1. Tiya misatapang kiso pasowal to tao to soˈlinay kimad no Fangcalay Cudad i, cowa ka harateng ko maanan hani?

MAHARATENGAYHO iso ko kahemek no niyah tiya pakahela to soˈlinay kimad han? Ihkalay ko soˈlinay kimad no Fangcalay Cudad, maedeng o mamicada ko kahacecay tamdaw saan kiso miharateng. Pakasoˈlinay kiso, o papadama ko soˈlinay kimad ciepoc ko kaˈorip nangra, iraho ko makapahay hatokel no ikor. (ˈOlic 119:105) Orato, mahemekay kiso pasowal to salawina ato widang to mananamay iso a kimad. Kawra, teloc i? Caay ka harateng, cowa ka olah cangra a mitengil.

2-3. Itini ci Yis i fafekang no sera, pakayni cingranan ato milasilan ningra a lihaf samaanay ko pinengneng no ˈalomanay tamdaw hani?

² Eca ka pitengil ko tao to milasilan ita a lihaf, cowa ko mamacekid kita. Itiniho i fafekang no sera ci Yis, adihayay ko midemakan a kafahkaˈan, misawacay to midamaay ko Kawas cingranan, kawra kamayan eca ka pakasoˈlin ko ˈalomanay tamdaw cingranan. Tinakoen, midemak ci Yis to kafahkaan patikol paˈorip ci Lacarusan, mihaiyay ko misafelitay ci Yisan a tamdaw toniya demak. Kawra, o ˈaˈideman no Yutayakiyo kamayan manaˈay mihai to ci Misiya ci Yis. Sapipatayaw ci Yisan aci Lacarusan.—Yohani 11:47, 48, 53; 12:9-11.

³ Mafanaˈay ci Yis, cowa ko mamihai ko ˈalomanay tamdaw to ci Misiya cingra. (Yohani 5:39-44) Pasowalay cingra to nisawawaan no Paputisemay a Yohani sanay: ‘O cowa pakayni takowanan a mahafikod * a tamdaw o malemeday.’ (Matay 11:2, 3, 6) O ˈalomanay tamdaw hano eca ka kahi pakasoˈlin ci Yisan hani?

4. Oniya lalakaw wa milengo to manan?

 ⁴ Toniya lalakaw ato dotoc a lalakaw wa milengo, itini saka 1 hahekalan ˈalomanay tamdaw hano eca ka pakasoˈlin ci Yisan. Wa minengnengho kita, aniniay ˈalomanay tamdaw hano cowa ka pitengil to milasilan ita a lihaf. O kalimlaan i, wa mananam ita, hano pairaen ita ko tanektekay a pakasoˈlin ci Yisan, hoeca ka mahafikod ko niyah.

5. O roma tamdaw pakayniay i manan lalangian, cato ko ci Misiya ci Yis saan ko piharateng?

⁵ Cowa pakasoˈlin ko ˈalomanay tamdaw ci Yisan, pakayniay i kasofocan ato lalengawan ningra. Mihaiyay cangra o idahiyay a singsi ci Yis, midemakayho to adihayay kafahkaˈan. Kawra itini pinengneng nangra, edeng o wawa no manikaway a sayho ci Yis, hanaca mikitiniay i mimingay niyaroˈ i Nacali a masadak. Ano oyato ikor malo nisawawaan ni Yis a Natanail, sanay ko sowal: “Ira ko maan to ngaˈayay a demak i Nacali a niyaroˈ saw?” (Yohani 1:46) Miharateng ci Natanail, awaay ko mikiriwiˈay no Nacali, anca maharatengay ningra ko sapairasol i Mika 5:2, wa itini Piclihim a sofocen ci Misiya, cowa ko Nacali saan.

6. Itini lintad ni Yis a tamdaw, samaan ko demak wa ngaˈay pakahapinang to ci Misiya ci Yis?

⁶ Samaanay ko sowal no Fangcalay Cudad? Paˈayaway ko pairasolay ci Isaya, cowa ko ‘caciharateng to rayray no kasofocan ni Misiya’ ko ˈada ni Yis sanay. (Isaya 53:8) Adihayay ko maˈoningay no sapairasol no Fangcalay Cudad to pakayniay ci Misiyaan a demak. Ano makahi ko tamdamdaw mihapinang to demak, o mamafanaˈto aitini i Piclihim a sofocen ci Yis, hanaca o teloteloc no Hongti ci Tafiti. (Luka 2:4-7) Mihaenay, o kasofocan ni Yis a kitiraan malecaday to sapairasol no Mika 5:2. Ano mahaenay, o maanan kora pasangaray hani? Lalangian i, cowa ka fanaˈ ko tamdaw to kihcod a demak, caloh sanay mitolas to sowal, mansa cowato pakasoˈlin ci Yisan.

7. Anini, ˈalomanay tamdaw hano caka pitengil to milasilan no Misawacayay Tamdaw ni Yihofa a lihaf?

⁷ Anini iraay ko malecaday a demak han? Iraay. Komoden ko sowal, o kasofocan ato lalengawan no Misawacayay Tamdaw ni Yihofa, cowa ka samaan, pinengneng no ˈalomanay tamdaw o ‘awaay ko picudadan a kalo a tamdawˈ cangra, sanay.’ (Dmak 4:13) Harateng no roma tamdaw, awaay ko tatodong no Misawacayay Tamdaw ni Yihofa, pasifanaˈ to tao to Fangcalay Cudad, samanen cowa picudad cangra to picudadan no kiyokay. Harateng no roma tamdaw, ono “Padaka a kiyokay” cangra sanay, kawra ˈalomanay a Misawacayay Tamdaw ni Yihofa cowa ka itira i Padaka. Sowal no roma tamdaw, cowa pakasoˈlin cangra ci Yisan sanay. Halafinayto, panganganan cangra, o “Kiwsanto,” “sopay no Padaka” ato “mitowakangay to mikowanay” sanay. O sowal aca no tamdaw ko matengilay, anca caka kahi micada to soˈlinay demak, mansa caka kahi mitengil to lihaf no Misawacayay Tamdaw ni Yihofa.

8. Mikitini Dmak 17:11, sapihapinangaw to cima ko finawlan no Kawas anini, sasamaan ko hademak?

⁸ Samaan ko demak ngaˈ eca ka mahafikod? Wa mihapinang kita to soˈlinay demak. O mitiliday to Fangcalay Cudad ci Luka mihaenay ko demak, misarocoday cingra ‘misongilaˈ a mihapinang to polong nonini a demak,’ hongaˈ ‘ihkal a mafanaˈ’ ko miasipay, o mananamay nangra milingatay ci Yisan a demak, ‘sahtoay o soˈlinay.’ (Luka 1:1-4) Roma i, itiniay Piriyaay a Yutaya tamdaw malecaday ci Lukaan, matengil nangra ko milingatay ci Yisan a ngaˈayay a lihaf ikor, misarocoday micekiw to Hipray sowal a Fangcalay Cudad, mikinsa to matengilay nangra, o soˈlinay hokira. (ˈOsien ko Dmak 17:11.) Malecaday, mamihapinang kita to soˈlinay demak, palalinien to  sinael no Fangcalay Cudad ato mananamay no niyah mikitini Misawacayay Tamdaw ni Yihofa a lalakaw. Wa mikingkiwho cangra to likisi no finawlan no Kawas anini a lintad. Ano songilaˈen no tamdaw ‘mitiyawca ko lalengawan,’ cowato ko mamaapoh no misakinihay ato mararaway sowal no tamdaw.

9. Manaˈayay ci Yis mitoor to saali no tao midemak to kafahkaˈan, samaanayto ko teloc?

⁹ Soˈlin tadamaanay ko sapasifanaˈ ni Yis, kawra cangoˈotayho sanay ko roma tamdaw. Misaaliay cangra ci Yisan ‘paihkalen ko kafahkaˈan a demak nai kakarayan,’ misawacay to ci Misiya cingra. (Matay 16:1) Mihaen ko pisaali nangra, samanen mararaway ko kacipinang to Taniil 7:13, 14. Roma i, cowaho ko palaˈosian ni Yihofa toniya sapairasol a tatokian itiya. O sapasifanaˈ ni Yis a kimad na ngangaˈay misawacay to ci Misiya cingra, kawra pakayni ka eca pitoor to saali nangra a midemak to kafahkaˈan, hato caayto pakasoˈlin cangra cingranan.—Matay 16:4.

10. Samaanay ci Yis palaˈosi to sapairasol no Isaya cudad pakayni ci Misiyaan hani?

¹⁰ Samaanay ko sowal no Fangcalay Cudad? Pakayni Ci Misiyaan, sanay ko sowal ni Isaya: “Caay pilekal, caay pisatataˈang to ngihaˈ, caay picaceliˈ a pasowal i lalalalan cingra.” (Isaya 42:1, 2) Dademak ci Yis cowa ka pisatataˈang to ngihaˈ. Cowa patireng cingra to makapahay a lomaˈ, cowa ka picaˈedong to mikiriwiˈay a rikoˈ no pidoyongan, anca misaali to tao tano mikiriwiˈay a ngangan pangangan cingranan. Soˈlin misiˈayaw to sakapatay a sasawkit, sapisangaˈayaw ci Hirotian cowa ka pidemak ci Yis to kafahkaˈan a demak. (Luka 23:8-11) Soˈlinay midemak ci Yis to kafahkaˈan a demak, kawra o misaaretengan ningra i, o pilasil to ngaˈayay lihaf. Pasowal cingra to nisawawaan sanay: ‘Onini ko araaw ako a tayni.’—Marko 1:38.

11. Anini o roma tamdaw iraay ko manan a mararaway a harateng hani?

¹¹ Anini iraay ko malecaday a demak han? Iraay. Masemeray ko ˈalomanay tamdaw to taˈangayay kiyokay ato matekesay a dafong ilalomaˈ, atoya iraay ko mikiriwiˈay ko ngangan a misasingsiay tamdaw. Maolahay cangra to pisalisin  no kiyokay, cowa pisikol to kasadakan ato tatodong no pisalisin no kiyokay. Kawra, pakayni i Kawas ato araaw Ningra, hakowaay ko mananamay nangra hani? Mirienang to saˈopo no mita cowa kalecad, cipinangay cangra to o manan ko araaw ni Yihofa, ato mitokel to tamdaw samaan ko demak. O Hongti Kitakit Kasaˈopoan ita makoracay, cowa ka matekes. O mikeriday a salikaka cowa picaˈedong to mikiriwiˈay a caˈedong, awaay ko kangodoan a ngangan. O pihakelongan ato sapasifanaˈ ita a Kimad mikitiniay i Fangcalay Cudad. Kawra kantangay ko pakayraan ita a midoko sanay. O sapasifanaˈ ita cowa ka tatodong i harateng nangra, mansa manaˈay cangra a mitengil to milasilan ita a lihaf.

12. Pakayni Hipray 11:1, 6, itinien i maanan a taˈeneran patireng to pakasoˈlinay falocoˈ hani?

¹² Samaan ko demak ngaˈ eca ka mahafikod? Pasowalan ni Pawlo ko Lomaay a Krisciyang: ‘O sasalakat ko tamdaw tahatengil to lihaf, ngaˈ pakasoˈlin; ira ko patenakay a tamdaw ci Kristoan, ngaˈ pakatengil to lihaf.’ (Loma 10:17) Sapalahadaw kita to pakasoˈlinay falocoˈ, wa misongilaˈ mikingkiw to Fangcalay Cudad, cowa ko pirienang to misafelitay to safalod no Fangcalay Cudad a pisalisinan no kiyokay. Ano samaanto ko pisolot noniya lisin, cowa ko mamalifok no tamdaw ko soˈlinay a epoc. Oha maminanam kita to matatodongay a sifanaˈ patireng to tanektekay pakasoˈlin, kalimlaan mihaen to demak, samanen ‘ano awaay ko pakasoˈlinay falocoˈ no tamdaw i, caay ko papahemek to Kawas.’ (ˈOsien ko Hipray 11:1, 6.) Cowa ko pakaˈaraw kita to kafahkaˈan a demak, ngaˈ pakasoˈlin to mahelaay no niyah ko soˈlinay kimad. O soˈlinay kimad no Fangcalay Cudad papatanoktok to pakasoˈlin ita, ano misongilaˈ kita a mikinkiw, o sasa no falocoˈ wa malahdawto maemin.

13. ˈAlomanay tamdaw pakayni manan a lalangian caka pakasoˈlin ci Yisan hani?

¹³ Nisawawaan no Paputisemay a Yohani maˈaraway ko nisawawaan ni Yis eca ka pisaliway, maapohay ko harateng. Sowal ni Yis, ano maˈoripho cingra, awaay ko lalangian no nisawawaan a misaliway. (Matay 9:14-17)  Soˈlin mihaen ko pitadtad ni Yis, o Farisay tamdaw ato misafelitay ci Yisan a tamdaw, padadotocay milikaf cingranan eca ka pidofdof to pisalisinan ato nolitengan a nanaman nangra. Itini Paselaˈan Romiˈad, maˈaraw nangra ko miadahan ni Yis ko adadaay, tada maketeray. (Marko 3:1-6; Yohani 9:16) Pahiyoay cangra to masongilaˈay a mitoor ko sarikec no Paselaˈan Romiˈad, kawra misasingdi i fangcalay sefi, cowa ko mararaway sanay. Tiya mirikecan ni Yis cangra i, tada mangolaway cangra. (Matay 21:12, 13, 15) Kinacecayay, itini i Nacali a kasaˈopoan, pasifanaˈ ci Yis to tamdaw i, tano tinakoan nolitengan a somowal, oya tamdaw misatekeday, cangoˈotay ko pakasoˈlin, telocto tada mangolaway cangra. (Luka 4:16, 25-30) Fahkaˈay ko ˈalomanay tamdaw to waywayan ni Yis, mansa caka kahi cangra pakasoˈlin ci Yisan.—Matay 11:16-19.

14. Hano rikecen ni Yis ko mihakelongay to cowa ka tatodong to Fangcalay Cudad a pinangan no tamdaw?

¹⁴ Samaanay ko sowal no Fangcalay Cudad? Pakaynian ni Yihofa ci Isayaan a somowal: ‘Onini a finawlan i, o miingiday Takowanan saan ko sowal, ˈarawhan o filfil aca ko sapitaˈong nangra i Takoawanan, miliyasay ko falocoˈ Takowanan. Ono tamdawan a likakawa ko minanaman nangra, mihaen o mikangodoay Takowanan saan.’ (Isaya 29:13) Mirikecan ni Yis ko mihakelongay to cowa ka tatodong to Fangcalay Cudad a pinangan no tamdaw, matatodongay ko demak ningra. Ano ciharateng ko tamdaw ikakaay ko saˈosi no tamdaw ato pinangan to Fangcalay Cudad saan i, o mifalahay ci Yihofaan ato miocoran Ningra a Misiyaan.

15. Anini ˈalomanay tamdaw pakayni manan lalangian, mapiliˈay to Misawacayay Tamdaw ni Yihofa hani?

¹⁵ Anini iraay ko malecaday a demak han? Iraay. Maˈaraw no ˈalomanay tamdaw ko Misawacayay Tamdaw ni Yihofa cowa pihakelong to misafelitay to Fangcalay Cudad a lisin, tinakoen eca ka pisalisin to kahofocan romiˈad anca Korismas, cowa ka hemek cangra. Maˈaraw no roma tamdaw eca ka pirienang to lisin no kitakit ko Misawacayay Tamdaw ni Yihofa, anca eca ka pihakelong to misafelitay to Fangcalay Cudad a pisiki to mapatayay, maketeray. Pakasoˈlinay cangra mihaydaan no Kawas ko pidokoan nangra sanay, kawra, ano paikakaen nangra to Fangcalay Cudad ko pinangan no tamdaw, ecato ka pakahemek cangra to Kawas.—Marko 7:7-9.

16. Pakayni i ˈOlic 119:97, 113, 163-165, mamidemak kita to manan ato mifalah to manan hani?

¹⁶ Samaan ko demak ngaˈ eca ka mahafikod? O mamisaˈicel kita, ho matongal ko kaolah no niyah to rikec ato safalod ni Yihofa. (ˈOsien ko ˈOlic 119:97, 113, 163-165.) Maolah kita ci Yihofaan, wa mifalah to kapiliˈan Ningra a pinangan, cowa ko mamihai to roma demak mikotay to saaroˈan ni Yihofa i falocoˈ no mita.

17. Itini lintad ni Yis, ˈalomanay tamdaw iraay ko manan a harateng mansa caka pakasoˈlin ci Yisan?

¹⁷ Itini lintad ni Yis, ciharatengay ko roma tamdaw tangsol ira ko faelohay a mikowanay. Mitokelay cangra ci Misiyaan padama cangranan miliyas to pikowan no Loma. Kawra tiya midopo cangra ci Yisan mala hongti i, minaˈayay ci Yis. (Yohani 6:14, 15) O fadangalan no saysi ato roma tamdaw o Loma ko pafeliay, mansa calemcem cangra patireng ci Yis to faelohay a mikowanay, pakangolaw to Loma tamdaw. ˈAlomanay Yutayay tamdaw ciharatengay tono mikowanay a demak, mansa cato pakasoˈlin ci Yisan.

18. O manan milingatay ci Misiyaan a sapairasol no Fangcalay Cudad cowa ka pisikol ko ˈalomanany tamdaw?

¹⁸ Samaanay ko sowal no Fangcalay Cudad? Soˈlin adihayay sapairasol pakayni ci Misiyaan  o pakalowiday a sofitay, kawra roma sapairasol paihkalay to sasalakat cingra kinafalah to ˈorip patado to tamdaw mihepol to raraw. (Isaya 53:9, 12) Mihaenay itini lintad ni Yis, ˈalomanay tamdaw pakayni ci Misiyaan hano ira ko marawraway a pitokel? O lalangian i, o sapairasol no Fangcalay Cudad ano caka pilengo to sasamaan misaysay to pasangaray nangra, cowato pisikol cangra.—Yohani 6:26, 27.

19. Anini, ˈalomanay tamdaw hano eca ka kahi mitengil to lihaf ita hani?

¹⁹ Anini iraay ko malecaday a demak han? Iraay. ˈAlomanay tamdaw pakayni i pisatenok ita i mikowanay a demak, mapiliˈay kitanan. O harateng nangra itini misinkiway wa mitopa kita. Kawra, mafanaˈay kita itini pinengneng ni Yihofa, ano o tamdaw ko mipiliˈan ita malo mikowanay, o mifalahayto Cingranan. (1 Samuil 8:4-7) Roma i, harateng no roma tamdaw ngaˈay patireng kita to picudadan, paisingan ato roma ngaˈayay a demak. Maˈaraway nangra misarocoday kita to mitosilay a tayal, eca ka pisaysay to pasangaray no hekal, caayto pitengil to lihaf ita.

20. Mikitini Matay 7:21-23, ngaˈay kita misarocod midemak to manan a demak hani?

²⁰ Samaan ko demak ngaˈ eca ka mahafikod? (ˈOsien ko Matay 7:21-23.) Wa misarocod kita midemak to sapalimoˈot ni Yis kitaanan a demak. (Matay 28:19, 20) Caay ka ngaˈay makalisanga ko falocoˈ ita pakayni toniya mikowanay ato pasangaray no hekal. Maolahay kita to tao, ciharatengayho to misiˈayawan a pasangaray nangra. Kawra mafanaˈay kita, pasifanaˈ to tao mafanaˈ to Hongti Kitakit no Kawas, padama cangranan patireng to kalawidang ci Yihofaan, ngaˈ ira ko taˈangayay haepoc nangra.

21. Wa misetek kita to falocoˈ midemak to manan?

²¹ Oniya lalakaw mifolfolay to sepat a lalangian, mitadtad to hano eca pakasoˈlin ko ˈalomanay tamdaw ci Yisan i saka 1 hahekalan, ato roma tamdaw anini hano eca ka makahi mitengil to milasilan ita a lihaf. Cowa konini aca, wa misinanotho kita to manan, hoeca ka mahafikod? Dotoc a lalakaw wa milengo to roma sepat mihafikoday to tamdaw a lalangian. Nanay misetek kita to falocoˈ padadotoc patanoktok to pakasoˈlinay falocoˈ no niyah, hoeca ka mahafikod!