1. Mikitini i Patnakay 3:7 milengoay to maanan hani?

O ROMA salikaka kalicaciyaway, o roma maomoyay. O lalangian a sinael noniya lalakaw milengoay, latekay oha cacaciyaw, latekay o tatomerep. (ˈOsien ko Patnakay 3:7.) Kawra mitokelay kita to roma salikaka adihayen ko sowal, anca mitokel to roma tamdaw hamaan misacaciyaw.

2. Cima ko papadama kitaanan cipinang to sasamaan misaka dademak to saka caciyaw a inaneng hani?

² O saka caciyaw a inaneng o sapatelong ni Yihofa. (Kasadakan 4:10, 11; Paˈarawan 4:11) Pakaynian ni Yihofa i Fangcalay Cudad a pacipinang kitaanan, oha sasamaan a misaka dademak toniya inaneng. Oniya lalakaw wa tano tinakoan i Fangcalay Cudad a tamdaw, padama kitaanan cipinang to hahacowa caciyaw, hahacowa a tomerep, ato samanay ko harateng ni Yihofa to mihadakan ita a sowal. Salakat nengnengen ita, hahacowa tatokian a caciyaw.

3. Pakayni i Loma 10:14, hahacowa a tatokian kita a caciyaw hani?

³ Oha mamicerid kita a misaday, pasowal to tamdaw to pakayniay i Hongti Kitakit ni Yihofa a kimad. (Matay 24:14; ˈosien ko Loma 10:14.) Mihaen ko demak ita o mitodongay to taˈarawan ni Yis. O sakakaay a araaw ni Yis tayni i fafekang no sera i, o papasowal to tamdaw to pakayniay kakarayan Wama a kimad. (Yohani 18:37) Kawraan, o haharatengen ita, kalimlaan ko sasamaan a pasowal. Ano pasowal kita to tamdaw to pakayniay sifanaˈ ni Yihofa i, o ‘dadamsay ko waywayan’ no  mita, ‘tangongol ko pikangodo’ to tao, ciharateng to nafalocoˈan no tao, mikangodo to pihakelongan nangra. (1 Pitiro 3:15) Mihaen, o mamalaˈosi ko araaw a pasifanaˈ, ngaˈayho mitemer to falocoˈ no tao.

4. Pakayni i Taneng 9:9, o sapirikec wa ira ko maanan a epoc to tamdaw hani?

⁴ Ano maˈaraw no malohemay malitengay ko misaaliay to rarikecen a salikaka i, aka cisasa ko harateng. Sakaecaaw a mangodo ko tao i, wa itini matatodongay a tatokian a mihadak ko malohemay malitengay to limoˈot, cowa ko aitini ˈaˈayaw no ˈalomanay a mihaen to demak. O haharatengen no malohemay malitengay ko kasenengan no tao, kawra sapadamaaw to salikaka mitoor to safalod no Fangcalay Cudad a dademak, o tatangsol a mihadak to sapirikec ko malohemay malitegay. (ˈOsien ko Taneng 9:9.) Itini kacaciyawan a tatokian timolo kita a mihadak to sowal hano kalimlaan hani? Dotoc wa milengo kita to tosa tinakoan: O cecay wama o mamisalof to wawa. O cecay fafahiyan wa palimoˈot to mamalahongti a tamdaw no ikor.

5. O taˈangayay a saysi ci Ili, na sasamaan ko hademak ngaˈngaˈay hani?

⁵ O taˈangayay a saysi ci Ili maolahay to tatosaay faˈinayan wawa, kawra oniya tatosaay wawa cowa pikangodo ci Yihofaan. Itini fangcalay pakopangan a mala saysi cangra, patelasay misaka dademak to fadangalan, cowa pikangodo to patafangan no finawlan ci Yihofaan a sapatoˈaya, maˈaˈodangayho to fafahiyan. (1 Samuil 2:12-17, 22) Tooren ko Rikec ni Mosi, o papatayen koniya tatosa a wawa ni Ili, kawra o pirikec aca ni Ili cangranan, padadotocayho itini fangcalay pakopangan a matayal. (Limoˈot 21:18-21) Samanay ko harateng ni Yihofa to pisaysay ni Ili to demak hani? Sanay ko sowal Ningra ci Ilian: ‘O pikangodo iso to wawa hano ikakaay to pikangodo Takowanan hani?’ Orato, mipatayan ni Yihofa koya tatosaay wawa ni Ili.—1 Samuil 2:29, 34.

6. Mikitini ci Ilian mananamay ita ko maanan a sapasifanaˈ hani?

⁶ Mikitni ci Ilian mananamay ita ko sapasifanaˈ. Ano mafanaˈay kita to widang ato salawina misafelitay to sarikec no Kawas i, ka timolo a mirikec cingranan mitoor to palinian ni Yihofa, pasowalho cingraanan to tayra i malohemay malitengay a micangacang to sadama. (Yakop 5:14) Cowa kaolah kita mahecad ci Ilian, pikangodo to salawina ikaka to pikangodo ci Yihofaan. Ano misalof to tao misaaliay  to timolo, kawra ano mihaen i, wa ira ko adihayay a haepoc. Dotoc maminengneng kita to makapahay a taˈarawan ni Apikail [Yapikay], o demak ningra cowa kalecad ci Ilian.

7. Ci Apikail hano miˈaraw ci Tafitian hani?

⁷ O fafahi ni Napal ci Apikail. Ci Tafiti ato mitooray cingraanan a tamdaw sapiliyasaw to pipatay ni Sawlo i, na kalacafayay cangra to pakaenay a tamdaw ni Napal, midipot to siri nangra ho caka maˈafas. Kawra miakoˈiday ci Napal cangranan han? Cowa. Tiya ocoren ni Tafiti ko tamdaw tayra ci Napalan a misaali to kakaenen i, tada maketeray ci Napal a mapoˈi cangranan. (1 Samuil 25:5-8, 10-12, 14) Orato, misaˈosiay ci Tafiti mipatay to faˈinayan i lomaˈ ni Napal. (1 Samuil 25:13, 22) Pakayni sapidipotaw to paro no lomaˈ, harateng ni Apikail o kacaciyawanto ningra a tatokian nohatini. Soˈlin cifonosay ci Tafiti ato 400 a sikawdan, macahiway a maketer, kamayan ci Apikail timolo a miˈaraw cangraanan.

8. Mikitini i taˈarawan ni Apikail mananamay ita ko maanan?

⁸ Miˈaraw ci Apikail ci Tafitian i, mangodoay ko waywayan ningra a timolo caciyaw, matatodongay ko mihadakan a sowal. Soˈlin cowa ka raraw ci Apikail, kamayan miliˈay cingra ci Tafitian. O moecelay a tamdaw ci Tafiti sanay ko sowal ningra, o mamidemak to matatodongay a demak, pakasoˈlinayho cingra to papadamaen ni Yihofa cingra. (1 Samuil 25:24, 26, 28, 33, 34) O nanamen ita ko taˈarawan ni Apikail, ano maˈaraw ko tao mamararaw ko demak, timolo a mihadak to limoˈot. (ˈOlic 141:5) Ira ko mikangodoay ato sidaˈitay a waywayan ita, timolo a mihadak to limoˈot i tamdaw, paihkalay to soˈlinay a widang kita.—Taneng 27:17.

9-10. Ano mihadak to limoˈot ko malohemay malitengay i, mamisinanot to maanan?

⁹ Misaaliay ko malohemay malitengay to timolo,  pasayra i mararaway a salikaka mihadak to limoˈot. (Kalatiya 6:1) Soˈlin cowa ko malefotay ko malohemay malitengay, misaaliay to sapatalipaˈelal no tao to latekay, kawra oha tatimolo a mirikec to misaaliay to limoˈot a tamdaw. (2 Timoti 4:2; Titus 1:9) Sakadademaken no malohemay malitengay ko saka caciyaw a inaneng, mihadidi damsay a padama to tao. Mihaen ko demak nangra pakayniay kaolah to salikaka. (Taneng 13:24) Kawra sakakaay kaciharatengan nangra o papaˈdil ci Yihofaan, mansa mamiˈading cangra to palinian no Kawas, hoeca ka madokaˈ ko kasakopang.—Dmak 20:28.

¹⁰ Pakayni hahacowa a caciyaw, adihayay ko mananamay ita. Kawra, latekay oha tatomerep kita. Cowa ko madoloay mihaen to demak, dotoc nengnengen ita ko pina pakayraan.

11. O maanan ko sapatinako ni Yakop a mitadtad to kalimlaan ko miˈimeray to sasowalen? Hano matatodongay koniya sapatinako hani?

¹¹ Latekay miˈimer to sasowalen ita cowa ko madoloay. Matatodongay ko sapatinako ni Yakop a mitadtad tonini. Sanay cingra: ‘O cima cowa ka raraw i sasowalen, o malefotay cingra, wa ngaˈay miˈimer to tireng. Ano mamionting to efa, paketingen i ngoyos nira ko manis, ngaˈayto a mionting to tireng nira.’ (Yakop 3:2, 3) O lalosidan ko manis, mikalicay to efa a tamdaw misolot to sasoˈot no manis, ngaˈayay mionting to tatalacowa ko rakat no efa, ngaˈayho paterep to efa. Ano caka songilaˈen no mikalicay to efa a tamdaw misolot ko sasoˈot, cowato ko mamaˈimer ko efa, ano mihaen o mamadokaˈ ko tamdaw ato efa. Malecaday, ano caka ˈimeren ita ko sasowalen no niyah, wa taˈangay ko dokaˈ. Dotoc wa milengo, itini masamaanay a pakayraan oha  ‘songilaˈen a misolot ko sasoˈot,’ mitafo to tomerepay.

12. Hahacowa kita a ‘songilaˈen a misolot ko sasoˈot’, mitafo to tomerepay hani?

¹² Ano mafanaˈay ko tamdaw to hahimeden a demak, macacawmaˈ kita cangraanan i, wa misinanot to maanan hani? Tinakoen, ano maˈaraw iso ko mikitiniay makecengay ko tayal a kilac a salikaka, oha lalicayen iso cangra to pakayniay mitosilay a demak han? Mihaen ko demak iso, maedeng ngaˈayay ko harateng. Maolah kita to salikaka, ciharatengay to samaanay ko kaˈorip nangra, ho ngaˈay matatodong ko pipatado cangraanan a mitolon. Kawra o ‘songilaˈen a misolot ko sasoˈot,’ mitafo to tomerepay. Ano pacieci han ita cangra mifanaˈ to mahimeday a demak, o awaay ko olah, cowa pisikol toya mitokelay cangranan mihimed to demak a salikaka. Cowa ko caciharateng kita mitongal to ˈinorong no salikaka. Roma i, itiniay i makecengay a kilac a salikaka, cowa ko papasowal to samaanay ko mitosilay ato roma a demak.

13. Pakayni i Taneng 11:13, sasamaan ko hademak no malohemay malitengay? Misamanay?

¹³ Mangalefay ko malohemay malitengay mamidofdof to limoˈot no Taneng 11:13 mitafo to mahimeday. (ˈOsien.) Sapihaenaw ko malohemay malitengay cowa ko madoloay, mikiriwiˈay o ciraramodayto a malohemay malitengay. Sakangaˈayaw no kalalaˈed no ramod, wa micerid masasowal ko mararamoday, makamihadak to harateng, nafalocoˈan ato cariraw. Kawra mafanaˈay ko malohemay malitengay cowa ka ngaˈay koniyah ‘pasadak to mahimeday,’ mifanaˈ to fafahi tono tekedan a demak no salikaka, hoeca ka lahedaw ko pakasoˈlin no tao cangraanan, wa mipalakho to ngangan noniyah. O ciˈinorongay i kasakopang a salikaka, cowa ka ngaˈay ‘tosa ko sema’ anca somowal to misaˈfitay a sowal. (1 Timoti 3:8 ato roma pihongyak.) Mihaenay, mamiˈimer cangra to sasowalen, eca ka piyakayak to sowal. Ano maolahay cingra to fafahi, aka pasowalen to cowa ko hakafanaˈan nangra a demak, mitongal to ˈinorong no fafahi.

14. O fafahi no malohemay malitengay sasamaan a miˈading to ngangan no faˈinay?

¹⁴ Eca ka pacieci ko fafahi to faˈinay a misadak to mahimeday a demak, wa maˈading ko ngangan no faˈinay. Mihaen ko demak no fafahi, cowako pidama aca to faˈinay, mikangodoay toya pakasoˈlinay to faˈinay a tamdaw. Sakakaay i, wa pakahemek ci Yihofaan, pakayni pisaˈicel no fafahi wa macowat ko rihaday ato kakelec no kasakopang.—Loma 14:19.

15. Samaanay ko harateng ni Yihofa to tatoloay a widang ni Yopu hani? Misamanay?

¹⁵ Pakayni i sasamaan a caciyaw ato hahacowa a caciyaw, mikitini i Yopu wa adihay ko mamananam ita. Dadotoc sanay ko macadaay ni Yopu a pades, iraay ko sasepat a tamdaw mihinomay cingraanan, palimoˈot cingraanan, kawra halafinay cangra a tomerep. O tatoloay tamdaw ci Ilifa, Piltat aci Cofar, o katomerep nangra cowa ko misimsimay to sasamaan a padama ci Yopuan, samanen ikorto mikitini pilikaf nangra ci Yopuan a mahapinang, o miharatengan nangra o sasamaan misawacay to mararaway ko demak ni Yopu. Matatodongay ko miming a sowal nangra, kawra pakayni ci Yihofaan aci Yopuan, adihayay ko cowa ka tatodong ato cowa ka sidaˈit a sowal nangra. (Yopu 32:1-3) Samanay ko harateng ni Yihofa tora sowal nangra hani? Maketeray Cingra, mafolaay cangra sanay, papitahidang ci Yopuan a patado cangraanan a mitolon.—Yopu 42:7-9.

16. Ngaˈay kita mikitini ci Ilifa, Piltat aci Cofaran mamananam to maanan a sapasifanaˈ hani?

 ¹⁶ Mikitini kita ci Ilifa, Piltat aci Cofaran mamananam ko maanan sapasifanaˈ hani? Saka 1, cowa kangaˈay kita patelas milikaf to salikaka. (Matay 7:1-5) ˈAyaw no papalimoˈot kita to salikaka i, o mamisongilaˈ a mitengil to sowal nangra, mihaen ngaˈ cipinang to pakayraan nangra. (1 Pitiro 3:8) Saka 2, pairaen ko sidaˈitay a sowal ita, paihkal to soˈlinay a pakayraan. (Ifiso 4:25) Saka 3, ciharatengay ci Yihofa to o maanan ko sowal ita to tao.

17. Mikitini taˈarawan ni Ilihu mamananam ita ko maanan?

¹⁷ O saka sepat miˈaraway ci Yopuan a tamdaw ci Ilihu, o salawina ni Apraham cingra. Tiya masasowal ci Yopu atoya tatoloay tamdaw i, tengil sanay cingra itihi. Misongilaˈay ci Ilihu a mitengil, mansa sidaˈit ato ihkal ko mihadakan a limoˈot, padama ci Yopuan a misalof to harateng. (Yopu 33:1, 6, 17) O kaciharatengan ni Ilihu i mikangodo ci Yihofaan, eca ko niyah ato roma tamdaw. (Yopu 32:21, 22; 37:23, 24) O taˈarawan ningra mananamay ita, latekay o tatomerep kita, misongilaˈ mitengil to sowal no tao. (Yakop 1:19) Mananamayho ita, ano palimoˈot to tamdaw i, paˈdil ci Yihofaan o sakakaay kalimlaan.

18. Sasamaan ko hademak ita o misalimlaay to inaneng a caciyaw hani?

¹⁸ Dofdofen ita ko limoˈot no Fangcalay Cudad, itini matatodongay tatokian a somowal to matatodongay a sowal, o paihkalay to misalimlaay to inaneng a caciyaw. Citanengay a hongti ci Solomon sanay: ‘O cecay sowal itini matatodongay tatokian a somowal, malecaday o ekim a lingko mitelian i linkim a piyal.’ (Taneng 25:11) ˈAyaw no papasowal kita to tamdaw, misinanot mitengil ato misongilaˈ a misimsim, o mihadakan a sowal malecad o ekim a lingko a makapah ira ko epoc. Mihaenay, ano hakowato ko sowal, wa ngaˈay pakalalok to tao ko sowal ita, wa ngaˈayho pakahemek ci Yihofaan. (Taneng 23:15; Ifiso 4:29) Mihaen ko demak ita, o miakoˈiday to pafeliay to saka inaneng ita a caciyaw a Kawas!