1. Patirengay ci Yis to manan ngaˈayay a taˈarawan hani? Samanay ko demak no nisawawaan ningra hani? (Nengnengen ko papotalay coka.)

ITINI fafekang no sera ci Yis padotocay tawlik fanekfek a mitosil, mitokelay to nisawawaan tawlik a mitosil. (Yohani 4:35, 36) Ano kalacafay ci Yis to nisawawaan i, soˈlinay fanekfek cangra. (Luka 10:1, 5-11, 17) Kawra, tiya malepel ato patayen ci Yis i, malahdaway ko fanekfek no nisawawaan a mitosil. (Yohani 16:32) Patikol ci Yis maˈorip, pakalalokay to nisawawaan misarocod to mitosilay a tayal. Minokay cingra tayra kakarayan, soˈlinay fanekfek ko falocoˈ no nisawawaan a mitosil, ano oyato misafelitay a tamdaw mihaenay ko sowal, o milasilan nangra a kimad ‘miedefayto i Yirusalim.’—Dmak 5:28.

2. Samanen iraay ko sadama ni Yihofa, o mitosilay a tayal iraay ko maanan ngaˈayay minaroˈan?

² Itini saka 1 hahekalan, padotocay ci Yis mikayat to mitosilay a tayal no Krisciyang, midamaan ni Yihofa cangra, mansa ˈalomanay ko micadaay to soˈlinay kimad. Tinakoen, itini saka 33 miheca Kocinsic, maedeng 3000 ko tamdaw micadaay to paputisem. (Dmak 2:41) Ikor, padotocay matongal ko ˈaloman no nisawawaan. (Dmak 6:7) Kawra paˈayaway ci Yis, itini salikoray romiˈad, wa ikaka ko ˈaloman no micadaay to ngaˈayay lihaf.—Yohani 14:12; Dmak 1:8.

3-4. (1) O roma salikaka hano pasangaray ko mitosilay demak saan ko piharateng? (2) Oniya lalakaw wa milengo to manan hani?

³ Kita maemin pakayni mitosilay a tayal misaˈicelay mitafo to tawlikay waywayan. Itini roma pala, madoloay mihaen to demak, samanen ˈalomanay ko makalimay minanam to Fangcalay Cudad a tamdaw, o roma tamdaw misarayarayay mitala to cecay liyad ngaˈ misatapang minanam to Fangcalay Cudad, samanen ˈifowaay ko mitosilay. Kawra roma pala, pasangaran  nanay ko salikaka to mitosilay a tayal, samanen awaay ko i lomaˈay a tamdaw, soˈlin i lomaˈ cowa ka olah to Fangcalay Cudad.

⁴ Ano pasangaray i kilac iso a mitosil, o sapaini noniya lalakaw wa padama tisowanan. Wa minengneng kita, o roma mitosilay tano maanan pakayraan makilim ko ˈalomanay tamdaw. Milengoho, ano samaanto ko harateng no tao, hano iraay ko lalangian ita mitafo to tawlikay.

5. ˈAlomanay mitosilay misiˈayaway to manan a pasangaray hani?

⁵ Pasangar pasangaray mahela ko cilomaˈay sanay ko ˈalomanay mitosilay. Itini roma kilac, adihayay ˈakawangay lomaˈ anca kitiraan maˈedefay ko fawahan, iraay ko mikacaway, ano cowa ko mitahidangan no cilomaˈay pasangaray micomod. Roma kilac, ngaˈayay pakalomalomaˈ ko mitosilay, kawra awaay ko i lomaˈay. O roma salikaka itiniay inaka anca maraayay a kilac mitosil, adihayay ko mapalakay a toki ngaˈ tahira i cecay lomaˈ, ˈarawhan awaay ko ilomaˈay. Ano mahaen ko pitosilan ita a kilac, aka a pisawad. Sasamaan kita miremo to mahaenay pasangaray, paira to epoc a mitosil hani?

6. O mitosilay tayal hano malecaday o mifotingay hani?

⁶ Patinakoan ni Yis ko mitosilay tayal to mifotingay. (Marko 1:17) O roma mifotingay pinaay romiˈad awaay ko malepelay a foting, kawra cowa pisawad cangra, misalofan ko pifotingan a toki, kitiraan anca pakayraan. Itini mitosilay a tayal wa ngaˈay kita misalof. Nengnengen ko laenoay sapaini.

7. Mitanam kita i caay kalecad a toki mitosil, wa ira ko maanan ngaˈayay minaroˈan hani?

⁷ Mitanam i caay kalecad a toki milisoˈ to cilomaˈay. Ano itini kita ka ilomaˈan no tamdaw a toki milisoˈ cangranan, wa adihay ko malitemohay a tamdaw, samanen o maminokanokay aca ko tamdaw. Mahapinangay no ˈalomanay salikaka ano kalahokan anca dadaya a mitosil, ˈalomanay ko mahelaay a tamdaw, hanaca o kasinowayan no cilomaˈay a tatokian konini, makahiay masasowal. Cecay malohemay malitengay ci Taywi *, o pakayraan ningra wa ciepoc tisowanan alatek. Cingra ato cafay itini cecay kilac pakalomaˈ mitosil to cecay tosa tatokian, patikolay mikilim to awaay i lomaˈ i salakat a tamdaw. Sanay cingra: “Cowa ka harateng patikol kami i, iraayto ko ilomaˈay.”

8. Ano mitosil i, ngaˈay kita samaan mitoor to sowal no Patnakay 11:6 a midemak hani?

⁸ Malecad o sowal no sinael no lalangian, cowa ka ngaˈay kita misawad. (ˈOsien ko Patnakay 11:6.) Ngaˈayay ko demak no masowalay i fafekang ci Taywi. Ikor no misaliyaliyaw cingra milisoˈ to cecay lalomaˈan, maˈarawayto ko ilomaˈay a tamdaw. Maolahay to Fangcalay Cudad koniya faˈinayan, sanay cingra: “Mikilomaˈ kako itini 8 to miheca, cowaho ka litemoh ko Misawacayay Tamdaw ni Yihofa mikongkong to fawahan ako.” Sanay ci Taywi: “Mahapinangay ako, o misaliyaliyawan niyam ngaˈ mahelaay a tamdaw, to cerid makahiay mitengil to milasilan ita a lihaf.”

9. Sapikilimaw toya pasangaray malitemoh a tamdaw i pakalomaˈ a milisoˈ i, samanay ko demak no roma mitosilay?

⁹ Mitanam i cowa kalecad a kitiraan mitosil. Sapikilimaw to pasangaray malitemoh i pakalomaˈ mitosil a tamdaw, o roma mitosilay mifalicay to kitiraan a mitosil. Tinakoen, mirienang kita i lalanay misawacay anca sapisawacay a paliding, wa ira ko toki malitemoh  ko maˈedefay ko fawahan a ˈakawangay lomaˈ a tamdaw, masasiˈayaw cangranan masasowal. Mahapinangay no ˈalomanay mitosilay itini kongyen, icifa ato pisasingdian, makahiay ko tamdaw masasowal kitaanan anca micada to cudad ita. Ci Fololang itiniay Polifia malo kasakilac kantok, sanay cingra: “Itini kalahokan 1 tangasa 3 ko toki tayraay kami i icifa ato pisasingdian mitosil. Itiya cowato ka ˈifowa ko pacakayay to dafong a tamdaw, mansa ira ko toki niyam ngaˈay ko kasasowal cangranan, latekay ngaˈayay misatapang malalengo to Fangcalay Cudad.”

10. Wa ngaˈay kiso tano maanan a pakayraan misawacay to tamdaw hani?

¹⁰ Mitanam to cakalecad a pakayraan mitosil. Ano mitanamayto kiso i cowa kalecad a toki kinapina a milisoˈ to cecay lomaˈ, kawra cowaho ka litemoh cingra, iraay ko roma pakayraan misawacay cingranan han? Sanay ci Katalina: “Patikamian ako koya cowa ka litemoh a cilomaˈay, tilidan ako ko hasowal i tikami.” Mamananam ita ko maanan hani? Sakadademaken ko masakenaay a pakayraan, misaˈicel mitosil to kahacecay tamdaw i kilac.

11. O roma tamdaw hano eca kaolah to milasilan ita a lihaf hani?

¹¹ O roma tamdaw cowa kaolah to milasilan ita a lihaf, cowa pisaali ko niyah to Kawas, anca cowa ko kalimlaan cipinang to Fangcalay Cudad saan. Eca pakasoˈlin cangra to Kawas, samanen adihayay ko maˈaraway a pades no hekal, eca pakasoˈlin to Fangcalay Cudad, samanen maˈaraway ko pisamangah no sao mitooray to palinian no Fangcalay Cudad  maˈorip a ˈaˈideman no pihakelongan, roma tamdaw ˈifowaay a matayal, paro no lomaˈ anca misaysay to pasangaray, cowa pakahapinang to epoc no Fangcalay Cudad. Eca pisaareteng ko tao to milasilan ita a lihaf i, sasamaan kita padadotoc a lipahak hani?

12. Ano mitosil i misakadademak to Filipi 2:4 a safalod, wa ira ko manan a ngaˈayay minaroˈan alatek?

¹² Mikifalocoˈ a ciharateng to tao. Salakat cowa kaolah ko ˈalomanay tamdaw to ngaˈayay lihaf, kawra matinako ko kaciharateng no mitosilay i, mafalicayto ko waywayan. (ˈOsien ko Filipi 2:4.) Masowalay i fafekang ci Taywi sanay: “Ano pasowal ko tamdaw to cowa kaolah, akaho ka pilengo kita to Fangcalay Cudad anca o cudad ita, ao licayen cingra: ‘Sakafanaˈaw kako, hano eca kaolah kiso to Fangcalay Cudad hani?’” Ciharateng kita to tao, o mamahapinang no tao. Cowa ko mamaharateng nangra ko sowal ita alatek, kawra maharatengay ningra to samanay ko nafalocoˈan masasowal kitaanan. Soˈlin awa ko toki ita milasil to ngaˈayay lihaf, wa ngaˈayho kita tano damsayay a waywayan, lopayˈay a papisingan paihkal to naifalocoˈay a kaciharateng.

13. Wa ngaˈay kita samaan mitoor to saali no cilomaˈay misalof to sowal a mitosil?

¹³ Ciharateng kita to cilomaˈay, wa mitoor to saali ato kaolahan no cilomaˈay misalof to sasowalen. Tinakoen, mahapinangay ita iraay ko wawa noniya cilomaˈay han? O malo wama winaay sapitengilaw, to pakayniay palahad to wawa ato misalof to kaˈorip no paro no lomaˈ a sapaini no Fangcalay Cudad. O fawahan no cilomaˈay adihayay ko sataeta han? Ano mahaenay, ngaˈayay lengoen ita ko mararaway a demak, ato kacalemceman no ˈalomanay tamdaw a demak. Ikor pasowalen cingra, noikor wa awato ko mararaway a demak, wa maolah cingra alatek. Ano o mananto a pakayraan, ano makahi cingra, sarocoden ita padama cingra to ciepocay ko sapaini no Fangcalay Cudad. Masowalay i fafekang ci Katalina sanay: “Miceriday kako miharateng samanay ko Fangcalay Cudad misalof to kaˈorip ako.” Mansa, ano mitosil ci Katalina matomesay to pakasoˈlin, matinakoay no mitengilay konini.

14. Pakayni i Taneng 27:17, sasamaan kita madadama to cafay itini pitosilan hani?

¹⁴ Pasayra i roma mitosilay minanam. Itini saka 1 hahekalan, pasowalan ni Pawlo ci Timoti to pakayraan no niyah a pasifanaˈ, pakalalokayho ci Timotian paladaˈ to roma salikaka toniya pakayraan. (1 Korinto 4:17) Malecad ci Timotian, wa ngaˈayho kita minanam to iraay ko nalifetan a salikaka i kasakopang. (ˈOsien ko Taneng 27:17.) Nengnengen ko tinakoan ni Siyawen. Cecay liyad, itiniay inaka malo misakafahay cingra, itiraay ˈalomanay tamdaw marenecay to pihakelongan  no niyah. Samanay cingra padadotoc lipahak hani? Sanay cingra: “Mitahidangay kako to roma salikaka kalacafay mitosil. ˈAyaw no tahira roma lomaˈ madadamaay kami to sakacakat no sapasifanaˈ a inaneng. Tinakoen, masasowalay to samanay ko ˈayaway a cilomaˈay, dotoc malacafay miharateng ano miliyaw malitemoh ko malecaday a pakayraan samanan ko caˈof wa ngaˈay.”

15. Ano mitosil i hano papasayra ci Yihofaan mitolon hani?

¹⁵ Pasayra ci Yihofaan mitolon a micangacang. Ano malingad mitosil cangacangen ci Yihofa mikayat tisowanan. Ano awaay ko sadama no fangcalay saocor, cowa ko mamalaˈosi ko tayal no mita. (ˈOlic 127:1: Luka 11:13) Pasayra kiso ci Yihofaan mitolon i, ihkalen ko sowal. Tinakoen, ngaˈay kiso micangacang Cingranan mikayat tisowanan makilim ko makahiay mafanaˈ Cingranan ato makahiay mitengil to ngaˈayay lihaf a tamdaw, ikor mihadak to ˈicel, pasayra i polong a malitemohay tamdaw a mitosil.

16. Micalep a micekiw hano iraay ko sadama to mitosilay a tayal hani?

¹⁶ Palaken ko toki misongilaˈ micekiw. Sowal no Fangcalay Cudad, “ta maedeng kamo a mafanaˈ to nafalocoˈan no Kawas to nika o maan ko ngaˈayay a karahekeran Ningra a masongilaˈay a demak.” (Loma 12:2) Ano pakasoˈlinay kita to mananamay no niyah o soˈlinay a kimad, ano mitosil i wa matongal ko pakasoˈlinay. Masowalay i fafekang a lalakaw ci Katalina sanay: “Caka halafin, mafanaˈay kako wa papatongalen ko pakasoˈlin no niyah to taˈeneran no soˈlinay kimad. Mansa micalepay kako mihapinang to wacay, pakasoˈlin to iraay materek ko misangaˈay a tatapangan, o Fangcalay Cudad o kimad Ningra, ato itini fafekang no sera iraay ko cecay mitaypiyaway Cingranan a likakawa.” Sowal ni Katalina, micalep a micekiw padamaay cingranan tanektek ko pakasoˈlinay falocoˈ, matongalayto ko kalipahak mitosil.

17. Mitosil ci Yis hano ngaˈay padadotoc a tawlik hani?

¹⁷ Soˈlin o roma tamdaw cowa kaolah to milasilan ni Yis a lihaf, kamayan tawlik ko waywayan ni Yis, padadotoc a mitosil. Misamaanay hani? Samanen mafanaˈay cingra misaaliay ko ˈalomanay tamdaw sakafanaˈaw to soˈlinay kimad, sapadamaaw to ˈalomanay tamdaw micada to lihaf no Hongti Kitakit. O roma i, mafanaˈay cingra salakat cowa kaolah ko roma tamdaw, kawra mafalic ko waywayan noikor. Nengnengen ko tinakoan no paro no lomaˈ ni Yis. Itini pitosil ni Yis to tolo miheca kali tosa a tatokian, o safa ningra awaay ko cecay pakasoˈlinay cingranan. (Yohani 7:5) Kawra ikor no patikol maˈorip ci Yis, malo Krisciyangayto cangra.—Dmak 1:14.

18. Hano papadotoc kita a mitosil to tamdaw?

¹⁸ Cowa ka fanaˈ kita tahini saikor o cima ko mamicada to soˈlinay kimad. Roma tamdaw misaaliay to adihayay a toki, ngaˈ matemeray no soˈlinay kimad. Roma tamdaw soˈlin salakat cowa kakahi mitengil, kawra maˈaraw ko ngaˈayay capeling ato tawlikay waywayan ita, saikor ‘panokayay to ˈdil i Kawas.’—1 Pitiro 2:12.

19. Pakayni 1 Korinto 3:6, 7, haharatengen ita ko maanan?

¹⁹ Wa misaˈicel kita a paloma ato micefos to nanom, kawra aka mapawan o Kawas ko palahaday. (ˈOsien ko 1 Korinto 3:6, 7.) Itini Iciyopiya (Isopiya) cecay faˈinayan salikaka ci Ketahong, sanay: “Itini 20 miheca, edengan a Misawacayay Tamdaw ni Yihofa kako itini. Kawra, iraayto ko 14 mitosilay itini, oya 13 micadaay to paputisem a tamdaw, mahawpay ko fafahi ako ato tatoloay wawa. Hikingen ko  mirienangay to saˈopo 32 ko tamdaw.” Itini pitala ni Ketahong to pisolot ni Yihofa to tamdaw malo finawlan Ningra, padotocay a fanekfek a mitosil. Tada mahemekay cingra caka pisawad ko niyah.—Yohani 6:44.

20. O maanan ko kalecadan ita to milidongay a tamdaw?

²⁰ Itini pinengneng ni Yihofa, sahtoay o kalimlaan ko ˈorip no tamdaw. ˈAyaw no ira ko hererekan, palacafayan no Kawas kita to wawa Ningra a matayal, misaˈopo to kasafinawlan, tada o kalikoan ita konini. (Hakay 2:7) O mitosilay a tayal malecaday to milidongay a demak, o kapot no milidongay kita, miocoran milidong to itiniay pisikitangan a tamdaw. O malidongay a misikitangay cowa ka ˈaloman alatek, kawra o mihadakan no milidongay a ˈicel iraay ko epoc. Malecaday, o kahacecay a mitosilay sahtoay o kalimlaan. Soˈlin cowa ka fanaˈ kita hahakowa ko malidongay tamdaw na i hekal ni Satan, kawra ngaˈayay saka dademaken ni Yihofa ko kahacecay tamdaw a padama cangranan. Itiniay i Polifia ci Anteliyase sanay: “Mahapinangay ako, ano cimato ko mafanaˈ to kimad, patafang to tireng micada to paputisem, sahtoay o minaroˈan no ˈalomanay tamdaw.” Nanay ira ko mahaenay tawlikay waywayan ita to mitosilay a tayal. Mihaen, o papalemeden ni Yihofa kita, wa ngaˈay kita mikitini mitosilay tayal milifok to soˈlinay a lipahak.