▪ Itini mahaenay a pakayraan, o pinengneng no kasakopang i, miliyaw ciramod ko cecay tamdaw ya isalakatay a raramod ningra mahererekayto, hanaca onini a faelohay a raramod ningra iraay ko sapiˈimer a ˈicel. Sakacipinangaw to hano mihaen ko sapitolas ita a sowal, nengnengen samaanay ko sowal ni Yis pakayni milicinowasay to raramod ato miliyaway ciraramod.

Itini i Matay 19:9 mihadakay ci Yis, dengan o mihaydaan no Fangcalay Cudad malalicinowas a lalangian o maanan. Sowal ningra: ‘Ano caay ko nikaˈodangan no fafahi ko sapisawad no faˈinay to fafahi ningra ta cifafahi to roma i, o maˈaˈodangay cingra.’ Mikitini sowal ni Yis, ngaˈay mahapinang ita (1) o maˈodangay o dengan a lalangian mihaydaan no Fangcalay Cudad sakalalicinowas to ramod, (2) o cecay a tamdaw ano cowa ko mihaydaan no Fangcalay Cudad a lalangian milicinowas to fafahi, ikor miliyaw ciraramod to roma tamdaw, o maˈaˈodangayto. a

Sakoniya sowal ni Yis, mikitini i pinengneng no Fangcalay Cudad, maˈaˈodang ko faˈinay ikor milicinowas to fafahi, irato ko pasalat miliyaw ciraramod hokira? Awaay ko pinang. O cecay tamdaw ano maˈaˈodang i, o makoracay a ramod ningra o mamisaˈosi to mamisodod cingranan hokira. O makoracay a ramod ano misaˈosi caka pisodod cingranan, hanaca maharekto midemak to kalalicinowas, ikor masongilaˈ ko kalalicinowas nangra, wa irato ko pasalat nangra miliyaw ciramod.

Roma pakayraan i, o makoracay a ramod sapadadotocaw to raramod alatek, hanaca makahi a misodod to faˈinay. Kawra caka makahi ko faˈinay micada to ngaˈayay a harateng no fafahi, hanaca o niyah sa ko misinsi milicinowas, sasamaanto hani? Ano makahiay ko fafahi misodod to faˈinay, makahiho padadotoc to raramod, mihaenay mikitini pinengneng no Fangcalay Cudad, soˈlin licinowasen no faˈinay ko fafahi, awaay ko pasalat miliyaw ciramod. Ano awaay ko pasalat no faˈinay miliyaw ciramod i, pacieci sa ciramod to tao, o miliyaway aca cingra maˈaˈodang. Itini mahaenay a pakayraan, o mamiiingto ko kasakopang cingranan.—1 Korinto 5:1, 2; 6:9, 10.

O cecay a tamdaw ano misafelit to safalod no Fangcalay Cudad, itini i awaay ko pasalat a pakayraan miliyaw ciramod ato roma tamdaw, sasamaan ko pinengneng no kasakopang to iˈayaway a raramod ningra ato aniniay a raramod hani? Mikitini pinengneng no Fangcalay Cudad, oya iˈayaway a raramod ningra kamayan ira ko epoc han? O makoracay a tihi wa ngaˈayho misaˈosi to sasododen cingra hokira? O pinengneng no kasakopang to faelohay a raramod ningra o maˈaˈodangay a kalalaˈed wa saan han?

O kacipinang ita isalakat i, ano maˈoripayho koya makoracay a tihi, cowa piliyaw ciramod, awaay ko maˈodangay a demak, o pinengneng no kasakopang to faelohay a ramod noya cowa ka madimadi a tihi o maˈaˈodangay a kalalaˈed. Kawra, milengo ci Yis to milicinowasay ato miliyaw ciramod a demak i, cowa kasomowal to makoracay a tihi. O sowal ningra ano awaay ko mihaydaan no Fangcalay Cudad a lalangian milicinowas to fafahi, ikor miliyaw ciramod, malecaday o maˈaˈodangay. Itini i mahaenay a pakayraan, milicinowas ato miliyaw ciramod mahererekayto ko iˈayaway a raramod.

 O cowa ka madimadi a tihi milicinowas ato miliyaw ciramod a demakan mahererekayto ko kalalaˈed to iˈayaway a raramod, o makoracay a tihi caayto ko mamipiliˈ misodod anca caka pisodod to tatihi. Mihaenay, cowato ko papakayni tonini pasangaray a sasaˈosien a micada to taˈangayay a saroero. O roma i, oya makoracay a tihi ikor mapatay hokira, miliyaw ciramod anca iraay ko madadiˈiyay a demak, cowa ko mamifiyor to sasamaan ko pinengneng no kasakopang to cowa ka madimadi a tihi ato faelohay a raramod. b

I fafekangay a tinakoan a maˈaˈodangay ko faˈinay hato mikayatay to sakalicinowas, kawra ilaenoay a pakayraan samaanay hani? Tinakoen, cowa ka ˈaˈodang ko faˈinay, mipiliˈay malalicinowas, ikor miliyaw a ciramod; tinakoen aca, ˈayaw no milicinowas ko faˈinay cowa ka ˈaˈodang, kawra ikor no milicinowas madadiˈiyay to tao, toniya tatokian makahiyay misodod cingranan ko iˈayaway a fafahi, kawra cowa kakahi cingra micada to ngaˈayay a harateng no iˈayaway a fafahi, kamayan mipiliˈ mararamod to tao. Itini i mahaenay a pakayraan, milicinowas ko faˈinay miliyaw aca ciramod o maˈaˈodangayto koni, pahererekay to iˈayaway a raramod. O faelohay a ramod ningra iraay ko saˈimer no sarikec. Mahaen o masowalay no Mikecolay 1980 miheca 5 folad 15 romiˈad 31 fiedac: “Nohatini patirengayto cingra to faelohay a raramod, awaay ko pakayraan palasawad mitikol to isalakatay a pakayraan; o kalalaˈed no raramod isalakat pakayniay i noka laliyas, maˈaˈodang ato miliyaw ciramod a mahererek.”

Soˈlin misalofanto ko pinengneng ita, sa koniya sowal cowato ka fangcal ko raramod cowa ka saan, anca cowa ka pakidem ko maˈaˈodangay a raraw. O cecay tamdaw ano awaay ko mihaydaan no Fangcalay Cudad a lalangian milicinowas to fafahi, ikor misafelit aca to safalod no Fangcalay Cudad, itini awaay ko pasalat miliyaw ciramod a pakayraan ciramod to roma tamdaw, o kasakopang papakayni i maˈaˈodangay a raraw ningra patireng to miiingay. (O faelohay a fafahi ningra ano o Krisciyang i, o papakayni i maˈaˈodangay a raraw micada to piiing no kasakopang.) Soˈlin o faelohay a raramod cowa ko maˈaˈodangay a kalalaˈed saan ko pinengneng, kawra o mahaenay a tamdaw awaay ko tatodong milifok to mikiriwiˈay a tayal i kasakopang, ano halafinto a mihecaan, o roma tamdaw cowa ko papakayni i saˈayaway a raraw ningra tatiih ko harateng, anca ngaˈayto miliyaw mikangodo cingranan saan, o kasacefang no malohemay malitengay wa miliyaw misimsim to tatodong ningra alatek. Roma i, na tano misaˈfitay a pakayraan misafelit to ˈayaway a fafahi, mifalahayho to kaemangay a wawa no niyah, mansa ano misaˈosi ko malohemay malitengay o ngangaˈay pafeli cingranan to maanan mikiriwiˈay a tayal i, mamisinanot to pakayraan no iˈayaway a fafahi ato wawa ningra nohatini.—Malaki 2:14-16.

Cecay Krisciyang ano awaay ko mihaydaan no Fangcalay Cudad a lalangian milicinowas to ramod, ikor miliyaw ciramod, tada pakidemay ko teloc. Mihaenay, papairaen no Krisciyang ko pinengneng ni Yihofa, o fangcalay ko kalalaˈed no raramod han ko pinengneng.—Patnakay 5:4, 5; Hipray 13:4.