Ora katalawan a dadaya mifalicay to hakelong no kaˈorip ako. mikitiya toya romiˈad, ciharatengayto kako saka cipinangaw to misangaˈay a Tatapangan. Itini ˈayaw no sapadotocaw ako pasowal toya mifekaday a demak i, pasowalen ako kamo to kaemangan ako a nalifetan, oniya nalifetan tangongolay ko pilingat takowanan. Ikor, sakafanaˈaw to kako to Kawas.

1937 miheca, itiniay kako i kaˈamis no Frans o Kaynan hananay misasikitangay a niyaroˈ hofocen. O wama ako o misasikitangay a tamdaw, mikitini cingranan mananamay ako malalok a matayal o masaka limlaan. O moecelay ko falocoˈ no wama, malingatay ningra kako. Manengneng ningra ko misikitangay a demak tada tatiihay. Marariday pakayni cangranan a talaˈayaw. Sapifalicaw to ngaˈayay ka dademakan, mikapotay ko wama itini i cecay lekakawa. Tawlikay midama no fadangalan no matayalay a demak. O roma i, o fokosi tano sowalay aca cowa ka midemak, tada maketeray ko harateng no wama. O kaˈorip no fokosi mikikakaay to kalo a tamdaw ko kangaˈay, misamsamay to maroray ko kaˈorip a misikitangay, pasayra cangraanan misaali to kakaenen ato payci. Tada mapiliˈay ko wama to waywayan  noniya fokosi, mansa cowa ka pilengo takowanan to pihakelongan, cowa ka somowal to Kawas.

Palidlid saan kako lomahad, misatapangay mapiliˈ to cowa ka sadafdaf a demak. Tinakoen, o roma tamdaw misakakinihay to roma kitakit a tamdaw, kawra maolahay kako malacafay to roma kitakit a wawa mihalama to mali. Soˈlinay i, o wina ako na itiniay i Polan, cowa ko Frans a tamdaw. Makalimay kako malecad o paro no lomaˈ, masadafdaf ko tamdamdaw.

1957 miheca, matahidangay kako mala sofitay, mansa itini kako i Aeciliya a lalotokan tahalalifa to katalawan a demak. Itiya miowaw kako ‘Kawasaw, lidongen kako’ ikor i, o masiˈayaway ako cowa ko adaˈ, o kohkohan a lofa! Sangaˈay sako harateng ako. Kawra, o lalood ato mifekaday toya dadaya a demak papisatapangay takowanan misolingaˈ misimsim to tatodong no hakelong no kaˈorip. Tinakoen, hano maˈorip kita? Ciharatengay ko Kawas kitaanan han? Wa ira ko dipayalay a tatokian han?

Ikor, pahanhan kako minokay minengneng to wama wina i, malitemohay ko cecay Misawacayay Tamdaw ni Yihofa. Pafelian ningra kako to cecay Fangcalay Cudad, minokay kako tayni Aeciliya ikor satapangay miˈosi. Ira kora cecay sinael tada maharatengay ako, itini Paˈarawan 21:3, 4. Sanay kora sowal: ‘O pakopangan no Kawas i lalomaˈay no tamdaw . . . sasisiten no Kawas ko cecacecay losaˈ nangra, awato ko patay, awato ko adada, tangic, roray.’ * Na cowa ka pakaˈaraw kako toniya sowal, o harateng i, “wa malaˈosi koniya sowal han?” Itiya i, na awaay ko fanaˈan ako to Kawas ato Fangcalay Cudad.

1959 miheca minokay to mala sofitay ikor, mafanaˈay kako to cecay ci Fulan Suwa a Misawacayay Tamdaw ni Yihofa, padamaen ningra kako cipinang to adihayay kimad no Fangcalay Cudad. Tinakoen, sakadademakan ningra ko sinael a mitadtad iraay ko ngangan no Kawas ci Yihofa. (ˈOlic 83:18) Pasowalay ci Fulan Suwa takowanan, itini fafekang no sera wa micowat ci Yihofa to moecelay, ho malo lakoing koninian a cikiw, palaˈosi to mikiˈokan Ningra itini Paˈarawan 21:3, 4. 

Matatodongay koniya kimad, mitemeray to falocoˈ ako, kawra tada maketeray kako to fokosi, sapikapoˈiaw cangranan, samanen o sapakafanaˈ nangra cowa ko kimad no Fangcalay Cudad! Itiya, o harateng no wama tada tangongolay ko pilingat takowanan. Cowa ka pihadidi kako, sapitangsolaw sanay kako a micoˈay toniya coka sadafdaf a demak.

Ci Fulan Suwa ato romaroma faelohay a kafanaˈan ako a salikaka hamaan a maketer sanay takowanan. Pasowlay cangra takowanan, o ˈinorong no Krisciyang cowa ko mamisawkit to tamdaw, ao mamifanaˈ cangranan to ngaˈayay lihaf no Hongti Kitakit no Kawas, pafeli cangranan to hatokel. Onini o nano demak ni Yis itini fafekang no sera, o sapatorod ningra to nisawawaan koniya ˈinorong (Matay 24:14; Luka 4:43) O roma hananamen ako i, ano o manan to ko pihakelongan no tamdaw i, ano masasowal cangranan i damsayen kangodoen, mahecad to misowalan no Fangcalay Cudad, ‘o koli no Tatapangan hamaan a malacongis, sadamsayen ko polong a tamdaw.’—2 Timoti 2:24.

Misalofto kako to pina a waywayan ikor i, itini 1959 miheca itini i kasakilac taykay micada to  paputisem. Itini i pitaykayan i, mafanaˈay kako to cecay fafahiyan a salikakak ci Ancila. Ngaˈayay ko harateng ako cingraanan, maolahay kako cingranan, ikor i, marariday kako tayra i kasakopan ningra mirienang to demak. 1960 miheca, mararamoday kami. Tada o ngaˈayay cingra a salikaka, ngaˈayay a fafahi, o masaka limlaan a sapatelong ni Yihofa takowanan.—Taneng 19:14.

Toniya pina miheca i, mikitini iraay ko taneng iraay ko nalifetan a salikaka, mananamay ako ko adihayay masaka limlaan a kimad. Ilaloma no cecay i: Sapihererekaw to pasangaray a ˈinorong, pairaan ko misapoeneray a waywayan, halo misaka dademak to safalod no Taneng 15:22, sanay koniya sinael: ‘Mihoped to ciepocay a harateng, wa malaˈosi ko demak.’

1964 miheca, mahapinangay ako oniya sinael i tada matatodongay ko sowal. Toya miheca, misatapangay kako mala kasakilac kantok milisoˈ to kasakopang, pakalalok to salikaka, padama cangraanan patanoktok to kalalaˈed ci Yihofaan. Itiya 27 ko mihecaan ako, cangoˈotay ko nalifetan, mansa iraay ko pina raraw. Kawra misaˈicelay kako micada to sarikec. Kalimlaan i, mikitira kako i citanengay adihayay ko milifetan a salikaka adihayay ko mananamay. Mihoped to ciepocay a harateng tada kalimlaan.

Maharatengay ako satapang malo kasakilac kantok i, mafekaday ko cecay a demak. Malaheci ako milisoˈ ko i Parisay cecay kasakopang ikor i, cecay matenesay faˈinayan salikaka milicayay takowanan wa ngaˈay kita masasowal han, ngaˈayay to han ako.

Milicayay cingra takowanan: “Lui, ano tayra ko ising i lomaˈ no tao i, cima ko ˈaˈarawen ningra hani?”

Pasowalen ako: “O ciadadaay a tamdaw.”

Pasowal cingra: “Matatodongayto. Kawra mahapinangay ako, o mipalakan iso a toki sahtoay itiniay i tanektekay ko pakasoˈlin no falocoˈ a salikaka, tinakoen ciˈinorongay midimokos to kasakopang a salikaka. Soˈlinay haw i, o kasakopanag niyam ˈalomanay ko faelohay micada to paputisem, kalingodoay anca matoleday ko falocoˈ a salikaka. Ano makahi kiso mipalak to toki mikalacafay cangraanan, anca tayra i lomaˈ nangra malacafay komaen, maedeng wa taˈangay ko hemek nangra.”

Matatodongay ko sowal noniya salikaka, ciepocay takowanan. Maˈaraw cingra tada maolahay to siri ni Yihofa, tada matemeray ko falocoˈ ako. Soˈlin kangodoanto, kawra tangsolay kako midoedo to misowalan ningra a midemak. Tada miakoˈiday kako ci Yihofaan, ira ko citanengay a salikaka padama takowanan.

 1969 miheca ato 1973 miheca, itini i Paris a Kelongpo kina tosaay ko koksay taykay. Itini toniya tosa a taykay, o ˈinorong ako mikayatay Misaday Tono Kakaenan a Kasakapot a tayal. Itini 1973 miheca a taykay i, wa misaday kami to lima romiˈad kakaenan no enem efan a tamdaw! Tada calemcemay kako, mafokilay to sasamaan ko demak. Toniya tatokian, itini Taneng 15:22 miliyaway padama takowanan misaysay toniya pasangar, ‘hopeden ko ciepocay harateng’. Milicayay kako to pina a salikaka, iraay ko nalifetan nangra. Iraay ko paˈacaay to titi a tawki, iraay ko misadatengay, iraay ko misacacakay, iraay ko miˈaˈacaay. Saikor, malacafayay kami milaheci toniya pasangaray a ˈinorong.

1973 miheca, kako ato fafahi ako matahidangay tayra i Frans Pitil a matayal. O macadaay ako a saka cecay a ˈinorong i, o cowa ko madoloay. Wa paonpang kako to cudad patayra i Afrika Komayrong a salikaka, o mitosilay a demak itini i 1970 miheca tahira i 1993 miheca o makecengay. Itiya miliyaway aca kako marawraw. O cecay mikayatay a salikaka to mitosilay a demak itini i Frans mahapinangay ningra, pakalalokay takowanan sanay: “Itiniay i Komayrong a salikaka ita tada misaaliay to sapahaled to pakasoˈlin no falocoˈ a kakaenen. Cowa ko papacahiwen kita cangranen.” Orato, midemakayto kami.

Kinapinaayto kako tayra i taliyok no kitakit no Komayrong, itiraay tora pala malalitemoh to i Komayrongay a malohemay malitengay, timoloay koniya salikaka matanengayho, itini sapadama nangra hato mala heciayto ako milimasmas, mapatahirayto i Komayrong ko cudad. Pakayni i sapalemed ni Yihofa malaˈosiayto ko kihecod a demak. I lalomaˈ no 20 mihecaan a tatokian, itiniay i Komayrongay a salikak cowa ka lawa nangra ko folafoladan a Mikecolay, ato Pakafoladay a salasil itiya.

Satapang makakaolah i, mahapinangayto ako ko adihayay capeling no Krisciyang ni Ancila. Oniya capeling i ikor no mararamod matongalay a  mahapinang. Tiya pakaetiman niyam a dadaya, papitolonay ci Ancila takowanan pasowal ci Yihofaan, kami mararamod makalimay misarocod matayal saki Cingraanan. Soˈlinayto a tengilen ni Yihofa ko satolon niyam.

O roma, samanen iraay ko sapakalalok ni Ancila, matongalay ko pitadiˈec ako ci Yihofaan. Tinakoen, isaka 1973 miheca matahidangay kami tayra i Pitil a matayal, satapang i cisasaay kako, samanen maolahay kako to milisoˈay a tayal. Kawra patalipaˈelalan ni Ancila kako, ano maherekayto kita patafang to tireng ci Yihofaan, mitahidang ko likakawa Ningra kitanan midemak to maan, coko mamihai kita mihaen to demak han? (Hipray 13:17) Mihaen ko sowal ningra, manaeca pihai kako saw? Mihaenay malingadayto kami tayra i Pitil. Tada ciharatengayto to tao ko fafahi ako, makahiay micaˈi, ira ko mahecaday ni Yihofa a pinengneng. Itini kalacafayan niyam a tatokian, o makapahay a capeling ningra, parahekeray to kaˈorip no raramod niyam, adihayay ko matanengay a pisaˈosi.

Nohatini, matoˈasayto kami, kamayan o ngaˈayay padamaay takowanan ci Ancila. Tinakoen, o likakawa ita adihayay ko sapahatatanam tano Padakaan a sasowalen a misikay, toha sapirienangaw toniya sapahatatanam, misatapangay kami misaˈicel minanam tono Padaka a sasowalen, mirienangho to cecay no Padaka ko sowal a kasakopang, itiya i, 70 ko mihecaan niyam. O iing no Frans a fenpo kako, adihayay ko tatayalen ako, mihaenay i mihadak to toki minanam to roma a sasowalen cowa ko madoloay, kawra madadamaay kami. 80 ko mihecaan niyam nohatini, kawra kamayan tano Padaka ato Frans a sasowalen misaday to lalakaw no saˈopo. O roma, misaˈicelay kami mirienang to saˈopo, ato malacafay to salikaka a mitosil. Misaˈicel minanam tono Padaka a sasowalen, malifokay ko sapalemed ni Yihofa.

2017 miheca, malifokayho niyam ko cecay taˈakayay a saka raheker, matahidangay kami tayra i Niwyok a Patterson Mikecolay Pahatatanaman, mirienang to Iing no Fenpo ato Fafahi a Pahatatanamay.

Ci Yihofa soˈlinayto o Kasapaan a Singsi. (Isaya 30:20) Mihaenay, o polong a finawlan Ningra milifokay to sangaˈayay a sapahatatanam. (Limoˈot 4:5-8) Maˈaraw ako ko pina kaemangay mitengilay to sowal ni Yihofa, pasayra i cinalifetan a salikaka minanam, mansa padadotoc a macakat, madimadi matayal saki ci Yihofaan. Matatodongay ko sowal itini i Taneng 9:9, sanay: ‘Pakafanaˈ to citanengay a tamdaw, wa matongal ko taneng ningra; Pakafanaˈ to moecelay a tamdaw, wa matongal ko sifanaˈ ningra.’

Nolatekay i, mitikolay kako miharateng to midemakan i ˈayaw no 60 miheca toya katalawan a dadaya. Itiya cowa ka harateng ako, itini ˈaˈayaw adihayay ko sapalemed mitalaay takowanan. Itini i hakelong no kaˈorip ako i, mikitini i tireng no tao adihayay ko mananamay ako! Pafelian ni Yihofa kako aci Ancila to kadofahay ciepocay a no kaˈorip, mihaenay misetekay kami to falocoˈ padadotoc minanam to i kakarayan a Wama, pasayra i citanengay iraay ko nalifetan a salikaka minanam.