1-2. ˈAlomanay salikaka misiˈayaway to maanan pasangaray?

TAROKOS ci Pawlo pakalalokay ci Timotian misongilaˈ milahci to mitosilay a ˈinorong, oniya sowal pasayniay kitaanan o polong a Krisciyang a misowal. (2 Timoti 4:5) Soˈlin makahiay kita mitoor to limoˈot ni Pawlo a midemak, kawra cowa ko madoloay no latekay. Pakaynien i ˈalomanay salikaka, mitosil to tamdaw misaaliay to taˈangayay a timolo. (2 Timoti 4:2) Tinakoen itini roma kilac, makecengay ko mitosilay tayal ita, anca masongilaˈay a makeceng, ano mitosil ko salikaka, misiˈayaway to sakalahdaw no pasalat!

² ˈAlomanay salikaka misiˈayaway to masakenaay a pasangaray, patoleday paˈisang cangranan alatek. Tinakoen, roma tamdaw koˈedaway ko toki mawmah paririˈ to paro no lomaˈ, makalimay cangra mitongal to mitosilay tayal, kawra maroray to cecay lipay i, awaayto ko ˈicel. Roma tamdaw halafinay adada anca matoˈasayto malonay ko tireng, cato ka ngaˈay masadak, citolasay ko midemakan. Roma tamdaw cangoˈotay ko pakasoˈlin to niyah, awaay ko kapo no niyah saan. Itiniay taliyok no Israil fafahiyan salikaka ci Mari, * sanay: “Sapilowidaw kako to masofaway harateng, taˈangayay ko mihadakan a ˈicel, telocto tada malotayay. Ikor makesemay ko harateng, samanen awaayto ko toki ato ˈicel ako malingad mitosil.”

3. Oniya lalakaw wa milengo to maanan hani?

³ Ano samaanto ko pakayraan ita, wa ngaˈay ci Yihofa pafeli to ˈicel kitaanan miremo to pasangaray, ho ngaˈay kita itini madangaray no ˈicel no niyah padotoc a matayal saki Cingranan. Oniya lalakaw wa milengo, wa tano maanan a pakayraan ci Yihofa padama kitaanan. Kawra salakaten ita minengneng, samanay Cingra padama ci Pawloan aci Timotian miremo to pasangaray, milahci to mitosilay a tayal.

4. Na misiˈayaway ci Pawlo to maanan pasangaray?

⁴ Adihayay ko masiˈayaway ni Pawlo a pasangaray, masetiˈay, mapalitayho, mangata patayen no tao. Toniya tatokian, mikiriwiˈay cingra misaali to sapafeli ni Yihofa a ˈicel. (2 Korinto 11:23-25) Pakapapotalay a mihai ci Pawlo, milowiday cingra to masofaway a harateng. (Loma 7:18, 19, 24) Roma i, ‘mapacekay no ceka ko tireng’ sanay cingra, o adada no tireng alatek, mitokelay ci Pawlo to Kawas padama cingranan mifalah toniya ceka.—2 Korinto 12:7, 8.

5. Adihayay ko masiˈayaway ni Pawlo a pasangaray, kawra malaˈosiay ningra ko manan a demak hani?

⁵ Soˈlin adihayay ko masiˈayaway ni Pawlo a pasangaray, kawra paˈicelan ni Yihofa ci Pawlo midemak to ˈinorong. Haratengen ita o maanan ko malaˈosiay ni Pawlo a demak. Tinakoen, mapalit cingra i Loma i, kamayan ci Pawlo itini ˈaˈayaw no tapang miˈading to ngaˈayay lihaf. Mitosilan ningra ko mihimaway sofitay ato milisoˈay cingranan a tamdaw. (Dmak 28:30, 31; Filipi 1:13) Toniya tatokian, itini sakayat no Kawas mitiliday ci Pawlo to pina tikami, oniya tikami cowa ko pakalalok aca to itiyaay Krisciyang, taˈangayay ko sapadama kitaanan anini. Roma i, o taˈarawan ni Pawlo pakalalokay to i Lomaay kasakopang a salikaka, padama cangranan ‘timolo a milasil to sowal no Kawas.’ (Filipi 1:14) Soˈlin latekay citolasay ko midemakan ni Pawlo, kawra misarocoday cingra a midemak. Minaroˈan i, o malifaay ningra ‘micowatay to katenak no ngaˈayay lihaf.’—Filipi 1:12.

6. Mikitini 2 Korinto 12:9, 10, o manan ko mitadiˈecan ni Pawlo milahci to ˈinorong ningra hani?

⁶ Cipinangay ci Pawlo, ano o mananto ko demak ningra sahtoay o pakayniay pitadiˈec to ˈicel ni Yihofaan, cowa ko pitadiˈec to ˈicel no niyah. O ˈicel no Kawas ‘itini kalonayan i mahapinangay to malefotay’ sanay ko sowal ningra. (ˈOsien ko 2 Korinto 12:9, 10.) Soˈlin misiˈayaway to sapalak, mapalit ato roma pasangaray, kawra pakayni pitadiˈec to sapafeli ni Yihofaan a fangcalay saocor, masongilaˈay malahci ko ˈinorong ningra.

7. Wa miremo ci Timoti to manan pasangaray ngaˈ ngaˈay milaheci to ˈinorong hani?

⁷ Oya kapah a cafay ni Pawlo ci Timoti wa mitadiˈec to ˈicel no Kawas, ngaˈ malahci ko ˈinorong. Ci Timoti wa kalacafay ci Pawloan tayra i mara:ayay pala mitosil. Cowa konini aca, miocoranho ni Pawlo cingra milisoˈ ato pakalalok to kasakopang. (1 Korinto 4:17) Cangoˈotay  ko ˈicel no niyah sanay ci Timoti miharateng alatek. Onini a lalangian, mansa palimoˈot ci Pawlo cingranan: ‘Aka papisakahmawen ko tamdaw minengneng to kakaemang iso.’ (1 Timoti 4:12) Toniya tatokian, marariday adada ci Timoti, malecaday mapacekay no ceka ko tireng. (1 Timoti 5:23) Kawra mafanaˈay ci Timoti, pakayni pitadiˈec to sapafeli ni Yihofa a fangcalay saocor, wa ngaˈay padadotoc milasil to ngaˈayay lihaf, matayal saki salikaka.—2 Timoti 1:7.

8. Anini tano maanan a pakayraan ci Yihofa pafeli to ˈicel i finawlan Ningra?

⁸ Malecaday, pafeliay ci Yihofa to finawlan Ningra to ‘kasapaan a ˈicel,’ ho ngaˈay cangra padadotoc madimadi midoko Cingranan. (2 Korinto 4:7) Dotoc, wa milengo kita to sapaˈicel ni Yihofa kitanan a sepat a pakayraan: Mitolon, micekiw to Fangcalay Cudad, macacawmaˈ to salikaka, ato mitosil.

9. O satolon iraay ko manan sadama kitanan hani?

⁹ Pakayni i satolon milifok to ˈicel. Itini Ifiso 6:18 pakalalokay ci Pawlo kitaanan micerid a mitolon. O papacaˈof ko Kawas kitaanan, pafeli to ˈicel kitaanan. Itiniay Polifia ci Ciyangni tahalifa to madadotocay a sapalifet i, matinakoay ko sapadama ni Yihofa cingranan. O fafahi ato wama wina ningra itini malecaday tatokian pakidem ko adada, toloay ko dadimokosen ningra, tada marorayay. Ikor mapatayay ko wina ningra, o fafahi ato wama ningra halafinay ko toki ngaˈ tanektekay ko tireng. Tikolen miharateng koya tatokian, sanay ci Ciyangni: “Ano taˈangay ko saroero ako i, ihkal a mihadak i satolon to nafalocoˈan iraay ko sapadama.” Paˈicelan ni Yihofa ci Ciyangni hato padotocay a mihadidi. Itini Polifia cecay malohemay malitengay ci Ronate, mafanaˈ cingra ciekangay ko wina ikor no cecay folad, mapatayayto ko wina. O maanan ko padamaay cingranan milakowit to pasangaray hani? Sanay cingra: “O satolon pairaay to toki ako pasayra ci Yihofaan mifohat to falocoˈ, mifowah to nafalocoˈan. Mafanaˈay kako tada cipinangay ci Yihofa takowanan, mikikakaay takowanan ko kacipinang to niyah.” Latekay cato ka tomeseng kako, anca caka fanaˈ to maanan ko cacangacangen i Kawas. Soˈlin pasangar kita tano sowal paihkal to harateng ato nafalocoˈan, kamayan mitokel ci Yihofa kitanan pasayra Cingranan a mitolon.—Loma 8:26, 27.

10. Mikitini Hipray 4:12, micekiw ato midotim to Fangcalay Cudad hano masakalimlaan?

¹⁰ Pakayni picekiw to Fangcalay Cudad milifok to ˈicel. Mikitiniay i picekiw to Fangcalay Cudad ci Pawlo milifok to sahinom ato ˈicel, wa mihaen ko demak ita. (Loma 15:4) Micekiw ato midotim kita to Kimad no Kawas i, wa pakaynien ni Yihofa i fangcalay saocor pakacipinang kitanan, samaan a misakadademak to safalod no Fangcalay Cudad misaysay to pasangaray. (ˈOsien ko Hipray 4:12.) Sanay ci Ronate: “Mahemekay kako palahad to ngaˈayay a nanaman to dadayadaya miˈosi to Fangcalay Cudad. Misongilaˈay kako midotim to makapahay a capeling ni Yihofa, ato samanay Cingra misarocod a midipot to sikawdan Ningra. Mihaen ko demak padamaay takowanan miliyaw a talifak.”

11. O cecay mapatayay ko ramod a fafahiyan salikaka samanay pakayni i picekiw to Fangcalay Cudad milifok to ˈicel?

¹¹ Misongilaˈ kita midotim to Fangcalay Cudad, wa matatodong ko pinengneng to pakayraan no niyah. Nengnengen samanay ko Fangcalay Cudad padama to cecay mapatayay ko ramod a fafahiyan salikaka miremo to kasomad. Painiay ko cecay malohemay malitengay cingranan misongilaˈ micekiw ato midotim to  lalakaw no Yopu. Salakat, maasip ningra ko mararaway harateng ni Yopu i, tangsolay milikaf ko falocoˈ ci Yopuan saan: “Yopuaw, aka masofaw ko harateng iso!” Ikor mahapinangay ningra, o harateng no niyah malecaday ci Yopuan. Micekiw to Fangcalay Cudad padamaay cingranan misalof to harateng, pafeli to ˈicel cingranan miremo to somad mapatay ko ramod.

12. Samanay ci Yihofa pakayni i salikaka pafeli to ˈicel kitaanan hani?

¹² Pakayni picawmaˈ to salikaka milifok to ˈicel. Pakaynianho ni Yihofa i salikaka pafeli to ˈicel kitaanan. Sowal ni Pawlo, makalimay cingra masasoˈaraw to roma Krisciyang, mihaen ngaˈayayto cangra mapakalalolalok. (Loma 1:11, 12) Masowalay i fafekang ci Mari misalimlaay to kacacawmaˈ to salikaka a toki, sanay cingra: “Cowa kafanaˈ ko roma salikaka to malifaay ako ko maanan pasangaray, kawra pakaynian ni Yihofa i cangranan a padama takowanan, o sowal nangra, sapafeli takowanan a kato, matatodongay o misaalian ako a sapakalalok. Roma i, pasayra i malecaday ko nalifetan a salikaka mihadak to nafalocoˈan iraay ko sapadama, mikitini cangranan adihayay ko mananamay ako. Padotocay ko malohemay malitengay ciharateng takowanan, o kalimlaan no kasakopang ko niyah saan kako miharateng.”

13. Ano masaˈopo i, samanen kita ngaˈay masasipakalalolalok?

¹³ O saˈopo o ngaˈayay a toki ita masasipakalalok. Mirienang kiso to saˈopo i, ngaˈayay talaˈayaw pakalalok to salikaka, pasowal cangranan tada maolahay kiso cangranan, masemeray cangranan. Cecay ci Pitiro a malohemay malitengay itini ˈayaw no saˈopo pasowlay to awaay ko ramod a wina: “Mafanaˈay kiso han? Maˈaraw kiso mirienang to saˈopo, tada pakalalokay tamiyanan. Ano masaˈopo oya enemay wawa iso misongilaˈay misaday to saˈopo, pakamayayho pacaˈof to salicay, maedeng adihayay ko mihadakan iso a ˈicel.” Tahatangic sanay koniya fafahiyan salikaka mitengil, sanay: “Anini tada misaaliay kako mitengil to mahaenay a sowal, koˈidayto.”

14. O mitosilay a tayal iraay ko manan sadama kitanan hani?

¹⁴ Pakayni mitosilay milifok to ˈicel. Ano samaanto ko harateng no tamdaw, paladaˈ kita i tamdaw to kimad no Fangcalay Cudad tada kahemekan, matomesay to ˈicel. (Taneng 11:25) Cecay ci Setaysi a fafahiyan salikaka tahatinakoay tonini. Ano ira ko mafalahay a tamdaw i lomaˈ i, tada masomaday cingra, padotocay miharateng: “Ano tongalen ako to miming ko sadama cingranan ngaˈayto.” Makesemay cingra, awaayto ko pakayraan miharateng to roma demak. O maanan ko padamaay cingranan miremo to pasangaray hani? O mitosilay! Ano mitosil cingra misamacayay ko falocoˈ padama to makalimay mitengil to ngaˈayay lihaf a tamdaw, sanay cingra: “Toya tatokian, pafeliay ci Yihofa takowanan to kalikiay macakat a pacekiwan, tada pakalalokay takowanan. O ciepocay i kaˈorip ako, kalipahakan a demak i, malingad a mitosil.”

15. Mikitini sowal ni Mari mananam iso ko maanan hani?

¹⁵ O roma salikaka pasangaray ko pakayraan no niyah saan miharateng, cowa ka adihay ko toki mitosil. Ano mahaenay ko harateng iso, haratengen ano maˈaraw ni Yihofa ko pisarocod iso a dademak o mamahemek. Nengnengen ita ko nalifetan ni Mari. Malinah cingra tayra roma ko sowal a kasakopang i, citolasay ko mademakay sanay miharateng. Sanay cingra: “Halafinay tatokian, ano mitosil kako o katangay aca ko sowal, miasip to cecay sinael anca pafeli to cecay tancang.” Palalinien to malaymayay a tamdaw, awaay ko kapo no niyah saan miharateng. Kawra ikor mafalicay ko harateng ningra, mahapinangay ningra, soˈlin caka ngaˈay ko sowal no niyah, kamayan  saka dademaken ni Yihofa cingra. Sanay cingra: “Kantangay ko kimad no Fangcalay Cudad, kawra oniya kimad ngaˈayay mifalic to kaˈorip no tamdaw.”

16. Pakayni ka tatiih no tireng caka ngaˈay masadak a salikaka o maanan ko papaˈicel cangranan hani?

¹⁶ Soˈlin tatiih ko tireng ita caka ngaˈay masadak, mafanaˈay ci Yihofa makalimay kita mirienag to mitosilay, hanaca masemeray to hatiniay a harateng ita. Ngaˈayay pairaen Ningra ko toki ita pasayra i ising kankoho ato misimaway kitanan a misawacay. Ano palalinien ita ko mamademak anini to mademakay i salakat, o mamatoled ko falocoˈ. Kawra ano mahapinang ita samanay ci Yihofa padama kitaanan anini, wa irato ko ˈicel lipahak a misiˈayaw to masakenaay a sapalifet.

17. Mikitini Patnakay 11:6, soˈlin cowa ka tangsol sa maˈaraw ita ko minaroˈan, hano papadadotocho a mitosil hani?

¹⁷ Cawa kafanaˈ kita, o mikosaman ita a sapaloma no soˈlinay kimad wa itini falocoˈ no nima a cicengoˈ. (ˈOsien ko Patnakay 11:6.) 80 ko miheca ci Papara, miceriday cingra tano tingwa ato tikami misawacay. Itini tikami i, miparoan ningra ko Mikecolay 2014 miheca saka 3 folad, 1 romiˈad, o lalangian no cecay lalakaw o “Pakayni kitanan midemakay ko Kawas to manan?.” Cowa ka fanaˈ cingra, micadaay toniya tikami o Misawacayay Tamdaw ni Yihofa i saˈayaw a mararamoday. Misaliyaliyawan nangra minengneng koniya casi, malecaday o masasowalay ci Yihofa cingranan saan ko harateng no faˈinay. Oniya mararamoday satapangay to mirienang to saˈopo, saikor itini piliyas nangra to likakawa no Kawas to 27 miheca, miliyaway malo Misawacayay Tamdaw ni Yihofa. Maˈaraw ko mitilidan no niyah a tikami pairaay to ngaˈayay a minaroˈan, tada rahekeray ci Papara, tada mahemekay ko falocoˈ.

18. Samaan ko demak ita wa milifok to mikitiniay i Kawas a ˈicel hani?

¹⁸ Mihadakay ci Yihofa to adihayay a pakayraan, ho ngaˈay kita milifok to fangcalay saocor Ningra. Oniya pakayraan mahawpay ko mitolon, micekiw to Fangcalay Cudad, kalacafay to salikaka macacawmaˈ, ato mitosil. Misakadademak kita toniya pakayraan, paihkalay to pakasoˈlinay ko niyah iraay ko ˈicel ni Yihofa padama kitanan, hanaca makalimay mihaen to demak. Tada makahiay ko kakarayan Wama ita “sapidemakaw to ˈicel padama to misarocoday madimadi Cingranan a tamdaw.” Nanay misarocod ko falocoˈ ita mitiˈer Cingranan.—2 Rayray 16:9.