Sapafeli to Waco a Epang
ITINIAY i Elekang no Padaka ci Nike saan ko sowal: “2014 miheca kacanglahan, misatapangay kako i ngata no lomaˈ ako a pararakat to waco. Tocerid itiraay ko Misawacayay Tamdaw ni Yihofa miteli to sapisawacay a paliding, sanengsengay ko caˈedong nangra, damsay a masedi ko pising to mitaˈlifay a kahacecay tamdaw.”
Cowa ko tamdaw aca ko damsayan no Misawacayay Tamdaw ni Yihofa, misangaˈayayho to waco ako. Cecay romiˈad, tomirengay i tatihi no sapisawacay a paliding a Ilin mialaay to epang pakaen to tosa a waco ako, kahenayay mafanaˈ ko waco ako tonini a ‘kilac no epang.’ Ano tahirato ko rakat i, tengteng sanay ko waco takowanan tayra a misaali to epang.
Mataˈlif ko cecay a liyad, lipahakay ko waco ako a komaen to kahacecay, sinowayay kako masasowal to itiraay a Misawacayay Tamdaw ni Yihofa, kawra cisasaayho ko waywayan ako. 70 to ira ko pina ko mihecaan ako, hanaca cowa kafanaˈ kako to pihakelongan no Misawacayay Tamdaw ni Yihofa. Na tayraay kako i cowa ka lecad a kiyokay isaˈayaw, patoleday takowanan, mansa o niyah sa ko miˈosi to Fangcalay Cudad ngaˈayto saan ko harateng ako.
Toniya tatokian, itini roma a kitiraan no niyaroˈ maˈaraway ko Misawacayay Tamdaw ni Yihofa ato sapisawacay a paliding nangra, sahtoay o damsayay cangra. Ano mihadak kako to salicay i, tano Fangcalay Cudad cangra a pacaˈof. Mihaenay i, palidlid saan rihaday ko falocoˈ ako cato katalaw cangranan.
Kinacecayay milicayay ci Ilin takowanan: “O pinaˈorip o sapakaolah no Kawas to tamdaw sanay kiso miharateng han?” Saan ko sowal ako: “Hayi!” Panengnengay takowanan ci Ilin to Isaya 11:6-9. Mitemeray to falocoˈ ako konini. Kawra, itiya kako caayho ka sapicadaaw to cudad nangra.
Dotoc a pina romiˈad, ci Ilin ato faˈinay ningra padadotocay a masasowal takowanan to Fangcalay Cudad. Soˈlin cowa ka halafin ko toki, kawra kahemekanto. Painiay cangra, ngaˈay kako o niyah sa ko miˈosi to Matay tangasa i Dmak a cudad, cipinang to o soˈlinay a mikotod ci Kristoan a tamdaw o masamaanay. Mihaenay kako a midemak. Cowa ka halafin, misatapangay kako malacafay ci Polontean aci Ilinan minanam to Fangcalay Cudad, itiya o kafaedetan no 2016 miheca.
“Halamhamay kako to lipalipay a minanam to Fangcalay Cudad, halamhamayho tayra i Hongti Kitakit Kasaˈopoan mirienang to saˈopo. Tada palipahakay ko soˈlinay kimad no Fangcalay Cudad takowanan, mitemerayho to falocoˈ ako. Ikor no cecay miheca, micadaayto kako to paputisem malo Misawacayay Tamdaw ni Yihofa. 79 ko mihecaan ako nohatini, mafanaˈay kako romakatay ko niyah to matatodongay a lalan. Palemedan ni Yihofa kako, padama takowanan masalalomaˈ no paro no lomaˈ Ningra, tada miakoˈiday kako Cingranan.”
