Ci Ciyke aci Maririn mikitini 1988 miheca misatapang, malacafayay a misakafah. Itiniay cangra i mikayatan no fenpo no Frans a Katelopo ato Kowiyana matayal, ano tayra cangra i faelohay kitiraan kalikiay a mananam. Nohatini, licayen ita cangra to pina salicay.

Hano makalim kamo a misakafah hani?

Maririn: Itiniay kako i Katelopo a lomahad, mikikaemang malacafay to wina a mitosil. O fanekfekay a misakafahay ko wina, ano masadak kami misaromiˈaday. Maolahay kako a padama to tao, mansa itini 1985 miheca, micudiyap kako misatapangayto a misakafah.

Ciyke: Kaemangho, adihayay ko maolahay mitosil a misakafahay i itihi ako. Ano paselaˈ ko picudadan, marariday kako malo padamaay misakafahay. Tahini pilipayan, mikalicay kami to faso malacafay to misakafahay tayra i roma pala mitosil. Mahererek ko cecay romiˈad, tayraay kami i lawac no riyar a mihokal to tireng. Toya pina miheca tada kalipahakanto!

1988 miheca, mararamoday kako aci Maririnan. Caka halafin, miharatengay kako: “Ano awaay ko ˈinorong niyam to paro no lomaˈ, hano caka pitongal to toki a mitosil hani?” Orato, kako aci Maririn malacafayay a misakafah. Ikor no cecay miheca, mirienangay kami to pahatatanamay to misakafahay, dotoc manilnilay malo mikiriwiˈay misakafahay. Na matayalay kami i cowa kalecad a pala no Katelopo, lipahakay kami. Ikor manilnilay kami tayra i Kowiyana.

Toniya pina miheca, manilnil kamo tayra i adihayay pala, samanay kamo a mananam to faelohay katayalan?

Maririn: Itini Kowiyana, mafanaˈay ko Pitil a salikaka to kaolahan niyam a sinael o Isaya 6:8, ano patingwa cangra i, pakatawaay a pasowal: “Maharatengayho ko kaolahan namo a sinael han?” Cipinangayto kami o mamafalicto ko katayalan. Saan ko caˈof niyam: “Itini kami, ocoren kami a malingad!”

 Cowa ka palalinien niyam ko faelohay katayalan to ˈayaway a katayalan, ano haenen i, cato pisalimla to malifokay a lemed nohatini. Talaˈayaway kami mafanaˈ to itiraay a salikaka, malawidang cangraanan.

Ciyke: Iˈayaw, tokel no roma widang nanay materek kami i tihi nangra, pasowal tamiyanan hamaan mafolaw. Kawra tiya miliyas kami to Katelopo i, malengoay no cecay salikaka ko nano sowal ni Yis i Matay 13:38: ‘O omah koniya hekal.’ Mihaenay patalipaˈelalay kami to niyah, soˈlin mafalic ko katayalan, kamayan itini malecaday a ‘omah’ a matayal. Ano icowato a mitosil, sakakaay i, o ikilacay a tamdaw!

Ano tayra i faelohay pala, o maˈaraway niyam lipahakay ko kaˈorip no itiraay a tamdaw, mansa misaˈicelay kami a minanam to kaˈorip itira, o kakaenen nananomen malecaday cangraanan, mitafo to tanektekay a tireng. Roma i, ano milengo kami to faelohay katayalan i, tawlikay ko sasowalen.

Maririn: Mikitini tireng no salikaka adihayay ko mananamay niyam. Maharatengayho ako, tahira aca i Kowiyana i, kinacecayay taˈangayay ko ˈorad, harateng niyam tomerepto ko ˈorad ngaˈ mahadak a mitosil. Kawra o cecay itiraay fafahiyan salikaka sanay: “Tatato malingad” sanay. Fahkaay kako, saan: “Samaan a malingad aki?” Sanay cingra: “Tatiwen ko dinay, citingsiya kita a malingad.” Mihaenay, mafanaˈayto kako mitatiw to dinay a patingsiya. Ano mafokilho, awa ko pakayraan itini kaˈoradan a mitosil.

Maedeng kina 15 a mafolaw kamo, pakayni mafolaw, iraay ko maanan a pakayraan namo?

Maririn: Cowa ko madoloay a mafolaw. Kawra, ano talacowato a malinah, sanengsengen ko kitiraan, mihaen ano minokay sato mitosil i, wa ngaˈay mahokal ko tireng.

Ciyke: Tocerid miliyawan niyam miecad ko lomaˈ. Ano mafanaˈ ko salikaka i fenpo to cowa ko hahalafin kami i cecay pala, pakatawaay a pasowal: “Ciyke akato ka maafad.”

Mafanaˈay ci Maririn a mitafo, maharek cingra miparo to dafong i hako, tilidan ningra i fafekang no hako ko “kainoˈan” “kafotiˈan” “cawka” sanay a tilid. Mihaen, tayra i faelohay lomaˈ, kahenayay patayra to hako i matatodongay a kitiraan. Iraay ko tahapinangan ningra a  tancang, mihapinang to o maamaan a dafong ko ihakoay. Mihaen, madepocay to kami a mikilim to dafong.

Maririn: Songilaˈen niyam misierod ko dafong, ano talacowato a malinah, ngaˈayay tangsol a mirienang to mitosilay a tayal.

Pakayni sapi ‘songilaˈaw milaheci’ to ˈinorong namo, samanay ko pilimasmas namo to toki hani?—2 Timoti 4:5.

Maririn: Picecayan paselaˈay kami, misaday to lalakaw no saˈopo, pitosaan misatapang mitosil to romiˈamiˈad.

Ciyke: Soˈlin masaˈosiay ko tatooren niyam a toki, kawra cowa ko toki ko kaciharatengan niyam, sakakaay kalimlaan i o mitosilay a tayal. Mahadak tahira pinokayan, misarocoday kami masasowal to malitemohay a tamdaw.

Maririn: Tinakoen, ano masadak misalama kami i, miˈorongay to tancang. Latekay, cowa pasowal kami to Misawacayay Tamdaw ni Yihofa kami, kawra iraay ko tamdaw misaali tamiyanan to cudad. Mihaenay misinanotay kami to caˈedong ato waywayan, samanen minengnengay ko tihiay a tamdaw toniya demak.

Ciyke: Misaˈicelay kami malo ngaˈayay a fiyaw, tinakoen, pacafayay kami mipodpod to hadec, mifalah to hadec, miasik to papah no kilang. Maˈaraway no fiyaw koniya demak, sanay pasowal: “Ngaˈay pafelien kako to cecay Fangcalay Cudad han?” Sanay.

Micerid kamo i inaka mitosil, iraay ko mikiriwiˈay a nalifetan han?

Ciyke: Itini i Kowiyana, o roma pala masainakaay, marariday kami mipalak to cecay lipay tatokian tayra i 600 kongli ko raay a pala, hanaca tatiihay ko lalan. Kinacecayay, tayraay kami colicolinan no Yamasin Senayli. Mikiriwiˈay koniya nalifetan, mikalicay kami to tosiya ato tamina, pinaay tatokian ngaˈ tahiraay. O itiraay tamdaw mikorkoray to ekim, sapiakoˈidaw to pipafeli niyam cangranan to cudad, pafeliay cangra to ekim sapakiyaho. Tahinito i dadaya, pasadakan niyam ko ika no likakawa, ˈalomanay ko minengnengay.

Maririn: Matahidangay ci Ciyke tayra i Kamopi, mikimad to Piharatengan to Kapatay ni Yis a Saˈopo. Mikalicay kami to tamina, sepatay ko toki i materteray a ˈalo, tada falihenawayto!

Ciyke: Itini pantaay ko nanom, kilemelay ko ˈalol no nanom, masakatalawanto. Itini katalawan a ˈalo, ngaˈay ko inaneng no palakatay ngaˈngaˈay. Ciepocay koniya piliwko, soˈlin 6 ko salikaka, kawra 50 ko mirienangay toya Saˈopo, mahawpay ko papina Intian a tamdaw.

Maririn: Ano makahi ko kaemangay misaadihay to tayal saki Yihofaan, wa tahatanam to kahemekan no kaˈorip. Itini mahaenay pakayraan, mitadiˈec kita ci Yihofaan, wa maˈaraw ko sapadama ni Yihofa, matongalay ko pakasoˈlin no falocoˈ no niyam.

Pinaay ko kasasiroma no minanaman namo a sowal, na irairaay aca ko hatiniay a inaneng namo han?

Ciyke: Cowa ka hatira. Minanam kami toniya sowal, pakayniay saali no kilac ato kasakopang. Tiya minanam to Siranantangciya a sowal * i, cowaho pinanam kako to piasip to sinael, wa misikayto Mikecolay a picekiw. Licayan ako ko cecay faˈinayan salikaka samanay ko pisikay ako, sanay ko salikaka: “Latekay awaay ko pinang niyam to manan ko sowal iso, kawra tada ngaˈayay ko demak iso!” Taˈangayay ko sadama no wawa takowanan, ano mararaw ko sowal ako, cowa ka pasowal ko matoˈasay to maanan, kawra pasowalay ko wawa takowanan, mikitira cangraanan adihayay ko mananamay ako.

Maririn: Itini cecay pala, tano Frans, Putawya ato Afrika a sowal misikay to pacekiway. Painiay ko cecay fafahiyan salikaka, salakat tano pasangaray a Putawya a sowal ko sapisikay a pacekiw, ikor tano kananaman a sowal misikay pacekiw sanay. Kahenayay mahapinang ako, tada ngaˈayay koniya sapaini.

 Cecay romiˈad, tano Siranantangciya a sowal ko pisikay ako pacekiw, dotoc tano Putawya a sowal ko sapisikay to sakatosa, kalacafayay takowanan a salikaka sanay pasowal: “Maririn, mararaway!” Sanay, hapinang sanayho ako, tano Siranantangciya a sowal ko pisikay ako to somowalay tono Putawya a tamdaw.

O salikaka i kasakopang maolahay tamowanan, samaanay kamo a mala widang cangraanan hani?

Ciyke: Sowal i Taneng 11:25: ‘Hinapaladaˈay a tamdaw, cacihafay malaˈosi noikor.’ Makahiay kami padama to tao. Itini pitomadaw to Hongti Kitakit kasaˈopoan i, pasowalay ko roma salikaka takowanan: “Papidemak hanko kalowa mitosilay” sanay. Hananay ako pacaˈof: “O mitosilay kako, ano iraay ko saali, mamihadak kako to ˈicel.” Marariday kako patalipaˈelal to niyah, soˈlin misaaliay kami to toki midemak to niyah a demak, kawra hamaan sawad saan a mihadak to sapadama.

Maririn: Misaˈicelay kami ciharateng to kahacecay a salikaka, ano misaaliay cangra to papadamaen midipot to wawa anca micada nai picudadan, misalofan niyam ko toki no niyah, misarocod a padama cangraanan. Ano ira ko saali no salikaka i, makahiay kami a padama, mansa malo ngaˈayay a widang nangra.

Tayra kamo i misaaliay a kilac matayal, malifokay ko maanan a sapalemed?

Ciyke: Miemin to toki misakafah adihayay ko kahemkan no kaˈorip niyam. Marariday minengneng to serayan, masemer to misangaˈan ni Yihofa a maamaan. Soˈlin adihayay ko pasangaray, kawra pakasoˈlinay kami, ano icowato a pala kami, milifokay to sapadama no salikaka, mihaenay cowa ka pakidem ko cariraw niyam.

Kaemangho kako i, pakayni kaeca ka lasofitay mapalitay i Kowiyana. Caay ka harateng ako, ngaˈay malo milakowitay to riyar a mitosilay patikol a tayni, milifokayho to pihayda no mikowanay tayra i kapalitan a mitosil. Tada adihayayto ko sapalemed ni Yihofa takowanan.

Maririn: Padama to tao palipahakay takowanan. Matayal saki Yihofaan, tada rahekerayto, matongalay ko kangaˈay no raramod niyam. Tinakoen, latekay milicayay ci Ciyke takowanan, ngaˈay tahidangen ita ko o pakalaloken a mararamoday tayni i lomaˈ, tangsolay pacaˈof kako: Mahaenay ko harateng ako!” mahecaday ko maharatengay no falocoˈ niyam!

Ciyke: Caka halafin, makinsaay to iraay ko ekang ako. Soˈlin cowa kaolah ci Maririn mitengil to mahaenay a sowal, pasowalan ako cingra: “Kanonoˈan ako, ano awato kako ano cira, soˈlin cowa ka koˈedaw ko ˈorip, kawra marenecay kako, samanen patafangan ako ko ˈorip ci Yihofaan, tada ciepocay ko nokaˈorip.”—Satapangan 25:8.

Maririn: Adihayay ko sapafeli ni Yihofa a kafahekaan tamiyanan, malifokay niyam ko cowa ka harateng a katayalan ato sapalemed. Mitadiˈecay kami ci Yihofaan, ano misaali ko likakawa Ningra tamiyanan tatalacowa i, o mamalingad kami a tayra!