a Kawas ko midokoan ita ci Yihofa.—1 Timoti 1:11.

15. O wama wina sasamaan ko demak, madoloto ko wawa misadak to nafalocoˈan nangra? (Taneng 20:5) (Nengnengen ko coka.)

¹⁵ Nolatekay, wama wina pasangaran nanay papisomowal ko wawa to nafalocoˈan nangra. Ano mahaenay ko pakayraan iso i, papalaken iso ko adihayay a toki a misaharaterateng. (ˈOsien ko Taneng 20:5.) O romaroma a wama wina mahapinangay ano kalacafay to wawa rihaked a minengneng to serayan i, madoloay ko wawa pasowal to nafalocoˈan nangra, misamaanay hani? Samanen itira tora tatokian awaay ko mamikalisanga to falocoˈ no wama wina ato wawa. Itiniay  i Taiwan a cecay wama ci Yayen somowalay: “Mipalakan niyam ko toki kalacafay to wawa tayra i papotal a misalama, tinakoen itini lotolotokan anca i lawac no riyar a romakat i, sinowayay ko falocoˈ nangra itiya. Mahapinangay niyam madoloayto cangra misadak to nafalocoˈan no niyah itiya.” Ci Kaciya ya masowalay i fafekang a fatac sanay: “Minokay nai picudadan ikor, mikeridan no wina kako tayra i cecay makapahay a koing. Itira sinowayay ko falocoˈ ako, madoloay a somowal to mafekaday i picudadan a demak ato kacalemceman ako a demak.”

16. O paro no lomaˈ sasamaan itini nisangaˈan ni Yihofa a serayan paselaˈ a sinoway hani?

¹⁶ Mapolong ko paro no lomaˈ miingid to serayan o ngaˈayay a pisalama, mamatongal ko ngaˈayay kalalaˈed no paro no lomaˈ. Sowal no Fangcalay Cudad ‘ira ko kalipahakan a toki’ ‘ira ko kasakeroan a toki.’ (Patnakay 3:1, 4, ato roma pihongyak.) Itini i cikiw adihayay ko nisangaˈan ni Yihofa sano cokaay makapah a pala, itini makapahay a kitiraan, ngaˈayay haratengay saan kita midemak to ciepocay to tireng a demak. ˈAlomanay paro no lomaˈ maolahay cangra malacafay tayra i inaka, lotolotokan, lawac no riyar a misalama. O romaroma wawa maolahay misolap a minengneng to pinaˈorip, itini i koing comikay misalama, anca itini ˈalo, fanaw, i riyar a midangoy. Tayra kita i papotal miingid to serayan, adihayay ko toki rihaked a minengneng to nano demak ni Yihofa, hanaca pasinoway to tireng ato falocoˈ no niyah.

17. O wama wina misamaanay hano papadama to wawa minanam a rihaked to nisangaˈan ni Yihofa a maamaan?

¹⁷ Itini faelohay a hekal, wama wina ato wawa, ngangaˈay sao haratengay saan rihaked to nisangaˈan ni Yihofa a kihcod. Itiyato i, cowato ko mamatalaw kita to pinaˈorip, cowa ko mamatalaw ko pinaˈorip kitaanan. (Isaya 11:6-9) Awaay ko tolas no toki ita rihaked to nisangaˈan ni Yihofa a makapahay a maamaan. (ˈOlic 22:26) Kawra wama wina, aka tahirato ngaˈ, padama to wawa minanam a rihaked to tadamaanay a demak ni Yihofa, nohatiniho misatapang! Kamo ano tano nisangaˈan a maamaan pasifanaˈ to wawa mafanaˈ ci Yihofaan i, mamatirato ko wawa to Hongti ci Tafitian pakahemek ci Yihofaan: ‘Yihofaaw, awaay ko pakafiloay to nika tadamaan Iso.’—ˈOlic 86:8.