Ka adayayan, maedeng 13 ko mihecaan ako, palidlid sanay miliyas ci Yihofaan. Ano nengnengen ko cafay micudad hato pasalatay a lipahak, haratengay sanay midemak, makalimay kako malecad cangranan. O palinian no Fangcalay Cudad ato sarikec no wama wina tada pakidemayto saan kako miharateng, mitosil ato mirienag saˈopo tada marorayay kaˈisangan saan miharateng. Soˈlin cowa ko cisasa kako to iraay ci Yihofa, kawra awaayto i falocoˈ ako ci Yihofa.

Kawra, pakayni sapasadakaw to sahokok mitosil, sapaˈaraw aca midemak to miming, soˈlin malingaday mitosil cowa pisaday, mansa pasangaray masasowal to cilomaˈay. Telocto awaay ko milisoˈan, awaay ko pacekiwan. Tada kaˈisangan saan kako miharateng, palidlid sanay mapiliˈ mitosil. Miharateng kako, hano ira ko tamdaw makahi to lipalipay, folafoladan mitosil hani?

Itini 17 ko mihecaan sapisiekedaw kako, orato milosimet to dafong miliyas to lomaˈ, malinah tayra i Australia. Itiya, tada masomaday ko wama wina ako, calecemayho, kawra wa padadotoc kako midoko ci Yihofaan saan ko harateng nangra.

 Itini Australia, mangalefay ko tatiih no pakayraan ako. Marariday kako milawa to saˈopo. Malecaday ko mihecaan a widang mahaenay takowanan, masaˈopo anini, nocila tayra i pilawlaan komaen to epah ato makero. Tikolen miharateng nohatini, itiya malecaday o tosaay ko palinian ako, kawra itini hekal anca i kasakopang, awaay ko saaroˈan ako saan miharateng.

Maedeng ikor no 2 miheca, malitemohay ako ko cecay fafahiyan salikaka, soˈlin cowa ka fanaˈ cingra, kawra pakayraay cingranan ko sapiliyaw ako misimsim to patosokan no kaˈorip no niyah. Itiya malacafayay kako to lalima awaay ko ramod a fafahiyan salikaka. Itini pilisoˈan no kasakilac kanto a lipay, mitahidangay kami to kasakilac kantok ato fafahi ningra ci Tamala tayni lomaˈ niyam milafin. Itini pisaysayan no faˈinay to demak no kasakopang i, macacawmaˈay ci Tamala tamiyanan, malacafay misalama, tada lipahakay kako. Damsayay cingra, ngaˈayay ingiden. Caay ka harateng ako, fanekfekay midoko ci Yihofaan a fafahiyan salikaka ngaˈayay mihaen a misalama.

Fanekfekay ko falocoˈ ni Tamala, o olah ningra to soˈlinay kimad ato mitosilay midengaay to tao. Adihayay ko misadakan ningra pakayni ci Yihofaan, kawra lipahakay, mimingay ko mihadakan ako ci Yihofaan, kawra cowa ka lipahak. Matatodongay ko harateng ningra, mikitiniay i falocoˈ masadak ko lipahak, taˈangayay ko pifiyor takowanan. O ngaˈayay a taˈarawan ningra padamaay takowanan misatapang misimsim to kalimlaan a Kimad: Mitokelay ci Yihofa kitaanan “lipahak” midoko Cingranan, “tayra i ˈaˈayaw Ningra a romadiw.”—ˈOlic 100:2.

Makalimay kako malecad ci Tamalaan a lipahak, kawra misaaliay kako taˈangay ko pifalic. Soˈlin misaaliay koni to toki, kamayan kako palidlid saan misalof. ˈAyaw no mitosil misadayay kako, latekay panganganay to padamaay misakafahay, telocto cowato kalecad to saˈayaway a marawraw, pakasoˈlinay to niyah. Marariday kako mifohat to Fangcalay Cudad mitosil i tamdaw, matongalay ko karenec no falocoˈ. Caka halafin, malo padamaay misakafahay kako to folafoladan.

 Misatapangay kako micawmaˈ to cowa kalecad ko mihecaan a widang, oniya salikaka fanekfekay a matayal saki Yihofaan, hanaca lipahakay a midemak. O ngaˈayay taˈarawan nangra pakalalokay takowanan miharateng, o maanan ko sakakaay kalimlaan, padamaayho takowanan palahad to nanaman miasip to Fangcalay Cudad to romiˈamiˈad. Maolahmaolahay kako to mitosilay tayal, ikor malo miceriday misakafahay. Mataˈlif ko adihayay mihecaan, miliyaway a rihaday, lipahak ko falocoˈ ako, itini kasakopang iraay ko saaroˈan no niyah.

Ikor no cecay miheca, mafanaˈay kako ci Alikesan. Tada ngaˈayay koniya salikaka, soˈliˈlinay ko harateng, maolahayho ci Yihofaan ato mitosilay a tayal. O dama sikawdan cingra itiya, enemayto miheca misakafah. Na tayraay cingra i Malawi matayal, samanen misaaliay to adihayay mitosilay itira. O mikiriwiˈay nilnilen a mitosilay itira taˈangayay ko pilingat cingranan, pakalalokay cangra cingranan padadotoc paisalakat ci Yihofaan i nokaˈorip.

2003 miheca, mararamoday kako aci Alikes. Ikor no mararamod padadotocay kami malo mieminay to toki misakafah tahanini. Adihayay ko mahopeday niyam kalimlaan a nalifetan, o sapalemed ni Yihofa tamiyanan tada adihayayto.

2009 miheca, matahidangay kami tayra i Tongtion, itini potipot no Intonisiya kaemingay a kitakit malo mikiriwiˈay nilnilen a mitosilay. Itiya, macekiday mahemekay a calecem kami. Ikor no 5 folad, tayraay kami i Tili sataˈangayay niyaroˈ no Tongtion.

Pakayni tamiyanan, malinah tayra i Tongtion o taˈangayay a kafalic. Wa mananamho to faelohay serangawan, sasowalen, kakaenen ato kitiraan, Mitosil i, ˈalomanay malitemohay tamdaw sahto o manikaway, cowa ka hakowa ko picudadan, micadaayho to saroero. Roma i, o lalood ato mariˈangay demak midokaˈay to falocoˈ no ˈalomanay tamdaw. *

 Kawra, tada ngaˈayay itini mitosil. Kinacecayay, malitemohay ako ko cecay 13 miheca a fafahiyan, ngangan ningra ci Mariya. * Miceriday cingra makesem ko pising, samanen ˈayaw no pina miheca mapatayay ko wina ningra, cowa kararid maˈaraw ko wama. Malecaday o kahecadan ko mihecaan a wawa ci Mariya, maolatay ko harateng. Kinacecayay, tomangicay cingra pasowal takowanan, kawra cowaho kafanaˈ kako to sowal ningra, cowa ka fanaˈ to o manan ko misowalan ningra. Orato, micangacangay kako ci Yihofaan padama takowanan mafanaˈ to sasamaan pakalalok cingranan. Ikor, miˈosiay kako to pina ngaˈayay mihinom cingranan a sinael. Dotoc a pina miheca, maˈaraway ako ko pilingat no soˈlinay Kimad ci Mariyaan. O pising, waywayan ato kaˈorip ningra mafalicay maemin. Ikor micadaay to paputisem cingra, iraayto ko pacekiwan no niyah. Anini, itiniay i dihekoay a paro no lomaˈ no Krisciyang, matinakoay ni Mariya ko adihayay a olah.

Soˈlinay palemeden ni Yihofa ko mitosilay a tayal i Tongtion. Manaokaniw roma mitosilay itiniay i lalomaˈ no 10 miheca micada to paputisem, kawra adihay ko malo misakafahay, dama sikawdan, malohemany malitengay. O roma i, iraay ko salikaka itini RTO matayal, padama mihongyak to romaroma sowal a mitepangan cudad tora pala. Matengil ko radiw nangra itini kasaˈopoan, maˈaraw ko makapahay a pising nangra matawa, matongalay ko tanektek no pakasoˈlinay falocoˈ, tada mahemekayto kako.

O kaˈorip i Tongtion taˈangayay ko kasasiroma to Australia. Kawra pakayni takowanan i, awaay ko ikakaay tonini ko ngaˈay a kaˈorip. Latekay, mikalicay kami to mimigay a faso kalacafay to ˈalomanay tamdaw, mitatiway cangra to micakayan i icifa a foting ato adihayay a dateng. Latekay, itiniay i soemetay faedetay a lomaˈ pasifanaˈ to Fangcalay Cudad to tao, sahtoay o sera i laeno no waˈay, iraayho ko ˈayam misacikacikayay. Soˈlin cowa ko madoloay, kawra miharateng kako oniya kaˈorip tada ngaˈayayto!

Tikolen miharateng, tada miakoˈiday kako to wama wina misarocod a pasifanaˈ takowanan to palinian ni Yihofa. Padotocay cangra midama takowanan, soˈlin maliyangay kako i kaemangan, cowa pisawad takowanan. Mikitini nalifetan no niyah mahapinangay ako, matatodongay ko sowal i Taneng 22:6. Nohatini, maˈaraw no wama wina kako aci Alikes misarocod matayal saki Yihofaan, tada lipahakay, malikoayho. Mikitini 2016 miheca misatapanag, padotocay kami i Fenpo no Taypiyang a kilac malo milisoˈay ko tayal.

Cowa ka harateng, o mitosilay a tayal o karetengay a ˈinorong saan kako miharateng i saˈayaw. Anini tada maolahay kako mitosil! Mahapinangay ako, ano samaanto ko pakayraan, misarocod to falocoˈ ato harateng midoko ci Yihofaan ngaˈ, ira ko soˈlinay a lipahak. Mataˈlifay 18 miheca malacafay ci Alikesan matayal saki Yihofaan, o tada lipahak a tatokian i kaˈorip ako. Anini matinakoay ako, o sowal no mitiliday to ˈOlic ci Tafiti ci Yihofaan o matatodongay, sanay cingra: “Nikawrira, oya mikiˈadingay i Tisowanan a tamdamdaw i, nanay mararid cangra a lipahak a mahemek a romadiw. Nanay dipoten Iso koya maolahay i Tisowanan. Ta pakayni i Tisowanan ko sakalataˈang nangra a lipahak.”—ˈOlic 5:11.