1. O maanan ko sapalimoˈot ni Yis to nisawawaan hani? (Nengnengen ko papotalay coka.)

ˈAYAW no kinafalah ci Yis a dadaya, palimoˈotay to nisawawaan. Sanay cingra: ‘Samanay kako maolah tamowanan, mihaen kamo a masasiolah.’ Dotoc sanay cingra: ‘Ano masasiolah kamo, wa mafanaˈ ko polong a tamdaw to nisawawaan ako kamo.’—Yohani 13:34, 35.

2. O masasiolahay hano masakalimlaan hani?

² Sowal ni Yis, ano ira ko malecaday o ningra a ciolahay falocoˈ no nisawawaan ningra, wa mahapinang no tao to soˈlinay a Krisciyang cangra. Malecaday o saka 1 hahekalan anini. Mihaenay, soˈlin tahasiˈayaw kita to pasangaray, wa padadotoc a masasiolah, kalimlaan mihaen to demak!

3. Oniya lalakaw wa milengo to maanan?

³ Cowa ko malefotay ko tamdaw, mikifalocoˈ masasiolah cowa ko madoloay, kawra kakamayan misaˈicel kita a malecad ci Yisan a paihkal to olah. Oniya lalakaw wa milengo, sasamaan kita tano olah a micowat to rihadayay, eca pisakakinih to tamdaw, ato paihkal to hinapaladaˈay hinalafangay a harateng. Ano micekiw kiso toniya lalakaw i, haratengen, “O masowalay no lalakaw a salikaka soˈlin misiˈayaw to pasangaray, padadotocayho a maolah to tao, wa samaan kita a minanam cangraanan hani?”

4. Pakayni Matay 5:23, 24, ano iraira ko katatiihan no salikaka kitaanan, hano tatalaˈayaw kita micowat to rihaday hani?

⁴ Sowal ni Yis, ano iraira ko katatiihan no salikaka kitaanan,  talaˈayaw kita a micowat to rihaday tada kalimlaan. (ˈOsien ko Matay 5:23, 24.) O misowalan ningra i, ano sapakahemekaw kita to Kawas, o rarihaday to tao. Ano maˈaraw ko pisaˈicel ita mararihaday to salikaka, wa mahemek ci Yihofa. Kawra ano padadotoc a maketer kita, caka malakangaˈay to salikaka, cowa ko mamicada ci Yihofa to pidoko no mita.—1 Yohani 4:20.

5. Saka rihadayaw ci Make to salikaka, kawra tahalifaay to maanan pasangaray hani?

⁵ Micowat to rihaday cowa ko madoloay nolatekay. Nengnengen ita ko nalifetan ni Make. * Milikafay ko cecay salikaka ci Makean, ngaliwngiwayho to roma tamdaw i kasakopang. Samanay ko harateng ni Make hani? Sanay cingra: “Cato pakahadidi kako a mangoraw cingraanan.” Ikor, masomaday ci Make, miliˈay toya salikaka, saka rihadayaw cingranan, kawra cowa kakahi koya salikaka micada. Orato sanay ko harateng ni Make: “Ano mahaenay i, hano misaˈicel kako hani?” Kawra palimoˈotay ko kasakilac kantok cingraanan aka misawad. Samanayto ko demak ni Make hani?

6. (1) Sapicowataw to rihaday, samaanay ko demak ni Make hani? (2) Samaanay ci Make misaka dademak to safalod no Kolosay 3:13, 14 hani?

⁶ Milomalay ci Make, mahapinangay to cowa pisapoener ko niyah, iraay ko misaidahiyay a harateng, misaaliay to sasalofen. (Kolosay 3:8, 9, 12) Orato miliyaway cingra mikilim toya salikaka, miliˈay cingraanan, mitiliday to pina tikami, pasowal to mararaway ko niyah, makalimay malakangaˈay cingraanan. Pafeliayho ci Make to sapatelong toya salikaka. Ka adayayan i, cowaho ka fasaw ko keter noya salikaka. Padadotocay ci Make mitoor to sowal ni Yis, maolah toya salikaka, misarocod a misodod cingraanan. (ˈOsien ko Kolosay 3:13, 14.) Mananamay ita, soˈlin caka ngaˈay ko harateng no tao, mamisaˈicel kita micowat to rihaday, paihkal to olah no Krisciyang, padadotoc a  misodod cangraanan, padadotocho a mitolon to Kawas, micangacang to sapadama Ningra a malakangaˈay to salikaka.—Matay 18:21, 22; Kalatiya 6:9.

7. (1) Sowal ni Yis, sasamaan ko picada ita to tao hani? (2) Tahalifaay ci Rana to maanan a pasangaray?

⁷ Sowal ni Yis, ano makalimay kita samaan ko picada no tao kitaanan, oha mamihaen ko picada ita to tao. Sanayho ko sowal ningra, cowa koya maolahay aca kitaanan a tamdaw ko kakaolahen ita. (Luka 6:31-33) Ano ira ko tamdaw sapiliyasaw tisowanan i kasakopang, eca pihamham tisowanan, sasamaan ko hademak iso hani? Soˈlin cowa ka adihay ko hatiniay demak, kawra iraay ko mahaenay malifaay ni Rana. Sanay cingra: “Cecay fafahiyan salikaka talimaan sanay takowanan, awaay ko pinang ako to samaanay. Taˈangayay ko saroero takowanan, cato ka lingad a masaˈopo.” Salakat sanay ko harateng ni Rana: “Cowa kararaw kako i, hanaca fahkaay ko ˈalomanay tamdaw i kasakopang toniya fafahiyan salikaka.”

8. Sapicowataw to rihaday, samaanay ko demak ni Rana hani? Mikitini nalifetan ningra mananamay ita ko maanan?

⁸ Ikorto, misaˈicelay ci Rana malakangaˈay toya salikaka. Maharek cingra mitolon ci Yihofaan, mikilimay toya salikaka masasowal. Mihadakay cangra to nafalocoˈan, malakangaˈay, matatakecayho cangra, hato masaysayayto ko pasangaray. Kawra sanay ci Rana: “Mataˈlif ko cecay liyad, miliyaway mahaen koya salikaka eca pisikol takowanan, tada matoleday kako.” Harateng ni Rana, ano eca ka falic koya salikaka, cowa ko lalipahak ko niyah. Ikor mahapinangay ningra, ano mahaen i, ‘mikifalocoˈ a misodod’ ko niyah, padadotoc a maolah toya salikaka. (Ifiso 4:32–5:2) Maharatengay ningra ko sowal no Fangcalay Cudad, o olah no Krisciyang, padamaay kitaanan ‘aka pisaˈosi to tatiihay no tao, padadotoc a masasodod, padadotoc a pakasoˈlin, padadotoc a mitokel, padadotoc a mihadidi.’ (1 Korinto 13:5, 7) Orato rihadayayto ko falocoˈ ni Rana. Cecay liyad, mafalicayto ko waywayan  noya salikaka. Malecad ci Ranaan, ano misaˈicel kiso micowat to rihaday, padadotoc a maolah to salikaka, oya ‘Matomesay to olah, pafeliay to rihaday a Kawas’ o kakalacafay tisowanan.—2 Korinto 13:11.

9. Mikitini i Dmak 10:34, 35, hano caka ngaˈay misakakinih kita hani?

⁹ Cowa pisakakinih ci Yihofa. (ˈOsien ko Dmak 10:34, 35.) Malecad kita Cingraanan a micada to tamdaw, misawacayay to o wawa Ningra kita. Wa misaˈicel kita ‘maolah to tamdaw malecad o kaolah to niyah,’ misaˈicelho patireng to rihadayay harateng i paro no lomaˈ ni Yihofa.—Loma 12:9, 10; Yakop 2:8, 9.

10-11. Samaanay ci Lose miremo to misakakinihay hani?

¹⁰ Pakaynien i roma salikaka, eca pisakakinih to tamdaw cowa ko madoloay. Nengnengen ita ko nalifetan ni Lose. Moetep ira ko pina ko mihecaan ni Lose i, tangongolay ko pidokaˈ no cecay roma kitakit a fafahiyan to paro no lomaˈ ningra. Taˈangayay ko pifiyor cingraanan, sanay cingra: “O milingatay tora kitakit a tamdaw ato demak, tada mapiliˈay kako, sahtoay o tatiihay a tamdaw kora kitakit sanay kako, mahawpay ko salikaka.” Ikorto mafalicay ko pinengneng ni Lose, samanay ko demak ningra hani?

¹¹ Sowal ni Lose, sapiremoaw to misakakinihay, taˈangayay ko mihadakan ningra a ˈicel. Miˈosiay cingra to nalifetan ato pisiwkay to salikaka a Ninkang nora kitakit, sanay cingra: “Misaˈicelay kako miharateng to ngaˈayay a demak nora kitakit. Mahapinangay ako, o itiraay salikaka tada maolahay ci Yihofaan, o paro no lomaˈ no Krisciyang cangra.” Palidlid sanay mahapinang ni Lose, tatano waywayan ko niyah paihkal to olah. Sanay: “Ano maˈaraw ako ko itiraay tora kitakit a salikaka, misarocoday a malawidang cangraanan. Talaˈayaw a masasowal cangraanan, cipinang cangraanan. Ikor, lahdaw sanayto ko misakakinihay a harateng ako.”

12. Hano sasalofen ni Sala ko waywayan no niyah hani?

¹² Roma salikaka cowa ka fanaˈ to iraay ko misakakinihay harateng no niyah. Nengnengen ko tinakoan ni Sala. Cowa pisakakinih ko niyah to tamdaw sanay cingra, samanen cowa pikihal cingra to finacadan, cihafayay anca ˈinorong no tamdaw i kasakopang. Kawra sanay ko sowal ningra: “Ikor mahapinangay ako, misakakinihay kako to tamdaw.” Misamanay hani? Cingra ato paro no lomaˈ ˈakawangay ko picudadan, mansa maolahay cingra kalacafay to ˈakawangay ko picudadan. Kinacecayay, pasowalan ningra ko widang: “O ˈakawangay aca ko picudadan a salikaka ko misawidangan ako.” Misaaliay cingra to sapisalofaw to waywayan. O sasamaan ko hademak ningra hani?

13. Samaanay ci Sala mifalic to waywayan hani? Mikitini nalifetan ningra mananamay ita ko maanan?

¹³ Padamaan no kasakilac kantok ci Sala. Sanay ci Sala: “Pakahemekay cingra takowanan fanekfekay a matayal, ngaˈayay ko sapacaˈof, adihayay ko sifanaˈ to Fangcalay Cudad. Dotoc sanay pasowal, ano adihay ko sifanaˈ ita, o papalahad to makapahay capeling, tinakoen o misapoeneray, damsayay ato siniˈadaay.” Tooran ni Sala ko sapaini no kasakilac kantok a midemak, sanay cingra: “Mahapinangay ako ciolah to tamdaw, mikangaˈay to tao, o masakalimlaan.” Palidlid sanay, mafalicayto ko pinengneng ningra to salikaka, sanay cingra: “Misaharateratengay kako, itini tireng no salikaka iraay ko maanan kahemekan ni Yihofa a capeling.” Mikitini nalifetan ni Sala mananam ita ko maanan hani? Ano ˈakawangay ko picudadan ita, aka a misaidahidahi. Mikifalocoˈ kita a ‘maolah to kasacefang no salikaka,’ mihaen cato ka pisakakinih to tamdaw.—1 Pitiro 2:17.

14. Pakayni Hipray 13:16, manengneng ni Yihofa paihkal kita to hinapaladaˈay hinalafangay wa samaan ko harateng hani?

¹⁴ Maolahay ci Yihofa to hinapaladaˈay hinalafangay a harateng. (ˈOsien ko Hipray 13:16.) Itini pinengneng Ningra, hinapaladaˈ kita to tamdaw, mangalef hinapaladaˈ to misaaliay to papadamaen a tamdaw, malecaday o midokoay Cingraanan. (Yakop 1:27; 2:14-17) Mihaenay, palimoˈotay ko Fangcalay Cudad kitaanan ‘paihkal to hinalafangay a harateng.’ (Loma 12:13) Paihkal kita to hinalafangay i tamdaw, wa mafanaˈ cangra, soˈlinay kita ciharateng ato maolah cangraanan, makalimay malo widang nangra. Ano patiyamsim, pananom, pakaen, anca mipalak to toki kalacafay cangraanan, wa mahemek ci Yihofa. (1 Pitiro 4:8-10) Kawra hinapaladaˈ hinalafang pasangaray nolatekay, nengnengen ita hano mahaen hani.

15-16. (1) O roma tamdaw hano cowa ka olah micada to lafang hani? (2) Samaanay mafalic ci Aytite hani?

¹⁵ Awaay ko payci ako sanay kita miharateng alatek, caka ngaˈay paihkal to hinapaladaˈay. Tinakoen, o cecay fafahiyan salikaka ci Aytite, o maponengay cingra. ˈAyaw no malo Misawacayay Tamdaw ni Yihofa cingra i, cowa ka olah micawmaˈ to tamdaw, awaay ko pakayraan patahka to tao sanay.

¹⁶ Ikor no micada ci Aytite to paputisem mafalicay ko harateng, mafanaˈayto hinapaladaˈ to tao. Sanay cingra: “Patireng kami to faelohay kasaˈopoan i, milicayay ko malohemay malitengay takowanan wa ngaˈay micada to pacafayay matayal a mararamoday, tosa lipay ko palafin cangraanan. Maharatengay ako itiya koya maponengay no Carifat, pakayni picada ningra ci Iliyaan, malifokay ko adihayay sapalemed. (1 Hongti 17:12-16) Mihaiay ci Aytite. O maanan ko malifokay ningra a sapalemed hani? Sanay cingra: “Cowa ka tosa aca lipay milafin koya mararamoday, tosaay a folad. Toniya tosa folad mapalahaday niyam ko tangongolay a kalawidang.” Roma i, adihayayto ko ngaˈayay widang ni Aytite i kasakopang. O misakafahayto cingra nohatini, mahererek mitosil  maolahay cingra mitahidang to salikaka tayra i lomaˈ a pahanhan. Sanay cingra: “O paladaˈay pakahemekay takowanan! Hanaca o malifokay ako a sapalemed ikakaay to mihadakan ako.”—Hipray 13:1, 2.

17. Mahapinangay ni Roke ato fafahi iraay ko maanan sasalofen nangra hani?

¹⁷ O roma salikaka hinalafangay, wa samaan cangra matongal ko kangaˈay no demak hani? Tinakoen, ci Roke ato fafahi maolahay micada to lafang, marariday mitahidang to wama wina nangra, salawina ato kasakilac kantok tayra i lomaˈ. Kawra sanay ci Roke: “Mahapinangay ako, o mitahidangan niyam oyaan ngaˈayay ko kalalaˈed tamiyanan a tamdaw.” Sasamaan cangra a macakat hani?

18. Mikikakaay ko hinalafang ni Roke ato fafahi, samaanay ko demak nangra hani?

¹⁸ Misongilaˈay ci Roke ato fafahi misimsim to sowal ni Yis: ‘Oya maolahay aca tamowanan ko kaolahen namo, o maanan ko mamalayap namo a sapalifon hani?’ (Matay 5:45-47) Maharatengay nangra, papahecaden ci Yihofa a hinapaladaˈ to polong a tamdaw, orato mitahidangay to cowaho ka tahidangen a salikaka. Sanay ci Roke: “Lipahakay ko ˈalomanay, masasifanaˈayto kami, matongalay ko piingid ci Yihofaan.”

19. Sasamaan kita misawacay to soˈlinay Krisciyang koniyah hani? Wa misetek kiso to falocoˈ samaan ko hademak hani?

¹⁹ Mikifalocoˈ kita a masasiolah, o mamisaˈicel a micowat to rihadayay, eca pisakakinih micada to tamdaw, hinapaladaˈ hinalafang. O sasalofen ita ko masofaway a harateng, mikifalocoˈ a maolah to salikaka. Mihaen ko demak ita, tataˈangay ko lipahak, misawacayho to soˈlinay a Krisciyang koniyah.—Yohani 13:17, 35.