Mafanaˈay Kiso Han?
Cowa ko Fangcalay Cudad aca, iraayho ko roma a wacay to ngangaˈay misawacay to na malakoliay ko Israil tamdaw i Icip han?
Matiliday i Fangcalay Cudad, maˈorongay no Mitin tamdaw ci Yosif tayra i Icip. IKor, o wama ningra ci Yakop miˈorongay to paro no lomaˈ mikitini Kanan malinah tayra i Icip, itiniay i Kosin no Nayil ˈAlo a mikilomaˈ. (Satapangan 47:1, 6) Kalikiay a matongal ko ˈaloman no Israil tamdaw, ‘malingaday ko kaciˈicel,’ matalawayto ko Icip a tamdaw, miroeroay a palakoli to Israil tamdaw.—Kasadakan 1:7-14.
Cisasaay ko mikingkiway a tamdaw toniya matiliday no Fangcalay Cudad, o tawcikel aca konini sanay. Kawra soˈlinay ira ko wacay, na malakoliay i nolitengan a Icip ko Simite a tamdaw. *
Tinakoen, mikingkiway to nolitengan a tamdaw itini kaˈamis no Icip mahelaay ko nolitengan a nalacolan. Hakasi ci Yohani Pimosen sanay, itini kaˈamis no Icip, o nalacolan no Simite tamdaw mataˈelifay ko 20. Roma i, mikingkiway to nolitengan a Icip ci Canmos sanay: “Maedeng i ˈayaw ni Yis 1800 miheca tangasa 1540 miheca a tatokian, pakayni i somowalay tono Simite i Asiya a tamdaw, o ngaˈayay kitiraan ko Icip.” Sanayho cingra: “Oya lintad matatodongay i lintad no kakeridan no ngasaw, matatodongay to misowalan no Satapangan a pakayraan.”
Mikingkiway to nolitengan a tamdaw itini katimol no Icip mahelaay ko wacay. Tinakoen, cecay matiliday i kalidopak, ngaˈayay talaˈayawen a minengneng i nolitengan a Icip (maedeng ˈayaw ni Yis 2000 miheca tangasa 1600 miheca.), matiliday ko ngangan no malo koliay, i lalomaˈ iraay ko 40 no Simite sowal a ngangan. Oniya koli itiniay i katimolay no Icip a lomaˈ malakoli, mitatangtangay to holo, mitenaˈay, matayalay ko demak. Sanay ci Hofomay: “Itini cecay lalomaˈan no katimolay a Icip, ira ko 40 a Simite tamdaw, mihaenay i polong no Icip, maedeng adihayay ko Simite a tamdaw.”
Mikingkiway to nolitengan ci Tawite Loe sanay, oniya ngangan malecaday o matiliday i Fangcalay Cudad. Tinakoen, o roma ngangan malecaday ci Isakar, Asir, Sifraan. (Kasadakan 1:3, 4, 15) Sanay ci Loe: “Oniya wacay ngaˈayay misawacay, soˈlinay na malakoliay ko Israil tamdaw i Icip.”
Hakasi ci Pimosen sanay: “Masowal no Fangcalay Cudad to malakoliay ko Israil tamdaw i Icip, ikor miliyasay to Icip, o soˈliˈlinay a likisi konini.”
^ 4段 O ‘Simite’ a tilid mikitiniay i ‘Sim’ a masadak, ci Sim o wawa ni Nowa. O teloteloc ni Sim mahawpay ko Ilan tamdaw, Asiriya tamdaw, ato Ciyaleti tamdaw, Hipray tamdaw, Siriya tamdaw, ato finacadan no Arapiya.
