Itini ˈayaw no mapatay ci Yis hano mihadak to sowal ni Tafiti i ˈOlic 22:1 hani?

Itini Matay 27:46 maˈoningay ko cecay sowal ni Yis i ˈayaw no mapatay, sanay cingra: ‘Kawas ako, Kawas ako, hano liyasen Iso kako?’ Mihaen ko sowal ni Yis, matatodongay to sowal ni Tafiti i ˈOlic 22:1. (Marko 15:34) Somowal ci Yis toniya sowal o matoleday cingra aka mihaen ko harateng ita, anca malahdaway to cecay liyad ko pakasoˈlinay falocoˈ saan. Masongilaˈay ko kacipinang ni Yis to hano kinafalah cingra to ˈorip, makahiayho a mihaen to demak. (Matay 16:21; 20:28) Mafanaˈay ci Yis, ano misiˈayaw cingra to patay i, o sasongilaˈen ni Yihofa paliyas to sadipot cingranan. (Yopu 1:10) Edeng mihaen ngaˈ, misawacay ci Yis, ano hakowato ko pisemsem, o tatahira i patay ko madimadi ningra ci Yihofaan.—Marko 14:35, 36.

Ano mahaenay i, hano pasowal ci Yis toniya sowal no ˈOlic hani? Cowa ka fanaˈ kita o manan ko lalangian, kawra laenoay fatac o lalangian alatek. *

Somowal ci Yis toniya sowal, o cowa ko lalidongen ni Yihofa cingra hoeca ka patay sanay han? O mamisadak ci Yis to sapatefoc, toniya tatokian, cowa ko dadipoten ni Yihofa cingra. Itiniho i fafekang no sera ci Yis o tamdaw, o kakinafalah cingra to ˈorip ngaˈ, ‘patado to tamdamdaw a mitanam to patay.’—Hipray 2:9.

Misakadademak ci Yis toniya sinael, wa padama to tao misaharateng to kihcod a lalakaw no ˈOlic 22 fedengan han? Itiya o nanaman no  Yutaya tamdaw misaharatengay to lalakaw no ˈOlic, mihaenay i, ano somowal to cecay sinael no ˈOlic, maharatengayto ko lalakaw no cecay a fedengan no ˈOlic. Ano o harateng ni Yis konini, misakadademak cingra to ˈOlic 22:1, soˈlinay o papadama to Yutaya a nisawawaan pakaharateng to milingatay to kapatay ningra a sapairasol itini ˈOlic. (ˈOlic 22:7, 8, 15, 16, 18, 24) Roma i, itini i saikor no ˈOlic 22 fedengan pakahemekay ci Yihofaan, somowal to mamikowan to paro no kakarayan cingra.—ˈOlic 22:27-31.

Misakadademak ci Yis to sowal ni Tafiti, mitadtaday to awaay ko raraw no niyah saan hokira? Itini ˈayaw no patayen, tahalifaay ci Yis to cowa ka tatodong a pisawkit, misaˈosi to pakaditay ko raraw saan. (Matay 26:65, 66) Itiniay i dadaya a misawkit ko hoing, hanaca cowa pitoor to limasmas no rikec a misawkit ci Yisan. (Matay 26:59; Marko 14:56-59) Mihaenay misakadademak ci Yis to sowal no ˈOlic 22:1, mitadtaday to awaay ko raraw no niyah saan alatek, hato mihaenay ko sowal ningra: ‘Kawas ako, Kawas ako, hano liyasen Iso kako?’

Soˈlin haien ni Yihofa micada to roray ko mitiliday to ˈOlic a Tafitian, kawra o cowa ka haydaen no Kawas cingra cowa ka saan. Mitokelay ci Yis masinanot no tao konini hokira? Mihaen ci Tafiti milicay ci Yihofaan, cowa ko cangoˈotay to pakasoˈlin. Ikor a sowal ningra paihkalay, pakasoˈlinay cingra to mamilidong ci Yihofa to finawlan Ningra, soˈlinay ci Yihofa padotoc a palemed cingranan. (ˈOlic 22:23, 24, 27) Malecaday, ‘teloteloc ni Tafiti’ a Yisan soˈlin misemsem i pisemseman hecek, o cowa ka haydaen no Kawas cingra cowa ka saan.—Matay 21:9.

Pakayni sapadamaaw ci Yisan misawacay to madimadi no niyah, o sasawaden ni Yihofa ko sadipot cingranan. Pakayni tonini hato masomaday ci Yis a mihadak toniya sowal hokira? Na cowa piharateng ci Yihofa to mamisemsem a mapatay ci Yis, ikor no mifekad ko mitowakangay a demak i Itin ngaˈ iraay koniya limasmas. Cowa ka raraw ci Yis, kawra o mamisemsem a mapatay cingra ngaˈ, masaysay ko mihadakan ni Satan a lacongis, hanaca mihadak to sapatefoc milidong to tamdamdaw. (Marko 8:31; 1 Pitiro 2:21-24) Sapalaˈosiaw toniya araaw, wa sawaden ni Yihofa a midipot ci Yis to cecay liyad, o sakinacecay eca ka dipoten ni Yihofa ci Yis konini.

Mitokelay ci Yis to nisawawaan misaharateng, o soˈlinay a lalangian ni Yihofa tano hatiniay a pakayraan mapatay cingra hokira? * Mafanaˈay ci Yis, tano mararaway a saaroˈan a mapatay i pisemseman hecek cingra wa pakapolin to ˈalomanay a tamdaw. (1 Korinto 1:23) Kawra ano cipinang ko nisawawaan ningra to soˈlinay a lalangian ningra mapatay, wa mahapinang to kalimlaan ko tatodong no kapatay ningra. (Kalatiya 3:13, 14) Mihaenay haw i, o milidongay a tatapangan cingra cowa ko mararaway a tamdaw wa saanto ko pinengneng nangra.

Ano o mananto ko lalangian ni Yis misakadademak to ˈOlic 22:1, maedeng mafanaˈay cingra patayen i pisemseman hecek ko niyah o araaw ni Yihofa konini. Misakadademak ci Yis to sowal no ˈOlic caka halafin, sanay ko sowal: “Malahciayto!” (Yohani 19:30; Luka 22:37) Awaay ko hasasa, paliyasan ni Yihofa ko sadipot ci Yisan to cecay riyad, ho ngaˈay masongilaˈ ko pilahci ni Yis to ˈinorong tayni fafekang no sera, ngaˈay matatodong ningra ko ‘polong matiliday i Rikec ni Mosi, pairasolay a cudad ato i ˈOlicay’ pakayniay cingranan a sowal.—Luka 24:44.