1. ˈAyaw no papatireng ko cecay tamdaw to lomaˈ, sasamaan ko demak hani?

HARATENGEN hena, papatireng ko cecay tamdaw to lomaˈ, mafanaˈay cingra to papatireng to masamaanay a lomaˈ. Wa tangsol cingra micakay to cayliyaw, misatapang a matayal hokira? Cowa ka hatira. ˈAyaw no patireng, wa midemakho cingra to cecay kalimlaan a demak, misaˈosi to mamapalak a payci. Ano salakat cingra misongilaˈ misaˈosi to hakowa ko payci, o mamalaˈosi a patireng.

2. Pakayni Luka 14:27-30, ˈayaw no micada kiso to paputisem songilaˈen a miharateng ko maanan hani?

² Maolahay ato miakoˈiday kiso ci Yihofaan, mansa sapicadaaw to paputisem han? Ano mahaenay i, malecaday toya papatireng to lomaˈ a tamdaw. Misamanay hani? Nengnengen ko Luka 14:27-30. (ˈOsien.) Sowal ni Yis, malo nisawawaan ningra o mamakahi kita mihadidi to sapalifet ato kinafalah. (Luka 9:23-26; 12:51-53) Mihaenay ˈayaw no micada to paputisem, songilaˈen a miharateng koniya demak. Mihaen ikor no micada kiso to paputisem, wa padadotoc a madimadi ci Yihofaan.

3. Oniya lalakaw mamilengo to maanan hani?

³ Micada to paputisem malo Krisciyang soˈlinay ira ko epoc han? Iraay ko epoc! Ikor no micada kiso to paputisem, adihay ko mamalifok a sapalemed anini ato noikoran. Dotoc wa milengo kita to milingatay to micada to paputisem kalimlaan a salicay, o papadama tisowanan miharateng: “Maharekayto kako a misaday micada to paputisem han?”

4. (1) Patafang to tireng o maanan ko tatodong? (2) O sowal no Matay 16:24 ‘mihaiyay cowato kono niyah kiso’, o maanan ko tatodong hani?

⁴ Patafang to tireng o maanan ko tatodong? ˈAyaw no micada to paputisem patafangho kiso to tireng. Tatodong nonini mikifalocoˈ kiso a mitolon to Kawas, pasowal Cingraanan tatahadaˈoc kiso a midoko Cingraanan. Patafang kiso to tireng, ‘mihaiyay cowato kono niyah kiso.’ (ˈOsien ko Matay 16:24.) Itiya misatapang oni Yihofato kiso, tada kalikoan konini. (Loma 14:8) Patafang kiso to tireng malecaday mikiˈokay ci Yihofaan, wa misamacay kiso matayal saki Cingraanan, ecato pakahemek to niyah. O patafangay to tireng o kalimlaan a noka piketon, cowa ko papacieci ci Yihofa tisowanan mihaen ko demak. Kawra, ano maharek kiso miketon, misaaliay Cingra tisowanan midofdof to mikiˈokan.—ˈOlic 116:12, 14.

5. Patafang to tireng ato micada to paputisem o maanan ko kasasiromaan hani?

⁵ Patafang to tireng ato micada to paputisem iraay ko maanan kalaliting hani? Patafang to tireng ono tekedan a piketon, dengan kiso aci Yihofa ko mafanaˈay. Kawra o micadaay to paputisem o pakapapotalay, tocerid itiniay pitaykayan a misikay. Micada kiso to paputisem paihkalay i tamdaw, maharekayto kiso a patafang to tireng ci Yihofaan.  *Micada to paputisem mifanaˈay to tao, misarocod to falocoˈ, to harateng, to ˈicel, tano polong a ˈorip iso a maolah ci Yihofaan, misetek to falocoˈ tahadaˈoc midoko Cingraanan.—Marko 12:30.

6-7. Pakayni 1 Pitiro 3:18-22, iraay ko maanan tosa lalangian mitadtad to kalimlaan ko picada to paputisem hani?

⁶ Kalimlaan ko picada to paputisem han? Nengnengen ko 1 Pitiro 3:18-22. (ˈOsien.) Malecad o tamina mahapinangay no tamdaw ko pitadiˈec ni Nowa to Kawas, o paputisem wa ngaˈay mahapinang no tamdaw to maharekayto kiso patafang to tireng ci Yihofaan. Mitadtaday ci Pitiro to hano kalimlaan ko picada to paputisem. Saka 1, o paputisem ngaˈayay ‘milidong’ kitaanan. Ano pakasoˈlinay kita ci Yisan, pakasoˈlin to kinafalah ningra to ˈorip pakayni kitaanan, ikor patikol maˈorip tayra i kakarayan, ‘itini kawanan no Kawas,’ o ngangaˈayto milidong ko paputisem kitaanan.

⁷ Saka 2, o paputisem papadama kitaanan milifok to ‘makoracay a makapahay falocoˈ’. Maharek kita patafang to tireng micada to paputisem i, mikiriwiˈayto ko kalalaˈed ci Yihofaan. Mikifalocoˈ kita a pasasiyor, pakasoˈlinayho to sapatefoc, mansa sododen no Kawas ko raraw ita, padama kitaanan makorac ko makapahay falocoˈ a midoko Cingraanan.

8. Misetek kiso to falocoˈ micada to paputisem, o maanan ko sakakaay a lalangian hani?

⁸ Misetek kiso to falocoˈ micada to paputisem, o maanan ko lalangian hani? Misongilaˈ kiso minanam to Fangcalay Cudad, palidlid saan mafanaˈ to capeling ato pinangan ni Yihofa. Oniya sifanaˈ mitemeray to falocoˈ iso, tangongol ko olah ci Yihofaan. Mihaenay, misetek ko falocoˈ iso micada to paputisem sakakaay lalangian i, o kaolah ci Yihofaan.

9. Sowal no Matay 28:19, 20 ‘pakayni i ngangan no Wama, wawa, fangcalay saocor’ a micada to paputisem. O maanan ko tatodong noniya sowal hani?

⁹ Misetek kiso to falocoˈ micada to paputisem o roma lalangian i, pakasoˈlinay to mananamay a Kimad no Fangcalay Cudad. Palimoˈotan ni Yis ko nisawawaan ningra padama to tao malo Krisciyang. (ˈOsien ko Matay 28:19, 20.) Sowal ni Yis, o tamdaw ‘pakayni i ngangan no Wama, wawa, fangcalay saocor’ a micada to paputisem. Tatodong ningra i, wa  pakasoˈlin cingra to pakayniay ci Yihofaan, ci Yisan ato fangcalay saocor a kimad. Oniya kimad tada ciˈicelay, ngaˈay mitemer to falocoˈ iso. (Hipray 4:12) Nohatini tikolen ita miharateng koniya soˈlinay kimad.

10-11. Mananamay ato pakasoˈlinay kiso to maanan pakayniay i kakarayan Wama a soˈlinay kimad hani?

¹⁰ Pakayni i kakarayanay Wama, mikitini i Fangcalay Cudad mananamay iso ko maanan? O “ngangan Ningra ci Yihofa,” o ‘tadamaanay a Tatapangan, mikowanay to kihcod,’ edengan Cingra ko Kawas. (ˈOlic 83:18; Isaya 37:16) O misangaˈay a Tatapangan Cingra, edengan Cingra ko mamilidong kitaanan. (ˈOlic 3:8; 36:9) Milimasmasay Cingra, mamilidong kitaanan paliyas to raraw ato patay, ngaˈay a tahadaˈoc ko ˈorip ita. (Yohani 17:3) Ikor no patafang to tireng micada to paputisem kiso, malo Misawacayay Tamdaw ni Yihofa. (Isaya 43:10-12) Tada kalikoan iso malo laenoay no ngangan no Kawas a tamdaw, malacafay to polong no hekal a salikaka mitenak to fangcalay ngangan no Kawas.—ˈOlic 86:12.

¹¹ Ngaˈay cipinang to kimad no kakarayan Wama, tada miakoˈiday kita! Pakasoˈlinay kiso toniya kalimlaan a kimad, wa makalim a patafang to tireng micada to paputisem.

12-13. Mananamay ato pakasoˈlinay kiso to maanan pakayni i ci Yisan a soˈlinay kimad hani?

¹² Pakayni ci Yisan, mikitini i Fangcalay Cudad mananamay iso ko maanan hani? O saaroˈan ni Yis midotocay ci Yihofaan. Makahiay cingra kinafalah to ˈorip malo sapatefoc, tano waywayan kita a paihkal to pakasoˈlinay to sapatefoc, wa masodod ko raraw, ngaˈay mala widang no Kawas kita, milifok to midaˈocay a ˈorip. (Yohani 3:16) O taˈangayay saysi no mita ci Yis, padamaay kitaanan pakayni i sapatefoc milifok to epoc, ngaˈay ko kalalaˈed aci Yihofaan. (Hipray 4:15; 7:24, 25) O hongti no Hongti Kitakit ci Yis, wa paˈodingar cingra to fangcalay ngangan ni Yihofa, papalahdaw to kihcod tatiihay a tamdaw ato demak, ngaˈay kita itini i Lakoing tahadaˈoc lipahak a maˈorip. (Matay 6:9, 10; Paˈarawan 11:15) O makapahay a taˈarawan cingra. (1 Pitiro 2:21) Misarocoday cingra midemak to araaw ni Yihofa, patirengay to ngaˈayay a taˈarawan no mita.—Yohani 4:34.

¹³ Pakasoˈlin kiso to pakayniay ci Yisan a kimad i Fangcalay Cudad, wa matongal ko olah ci Yisan, ciharateng malecad cingranan misarocod a midemak to araaw no Kawas, wa micoloh konini tisowanan patafang to tireng micada to paputisem.

14-15. Mananamay ato pakasoˈlinay kiso to maanan pakayni i fangcalay saocor a kimad hani?

¹⁴ Pakayni fangcalay saocor, mikitini i Fangcalay Cudad mananamay iso ko maanan hani? O fangcalay saocor cowa ko ˈadingoan a tireng, ao mihadakan no Kawas a ˈicel. Misakadademakan ni Yihofa ko fangcalay saocor mikayat to tamdaw mitilid to Fangcalay Cudad, padamaayho kitaanan cipinang to Fangcalay Cudad ato misakadademak to minanaman. (Yohani 14:26; 2 Pitiro 1:21) Pakayni i fangcalay saocor, padamaay ci Yihofa kitaanan ira ko ‘kasapaan a ˈicel.’ (2 Korinto 4:7) Mihaenay, wa ngaˈayto kita mitenak to ngaˈayay a lihaf, miconged to sakayhid, miremo to sapalifet ato matoleday a harateng, palahad to ‘minaroˈan no fangcalay saocor.’ (Kalatiya 5:22) Ano tadiˈecen ita ko Kawas, naifalocoˈ a micangacang Cingraanan, wa makahi Cingra pafeli to fangcalay saocor kitaanan.—Luka 11:13.

¹⁵ Mafanaˈ to papafeli ci Yihofa to fangcalay saocor kitaanan, padama kitanan midoko Cingranan, o paparihaday to falocoˈ ita! Pakasoˈlin kiso to pakayniay i fangcalay saocor a  kimad, wa mitemer ko falocoˈ, makalim a patafang to tireng micada to paputisem.

16. Pakayni i patafang to tireng micada to paputisem, maharekayto kita misimsim to maanan a demak hani?

¹⁶ Misetek to falocoˈ a patafang to tireng micada to paputisem o kalimlaan a demak. Malengoayto ita, o mamakahi kiso mihadidi to roray ato kinafalah, kawra o malifokay iso a sapalemed ikakaay to mihadakan iso. O paputisem cowako pilidong aca tisowanan, wa ngaˈayho paira to makoracay a makapahay falocoˈ iso. Misaˈosi kiso micada to paputisem, sakakaay lalangian i, o kaolah ci Yihofaan. Oha marocek ko pakasoˈlin iso to pakayniay ci Yihofaan, ci Yisan ato fangcalay saocor a kimad. Maharek misimsim toniya demak i, ngaˈayho miharateng kiso: “Maharekayto kako misaday micada to paputisem han?”

17. ˈAyaw no micada to paputisem midemakho to maanan kalimlaan a demak hani?

¹⁷ Ano maharekayto kiso misaday micada to paputisem, maedeng maharekayto midemak to kalimlaan a demak, palahad to ngaˈayay a kalalaˈed aci Yihofaan. * Micerid kiso minanam to Fangcalay Cudad, matongal ko kafanaˈ ci Yihofaan aci Yisan, palahad to tanoktokay a pakasoˈlinay falocoˈ. (Hipray 11:6) Pakasoˈlinay kiso to sakiˈok ni Yihofa i Fangcalay Cudad, pakasoˈlinay kiso to sapatefoc ni Yis, wa ngaˈay miliyas to raraw ato patay. Nafalocoˈan kiso a pasasiyor, tangongol ko kakesem to raraw no niyah, micangacang to sasodod no Kawas. Maharekayto kiso “patatikol”, mifalah to ˈayaway mararaway a waywayan, hanaca mitoor to mihaydaan ni Yihofa a pakayraan maˈorip. (Dmak 3:19) Makalimay kiso paladaˈ to tao to soˈlinay a kimad, malo caho picada to paputisem a mitosilay, malacafay to kasakopang a mitosil. (Matay 24:14) Midemak kiso toniya kalimlaan a demak, wa patado ci Yihofa tisowanan a mahemek ato maliko.—Taneng 27:11.

18. ˈAyaw no micada to paputisem midemakho kiso to maanan a demak hani?

¹⁸ ˈAyaw no micada to paputisem, wa midemakho kiso to pina demak. Malecad o masowalay i fafekang, papatafang to tireng kiso i Kawas. Itini notekedan kiso a mikifalocoˈ a mitolon Cingraanan, miketon to mamisongilaˈ misakadademak to ˈorip, midemak to araaw Ningra. (1 Pitiro 4:2) Ikor pasowalen ko misatenokay no malohemay malitengay to mamicada kiso to paputisem, wa milimasmas cingra tisowanan masasoˈaraw to roma malohemay malitengay. Mafanaˈayto ko malohemay malitengay tisowanan, ciharatengay tisowanan, cowa ko cacalemcem kiso. O mamilomal cangra tisowanan to mananamay a kimad no Fangcalay Cudad, mihapinang to cipinangay kiso toniya taˈeneran a kimad, cipinang  to tatodong no patafangay to tireng ato micada to paputisem. Ano iraay ko tatodong iso saan cangra i, wa mifanaˈ tisowanan micada to paputisem i ikor a taykay.

19-20. Ikor no micada to paputisem kiso i, misamaanho ko hademak hani?

¹⁹ Ikor no micada to paputisem, midemakho kiso to maanan a demak hani? * Maharatengayho han? Patafang to tireng o kalimlaan a piketon, tokel ni Yihofa misarocod midofdof to miketonan iso. Mansa ikor no micada to paputisem, o pakayraan iso a maˈorip pahecad to miketonan iso a patafang to tireng. Sasamaan ko hademak iso hani?

²⁰ Ka picerid micawmaˈ to salikaka no kasakopang. Ikor no micada to paputisem, malo ‘kasacefang no salikaka’ kiso. (1 Pitiro 2:17) O salikaka malecaday o paro no lomaˈ iso, micerid kiso mirienang to saˈopo, wa ngaˈay patanektek to kalalaˈed cangraanan. To romiˈamiˈad micekiw ato midotim to sowal no Fangcalay Cudad. (ˈOlic 1:1, 2) Maharek miˈosi ko sinael, palaken ko toki a midotim, mihaen o mamatemer ko falocoˈ iso. Ka ‘padadotoc a mitolon,’ mihaen o mamatongal ko piingid iso ci Yihofaan. (Matay 26:41) Ka ‘padadotoc i salakat micangacang to Hongti Kitakit,’ malo sakakaay ko mitosilay demak i nokaˈorip iso. (Matay 6:33) Micerid mirienang to mitosilay tayal, tanektekto ko pakasoˈlinay falocoˈ iso, ira ko toki a padama to tao romakat to saka tahadaˈoc no ˈorip a lalan.—1 Timoti 4:16.

21. Ikor no micada to paputisem, mamilifok to maanan a sapalemed?

²¹ Patafang to tireng micada to paputisem o kalimlaan a saˈosi iso i nokaˈorip. Manaokaniw, wa tahacada kiso to sapalifet, ato kinafalah. Iraay ko epoc mihaen han? Iraay ko epoc! O masiˈayaway iso nohatini masakenaay a pasangaray, o ‘cecayay liyad o kahmaway.’ (2 Korinto 4:17) Ikor no micada to paputisem, wa matongal ko lipahak iso, noikor wa milifok to ‘soˈlinay a ˈorip.’ (1 Timoti 6:19) Mihaenay, nanay tolonen iso ko Kawas, songilaˈen a misimsim koniya salicay: “Maharekayto kako misaday micada to paputisem han?”