ˈALOMANAY tamdaw mafanaˈay to itiniay i nolitengan Icip, o faho a rengos maceriday sakadademaken sapitilid a cayliyaw. Nolitengan a Kirisiya ato Loma a tamdaw ora tilid mitilidan i faho a rengos.  *ˈAlomanay tamdaw cowa ka fanaˈ, o faho a rengos cowa ka sapisangaˈ aca mala kalidopak, ngaˈayho sapisangaˈ to tamina.

ˈAyaw no 2700 miheca masowalay no pairasolay a Isaya, o roma tamdaw itiniay i mililisay to ˈalo no Iciyopiya ko kitiraan. ‘Micocoran nangra ko tarokos mikalic to no faho a rengos a tamina a malingad.’—Isaya 18:1, 2

Mikingkiway to nolitengan a tamdaw mahapinang, itini lintad no Fangcalay Cudad a tamdamdaw soˈlinay tano faho a rengos misangaˈ to tamina. Pakayni minanam to Fangcalay Cudad a tamdaw cowa ko kafahkaˈan konini, samanen o Kawas ko mikayatay to tamdaw mitilid to Fangcalay Cudad. (2 Timoti 3:16) Mahapinangayho nangra ko manan hani? Makilimay nangra ko ihkalay a wacay, misawacay to nolitengan a Icip soˈlinay ira ko tano faho a rengos misangaˈan a tamina.

O patademan nolitengan a Icip iraay ko icafengay a coka ato mitoˈtoˈan, micokaan no tamdamdaw ko mahopeday a faho a rengos sapisangaˈ to tamina a demak. Miketonan no tamdamdaw kora faho a rengos a milolong a mikedec misoˈot. O ˈawakay noya rengos masasankakay, mansa makedecay a faloled. O cecay pakayniay Nolitengan a Icip a Cudad sanay, o mahaenay a tamina maedeng 17 kongce ko koˈedaw, tosa a tatihitihi no tamina 10 tahira 12 ko sapiˈiwas.

Itini fideloan no Nayil ˈAlo, icowacowa iraay ko faho. Roma i, o faho a tamina madoloay sangaˈen. Ikor, soˈlin misangaˈ to taˈangayay a tamina a cayliyaw sakakakaay o kilang, kawra oya mifotingay ato miˈadopay a tamdaw padadotocay tano faho a misangaˈ to mimigay a tamina.

Ira ko halafinay tatokian i, kamayan ko tamdaw sakadademak to faho a tamina. O cecay lalitengan no mitatiliday Krisiya ci Polotake, itini kongyen saka 1 tahira 2 hahekalan maˈorip. Mikitira lalomaˈ no mitilidan ningra mahapinang ita, i lintad ningra o faho a tamina maceriday manengneng.