Itini ˈaˈirangan no Lifi, cowa ko saysi a tamdaw citodongay to roma tayal, o cecay i, milaocay to fangcalay sefi, itiniay cangra i pikayat no ˈaˈideman no sefi a matayal. O mikingkiway no Yutaya ci Pilo milengo toniya milaocay sanay: “O roma nangra mihimaway to fawahan no fangcalay sefi, o roma itiniay fangcalay kitiraan, misinanot to patelasay micomod i fangcalay kitiraan a tamdaw, o roma makakotayay to romiˈad ato dadaya misolap to fangcalay sefi.”

O milaocay to fangcalay sefi mitengilay to sakayat no hoing. Mikitiniay i mirikecay no Loma cangra milifok to fadangalan, ngaˈayay milafa to sapilood a lalosidan a Yutaya tamdaw.

O roma mikakingkiway ci Yoasimo sanay ko sowal: “Mirikec ci Yis toya mirepetay cingraanan a tamdaw, to romiˈamiˈad itiniay cingra i fangcalay sefi a pasifanaˈ to tamdaw, cowa ka pirepet cangra cingraanan. (Matay 26:55) Mikitini i sowal ningra mahapinangay, oniya tamdaw o milaocay to fangcalay sefi.” Harateng ni Yoasimo, oya mirepetay ci Yisan i saˈayaw o milaocay to fangcalay sefi. (Yohani 7:32, 45, 46) Ikor, malacafayay to ˈaˈideman no sefi mirepet to tarokos, ato mikidkiday ci Pawloan pasadak i sefi a tamdaw, maedeng o milaocay to fangcalay sefi.—Dmak 4:1-3; 5:17-27; 21:27-30.