1-2. (1) O cecay mikingkiway to siyakay a tamdaw samanay ko sowal hani? (2) Oniya lalakaw wa milengo to manan?

ANINI ˈalomanay tamdaw pakasoˈlinay ko niyah ci Yisan saan, kawra cowa ka soˈlin a mitengil midofdof to sapasifanaˈ ningra. (2 Timoti 4:3, 4) O cecay mikingkiway to siyakay a tamdaw itini mitilidan a cudad sanay cingra: “Ano mahadak ko saka tosa a ‘Yis’ anini, o sasowalen malecaday to saka cecay a Yis, aniniay a tamdaw wa malecad to ˈayaw no 2000 miheca a tamdaw mifalah cingranan han? Hai.”

² Itini fafekang no sera ci Yis, ˈalomanay tamdaw pakatengilay to sapasifanaˈ ningra, pakaˈaraway to midemakan ningra a kafahkaan demak, kawra kamayan caka kahi pakasoˈlin cingranan. Misamaanay? I fafekangay a lalakaw mifolfolay to sepat a lalangian, oniya lalakaw wa milengo to roma sepat a lalangian. Mihaenay, wa ngaˈay kita mihapinang to hano mapiliˈ ko roma tamdaw to soˈlinay Krisciyang anini, ato sasamaan kita midemak eca ka mahafikod no masakenaay a demak.

3. O roma tamdaw mapiliˈay to manan a demak ni Yis hani?

³ Itini fafekang no sera ci Yis i, makahiay macacawmaˈ to masakenaay a tamdaw. Na malacafayay cingra to cihafayay, iraay ko fadangalan a tamdaw komaen, kawra mipalakayho to adihayay a toki cingra kalacafay to manikaway, maroeroay a tamdaw. O roma tamdaw o “ciraraway” sanay ko pinengneng no ˈalomanay, kawra sidaˈitay ci Yis micada cangranan. Maˈaraw no misatakaraway a tamdaw tada mapiliˈay, miliclicay to nisawawaan ni Yis sanay: “Hano mikapot kamo to milisataay ato romaroma a ciraraway a tamdaw a komaen saw?” Sanay ko caˈof ni Yis: “O  tanoktokay a tamdaw i, caay ko papaisingen. Deng o adadaay ko papaisingen. O sakatayni ako i, caay ko mitahidangay to moecelay ko falocoˈ a tamdaw, o mitahidangay Kako to ciraraway a tamdaw a papipasasiyor to falocoˈ a pasayra i Kawas.”—Luka 5:29-32.

4. Mikitini sapairasol ni Isaya, o mamafanaˈ ko Yutaya tamdaw to sasamaan ko macadaay ni Misiya a pakayraan?

⁴ Samaanay ko sowal no Fangcalay Cudad? Itini ˈayaw no masadak ci Misiya, pairasolay ci Isaya paˈayawayto cowa ko mamicada ko tamdaw cingranan, sanay: ‘Misakahmaway ko pinengneng no tamdaw cingranan, kapiliˈen no tamdaw . . . Caay ka sapinengnengan ko tamdaw cingraan. Misakahmawan no tamdaw cingra, cowa ka pisaareteng ko pinengneng ita cingranan.’ (Isaya 53:3) Ano ‘kapiliˈen no tamdaw’ ci Misiya saan ko sowal no Fangcalay Cudad, mihaenay ano maˈaraway no saka 1 hahekalan a Yutaya tamdaw ko pisakahmaw no tamdaw ci Yisan, cowa ko fafahkaen ko harateng.

5. ˈAlomanay tamdaw anini samanay misakahmaw to finawlan ni Yihofa hani?

⁵ Anini iraay ko malecaday a demak han? Iraay. ˈAlomanay ˈaˈideman no pihakelongan mitokelay to cihafayay, cifadangalay, ˈakawangay ko picudadan a tamdaw mirienang to kiyokay nangra. Harateng nangra, soˈlin caka tatodong to palinian no Fangcalay Cudad ko waywayan nangra ngaˈayto sanay. Roma i, soˈlin fanekfekay ko finawlan ni Yihofa a midoko to Kawas, makapahay ko waywayan, kawra misakahmaway ko ˈaˈideman no pihakelongan cangranan, samanen awaay ko saaroˈan nangra toniya hekal. Na somowalay ci Pawlo, o mipiliˈan no Kawas a tamdaw oya ‘misakahmawan no tao.’ (1 Korinto 1:26-29) Kawra itini pinengneng ni Yihofa, o polong madimadiay midoko Cingranan a tamdaw sahtoay o kalimlaan.

6. Itini Matay 11:25, 26 paihkalay ci Yis to maanan a harateng hani? Wa ngaˈay kita samaan mitodong cingranan?

⁶ Samaan ko demak ngaˈ eca ka mahafikod? (ˈOsien ko Matay 11:25, 26.) Misakahmaway ko hekal tamdaw to finawlan no Kawas, aka a mafiyor no harateng nangra kita. Kafanaˈ, o misapoeneray aca a tamdaw ko patorodan ni Yihofa to demak Ningra. (ˈOlic 138:6) Ngaˈayay haratengen ita, pakaynian ni Yihofa i awaay ko taneng, ato sifanaˈ hananay no hekal a tamdaw, palaˈosi to adihayay kasapaan a demak.

7. Hano misamangahay ko Farisay tamdaw saan ko sowal ni Yis? Pakayni i sowal ni Yis samanay ko harateng nangra?

⁷ Timoloay ci Yis mirikec to ˈaˈideman no pihakelongan itiya, samanen misamangahay ko waywayan nangra. Tinakoen, sowal ni Yis misaaretengay cangra to samaan misawsaw to kamay sanay, kawra cowa ka ciharateng to samaan midimokos to wama wina. (Matay 15:1-11) Pakayni sowal ningra fahkaˈay ko nisawawaan ni Yis, milicayay cingranan: “Mafanaˈay kiso haw to nika keter no Farisay a mitengil tonini a sowal Iso?” Sanay ko caˈof ni Yis: “O caay ko nipalomaan no Wama ako i kakarayan a sapal i, o fafaˈnoten a maemin. Saka, pakoningra han cangra. O mapohaway a mikeriday cangra. Ano keriden no mapohaway ko mapohaway i, o mamatefad i refong a tatosa.” (Matay 15:12-14) Soˈlin misaˈadaay ko ˈaˈideman no pihakelongan ci Yisan, kamayan timolo ci Yis mihadak to soˈlinay a demak.

8. Somowalay ci Yis to maanan, paihkal to cowa pihayda ko Kawas to polong a pihakelongan?

⁸ Mitihedakay ci Yis to mararaway a sasowalen no pihakelongan. Cowa ka pasowal cingra sahtoay o mihaydaan no Kawas ko polong  a pihakelongan. Sowal ningra o sakatayra i sakalaˈafo a lalan kakahaday, ˈalomanay ko romakatay toniya lalan, kawra o sakatayra sakaˈorip a lalan kaemingay, mimingay ko pakahelaay tamdaw. (Matay 7:13, 14) Ihkalay ko sowal ni Yis, roma tamdaw o potal aca ko mangodoay, kawra cowa ko soˈlinay. Patalipaˈelalan ningra ko nisawawaan: ‘Ka piliyas to makaniway a pairasolay, tayra cangra tamowanan, matiya o cirikoˈay to katol no siri, ˈarawhan o mariˈangay a lokedaw ko lalomaˈ nangra. Pakayni minaroˈan nangra, wa ngaˈay mahapinang iso cangra.’—Matay 7:15-20.

9. Mitihedakay ci Yis to maanan mararaway kimad no pihakelongan hani?

⁹ Samaanay ko sowal no Fangcalay Cudad? Paˈayaway ko Fangcalay Cudad, wa fanekfek ko falocoˈ ni Misiya to sefi ni Yihofa. (ˈOlic 69:9; Yohani 2:14-17) Samanen iraay ko mahaenay a fanekfek, timoloay ci Yis mitihedak to kimad ato waywayan no mararaway pihakelongan. Tinakoen, pakasoˈlinay ko Farisay tamdaw to cowa ka patay ko saloˈafang no tamdaw, kawra malecaday o mafotiˈay ko mapatayay tamdaw sanay ci Yis. (Yohani 11:11) O Satukay tamdaw cowa pakasoˈlin to patikol maˈorip ko mapatayay, kawra patikolan ni Yis paˈorip ko ngaˈayay widang ci Lacarus. (Yohani 11:43, 44; Dmak 23:8) Harateng no Farisay tamdaw o kihcod a demak maharekayto ko Kawas milimasmas sanay, kawra paihkalay ci Yis, mamidoko to Kawas ngaˈayay ko kahacecay tamdaw mipiliˈ to mamidoko to Kawas hokira.—Matay 11:28.

10. Anini ˈalomanay tamdaw hano mapiliˈ kitanan hani?

¹⁰ Anini iraay ko malecaday a pasangaray han? Iraay. Mitihedakan ita tano Fangcalay Cudad ko mararaway a sasowalen no pihakelongan, mansa mapiliˈ ko ˈalomanay tamdaw kitaanan. Tinakoen, sapiontingaw to mihakelongay tamdaw, pasemseman no Kawas ko tatiihay tamdaw i cikok sanay. Kawra pasowalan ita ko tamdaw to o mangah konini, samanen o finawlan ni Yihofa kita, mafanaˈay kita o ciolahay Cingra. Roma i, cowa ka patay ko saloˈafang no tamdaw sanay ko misasingsiay, kawra mitoroˈan ita cowa ko mikitiniay i Fangcalay Cudad ko hatiniay a sowal, hanaca ano cowa  ka patay ko saloˈafang, awaayto ko epoc patikol maˈorip. Adihayay a kimad no pihakelongan sahtoay o maharekayto misaˈosi, kawra pasowalay kita to tamdaw, pafeliay ko Kawas to pasalatay i tamdaw, ngaˈay mipiliˈ to midoko cingranan hokira. Samanay ko harateng no ˈaˈideman no pihakelongan tonini hani? Tada maketeray cangra.

11. Pakayni sowal ni Yis i Yohani 8:45-47, mitokelay ko Kawas to finawlan Ningra samaan ko demak?

¹¹ Samaan ko demak ngaˈ eca ka mahafikod? Maolah kita to soˈlinay kimad, o papakasoˈlin ato midofdof to kimad no Kawas. (ˈOsien ko Yohani 8:45-47.) Aka malecad kita ci Akoma Satanan, tanekteken a midofdof ko soˈlinay kimad, eca pidemak to misafelitay to pihakelongan a demak. (Yohani 8:44) Palimoˈotay ko Kawas to finawlan Ningra “kaˈosien ko tatiihay, kaˈimer to ngaˈayay,” malecad o midemakan ni Yis.—Loma 12:9; Hipray 1:9.

12. ˈAlomanay Yutaya tamdaw pakayni kapatay ni Yis i pisemseman hecek, hano ecato pakasoˈlin cingranan hani?

¹² O maanan ko roma lalangian no Yutaya tamdaw mifalah ci Yisan? Sowal ni Pawlo: ‘Kita sa i, patenakay to mipatayan i hecek a Kristo. Pinengneng no Yutaya tamdaw, o mihafikoday a fakeloh konini.’ (1 Korinto 1:23) Pakayni kapatay ni Yis i pisemseman hecek hano ecato pakasoˈlin ko Yutaya tamdaw cingranan hani? Samanen pakayraen cangranan, o mapatayay i pisemseman hecek o ciraraway, tatihay ko demak, ecato ko ci Misiya sanay.—Limoˈot 21:22, 23.

13. Oya mifalahay ci Yisan a Yutaya tamdaw cowa pakasoˈlin to maanan hani?

¹³ Oya mifalahay ci Yisan a Yutaya tamdaw cowa pakasoˈlin to awaay ko raraw ni Yis, o mapakokotay, mapaolafay. O saˈakawangay hoing no Yutaya caloh sanay misawkit ci Yisan, cowa pidofdof to rayray no rikec a midemak, awaay ko masadafdafay. (Luka 22:54; Yohani 18:24) Cowa pitengil cangra to wacay a mitiyawca to demak, ‘mikilimay to makaniway a wacay pakokot ci Yisan, sapipatayaw cingranan.’ Ikor caka laˈosi koniya demak, mihalakaay mikitini i sowal ni Yis mikilim to dangoc. Mihaen ko demak nangra o misafelitay  to sarikec. (Matay 26:59; Marko 14:55-64) Patikol ci Yis maˈorip, oniya misawkitay a tapang tano linkim palofok toya mihimaway tadem a sofitay no Loma, papiyakayak to mangah, somowal to mitakawan no nisawawaan ni Yis ko tireng ningra.—Matay 28:11-15.

14. Pakayni kapatay ni Misiya, paˈayaway ko Fangcalay Cudad to maanan?

¹⁴ Samaanay ko sowal no Fangcalay Cudad? Soˈlin cowa ka fanaˈ ko ˈalomanay Yutaya tamdaw to mamapatay ci Misiya, kawra paˈayawayto ko Fangcalay Cudad, ci Misiya ‘wa kinafalah to ˈorip, tahira i patay, masalalomaˈ no ciraraway. Patado to ˈalomanay tamdaw mitamorong to raraw, patado to tamdaw micangacang to sakahepol no raraw.’ (Isaya 53:12) Mihaenay, awaay ko lalangian no Yutaya tamdaw pakayni pisaˈosi to raraw ato kapatay ni Yis, ecato pakasoˈlin cingranan.

15. O Misawacayay Tamdaw ni Yihofa samanen micadaay to maanan sakokot ato pipaolaf hato mikapiliˈan no roma tamdaw?

¹⁵ Anini iraay ko malecaday a pasangaray han? Iraayto. Mapaolafay mapakokotay ci Yis, marariday malifa no Misawacayay Tamdaw ni Yihofa ko mahaenay cowa ka sadafdaf a demak. Nengnengen ko pina tinakoan. Itini 20 hahekalan 30 tangasa 40 mihecaan, itini Padaka marariday kita tayra i hoing, paˈading to pasalat midoko to Kawas. Misaysay ko roma hankang to pakayraan ita, mahapinangay to misakakinihay kitaanan. Itini Kwipik no Kanata, makakafitay ko kiyokay ato mikowanay, misafelit to mitosilay tayal ita. Telocto ˈalomanay mitosilay pakayni pitenak to Hongti Kitakit no Kawas, milofoan i kapalitan. Itini Towic, ˈalomanay madimadiay a kapah mipatayan no Naci. Itini ngata mihecaan i Rowasiya, malalengo to tamdaw to Fangcalay Cudad o mitowakangay to mikowanay sanay, ˈalomanay salikaka misawkitan to ciraraway milofoan i kapalitan. Ono Rowasiya sowal a Faelohay Hekal Mihongyakan a Fangcalay Cudad pakayni pisakadademak to Yihofa a ngangan, o mitowakangay to mikowanay a cudad hananay nangra.

16. Pakayni 1 Yohani 4:1, hano caka ngaˈay kita pakasoˈlin to pakayniay i Misawacayay Tamdaw ni Yihofa a mangah?

¹⁶ Samaan ko demak ngaˈ eca ka mahafikod? Hapinangen ko soˈlinay demak. Itini kimad ni Yis i lotok patalipaˈelalay to nisawawaan, wa ‘tano masakenaay tatiihay a sowal mapaolaf’ cangra. (Matay 5:11) Oniya mariˈangay a mangah sahtoay mikitiniay ci Satanan. Misakadademakan ningra ko misafelitay miyakayak to mangah, midokaˈ to maolahay to soˈlinay kimad a tamdaw. (Paˈarawan 12:9, 10) Aka pakasoˈlin to mahaenay a mangah, aka matalaw anca mangiyangi ko pakasoˈlin no falocoˈ.—ˈOsien ko 1 Yohani 4:1.

17. O mifekaday a demak i ˈayaw no kinafalah ci Yis hano papalahdaw to pakasoˈlin no roma tamdaw hani?

¹⁷ Itini ˈayaw no kinafalah ci Yis a dadaya, pacakayan no cecay tarokos cingra, kina toloay capihayda cingranan ko cecay, polong a tarokos mifalahay cingranan milaliw. (Matay 26:14-16, 47, 56, 75) Cowa ka fahka ci Yis, maharekayto cingra pasowal to mamahaen ko mifekaday a demak. (Yohani 6:64; 13:21, 26, 38; 16:32) Maˈaraw no roma tamdaw wa malahdaw ko pakasoˈlin alatek, saan miharateng: “Ano mahaen ko demak no tarokos ni Yis, nimaan masalalomaˈ nangra kako hani?”

18. O mifekaday a demak i ˈayaw no kinafalah ci Yis matatodongay ko maanan sapairasol no Fangcalay Cudad?

¹⁸ Samaanay ko sowal no Fangcalay Cudad? ˈAyaw no pina soˈot miheca, maharekayto ci Yihofa pairasol, wa tano 30 linkim pacakayen no tamdaw ci Misiya. (Cikariya 11:12, 13) Somowalayho ko Fangcalay Cudad, o pacakayay  ci Yisan oya ngaˈayay widang ningra. (ˈOlic 41:9) Roma i, pairasolay ci Cikariya: ‘ˈOdisen ko pakaenay tamdaw, pakiyadi han maliwasak ko masafelaway a siri.’ (Cikariya 13:7) Ano maolah ko tamdaw to soˈlinay kimad, maˈaraw ko katatodong noniya sapairasol i tireng ni Yis cowa ko mamahafikod, ao mamatongal ko tanektek.

19. O maolahay to soˈlinay kimad a tamdaw pakahapinangay to manan soˈlinay a demak?

¹⁹ Anini iraay ko malecaday a pasangaray han? Iraay. Anini lintad, o roma na cinganganay i likakawa no Kawas a tamdaw miliyasay to soˈlinay kimad, malo mitowakangay to kimad, mihalakaayho misolot to tao mihakelong cangranan. Oniya tamdaw itiniay sinpon ato wangcan milasil to tatiihay lihaf, o makaniway ato mangah, paolaf to Misawacayay Tamdaw ni Yihofa. Kawra o maolahay to soˈlinay kimad a tamdaw cowa ko mamahafikod, ao mahapinangay ko katatodong no sapairasol no Fangcalay Cudad.—Matay 24:24; 2 Pitiro 2:18-22.

20. Samaan ko demak ita, cowato ko papakayra i miliyasay to kimad a tamdaw a mahafikod? (2 Timoti 4:4, 5)

²⁰ Samaan ko demak ngaˈ eca ka mahafikod? Sapadotocaw kita tanektek ko pakasoˈlin, wa micerid micekiw to Fangcalay Cudad, padotoc a mitolon, misarocod midemak to patorodan ni Yihofa kitaanan a demak. (ˈOsien ko 2 Timoti 4:4, 5.) Ano tanektek ko pakasoˈlin ita, soˈlin matengil ko tatiihay a safanaˈ pakayni Misawacayay Tamdaw ni Yihofa, cowa ko mamarawraw a maohot. (Isaya 28:16) Maolah kita ci Yihofaan, maolah to Fangcalay Cudad, maolahho to salikaka, cowato ko papakayra i miliyasay to kimad a tamdaw a mahafikod.

21. O ˈalomanay tamdaw soˈlin eca pitengil to milasilan ita a lihaf, wa kamayan pakasoˈlin kita to maanan hani?

²¹ Itini saka 1 hahekalan, mifalahay ko ˈalomanay tamdaw ci Yisan, pakayra cingranan a mahafikod. Kawra ˈalomanayho ko pakasoˈlinay mihakelong cingranan, iraay ko cecay itiniay hoing no Yutaya a tamdaw, mahawpayho ko ˈalomanay saysi. (Dmak 6:7; Matay 27:57-60; Marko 15:43) Anini, pinaay soˈot efan a tamdaw cowa ka pakayni ci Yisan a mahafikod. Misamanay hani? Samanen mafanaˈay ato maolahay cangra to kimad no Fangcalay Cudad. Matatodongay ko sowal no Fangcalay Cudad: ‘O maolahay to sarikec a tamdaw milifokay to rihaday, ano o mananto cowa ko papakahafikod cangranan.’—ˈOlic 119:165.