1-2. Ngaˈay kita tano maanan sapatinako mitadtad to tatodong no 1 Pitiro 2:21?

HARATENGEN mihakelongay kiso to cecay ˈopo a tamdaw mitaˈlif to katalawan a kohkoh, cisoedaay ko sera. Cecay adihayay ko nalifetan a mikeriday mikayatay i ˈaˈayaw, kaikor ningra iraay ko masarayarayay a pasaripaˈan. Soˈlin latekay cowa kaˈaraw koya mikeriday, cowa ka marawraw kiso, samanen mafanaˈay kiso ato roma tamdaw, ano kedecen a mikotod ko pasaripaˈan no mikeriday cowa ko mamahiday.

² Pakaynien soˈlinay Krisciyang ko sowal, oniya ciraraway hekal malecaday to katalawan a kohkoh. Kao ngaˈayay mihadakay ci Yihofa to malefotay mamikerid kitaanan a tamdaw, o Wawa ningra ci Yis Kristo, ngaˈay kita mikedec a mikotod to pasaripaˈan noniya mikeriday. (1 Pitiro 2:21) Toniya sinael, sowal ni Pitiro malecaday o mikeriday ci Yis, miterekay to masarayarayay a pasaripaˈan i kaikor. Dotoc, simsimen ita ko tolo a salicay: Mikotod to pasaripaˈan ni Yis o maanan ko tatodong? Hano mikotod to pasaripaˈan ni Yis? Ihkalen ko sowal, sasamaan ko hademak ita?

3. Mikotod to pasaripaˈan no cecay tamdaw o manan ko tatodong hani?

³ Mikotod to pasaripaˈan no cecay tamdaw o maanan ko tatodong hani? Itini Fangcalay Cudad, ‘romakat’ ato ‘waˈay’ ngaˈayay mitaypiyaw to waywayan no cecay tamdaw a maˈorip. (Satapangan 6:9; Taneng 4:26) O miterekan no cecay tamdaw a taˈarawan, malecaday o miterekan a pasaripaˈan i aikor. Mihaenay mikotod to pasaripaˈan no tamdaw, minanam cingranan sanay ko tatodong, mitodong to taˈarawan ningra.

4. Mikotod to pasaripaˈan ni Yis o maanan ko tatodong hani?

 ⁴ Mihaenay, mikotod to pasaripaˈan ni Yis o maanan ko tatodong hani? Kantangen ko sowal i, mitodong to taˈarawan ningra. Itini lalangian a sinael noni lalakaw, milengoan ni Pitiro o pisemsem ato pihadidi ni Yis a ngaˈayay taˈarawan. Kawra, wa ngaˈay kita itini roma pakayraan a minanam ci Yisan. (1 Pitiro 2:18-25) Itini hakelong no kaˈorip ni Yis, o nano sowal, nano demak ningra, oha ngangaˈay nanamen ita.

5. Cowa ko malefotay tamdaw, soˈlinay ngaˈay mitodong to malefotay a taˈarawan ni Yis han? Tadtaden.

⁵ Nikawrira cowa ko malefotay kita, soˈlinay ngaˈay mitodong to taˈarawan ni Yis han? Ngaˈayay. Haratengen, palimoˈotay ci Pitiro kitaanan ‘mikedec mikotodˈ to pasaripaˈan ni Yis, cowa ko mamalefot a mikotod to pasaripaˈan ningra. Mihaenay ko sowal no tarokos ci Yohani, ‘samanay ko waywayan ni Kristo,’ mamihaen ko waywayan ita malo tamdaw. Soˈlin cowa ko malefotay kita, ano misarocod kita, misongilaˈ minanam ci Yisan, o mitooray to limoˈot ni Yohani a midemak.—1 Yohani 2:6 ato roma pihongyak.

6-7. Mikotod to pasaripaˈan ni Yis hano papadama kitaanan matongal ko piingid ci Yihofaan?

⁶ Mikotod to pasaripaˈan ni Yis wa padama kitaanan matongal ko piingid ci Yihofaan. Misamanay? Salakat, itini kaˈorip sahtoay o kahemekan ni Yihofa ko midemakan ni Yis, patirengay to ngaˈayay taˈarawan ita. (Yohani 8:29) Mihaenay, mikotod kita to pasaripaˈan ningra, o papakahemek ci Yihofaan. Ngaˈay pakasoˈlin kita, wa ingiden no kakarayan Wama ko misaˈicelay miingid Cingranan a tamdaw.—Yakop 4:8.

⁷ Saka tosa, samanen malefotay ko pitodong ni Yis to kakarayan Wama, mansa ngaˈay ko sowal: ‘Cima pakaˈaraw takowanan, malecaday o pakaˈaraway to Wama.’ (Yohani 14:9)  Tada siniˈadaay ci Yis to cecay ciadadaay to fanges a tamdaw, siniˈadaay to misemsemay to adada a fafahiyan, siniˈadaayho to malahdaway ko salawina a tamdaw. Mitodong kita to capeling ni Yis ato pakayraan ningra micada to tamdaw, o mitodongay ci Yihofaan. (Marko 1:40, 41; 5:25-34; Yohani 11:33-35) Ano matongal ko kalecad ita ci Yihofaan, wa matongal ko piingid Cingranan.

8. Mikotod to pasaripaˈan ni Yis hano papadama kitanan ‘pakalowid toniya hekal?’

⁸ Mikotod to pasaripaˈan ni Yis, padama kitaanan misamacay midoko ci Yihofaan, cowa ko mamakalisanga noniya ciraraway hekal ko falocoˈ. ˈAyaw no kinafalah a dadaya, sanay ci Yis: ‘Malowidayto ako koniya hekal.’ (Yohani 16:33) Mihaen ko sowal ni Yis, samanen cowa ka mafiyor no harateng, patosokan ato waywayan no hekal cingra. Cowa ka mapawan ci Yis to lalangian ningra tayni i fafekang no sera, o papaˈodingar to fangcalay ngangan ni Yihofa. Samanay kita hani? Adihayay a demak noniya hekal mikalisangaay to falocoˈ ita alatek. Kawra ano todongen ita ci Yis, misamacay midemak to araaw ni Yihofa, wa ngaˈay kita ‘pakalowid toniya hekal.’—1 Yohani 5:5.

9. Samaan ko demak ita ngaˈ materek i sakatayra midaˈocay ˈorip a lalan?

⁹ Mikotod to pasaripaˈan ni Yis, wa ngaˈay kita milifok to midaˈocay ˈorip. O cecay cihafayay a kapah milicayay ci Yisan sasamaan ngaˈ milifok to midaˈocay a ˈorip, pasowalan ni Yis cingra: ‘Ka pikotod takowanan.’ (Matay 19:16-21) Na pasowalan ni Yis koya cowa pakasoˈlin to ci Kristo cingra a Yutaya tamdaw: ‘O lopayˈay siri ako . . . mikotoday takowanan. Pafelien ako cangra to midaˈocay ˈorip.’ (Yohani 10:24-29) Roma i, itiniay hoing ci Niketemo saka cipinangaw to sapasifanaˈ ni Yis a kimad, pasowalan ni Yis ci Niketemo, ‘pakasoˈlinay mihakelong cingranan a tamdawˈ wa milifok to ‘midaˈocay a ˈorip.’ (Yohani 3:16) Pakasoˈlin a mihakelong kita ci Yisan, o mamitoor to sapasifanaˈ ningra a midemak, minanamho to ngaˈayay taˈarawan ningra. Mihaen, wa ngaˈay kita materek i saka tayra midaˈocay ˈorip a lalan.—Matay 7:14.

10. Samaan ko demak ita ngaˈ, matoor ko misowalan no Yohani 17:3 “Mafanaˈ” ci Yisan?

¹⁰ Sapikedecaw mikotod to pasaripaˈan ni Yis, wa salakatho a mafanaˈ cingranan. (ˈOsien ko Yohani 17:3.) “Mafanaˈ” ci Yisan o padadotocay a demak, mamicalep kita a cipinang to capeling, harateng ato palinian ningra. Ano hakowaayto ko halafin ita malo Krisciyang, o papadotoc a misaˈicel “mafanaˈ” ci Yihofaan ato Wawa ningra.

11. O sepat Ratoh a Cudad o maanan ko maˈoningay?

¹¹ Sapadamaaw kitaanan mafanaˈ ci Yisan, pafeliay ci Yihofa kitaanan to sepat Ratoh  a Cudad. Oniya sepat Cudad maˈoningay ko kaˈorip ato mitosilay a tayal ni Yis i fafekang no sera, o sasowalen ato waywayan ni Yis, ato harateng ningra, oniya lalakaw papadama kitaanan ‘misongilaˈ miharateng to taˈarawan ningra.’ (Hipray 12:3) Oniya maˈoningay malecaday o miterekan ni Yis a ‘pasaripaˈan’, misamacay kita a micekiw, wa matongal ko kafanaˈ ci Yisan, mikedec a mikotod to pasaripaˈan ningra.

12. Sapinanamaw to adihayay i Ratoh a Cudad, sasamaan ko demak?

¹² Sapinanamaw to adihayay i Ratoh a Cudad, aka o pinengneng aca, palaken ita ko adihayay toki misongilaˈ a micekiw, misongilaˈ a midotim. (Nengnengen ko Yosuwa 1:8.) Dotoc lengoen ita ko tosa pakayraan, sasamaan midotim to lalakaw no Ratoh a Cudad, halo misakadademak to mananamay.

13. Samaan ko demak iso, ngaˈay paˈorip i kaˈayaw ko maˈoningay no Ratoh a Cudad?

¹³ Salakat, paˈoripen i kaˈayaw ko maˈoningay no Ratoh a Cudad. Ngaˈayay saharateratengen, itiraay kiso nohatini, maˈaraway iso ko maanan, matengilay ko maanan, matinakoay ko maanan hani? Sakadademaken ko sapicekiw a lalosidan no likakawa, wa padama tisowanan a miharateng. Ngaˈayay nengnengen ko fafekangay laenoay sinael, kilimen ko milingatay a lalakaw, cipinang toniya maˈoningay a tamdaw ato kitiraan. Ngaˈayay palalinien iso, o malecaday a demak itini roma Ratoh a Cudad a maˈoningay. Latekay cecay Ratoh Cudad iraay ko sasimsimen a demak, o cowa ka sowal no roma Ratoh a Cudad.

14-15. Samaan kita misakadademak to minanaman nai Ratoh a Cudad hani?

¹⁴ Sakatosa, sakadademaken ko minanaman. (Yohani 13:17) Maharek kiso misongilaˈ miˈosi to cecay maˈoningay no Ratoh a Cudad i, haratengen: ‘Mananamay ako ko maanan a lalakaw, ngaˈayay sakadademaken i kaˈorip no niyah? Sasamanen ako misakadademak ko minanaman a padama to tao hani?’ Ngaˈayay haratengen iso ko cecay kafanaˈan a tamdaw, ikor kilimen ko matatodongay a toki,  damsayen a paladaˈ cingra to mananamay iso a demak.

¹⁵ Na malitemohay ni Yis ko cecay manikaway a maponengay i fangcalay sefi. Dotoc tadtaden ita koniya maˈoningay, tanonini a tinakoan mitadtad, sasamaan misaka dademak to masowalay i fafekang a tosa pakayraan.

16. Tadtaden hena ko mifekaday demak i Marko 12:41.

¹⁶ Paˈoripen i ˈaˈayaw ko maˈoningay. (ˈOsien ko Marko 12:41.) Haratengen ko mifekaday demak itiya. Itiniay i Kongyen 33 miheca Nisan folad 11 romiˈad, ato pinato romiˈad, o kakinafalahto ci Yis to ˈorip. Saromiˈad sanay ci Yis i fangcalay sefi pasifanaˈ to tamdaw. Mikalisangaay ko misafelitay tamdaw cingranan, cisasaay ko roma tamdaw to fadangalan ningra, milicayay ko roma tamdaw to mikafoday a salicay, sapipadikaw cingranan. (Marko 11:27-33; 12:13-34) Nohatini, tayraay ci Yis i roma pala no fangcalay sefi, maedeng tayraay cingra ino fafahiyan a kilac. Itira, maˈaraway ko pakiyahoan a hako. Maroˈay cingra, minegneng to tamdaw miparo to payci i hako. ˈAlomanay cihafayay adihayay ko miparoan a payci. Madeng mingataay cingra, matengilay ko talangtang sanay a honi no payci matefad i hako.

17. O misowalan i Marko 12:42 a manikaway maponengay midemakay to maanan?

¹⁷ ˈOsien ko Marko 12:42. Itiya, iraay ko cecay fafahiyan mikidatay to harateng ni Yis. O manikaway a maponengay cingra, pasangaray ko kaˈorip, awaayto ko sakafecol a kakaenen. Miingiday cingra i pakiyahoan a hako, awaay ko adeses a miparo to tosa laliping. Matefad koniya tosa laliping i hako i, awaay ko honi. Mafanaˈay ci Yis tosaay laliping ko miparoan ningra, o sasafaay a payci itiya konini. Oniya miming payci cowa ko papakacakay to cecay ˈalic, itini kakaenen a ˈayam, o samadoloay ko ˈalic.

18. Mikitini Marko 12:43, 44, samanay ko pinengneng ni Yis to demak noniya manikaway maponengay hani?

¹⁸ ˈOsien ko Marko 12:43, 44. Tada masemeray ci Yis toniya manikaway a maponengay, orato mitahidangay to nisawawaan, papinengneng cangranan to demak noniya fafahiyan. Sanay ci Yis: “Ikaka no niparoan no nimanima a tamdaw ko niparoan nonini a maponengay a pakoyoc a fafahiyan a payso.” Dotoc sanay ci Yis mitadtad: ‘Cangra (Oya cihafayay tamdaw) o nano rafas ko niparoan a payci, o nonini a maponengay cangoˈotay ko sakaˈorip, emin hananay ningra a miparo.’ Oniya madimadiay a fafahiyan mieminan ningra miparo i hako ko payci, malecaday o patorodan ningra ko ˈorip i kamay ni Yihofa, pakasoˈlinay cingra iraay ko madimadiay a olah ni Yihofa, o mamidimokos cingraanan.—ˈOlic 26:3.

19. Mikitini sowal ni Yis mananam ita ko maanan kalimlaan a kimad hani?

¹⁹ Sakadademaken ko minanaman. Ngaˈayay licayen ko niyah: “Mikitini sowal ni Yis mananam ako ko maanan hani?” Haratengen ko nafalocoˈan noniya maponengay. Madeng makalimay cingra adihay ko sapakiyaho, kawra mieminanto ningra a miparo, hanaca o sangaˈayay ko sapafeli ningra ci Yihofaan. Mafanaˈay ci Yis, o sapatafang ningra kalimlaan sanay ko pinengneng no kakarayan Wama. Mananamay ita ko maanan kalimlaan a kimad hani? Ano misarocod ko falocoˈ ato harateng ita midoko ci Yihofaan, o patafangay to sangaˈayay Cingranan, o mamahemek Cingra. (Matay 22:37; Kolosay 3:23) Maˈaraw ni Yihofa ko pisarocod ita, o mamahemek. Ano hakowato ko mihadakan ita a toki ato ˈicel a mirienang to saˈopo ato mitosil ato roma midokoay  a demak, ano misarocodayto, o mamasemer ci Yihofa.

20. Sasamaan kiso misakadademak toniya pakayniay manikaway maponengay a maˈoningay a pakalalok to tao hani? Tinakoen.

²⁰ Sasamaan kiso misakadademak toniya pakayniay manikaway maponengay a maˈoningay a pakalalok to tao hani? Haratengen, o cima ko papakalaloken iso a salikaka, pasowal cingranan to masemeray ci Yihofa to pisaˈicel ningra hani? Alatek mafanaˈay kiso to cecay matoˈasay fafahiyan a salikaka, samanen o tireng ningra cowato kalecad to saˈayaway, itini mitosilay tayal cowato kalecad o saˈayaway adihay, makesemay ko falocoˈ, awaay ko kapo no niyah saan miharateng. Anca mafanaˈay kiso to cecay faˈinayan salikaka, halafinayto misemsem to adada, awaay ko pakayraan micolok to saˈopo a mirienang, matoleday ko falocoˈ. Wa ngaˈay padamaen iso ko mahaenay a salikaka, pasowal cangranan to ‘pakalalokay a ngaˈayay sowal.’ (Ifiso 4:29) Ngaˈayay tano mananamay iso mikitini manikaway maponengay a maˈoningay a pakalalok cangra, fanaˈen cangra, ano misarocodayto a midemak, o mamahemek ci Yihofa. (Taneng 15:23; 1 Tisalonika 5:11) Ano samaanto a miming ko midemakan no tao, pakahemeken cangra patafang to sangaˈayay ci Yihofaan, o mikedecayto a mikotod to pasaripaˈan ni Yis.

21. Misetek kiso to falocoˈ samaan ko demak hani?

²¹ Tada miakoˈiday kita ci Yihofaan ngaˈay kita miˈosi to sepat Ratoh a Cudad, misongilaˈ a cipinang to hakelong no kaˈorip ni Yis, pasayra cingranan a minanam, mikedec a mikotod to pasaripaˈan ningra. Itini no tekedan picekiw anca pakalomaˈay pidoko i, micalep a micekiw to Ratoh a Cudad. Haratengen, sapilifokaw to epoc i picekiw, paˈoripen i ˈaˈayaw ko maˈoningay, sakadademaken ko minanaman. Cowa ko pinanam aca to demak ni Yis, misongilaˈho mitengeil to sowal ningra. Dotoc a lalakaw wa milengo, wa ngaˈay kita mikitini sowal ni Yis i ˈayaw no mapatay minanam to maanan?