1-2. O maanan ko sapatefoc? Hano misaali kita to sapatefoc?

CI ATAM nao malefotay a tamdaw, kawra ikor no mararaw cowato ka tahadaˈoc ko ˈorip, macapidayho ko teloteloc ningra. Padetengay ci Atam a mararaw, awaay ko tatodong a sododen. Kawra sasamaan ko teloc ningra hani? O awaay ko raraw nangra. (Loma 5:12, 14) O tatodong a patayen ci Atam, kawra o papadamaen ni Yihofa ko teloc ni Atam, paira to tahadaˈocay a ˈorip nangra han? Ikor no mararaw ci Atam, palidlid sanay ci Yihofa paihkal, wa samaan Cingra milidong to masacaˈolay masaemangay a teloc ni Atam miliyas to raraw ato patay. (Satapangan 3:15) Malaod ko misaˈosian ni Yihofa a toki, miocoran Ningra ko Wawa ningra tayni i hekel malatamdaw, ‘patafang to ˈorip, mala sapatefoc no ˈalomanay tamdaw.’—Marko 10:45 ato roma pihongyak; Yohani 6:51.

² O maanan ko sapatefoc? Itini Kirisiya a Cudad, mitoroˈan no sapatefoc o mihadakan ni Yis a sapiˈaca to malahdaway ni Atam. (1 Korinto 15:22) Hano misaali kita to sapatefoc hani? Samanen itini Rikec ni Mosi tano ˈorip a patefoc to ˈorip o masadafdafay a palinian. (Kasadakan 21:23, 24) O malahdaway ni Atam o malefotay a ˈorip, mansa patafang ci Yis to malefotay a ˈorip no tamdaw, mihaen ngaˈ matoor ko masadafdafay a palinian no Kawas. (Loma 5:17) Mihaenay, pakayni i pakasoˈlinay to sapatefoc a tamdaw, ci Yis malo ‘Midaˈocay a Wama’ nangra.—Isaya 9:6; Loma 3:23, 24.

3. Pakayni Yohani 14:31 ato 15:13, hano makahi ci Yis kinafalah to malefotay ˈorip no niyah?

³ Tangongolay ko olah ni Yis to kakarayan Wama, maolahayho kitaanan, mansa makahi kinafalah to ˈorip no niyah. (ˈOsien ko Yohani 14:31; 15:13.) Pakayni toniya olah, misetekay cingra to falocoˈ tahatolas a madimadi, tahira i patay,  milaheci to araaw no Wama. Mihaenay, wa masongilaˈ a malaˈosi ko nano araaw ni Yihofa to tamdaw ato cikiw. Oniya lalakaw wa milengo, hano haien no Kawas adihay ko semsem ni Yis a mapatay, milengoho to taˈarawan no misalimlaay to sapatefoc a mitiliday to Fangcalay Cudad. Salikor, wa minengneng kita, samaan ko demak o miakoˈiday ci Yihofaan ato kinafalah ni Yis, wa samaan kita mitongal to miakoˈiday a falocoˈ no niyah.

4. Tadtaden ko mifekaday a demak ino pipatay ci Yisan.

⁴ Haratengen hena, ˈayaw no mapatay ci Yis a romiˈad tahalifaay to maanan. Na ngangaˈay cingra misaali to Wama miocor to coyoh midipot cingranan, kawra cowa pihaen cingra. Milepel ko sofitay no Loma cingranan, mariˈang a misetiˈ cingranan, cowa picoˈay cingra. (Matay 26:52-54; Yohani 18:3; 19:1) Mipekpekan no sofitay cingra powarsa a masadak ko ˈirang i macinasay heci, dotoc patamorongan to karetengay a hecek i madokaˈay a kolol ningra. Pacieci han ni Yis mitamorong koya hecek tahira pipatayan a kitiraan, kawra caka halafin cato ka pakafilo ko tireng. Orato, pacieciyan no sofitay ko roma tamdaw a mitamorong to pisemseman hecek. (Matay 27:32) Tahira pipatayan a kitiraan, mipacekan no sofitay ko kamay ato waˈay ni Yis i pisemseman hecek. O kareteng no tireng ni Yis madeng micinasay to dokaˈ no kamay ato waˈay ningra, cato pakaemem to adada. Masomaday ko widang ningra, tomangicay ko wina ningra, kawra padotocay malikaf ko ˈaˈideman no pihakelongan. (Luka 23:32-38; Yohani 19:25) Toniya tatokian, matongalay ko adada. Ikor no pina toki, palidlid sanayto malonay ko falocoˈ ato falaˈ ningra, pasangarayto a saselaˈ. ˈAyaw no maketon ko selaˈ, mafanaˈay ci Yis malahciayto ko ˈinorong no niyah, orato mitolonay ci Yihofaan, dotoc ˈicekoy sanayto ko fongoh, maketon ko selaˈ. (Marko 15:37; Luka 23:46; Yohani 10:17, 18; 19:30) O kapatay ni Yis tada halafinay ko pisemsem, tada marorayayto, taˈangayay ko pipakangodo!

5. Pakaynien ci Yisan, o maanan ko katatiihan ningra hani?

⁵ Pakaynien ci Yisan, o katatiihan i cowa ko samanay ko pipatay cingranan, ao tano maanan a raraw ko sapipatay cingranan. Pakokotay ko tamdaw to ciraraway cingra to pakaditay a raraw, misakahmaway to Kawas ato fangcalay ngangan no Kawas sanay. (Matay 26:64-66) I ˈayaw, maharateng ni Yis paketingen to mahaenay raraw ko niyah, adadaay ko falocoˈ, tokel ningra to kakarayan Wama aka micada cingra to mahaenay a pipakangodo. (Matay 26:38, 39, 42) Mihaenay, hano haien ni Yihofa ko Wawa ningra misemsem ko kapatay hani? Nengnengen ita ko tolo a lalangian.

6. Hano pacaˈiten i pisemseman hecek ci Yis hani?

⁶ Salakat, papacaˈiten ci Yis i pisemseman a hecek, ngaˈ ngaˈay malidong ko Yutaya tamdaw miliyas to saˈkak no Rikec. (Kalatiya 3:10, 13) Mikiˈokay ko Yutaya tamdaw mamidofdof to Rikec no Kawas, kawra cowa pakatoor. Mihaenay, cowa ko pakayni aca i raraw ni Ataman, maˈkakayho no Rikec. (Loma 5:12) Misaˈosiay ko Rikec ni Mosi, ano ciraraw ko tamdaw to sakapatay a raraw, o papatayen, ikor papacaˈiten ko tireng i hecek *, sanayho ko rikec, o mapacaˈitay i hecek a tamdaw o miˈkakan no Kawas. (Limoˈot 21:22, 23; 27:26) Itiniay i hecek patayen ci Yis, o patadoay to Yutaya tamdaw micada toniya ˈkak, hato iraay ko toki noniya mifalahay cingranan a finacadan mikitini kinafalah ningra milifok to epoc.

7. O maanan ko sakatosa lalangian mihai ko Kawas misemsem ci Yis hani?

 ⁷ O sakatosa a lalangian mihai ko Kawas misemsem ci Yis i, pahatatanamay ci Yisan malo ngaˈayay a taˈangayay saysi noikor. Matinakoay ni Yis, itini pakidemay a sapalifet midofdof to Kawas cowa ko madoloay. ‘Cilosaˈay a miowaw’ ci Yis itiya, misaliyaliyaw mitolon to sadama no Kawas, tada taˈangayay ko macadaay a saroero. Na marorayay ci Yis, madeng cipinangay to saali ita, ano micada kita to sapalifet ngaˈay pafeli to sadama kitaanan. Siniˈadaay ko falocoˈ ni Yis, ‘ngaˈay siniˈada to kalonay ita,’ tada aakoˈiden ita ci Yihofa minilnil cingranan malo taˈangayay saysi ita!—Hipray 2:17, 18; 4:14-16; 5:7-10.

8. O maanan ko sakatolo lalangian mihai ko Kawas micada ci Yis to pakidemay sapalifet hani?

⁸ O sakatolo a lalangian mihai ci Yihofa misemsem ci Yis i, sapacaˈofaw to cecay kalimlaan a lacongis: Itini pakidemay sapalifet wa ira ko tamdaw ngaˈay mitafo to madimadi ci Yihofaan han? Awaay sanay ci Satan. Sowal ningra midoko ko tamdaw to Kawas mikitiniay misatekeday araaw sanay, o teloteloc ni Atam malecaday ci Ataman, cowa ko soˈlinay maolah ci Yihofaan sanay. (Yopu 1:9-11; 2:4, 5) Pakasoˈlinay ci Yihofa ci Yisan, mansa mihai cingranan micada to pakidemay sapalifet. Tahiraay i patay a madimadi ci Yis, misawacay to makaniway ko sowal ni Satan.

9. Itini maanan pakayraan patirengay ko tarokos ci Yohani to ngaˈayay taˈarawan no mita?

⁹ ˈAlomanay Krisciyang pakayniay sapatefoc a kimad matongalay ko tanektekay a pakasoˈlin. Soˈlin micada to pisafelit, kamayanho padotoc a mitosil, tahalifa to sapalifet ko kaˈorip ngaˈayayho mihadidi. O ngaˈayay ko tinakoan no tarokos ci Yohani. Tanektekay capisawad cingra a milasil to pakayniay ci Kristoan ato sapatefoc a kimad, mataˈlifay ko 60 miheca. Mangata ko 100 miheca i, o katalawan a tamdaw sanay ko pinengneng no mikowanay no Loma ci Yohanian, paholiwan i Patmos potipot. O manan ko raraw hani? O ‘pakayniay pilasil to demak no Kawas, misawacay ci Yisan.’ (Paˈarawan 1:9) Itini pakasoˈlin no falocoˈ ato mihadidiay patirengay ci Yohani to ngaˈayay taˈarawan no mita!

10. Mikitini mitilidan ni Yohani a cudad samaan mahapinang ita to misalimlaay cingra to sapatefoc?

¹⁰ Itini mitilidan ni Yohani a cudad, paihkalay to tangongolay ko olah ningra ci Yisan, ato pisaareteng to sapatefoc. Masowalay ningra a sapatefoc ato pairaan no sapatefoc a raheker mataˈlifay ko kina 100. Sanay ko sowal ni Yohani: ‘O cima mararaw to cecay liyad, itini kakarayan Wama iraay ko padamaay kitanan, oya moecelay a Yis Kristo.’ (1 Yohani 2:1, 2) Roma i, somowalay ci Yohani kalimlaan ko ‘pisawacay ci Yisan.’ (Paˈarawan 19:10) Awaay ko hasasa, misalimlaay ci Yohani to sapatefoc. Sasamaan ko demak ita, paihkal to mahecaday ko niyah cingranan hani?

11. O maanan ko papadama kitaanan micoˈay to sakayhid?

¹¹ Micoˈay to sakayhid, aka mararaw. Ano misalimlaay kita to sapatefoc, cowa ko mamiharateng to: “Awaay ko araaw ako mihadak to ˈicel micoˈay to sakayhid. Mararaw kako i, cangacang han ko Kawas misodod ngaˈayto saan.” Ano micada kita to sakayhid i, haenen ko harateng: “Cato kangaˈay, pakayni takowanan adihayayto ko mihadakan ni Yihofa aci Yis, hano ngaˈay kako pakatoled Cangranan, midemak to mahaenay a demak hani?” Dotoc, ngaˈayay cangacangen ita ci Yihofa pafeli to  ˈicel kitaanan, hoeca ka mapadik no sakayhid.—Matay 6:13.

12. Sasamaan kita misakadademak to limoˈot no 1 Yohani 3:16-18 hani?

¹² Maolah to salikaka. Maolah kita to salikaka, o paihkalay to misalimlaay koniyah to sapatefoc. Misamanay hani? Samanen cowa ko pakayniay aca ci Yis kitaanan, pakayniayho i salikaka ita kinafalah to ˈorip. Ano makahiay ci Yis pakayni cangranan a mapatay, madeng o kalimlaan cangra saan ko piharateng. (ˈOsien ko 1 Yohani 3:16-18.) Sangaˈayen ita micada ko salikaka, o paihkalay to olah cangranan. (Ifiso 4:29, 31–5:2) Tinakoen, ano adada cangra, tahalifa to sapalifet ato tahapades i, padamaen ita cangra. Kawra, ano midokaˈ kitanan ko sowal ato midemakan no salikaka, sasamaan ko hademak hani?

13. Hano mamakahi kita a misodod to salikaka hani?

¹³ Ano pakararaw ko salikaka kitaanan, itini han ita i falocoˈ minaˈeng, pasangaren a misodod cangranan han? (Lifi 19:18) Ano mahaenay, tengilen ko laenoay limoˈot: “Ano iraira ko katatiihan no falocoˈ no nima namo i cimaanan i, kasasihepol. Haenen o nipihepol ni Yihofa to raraw namo ko nika sasihepol namo to raraw.” (Kolosay 3:13) Kinacecay kita misodod to salikaka, o pasowalay to kakarayan Wama, soˈlinay kita miakoˈid to limasmas Ningra a sapatefoc. Samaan ko demak ita, wa matongal ko pisalimla to sapatefoc a sapatelong hani?

14. Samaan ko demak ita wa matongal ko pisalimla to sapatefoc?

¹⁴ Koˈiday ko sapafeli ni Yihofa a sapatefoc. Itini Intiya, cecay 83 ko mihecaan fafahiyan salikaka ci Ciyawanna. Sanay cingra: “To romiˈamiˈad mitolon kako masowalay ko sapatefoc, pakayni ko piakoˈid ci Yihofaan tada kalimlaan.” Mitolon kiso to romiˈamiˈad i ngaˈayay haratengen, anini mararaway kiso to maanan, dotoc cangacangen ci Yihofa misodod tisowanan. Manaokaniw, ano aretengay ko raraw iso, cangacangen ko sadama no malohemay malitengay. Wa makahi cangra mitengil to sowal iso, hanaca misalalangian to Fangcalay Cudad mihadak to limoˈot tisowanan. Malacafay cangra tisowanan a mitolon, micangacang ci Yihofaan misalalangian to sapatefoc a misodod tisowanan. Mihaen, wa ngaˈay masalof ko kalimlaan kalalaˈed iso aci Yihofaan.—Yakop 5:14-16.

15. Hano palaken ita ko toki misongilaˈ micekiw ato miharateng to milingatay to sapatefoc a demak?

 ¹⁵ Songilaˈen miharateng ko sapatefoc a limasmas. 73 ko mihecaan fafahiyan salikaka ci Raciyamani sanay: “Ano maˈosi ako samanay ci Yis a misemsem, tiloc sanay ko losaˈ.” Maharateng to hakowaay ko macadaay a roray no Wawa no Kawas pakayni kitaanan, wa masomad kiso alatek. Kawra ano dotimen ko kinafalah ni Yis, wa matongal ko olah ci Yisan ato Wama ningra. Ngaˈayay samacayen a micekiw ko sapatefoc a limasmas, misongilaˈ midotim toniya lalangian.

16. Pasifanaˈ kita to tao mafanaˈ to sapatefoc, wa ira ko maanan haepoc no niyah? (Nengnengen ko papotalay coka.)

¹⁶ Pasifanaˈ to tao cipinang to sapatefoc a limasmas. Ano pasowal kita to tao to pakayniay sapatefoc a demak, wa matongal ko pisalimla no niyah to sapatefoc. Mihadakay ko likakawa to ngaˈayay sapasifanaˈ ita a lalosidan, padama kitaanan pasayra i tamdaw mitadtad hano pakayni kitaanan a kinafalah ci Yis to ˈorip. Tinakoen, ngaˈayay saka dademaken ita ko Mikitiniay Kawas a Ngaˈayay Lihaf saka 4 fedengan noniya cudad “Cima ci Yis Kristo?” Ngaˈayay saka dademaken ko Mamananam Ita ko Manan Nai Fangcalay Cudad? Saka 5 fedengan noniya cudad “Samanay ko Kawas Milidong to Tamdaw?” To mihecahecaan mirienangay kita to piharatengan to kinafalah ni Yis a saˈopo, tawlikay mitahidang to tao kalacafay mirienang, mihaen wa matongal ko pisalimla ita to sapatefoc. Pafeliay ci Yihofa to hatoki ita pasifanaˈ to tao mafanaˈ to Wawa ningra, tada kalikoanto konini!

17. Misamanay, o sapatefoc o kalimlaan a sapatelong no Kawas i tamdaw han ko sowal hani?

¹⁷ Tada kalimlaan ko sapatefoc, adihayay ko lalangian ita misalimla toniya sapatelong. Pakayni sapatefoc, soˈlin cowa ko malefotay kita ngaˈayayho malawidang ci Yihofaan. Pakayni sapatefoc, kihcod a demak ni Akoma mamalahdaw maemin. (1 Yohani 3:8) Pakayni sapatefoc, mamalaˈosi ko araaw ni Yihofa toniya cikiw. Malaod ko toki, polong no cikiw mamalo lakoing, kahacecay tamdaw wa maolah ato midoko ci Yihofaan. O sapatefoc soˈlinay o kalimlaan a sapatelong no Kawas i tamdaw. Nanay mameten ita ko toki to romiˈamiˈad paihkal to miakoˈiday a falocoˈ.