1-2. Mikitini i Dmak 8:27-31, 35-38 o tapang no Iciyopiya hano misaˈosi micada to paputisem hani?

MAKALIMAY kiso micada to paputisem malo Krisciyang han? ˈAlomanay tamdaw pakayni kaolah ci Yihofaan ato miakoˈid Cingraanan, mansa misaˈosi mihaen to demak. Nengnengen ita ko tinakoan nolitengan a tapang no Iciyopiya [Aysay-epiya].

² Cipinangto koniya tapang to sinael i, mafanaˈay to mamicada ko niyah to paputisem, tangsolay a mihaen to demak. (ˈOsien ko Dmak 8:27-31, 35-38.) O maanan ko micolohay cingraanan mihaen ko demak hani? Itini paliding miasipay cingra to lalakaw no Isaya, tada misaaretengay cingra to kimad no Kawas. Roma i, ikor no tadtaden ni Filip cingraanan ko sinael i, mifekaday ko miakoˈiday a harateng ningra ci Yisan. Haratengen hena, oniya tapang hano tayra i Yirusalim hani? Tayra cingra i Yirusalim o mamidoko to Kawas, samanen palahadayto cingra to olah ci Yihofaan. Misawadanto ningra ko telangan a pihakelongan, mipiliˈ malacafay to midokoay to soˈlinay Kawas a finacadan a midoko to Kawas. Mihaenay, Pakayni olah ci Yihofaan micolohay toniya tapang midemak to kalimlaan a demak, micada to paputisem malo Krisciyang.—Matay 28:19.

3. O maanan ko mamicara to tamdaw micada to paputisem hani? (Nengnengen ko sapatongal lalakaw “Samanay ko nafalocoˈan iso hani?”)

³ Pakayni kaolah ci Yihofaan micolohay tisowanan a micada  to paputisem, kawra o olah to tamdaw ato demak micaraay tisowanan a micada to paputisem. Tinakoen, ano kamayan a maolah kiso to cowa pidoko to Kawas a salawina, wa calemcem kiso to pisafelit nangra a micada ko niyah to paputisem. (Matay 10:37) Ano iraay ko kapiliˈan no Kawas a kaolahan anca nanaman iso, pasangaren kiso a misawad alatek. (ˈOlic 97:10) Anca nano kaemangan kiso mirienang to lisin no mararaway pihakelongan, adihayay ko makapahay a lalomalen, pasangaren kiso misawad to hatiniay a demak alatek. (1 Korinto 10:20, 21) Mihaenay, licayen ko niyah: “O maanan ko sakakaay kaolahan ako hani?”

4. Misetek to falocoˈ ko tamdaw micada to paputisem, sakakaay lalangian i, o maanan hani?

⁴ ˈAyaw no malacafay to Misawacayay Tamdaw ni Yihofa a minanam i, misaaretengayto kiso minengneng to Fangcalay Cudad alatek, anca maolahay ci Yisan. Ikor no mafanaˈ kiso to Misawacayay Tamdaw ni Yihofa i, maolahay micawmaˈ cangraanan. Kawra, o kaolah aca to tamdaw ato demak, cowa ko mamicoloh tisowanan a patafang to tireng a micada to paputisem. Misetek to falocoˈ ko tamdaw micada to paputisem, sakakaay lalangian i, o kaolah to Kawas ci Yihofaan. Ano sakakaay kaolahan iso ci Yihofa, wa awato ko mamicara tisowanan a midoko Cingraanan. O kaolah ci Yihofaan wa micoloh tisowanan micada to paputisem, wa padamaho tisowanan ikor no micada to paputisem padadotoc madimadi midoko Cingraanan.

5. Oni lalakaw wa milengo to maanan hani?

⁵ Sowal ni Yis, sarocoden ita ko falocoˈ, harateng, ˈicel, tano polong a ˈorip maolah ci Yihofaan. (Marko 12:30) Sasamaan ngaˈ maolah ato mikangodo ci Yihofaan hani? Misongilaˈ a misimsim to olah ni Yihofa kitaanan, wa micoloh kitaanan tano olah a patikol to olah. (1 Yohani 4:19) Oni lalakaw wa milengo, o maanan a pakayraan ko papadama kitaanan palahad to olah ci Yihofaan, ato pakayni katongal no olah ci Yihofaan, sasamaan ko hademak ita.  *

6. Mikitini Loma 1:20, o maanan ko hapakayraan a mafanaˈ ci Yihofaan hani?

⁶ Pakayni i misangaˈan ni Yihofa a maamaan mafanaˈ Cingraanan. (ˈOsien ko Loma 1:20; Paˈarawan 4:11) Nengnengen ko misangaˈan ni Yihofa a pinaˈorip ato pinaloma, cipinang to kasapaan a tireng no tamdaw, wa mahapinang iso tada citanengay ko Kawas. (ˈOlic 139:14) Ngaˈayho miharateng, o misangaˈan ni Yihofa a cidal hakowaay ko ˈicel, o cidal o masalalomaˈay aca no pinaay walwalan a foˈifoˈis. * (Isaya 40:26) Misimsim toniya demak, wa matongal ko pikangodo iso ci Yihofaan. Kawra, o kafanaˈ aca to iraay ko taneng ato ˈicel ni Yihofa cangoˈotayho, saka tanektekaw no kalalaˈed iso aci Yihofa, sapitongalaw to olah Cingraanan, pakalingaden ko kacipinang Cingraanan.

7. Ano saka tangongolaw ko olah ci Yihofaan, ngaˈay pakasoˈlinen iso ko maanan?

⁷ O papakasoˈlinen iso, tada maolahay ci Yihofa kisowanan. Ano pasangaray kiso pakasoˈlin to misinanotay, ciharatengay tisowanan ko misangaˈay a Tatapangan, aka mapawan, sowal no Fangcalay Cudad ‘cowa pilaay to kahacecay tamdaw’ ci Yihofa. (Dmak 17:26-28) Malecad o nano sowal ni Tafiti ci Solomonan, o Kawas ‘cipinangay to nafalocoˈan no tamdaw,’ hanaca mikiˈokay, ano ‘kilimen iso Cingra, wa mahela iso Cingra’ Sanay. (1 Rayray 28:9) Mankora, minanam kiso to Fangcalay  Cudad nohatini, ci Yihofa ko misolotay tisowanan tayra i tatihi Ningra. (Yirimiya 31:3) Ano matongal ko kacipinang iso to nano demak ni Yihofa tisowanan, wa matongal ko kaolah Cingraanan.

8. Sasamaan kiso pacoˈay to olah ni Yihofa hani?

⁸ Mao:lahay ci Yihofa tisowanan, o pakayraan iso a pacoˈay i, mitolon Cingraanan. Fanaˈen ko Kawas to kacarirawan ato piakoˈid iso, mihaen wa matongal ko olah iso Cingraanan. Maˈaraw iso samanay ci Yihofa a pacaˈof to picangacang iso i, wa tanektek ko kalawidang Cingraanan. (ˈOlic 116:1) O satolon papadama tisowanan a pakasoˈlin to cipinangay ci Yihofa tisowanan. Kawra, sapitongalaw a miingid ci Yihofaan, cipinang to harateng Ningra, ato mitokelay Cingra samaan ko hademak no miso, mihaenay ka pisongilaˈ a micekiw to Kimad Ningra.

9. Samaan ko demak iso o paihkalay to misaaretengay minengneng to Kimad no Kawas hani?

⁹ Minanam misaareteng minengneng to Kimad no Kawas. Dengan ko Fangcalay Cudad ko ngangaˈay pasowal tisowanan to pakayniay ci Yihofaan a kimad, ato mitokelay to sasamaan ko hademak iso. To romiˈamiˈad miasip to Fangcalay Cudad, misongilaˈ misaday to cacekiwen a lalakaw, hanaca saka dademaken ko mananamay, o paihkalay to misaaretengay kiso to Kimad no Kawas. (ˈOlic 119:97, 99; Yohani 17:17) Iraay ko misilsilan iso a miasip to Fangcalay Cudad, mitoor toniya misilsilan to romiˈamiˈad a miasip to Fangcalay Cudad hokira?

10. O maanan ko mikiriwiˈay itini i Fangcalay Cudad hani?

¹⁰ Iraay ko mikiriwiˈay no Fangcalay Cudad, o roma mitiliday na pakaˈaraway ci Yisan, miˈoning to nano demak ningra. Oniya maˈoningay papadama tisowanan mafanaˈ to o maanan ko nano demak ni Yis tisowanan. Cipinang kiso to demak ni Yis, mamakalimto a malo widang ningra.

11. Samaan ko demak iso wa matongal ko olah ci Yihofaan hani?

¹¹ Palahad to olah ci Yisan, wa matongal ko olah ci Yihofaan. Malefotay ko pipaihkal ni Yis to capeling no kakarayan Wama. (Yohani  14:9) Mihaenay, matongal ko kafanaˈ iso ci Yisan, wa matongal ko kafanaˈ ci Yihofaan, matongal ko kaolah Cingraanan. Haratengen hena, itini lintad ni Yis, misakahmaway ko tamdaw to manikaway, adadaay anca poeneray ko saaroˈan a tamdaw, kawra siniˈadaay ci Yis cangraanan. Roma i, adihayay ko ciepocay sapaini ni Yis to tamdaw, tooren iso ko sowal ningra a midemak, coko masalofay ko kaˈorip iso han?—Matay 5:1-11; 7:24-27.

12. Ano matongal ko kafanaˈ iso ci Yisan, wa makalimto midemak to maanan?

¹² Pakayni i kinafalah ni Yis, misododan ni Yihofa ko raraw no mita, misimsim kiso tonini wa matongal ko olah ci Yisan. (Matay 20:28) Mafanaˈ to makahiay ci Yis pakayni tisowanan a kinafalah to ˈorip, mitemeray to falocoˈ iso, sapasasiyoraw a micangacang to sasodod no Kawas. (Dmak 3:19, 20; 1 Yohani 1:9) Palidlid sa tangongol ko olah iso ci Yihofaan aci Yisan, wa makalimto micawmaˈ to maolahay cangraanan a tamdaw.

13. Pakayniyan ni Yihofa cimaanan a padama tisowanan hani?

¹³ Palahaden ko olah to taˈangayay a paro no lomaˈ ni Yihofa. Cowa ka cipinang ko salawina to hano midoko kiso ci Yihofaan, misafelitay cangra alatek. Kawra, o paro no lomaˈ iso ko salikaka, pakayniyan ni Yihofa cangraanan a padama tisowanan. Ano makelec ko kalalaˈed iso ato salikaka, wa malifok ko olah ato sapadama nangra. (Marko 10:29, 30; Hipray 10:24, 25) Ikorto alatek, wa kalacafay ko paro no lomaˈ iso tisowanan a midoko ci Yihofaan, mitoor to palinian Ningra a maˈorip.—1 Pitiro 2:12.

14. Pakayni 1 Yohani 5:3, samanay ko pinengneng iso to palinian ni Yihofa hani?

¹⁴ Minanam misaareteng ato midofdof to palinian ni Yihofa. ˈAyaw no minanam kiso to Fangcalay Cudad iraay ko niyah a palinian, kawra mahapinangay iso no hatini mitoor to palinian ni Yihofa ikakaay ko kangaˈay. (ˈOlic 1:1-3; ˈosien ko 1 Yohani 5:3.) Tinakoen, Masowalay no Fangcalay Cudad ko faˈinay, fafahi, wama wina ato wawa, sasamaan ko hademak. (Ifiso 5:22-6:4) Tooren iso ko sowal no Fangcalay Cudad a midemak, matongalay ko lipahak no paro no lomaˈ han? Roma i, tooren iso ko palinian ni Yihofa mipiliˈ to widang, coko masawaday ko tatiihay nanaman, matongalayto ko lipahak han?—Taneng 13:20; 1 Korinto 15:33.

15. O maanan ko papadama tisowanan tano safalod no Fangcalay Cudad a misaˈosi hani?

¹⁵ Latekay, cowa ka fanaˈ kiso sasamaan misaka dademak to safalod no Fangcalay Cudad a misaˈosi. Pakayniyan ni Yihofa i likakawa Ningra mihadak ko adihayay mitepangan cudad, oniya cudad wa padama tisowanan ‘pafafidaˈ to ngaˈayay tatiihay.’ (Hipray 5:13, 14) Songilaˈen iso a micekiw koniya lalakaw, wa mahapinang to ihkalay, ciepocay koniya sapaini. O papadama konini tisowanan makalim micomod toniya likakawa.

16. Samaanan ni Yihofa a milikakawa ko midokoay Cingraanan a tamdaw hani?

¹⁶ Palahaden ko olah to likakawa no Kawas, malacecay toniya likakawa. Mikapotan ni Yihofa ko midokoay Cingraanan a tamdaw malo kasakopang, o ˈaˈideman ko wawa Ningra ci Yis. (Ifiso 1:22; 5:23) Minilnilan ni Yis ko tatayra i kakarayan a faˈinayan, mikapot cangraanan malo ‘madimadiay citanengay a koli.’ Mikayatay cangra to patorodan ni Yis a demak, misarocodayho a misaday to sapahaled to pakasoˈlinay falocoˈ a ‘kakaenen,’ halo pidipot to kalalaˈed iso ato Kawas. (Matay 24:45-47) O roma pakayraan no madimadiay a koli padama tisowanan i, malifok iso ko sakayat ato sadipot no malohemay malitengay, oniya salikaka citatodongay a manilnil. (Isaya 32: 1, 2; Hipray 13:17; 1 Pitiro 5:2, 3) Makahiay ko malohemay malitengay patado tisowanan a matayal, makalimay cangra pakalalok ato padama tisowanan paingid to kalalaˈed ci Yihofaan. O roma kalimlaan a demak nangra i, pahatatanam tisowanan a padama to tao mafanaˈ ci Yihofaan.—Ifiso 4:11-13.

17. Pakayni Loma 10:10, 13, 14, hano papadama kita to tao mafanaˈ ci Yihofaan hani?

¹⁷ Padama to tao palahad to olah ci Yihofaan. Pasifanaˈ to tamdaw mafanaˈ ci Yihofaan o limoˈot ni Yis. (Matay 28:19, 20) Manaokaniw, irako ciˈinorongay a harateng wa mihaen ko demak no tamdaw. Kawra, ano matongal ko olah iso ci Yihofaan, wa mahecad ko harateng iso to tarokos ci Pitiroan aci Yohanian, sanay cangra: ‘O maˈaraway niyam, matengilay, o sasowalen a maemin.’ (Dmak 4:20) Padama to tao miingid ci Yihofaan o sakalipahak iso. Haratengen hena, padamaen ni Filip ko tapang no Iciyopiya minanam to soˈlinay kimad a micada to paputisem, hakowaay ko kalipahak ningra! Ano malecad kiso ci Filipan mitoor to limoˈot ni Yis a mitosil, paihkalay kiso to makalimay malo Misawacayay Tamdaw ni Yihofa. (ˈOsien ko Loma 10:10, 13, 14.) Itiya, wa saan ko sowal iso: ‘Ira ko maanan a lalangian ako eca picada to paputisem hani?’—Dmak 8:36.

18. Dotoc a lalakaw wa milengo to maanan?

¹⁸ Micada to paputisem o kalimlaan a saˈosi i nokaˈorip, sasongilaˈen iso a misimsim ko tatodong no micadaay to paputisem. Pakayni picada to paputisem, sakafanaˈaw kiso to maanan hani? ˈAyaw ato ikor no micada to paputisem, wa midemak kiso to maanan a demak hani? Dotoc a lalakaw mamilengo toniya salicay.