1-2. (1) O cima ci Iunici? Malo wina, misiˈayaway cingra to maanan pasangaray pakayraan? (2) Sowalen hena mikitini potalay coka maˈaraway iso ko maanan.

 SOˈLIN cowa ka somowal ko Fangcalay Cudad to picada ni Timoti to paputisem, kawra cowa ka pasangar haratengen ita, madeng mahemekay ko wina ningra ci Iunici itiya! (Taneng 23:25) Haratengen hena, lipahakay ko pising ni Iunici minengneng to wawa tomireng i tahiniay i tatelecan ko tangongol a nanom, wina ningra ci Lois tomirengay i tatihi. Mitakecan ni Lois ci Iunici, matawaay cangra a masasiˈaraw. Paselaˈay a saselaˈ ci Iunici to noka rawraw, minengneng ci Timotian matolem i nanom. Masadak ci Timoti i nanom i, matawaay a lipahak ko pising. Toniya tatokian, cowa ka pakaˈemet ci Iunici to losaˈ i noka lipahak. Padadotocay ci Iunici pasifanaˈ to wawa maolah ci Yihofaan aci Yis Kristoan, o nano roray i adihayay mihecaan iraayto ko minaroˈan. Halafinay a tatokian, mamiremo cingra to maanan a pasangaray hani?

² Cowa ka hecad ko pihakelongan no wama ato wina ni Timoti. O Kirisiya a tamdaw ko wama ni Timoti, o wina ato fofo o Yutaya a tamdaw. (Dmak 16:1) Maedeng itini moetep ira ko pina ko mihecaan ni Timoti i, pakasoˈlinay ci Iunici aci Lois to Kristokiyo, kawra o wama ni Timoti cowa ka malo Krisciyang. O mihecaan ni Timoti ngaˈayayto ko niyah misaˈosi, wa mipiliˈ cingra to maanan hani? O pihakelongan no wama ko piliˈen ningra han? Wa padadotoc cingra midofdof to no kaemangan a nanaman no Yutaya han? Anca mipiliˈ malo nisawawaan ni Yis Kristo hokira?

3. Mikitini Taneng 1:8, 9, misarocod ko wina pasifanaˈ to wawa maolah ci Yihofaan, samaanay ko pinengneng ni Yihofa to mihadakan nangra a ˈicel hani?

³ Anini, malo winaay a Krisciyang mahecaday ci Iunician maolahay to paro no lomaˈ. Misaaretengan nangra i, padama to wawa patireng to kalawidang ci Yihofaan. Tada masemeray ci Yihofa to mihadakan nangra a ˈicel. (ˈOsien ko Taneng 1:8, 9.) Maharekayto Cingra padama to ˈalomanay a wina pasifanaˈ to wawa maolah ato midoko Cingranan.

4. Anini, malo winaay a Krisciyang misiˈayaway to maanan pasangaray a pakayraan hani?

⁴ Latekay, miharatengay ko malo winaay: “O wawa ako wa malecad ci Timotian mipiliˈ a midoko ci Yihofaan han?” Mihaen cangra calemcem, samanen mafanaˈay itiniay i hekal ni Satan ko wawa misiˈayaway to taˈangayay a saroero. (1 Pitiro 5:8) Roma i, ˈalomanay fafahiyan salikaka o awaay ko faˈinay a wina, anca cowa ka pidoko ci Yihofaan ko faˈinay nangra, mihaenay sapasifanaˈaw to wawa maolah ci Yihofaan o taˈangayay a sapalifet. O cecay fafahiyan salikaka ci Kristing b sanay: “O faˈinay ako o midimokosay to lomaˈ ngaˈayay a wama, kawra tada misafelitay cingra takowanan pasifanaˈ to wawa malo Misawacayay Tamdaw ni Yihofa. Toniya pina miheca, adihayay ko malakisay a losaˈ ako, marariday miharateng: O wawa ako wa ngaˈay midoko ci Yihofaan han?”

5. Onini a lalakaw mamilengo to manan?

⁵ O malo winaay a salikaka, wa ngaˈay kiso malecad ci Iunician malaˈosi ko pipasifanaˈ to wawa maolah ci Yihofaan. Onini a lalakaw mamilengo, o sasamaan kiso mitodong to pakaynian ningra i misowalan a sowal no niyah ato midemakan a demak pasifanaˈ to wawa, ato sasamaan ci Yihofa padama tisowanan.

6. Mikitini 2 Timoti 3:14, 15, samaanay ci Timoti malo Krisciyang hani?

⁶ Itini kaemangho ci Timoti i, misarocodayto ci Iunici pasifanaˈ cingranan ‘mafanaˈ to Fangcalay Cudad.’ Manaokaniw, o kacipinang ni Iunici to Fangcalay Cudad cowa ka rocek, samanen o pihakelongan no Yutaya a tamdaw ko minanaman ningra, pakayni ci Yis Kristoan awaay ko kafanaˈan. Kawra, o sapasifanaˈ ni Iunici patadoay ci Timotian patireng to taˈeneran, hato madoloayto cingra micada to pihakelongan no Kristokiyo. Kawra o mamalo Krisciyang ci Timoti han? Lomahad to cingra iraay ko fadangalan no niyah misaˈosi. Sowal no Fangcalay Cudad, ci Timoti ‘micadaay to sapasifanaˈ ngaˈ pakasoˈlinay’ to pakayniay ci Yisan a soˈlinay kimad, mahapinangay toniya demak iraay ko sapadama ni Iunici. (ˈOsien ko 2 Timoti 3:14, 15.) O ‘Iunici’ a ngangan itini Krisiya a sowal, tatodong i, ‘milowid.’ Soˈlinay pakalowiday cingra to pasangaray, malaˈosi ko pipadama ci Timotian malo maolahay ci Yihofaan a Krisciyang. Maedeng miakoˈiday ci Iunici ci Yihofaan.

7. Ikor no micada to paputisem ko wawa, ngaˈay ci Iunici samaan padama cingranan padotoc a macakat?

⁷ Soˈlin malaˈosiay ni Timoti ko patosokan micada to paputisem, kamayanho ci Iunici patado to wawa a calemcem. Saan cingra miharateng alatek: “Sasamaan ci Timoti misaka dademak to kaˈorip no niyah hani? Mamicawmaˈ cingra to tatiihay a widang han? Tatayra cingra i Atin micudad, misatapang pakasoˈlin to misafelitay to soˈlinay kimad a inaneng no tamdaw han? Wa coriyaˈ cingra to toki, ˈicel ato kaˈorip micangacang to hafay han?” Cowa kangaˈay ci Iunici patado ci Timotian misaˈosi, kawra wa ngaˈay cingra padotoc padama to wawa mitongal to olah ci Yihofaan, ato ira ko miakoˈiday a falocoˈ ci Yisan. Ano cowa pihakelong ko faˈinay, itini pipasifanaˈ to wawa maedeng adihayay ko masiˈayaway no fafahiyan salikaka a sapalifet. Kawra soˈlin o midokoay ci Yihofaan ko mararamoday, sapitemeraw to falocoˈ no wawa, padama cangranan madimadi midoko to Kawas, latekay cowa ko madoloay. Mikitini ci Iunician ngaˈay mananam no Krisciyang ko maanan hani?

8. Ano mihakelongay ko faˈinay, o fafahiyan salikaka sasamaan midama to faˈinay pasifanaˈ to wawa mafanaˈ to Kawas?

 ⁸ Malacafay to wawa minanam to Fangcalay Cudad. O fafahiyan salikaka maemin, ano o Misawacayay Tamdaw ni Yihofa ko faˈinay iso, makalimay ci Yihofa tisowanan padama to faˈinay pasifanaˈ to wawa mafanaˈ Cingranan. Ngaˈay kiso misamaan to demak hani? Cecay hapakayraan damaen ko cerid no pakalomaˈay a pidoko. Itini i kaˈayaw no wawa ngaˈayay tawlik milengo tonini a limasmas, ngaˈayay misaharaterateng sasamaan pairato sinowayay lipahakay a kalalengo. Anca ngaˈayay kiso malacafay to faˈinay misaday to cecay mikiriwiˈay a demak padama to wawa matongal ko kafanaˈ to Fangcalay Cudad, ano lomahadto ko wawa, ngaˈayto miˈosi to Layapen ko Midaˈocay ˈOrip! tonini a cudad, ngaˈayay kiso midama to faˈinay tano nini a cudad pasifanaˈ to wawa minanam to Fangcalay Cudad.

9. Ano cowa pihakelong ko faˈinay, o fafahiyan salikaka mikicowa a milifok to sapadama hani?

⁹ O roma fafahiyan salikaka o awaay ko faˈinay a wina, anca cowa pihakelong ko faˈinay, mihaenay itini lomaˈ o tatalaˈayaw cangra pasifanaˈ to wawa minanam to Fangcalay Cudad. Ano mahaenay ko pakayraan iso, aka pakidem ko cariraw, o papadamaen ni Yihofa kiso. Ngaˈay saka dademaken iso ko misadayan no likakawa no Kawas sapasifanaˈ a lalosidan, malacafay to wawa minanam to Fangcalay Cudad. Ngaˈayay licayen iso ko iraay ko nalifetan a wama wina, samanay cangra itini pakalomaˈay a pidoko misaka dademak tonini a lalosidan. c (Taneng 11:14) Roma i, ngaˈay kiso pasayra ci Yihofaan mitolon, micangacang Cingranan padama tisowanan ngaˈay ko kasasowal to wawa, misaka dademak to matatodongay a salicay cipinang to soˈlinay a harateng ato nafalocoˈan no wawa. (Taneng 20:5) Tinakoen, ngaˈayay milicay kiso: “Miharateng kiso itini picudadan pasangaray siˈayawen i, o maanan hani?” Mahaenay kantangay a salicay wa ngaˈayto ko wawa mihadak to nafalocoˈan a sowal alatek.

10. Wa ngaˈayho kiso tano maanan a pakayraan padama to wawa mafanaˈ ci Yihofaan?

¹⁰ Sangaˈen ko hatoki pasifanaˈ to wawa mafanaˈ ci Yihofaan. Ceriden ko wawa a milengo ci Yihofaan ato adihayay midemakan Ningra pakayni tisowanan. (Limoˈot 6:6, 7; Isaya 63:7) Ano cowa kangaˈay itini i lomaˈ micerid malacafay to wawa minanam to Fangcalay Cudad, kakiriwiˈen iso mikilim to toki malalengo to wawa ci Yihofaan. I fafekangay masowalay a Kristing: “O kalalengo ako ato wawa ci Yihofaan a toki cowa ka adihay, mihaenay mamameten ako ko kihcod a toki. Tinakoen, kako ato wawa malingad a romakat anca miˈiwas to tamina, toniya tatokian misaˈicelay kako ato wawa malalengo to kasapaan a misangaˈan ni Yihofa a dafong, ato paˈicelay to pakasoˈlinay falocoˈ no wawa a demak. Ano lomahadto cangra i, pakalaloken ako cangra o niyah sa miˈosi to Fangcalay Cudad.” O roma i, tawliken a milengo ko likakawa ni Yihofa ato salikaka, aka pitongangan to malohemay malitengay. O nano sowal iso papadama to wawa makahi itini i pisaalian a tatokian pasayra cangranan micangacang to sapadama.

11. Mikitini Yakop 3:18, itini i lomaˈ micowat to rihadayay hano masakalimlaan hani?

¹¹ Itini i lomaˈ micowat to rihaday. Micerid paihkal to maolahay kiso to faˈinay ato wawa, tano mikangodoˈay sidaˈitay a pakayraan milengo to faˈinay iso, halo pasifanaˈ to wawa mihaen to demak. Ano mihaen i, wa ngaˈayto kiso paira to rihadayay no lomaˈ, wa ngaˈayho padama tisowanan madolo pasifanaˈ to wawa mafanaˈ ci Yihofaan. (ˈOsien ko Yakop 3:18.) Nengnengen ko tinakoan ni Yusifu. Itiniay cingra i Romaniya malo mikiriwiˈay misakafahay, itini ka lomahadan ningra a tatokian, misafelitay ko wama cangranan sasepat malikaka ato wina midoko ci Yihofaan. Sanay ci Yusifu: “Adihayay ko mihadakan no wina ako a ˈicel, paira to rihadayay no lomaˈ. Ano mangalef ko tatiih no waywayan no wama, mangalefay ko ka damsay no wina cingranan. Ano mahapinang no wina eca pikangodo ato midofdof to wama kami i, malacafayay cingra tamiyanan milengo to Ifiso 6:1-3, dotoc milengoay cingra tamiyanan to kangaˈayan no wama, padamaayho tamiyanan cipinang hano citatodongay ko wama kangodoen niyam. Kinapinaay cingra parihaday to karawraw no paro no lomaˈ.”

12. Mikitini 2 Timoti 1:5, taˈarawan ni Iunici pakayni ci Timotian iraay ko manan a pifiyor hani?

¹² ˈOsien ko 2 Timoti 1:5. Pakayni ci Timotian patirengay ci Iunici to ngaˈayay a taˈarawan. Maedeng na pasifanaˈanto ningra ci Timoti, o soˈlinay a pakasoˈlin no falocoˈ pairaen ko malecaday a demak. (Yakop 2:26) Maedeng mahapinangay ni Timoti o saka ira no mahaenay a demak no wina, pakayniay ka tangongol no kaolah ci Yihofaan. Maˈaraway ningra ko lipahak no wina midoko ci Yihofaan. O taˈarawan ni Iunici samaanay mifiyor ci Timotian hani? O sowal no tarokos ci Pawlo, ci Timoti iraay ko malecaday to wina ci Iunician a pakasoˈlinay falocoˈ, cowa ko fahal sanay a demak konini. Mihapinangay ci Timoti samaanay ko nano demak no wina, mansa matemeray ko falocoˈ, sapitodongaw to taˈarawan no wina. Malecaday, anini ˈalomanay malo winaay salikaka pakayniay i waywayan mitemer to falocoˈ no paro no lomaˈ. (1 Pitiro 3:1, 2) O mamadangar iso konini! O manan ko pakayraan hani?

13. O malo winaay hano papaisalakaten i kaˈorip ko kalalaˈed no niyah aci Yihofa hani?

¹³ Wa paisalakaten i kaˈorip ko kalalaˈed no niyah aci Yihofa. (Limoˈot 6:5, 6) Maedeng malecaday kiso to romaroma a wina pakayni paro no lomaˈ adihayay ko kinafalahan. Sapisongilaˈaw midimokos to saali no wawa, kinafalahay kiso to toki, payci, kafotiˈan a toki, kawra cowa ko papakayni kiso kaˈifowa midimokos to wawa a kinafalah to kalalaˈed no niyah aci Yihofaan. Ka pilimasmas to toki, mararid mitolon, no tekedan picekiw ato mirienang to saˈopo. Mihaen ko demak iso papatanektek to kalawidang no niyah ci Yihofaan, wa patirengho to ngaˈayay taˈarawan no paro no lomaˈ ato romaroma tamdaw.

14-15. Mikitini i tinakoan ni Liana, Mariya aci Loan mananamay iso ko maanan?

¹⁴ ˈAlomanay kaemangay tamdaw pakayni i ngaˈayay a taˈarawan no wina mananamay to mamaolah ato mamitadiˈec ci Yihofaan. Nengnengen ko pina tinakoan. O wawa ni Kristing ci Liana sanay: “Cowa ka ngaˈay kami itini lomaˈ minanam to Fangcalay Cudad, kawra padadotocay ko wina mirienang to saˈopo cowa ka pisawad. Soˈlin citolasay ko kafanaˈ niyam to Fangcalay Cudad, kawra o paihkalan ningra a pakasoˈlinay a falocoˈ ato ngaˈayay a taˈarawan mitemeray to falocoˈ niyam, mihaenay i ˈayaw no misatapang kami mirienang to saˈopo, pakasoˈlinayto o soˈlinay kimad konini.”

¹⁵ O wama ni Mariya pakayni i pirienang to saˈopo ko paro no lomaˈ mariˈangay cangranan, sanay ci Mariya: “O wina ako o timoloay a salikaka. Kaemangho kako tada ciharatengay to samanay ko pinengneng no tao takowanan, mansa matalaway midemak to roma demak. Kawra maˈaraw ako tada timoloay ko wina, to cerid paisalakatan ci Yihofa, padamaay konini takowanan miremo to matalaway to tamdaw a harateng.” O wama ni Loan cowa kakahi malalengo ko paro no lomaˈ to milingatay ci Yihofaan ato Fangcalay Cudad a demak. Sanay ci Loan: “Sakakaay mitemeray takowanan i, sapakahemekaw to wama makahiay ko wina misawad to kihcod, edeng cecayay ko mikiriwiˈay, cowa ko mamisawad cingra to kaolah no niyah ci Yihofaan.”

16. O malo winaay patireng to ngaˈayay a taˈarawan, pakayni i tao wa ira ko masamanay a pilingat?

¹⁶ O haharatengen no malo winaay, o taˈarawan iso wa ira ko ngaˈayay pilingat to tao. Haratengen o taˈarawan ni Iunici samaanay ko pilingat to tarokos ci Pawloan. Sowal ni Pawlo ci Timoti iraay ko ‘soˈliˈlinay a pakasoˈlin,’ o wina ningra ci Iunici ‘isalakatay ira ko mahaenay a pakasoˈlin.’ (2 Timoti 1:5) Ihacowaay mahapinang ni Pawlo to iraay ko mahaenay a pakasoˈlin ni Iunici hani? Itiniay sakacecay ningra miliwko a mitosil alatek, itiniay i Losete maˈaraw ci Lois aci Iunici, halo padama cangranan a malo Krisciyang. (Dmak 14:4-18) Haratengen hena, maedeng mataˈlif ko 15 miheca, patikami ci Pawlo ci Timotian i, maharatengayho to iraay ko pakasoˈlinay falocoˈ ni Iunici, somowalayho o ngaˈayay todongen ko taˈarawan ni Iunici. Mahapinangay, ngaˈayay ko pilingat ningra ci Pawloan, pakalalokayho to itiyaay a romaroma Krisciyang. Ano o awaay ko faˈinay a wina kiso anca cowa ka pihakelong ko faˈinay, wa ngaˈay pakasoˈlin kiso, o madimadiay a taˈarawan iso o papakalalok to itihiay a salikaka.

17. Ano mihadakayto kiso to ˈicel awaayho ko minaroˈan, sasamaan ko pidemak iso hani?

¹⁷ Ano misaˈicelayto kiso pasifanaˈ to wawa, kawra awaayho ko ngaˈayay a minaroˈan nohatini, sasamaanto hani? Aka mapawan, pasifanaˈ to wawa misaaliay to toki. Nengnengen ko coka. Paloma kiso to cecay to sapaloma i, wa miharateng onini sapaloma o cacicengoˈ a lomahad, ira ko heci hokira. Manaokaniw, samaan ko teloc cowa ko kiso ko mamisaˈosi, kawra papadotoc kiso micefos to nanom, ho ngaˈay ko kalomahad no sapaloma. (Marko 4:26-29) Malecaday, o malo winaay, saan kiso miharateng alatek: “Wa soˈlin malaˈosi kako padama to wawa maolah ci Yihofaan han?” Soˈliˈlin sasamaan ko minaroˈan cowa ko mamaˈimer iso, kawra wa ngaˈay padadotoc kiso misarocod pasifanaˈ to wawa, pafeli cangranan to sangaˈayay a kalomahadan, ho ira ko toki nangra malo widang ni Yihofa.—Taneng 22:6.

18. Sasamaan ci Yihofa padama to wawa iso malo widang Ningra hani?

¹⁸ Mikitini nolitengan tahanini, ˈalomanayto ko mapadamaay ni Yihofa a wawa malo widang Ningra. (ˈOlic 22:9, 10) Ano makahi ko wawa iso, wa ngaˈay ci Yihofa padama cangranan palahad to tangongolay kalawidang Cingranan. (1 Korinto 3:6, 7) Soˈlin caka ciharateng cangra midoko ci Yihofaan nohatini, wa kamayan Cingra padotoc a ciharateng cangranan. (ˈOlic 11:4) Ano paihkal cangra to miming ‘matatodongay a waywayan’ i, o papasayra ci Yihofa cangranan milayaˈ to kamay no widang. (Dmak 13:48; 2 Rayray 16:9) Itini i matatodongay a tatokian padama Cingra tisowanan somowal to matatodongay a sowal, o sowal iso itiya o kaolahan no wawa a mitengil. (Taneng 15:23) O mamikayat Cingra to cecay salikaka i kasakopang ciharateng to wawa iso alatek. Lomahadto ko wawa iso i, o papadamaen ni Yihofa cangra miharateng to nano sapasifanaˈ iso cangranan a soˈlinay kimad. (Yohani 14:26) Padadotoc kiso pakayni sasowalen ato waywayan misongilaˈ pasifanaˈ to wawa, o papalifonen ni Yihofa kiso.

19. Hano ngaˈay kiso pakasoˈlin to mamilifok ko niyah to pihayda ni Yihofa?

¹⁹ Ano o mananto ko mipiliˈan no wawa iso, cowa ko mamafalic ko olah ni Yihofa tisowanan. Maolah Cingra tisowanan samanen maolahay kiso Cingranan. Ano cecayay kiso palahad to wawa, mikiˈokay ci Yihofa o mamalo Wama no wawa iso Cingra, o mamalo ‘midipotay’ tisowanan. (ˈOlic 68:5) Awaay ko pakayraan iso miˈimer to mipiliˈan no wawa, kawra ano padadotoc kiso mitadiˈec to sapadama ni Yihofa, misarocod a midemak, o mamalifok iso ko pihayda Ningra.